ದೇವೇಗೌಡರ ವಿರುದ್ಧ ಸಿಎಂ ಆಕ್ರೋಶ.. ಹೆಚ್​ಟಿ ಕೃಷ್ಣಪ್ಪ ಆಡಿದ್ದ ಭವಿಷ್ಯವಾಣಿ ಉಲ್ಲೇಖಿಸಿದ ಸಿದ್ದರಾಮಯ್ಯ

ರಾಜಕೀಯದಲ್ಲಿ ಯಾರೂ ಸ್ನೇಹಿತರಲ್ಲ, ಯಾರೂ ವಿರೋಧಿಗಳಲ್ಲ. ಆಗ ತೆನೆ ಬಳಗದಲ್ಲಿದ್ದ ಸಿದ್ದರಾಮಯ್ಯ ಈಗ ವಿರೋಧಿ ಬಣದಲ್ಲಿದ್ದಾರೆ. ಸದ್ಯ ಕಾಂಗ್ರೆಸ್ ಸಮಾವೇಶದಲ್ಲಿ ಈ ಹಿಂದೆ ಹೆಚ್.​ಟಿ ಕೃಷ್ಣಪ್ಪ ಆಡಿದ್ದ ಭವಿಷ್ಯವಾಣಿ ಒಂದನ್ನ ಉಲ್ಲೇಖಿಸಿ ಸಿಎಂ ಸಿದ್ದರಾಮಯ್ಯ ಅವರು ಮಾಜಿ ಪ್ರಧಾನಿ ಹೆಚ್​.ಡಿ ದೇವೇಗೌಡರನ್ನು ತಿವಿದಿದ್ದಾರೆ.

ಹಾಸನ, ಇದು ದಳಪತಿಗಳ ಭದ್ರ ಕೋಟೆ. ಆದ್ರೆ ಹಾಸನ ಅಖಾಡ ಈಗ ದಳಪತಿಗಳ ಲಕೋಟೆಯಲ್ಲಿಲ್ಲ. ಮೊನ್ನೆ ಚನ್ನಪಟ್ಟಣ ಕೂಡ ಕಾಂಗ್ರೆಸ್ ಪಾಲಾಗಿದೆ. ಹೀಗಿರುವಾಗ ಅಂದಿನ ತೆನೆ ಸದಸ್ಯ ಇಂದಿನ ಕಾಂಗ್ರೆಸ್​ನ ಪ್ರಶ್ನಾತೀತ ನಾಯಕ ಸಿಎಂ ಸಿದ್ದರಾಮಯ್ಯ, ದೊಡ್ಡಗೌಡರಿಗೆ ಹಿಂದಿನ ವಿಚಾರಗಳನ್ನೇ ಉಲ್ಲೇಖಿಸಿ ತಿರುಗೇಟು ಕೊಟ್ಟಿದ್ದಾರೆ.

ಇದನ್ನೂ ಓದಿ: ಸೂರ್ಯ ಶಿಕಾರಿಯಲ್ಲಿ ಮತ್ತೊಂದು ಮೈಲಿಗಲ್ಲು.. ಹೆಮ್ಮೆಯ ಇಸ್ರೋದಿಂದ ಹೊಸ ಸಮಾಚಾರ..!

ಹೆಚ್.ಟಿ.ಕೃಷ್ಣಪ್ಪ ನುಡಿದಿದ್ದ ಭವಿಷ್ಯ ಪ್ರಸ್ತಾಪಿಸಿದ ಸಿದ್ದರಾಮಯ್ಯ

ಮಾಜಿ ಪ್ರಧಾನಿ ಹೆಚ್.​ಡಿ ದೇವೇಗೌಡರ ಕೋಟೆ ಹಾಸನದಲ್ಲಿ ನಡೆದ ಕಾಂಗ್ರೆಸ್ ಜನಕಲ್ಯಾಣೋತ್ಸವ ಸಮಾವೇಶದಲ್ಲಿ ಸಿಎಂ ಸಿದ್ದರಾಮಯ್ಯ ಅಬ್ಬರದ ಭಾಷಣ ಮಾಡಿದ್ದಾರೆ. ಉಪಸಮರದಲ್ಲಿ ಹೆಚ್​.ಡಿ ದೇವೇಗೌಡರು ಆಡಿದ್ದ ಒಂದೊಂದು ಮಾತಿಗೂ ತಿರುಗೇಟು ಕೊಟ್ಟಿದ್ದಾರೆ. ಈ ನಡುವೆ ಹಿಂದೆ ಒಕ್ಕಲಿಗ ನಾಯಕರಾಗಿದ್ದ ಹೆಚ್.ಟಿ ಕೃಷ್ಣಪ್ಪ, ಹೆಚ್.​ಡಿ ದೇವೇಗೌಡರ ಬಗ್ಗೆ ನುಡಿದಿದ್ದ ಭವಿಷ್ಯವನ್ನು ಪ್ರಸ್ತಾಪಿಸಿ ಟಾಂಗ್ ಕೊಟ್ಟಿದ್ದಾರೆ. ಕೃಷ್ಣಪ್ಪ ಆಗಲೇ ಈ ಪಾಪದ ಹೊರೆಯನ್ನು ಹೊರಬೇಕಾಗುತ್ತದೆ ಎಂದು ದೇವೇಗೌಡರಿಗೆ ಹೇಳಿದ್ದರು. ಅದನ್ನೇ ಸಿದ್ದರಾಮಯ್ಯ ಸಮಾವೇಶದಲ್ಲಿ ಪ್ರಸ್ತಾಪಿಸಿ ಹೇಳಿದ್ದಾರೆ. ಹೆಚ್.ಟಿ ಕೃಷ್ಣಪ್ಪ 2010ರಲ್ಲಿ ಹೇಳಿ ಬರೆದಿದ್ದ ಪತ್ರ ನ್ಯೂಸ್​​ಫಸ್ಟ್​ಗೆ ಲಭ್ಯವಾಗಿದೆ.

ಯಾರು ಈ ಹೆಚ್​.ಟಿ ಕೃಷ್ಣಪ್ಪ?

• ಹೆಚ್.ಟಿ.ಕೃಷ್ಣಪ್ಪ ಅವರು ಪುಣ್ಯಕೋಟಿ ಕೃಷ್ಣಪ್ಪ ಅಂತಾನೇ ಖ್ಯಾತಿ
• ರಾಜಕೀಯ, ಸಾಹಿತ್ಯ, ರಂಗಭೂಮಿ ಕ್ಷೇತ್ರದಲ್ಲಿ ಗುರುತಿಸಿಕೊಂಡಿದ್ರು
• ನಾಗಮಂಗಲ ವಿಧಾನಸಭಾ ಕ್ಷೇತ್ರದಿಂದ ಮೂರು ಬಾರಿ ಶಾಸಕರು
• ಎರಡು ಬಾರಿ ಸಚಿವಗರಾಗಿ ಕಾರ್ಯ ನಿರ್ವಹಿಸಿದ್ದ ಹೆಚ್.ಟಿ.ಕೃಷ್ಣಪ್ಪ
• 1986ರಲ್ಲಿ ಹೆಗಡೆ ಸಂಪುಟದಲ್ಲಿ ಆರೋಗ್ಯ ಖಾತೆ ಸಚಿವರಾಗಿದ್ದರು
• ತತ್ವ ಸಿದ್ಧಾಂತ ಬಿಡದ ಹೆಚ್​.ಟಿ.ಕೃಷ್ಣ, ರಾಜಕಾರಣದಿಂದ ದೂರ
• ಸಿದ್ಧಾಂತದಲ್ಲೇ ರಾಜಕಾರಣ ಮಾಡಿದ ಅಪರೂಪದ ರಾಜಕಾರಣಿ
• ಮಾಜಿ ಸಚಿವ ಹೆಚ್.ಟಿ.ಕೃಷ್ಣಪ್ಪ 2021ರಲ್ಲಿ ಇಹಲೋಕ ತ್ಯಜಿಸಿದ್ದರು

ಇನ್ನು ಹೆಚ್​ಟಿ ಕೃಷ್ಣಪ್ಪ ಪತ್ರವನ್ನ ಉಲ್ಲೇಖಿಸಿಯೇ ಸಿದ್ದರಾಮಯ್ಯ ಅವರು, ಹೆಚ್​.ಡಿ ದೇವೇಗೌಡರ ವಿರುದ್ಧ ಕಿಡಿಕಾರಿದ್ದಾರೆ. ನೀವು ಯಾರನ್ನು ಬೆಳೆಸಿದ್ದೀರಿ ಅಂತ ತಿವಿದಿದ್ದಾರೆ. ಒಕ್ಕಲಿಗ ನಾಯಕರಾಗಿದ್ದ ಕೃಷ್ಣಪ್ಪ ಆಗಲೇ ಈ ಪಾಪದ ಹೊರೆ ಹೊರಬೇಕಾಗುತ್ತದೆ ಎಂದು ದೇವೇಗೌಡರಿಗೆ ಹೇಳಿದ್ದರು. ಈಗ ಅವರ ಮಾತು ನಿಜವಾಗಿದೆ ಎಂದು ಸಿಎಂ ಸಿದ್ದರಾಮಯ್ಯ ಅವರು, ಹೆಚ್​.ಡಿ ದೇವೇಗೌಡರ ವಿರುದ್ಧ ವಾಗ್ದಾಳಿ ನಡೆಸಿದ್ದಾರೆ.

‘ದುರಂತ ನೋಡುವ ಕಾಲ ಬರುತ್ತದೆ’

ನಮಗೆಲ್ಲಾ ರಾಜಕೀಯ ವನವಾಸ ತಂದ ಹೆಚ್​.ಡಿ ದೇವೇಗೌಡರಿಗೆ ತನ್ನ ದುರಂತವನ್ನು ತಾನೇ ನೋಡುವ ಕಾಲ ಬರುತ್ತದೆ ಎಂದು ಹೆಚ್​.ಟಿ ಕೃಷ್ಣಪ್ಪ ಅವರು ಹೇಳಿದ್ದರು. ಈಗ ಅವರು ಇಲ್ಲ. ಆದರೆ ಅವರು ಹೇಳಿದ್ದು ಸತ್ಯವಾಗುತ್ತಿದೆ. ನಾನು ಮಾತನಾಡಿದರೆ, ಸಿದ್ದರಾಮಯ್ಯ ಒಕ್ಕಲಿಗರ ವಿರುದ್ಧ ಎತ್ತಿಕಟ್ಟಿ ಬಿಡುತ್ತಿದ್ದರು. ಹೆಚ್​.ಟಿ ಕೃಷ್ಣಪ್ಪ ಅವರು ಪಕ್ಕಾ ಒಕ್ಕಲಿಗ. ಅವರು ಹೇಳಿದ್ದು ಇದು.

ಸಿದ್ದರಾಮಯ್ಯ, ಮುಖ್ಯಮಂತ್ರಿ

ಹೆಚ್.​ಟಿ ಕೃಷ್ಣಪ್ಪ ಪತ್ರವನ್ನು ಉಲ್ಲೇಖಿಸಿ ಸಿಎಂ ಸಿದ್ದರಾಮಯ್ಯ ದೇವೇಗೌಡರ ವಿರುದ್ಧ ವಾಗ್ದಾಳಿ ನಡೆಸಿದ್ದಾರೆ. ಇದಕ್ಕೆ ದಳಪತಿಗಳು ಯಾವ ರೀತಿ ಪ್ರತಿಕ್ರಿಯೆ ಕೊಡ್ತಾರೋ ಕಾದು ನೋಡಬೇಕು.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ