ಕೊನೆ ಪಂದ್ಯದಲ್ಲಿ CSK ಸಿಡಿಲಬ್ಬರದ ಬ್ಯಾಟಿಂಗ್​.. ಕಾನ್ವೆ, ಬ್ರೆವಿಸ್ ಅರ್ಧಶತಕ, ಗುಜರಾತ್​ಗೆ ಬಿಗ್ ಟಾರ್ಗೆಟ್​

2025ರ ಐಪಿಎಲ್​ನ ಕೊನೆಯ ಪಂದ್ಯ ಆಡುತ್ತಿರುವ ಚೆನ್ನೈ ಸೂಪರ್ ಕಿಂಗ್ಸ್​ ಭರ್ಜರಿ ರನ್​ಗಳನ್ನು ಕಲೆ ಹಾಕಿದೆ. ಡಿವೋನ್ ಕಾನ್ವೆ ಹಾಗೂ ಡೆವಾಲ್ಡ್ ಬ್ರೆವಿಸ್ ಅವರ ಭರ್ಜರಿ ಅರ್ಧಶತಕದಿಂದ ಗುಜರಾತ್​ಗೆ 231 ರನ್​​ಗಳ ಬೃಹತ್​ ಟಾರ್ಗೆಟ್ ನೀಡಿದೆ.

ಅಹಮದಾಬಾದ್​ನ ನರೇಂದ್ರ ಮೋದಿ ಕ್ರಿಕೆಟ್​ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಐಪಿಎಲ್​ ಪಂದ್ಯದಲ್ಲಿ ಟಾಸ್ ಗೆದ್ದುಕೊಂಡ ಚೆನ್ನೈ ತಂಡ ಮೊದಲ ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡಿದೆ. ಓಪನರ್ ಆಗಿ ಕ್ರೀಸ್​ಗೆ ಆಗಮಿಸಿದ ಆಯುಷ್ ಹಾಗೂ ಡಿವೋನ್ ಕಾನ್ವೆ ಅದ್ಭುತ ಓಪನಿಂಗ್ ಪಡೆದರು. ಆಯುಷ್ 3 ಫೋರ್ ಹಾಗೂ 3 ಸಿಕ್ಸರ್ ಸಮೇತ ಕೇವಲ 17 ಬಾಲ್​ಗಳಲ್ಲಿ 34 ರನ್​ ಬಾರಿಸಿದರು. ಇವರ ನಂತದ ಕ್ರೀಸ್​ಗೆ ಬಂದ ಉರ್ವಿಲ್ ಪಟೇಲ್ ಮನ ಮೋಹಕ ಬ್ಯಾಟಿಂಗ್ ಮಾಡಿದರು.

ಇದನ್ನೂ ಓದಿ:ಬದ್ಧವೈರಿ ಆದರೂ ಚೆನ್ನೈ ಗೆಲುವಿಗಾಗಿ ಪ್ರಾರ್ಥಿಸುತ್ತಿರುವ RCB.. ಯಾಕೆ ಗೊತ್ತಾ?

ಇನ್ನೊಂದೆಡೆ ಕ್ರೀಸ್ ಕಚ್ಚಿ ನಿಂತಿದ್ದ ಕಾನ್ವೆ, ಕೇವಲ 35 ಬಾಲ್​ಗಳಲ್ಲಿ 6 ಬೌಂಡರಿ ಮತ್ತು 2 ಸಿಕ್ಸರ್​ಗಳಿಂದ 52 ರನ್​ ಚಚ್ಚಿ ಔಟ್ ಆದರು. ಉರ್ವಿಲ್ ಪಟೇಲ್, ಕೇವಲ 19 ಎಸೆತದಲ್ಲಿ 4 ಫೋರ್, 2 ಸಿಕ್ಸರ್​ನಿಂದ 37 ಬಾರಿಸಿದರು. ಜೂನಿಯರ್ ಎಬಿಡಿ ಎಂದೇ ಖ್ಯಾತಿ ಆಗಿರುವ ಡೆವಾಲ್ಡ್ ಬ್ರೆವಿಸ್ ಅವರು, ಗುಜರಾತ್ ಬೌಲರ್​ಗಳನ್ನ ಮನ ಬಂದಂತೆ ಚಚ್ಚಿದರು.

ಡೆವಾಲ್ಡ್ ಬ್ರೆವಿಸ್ ಆಡಿದ್ದು ಕೇವಲ 23 ಎಸೆತಗಳು ಆದರೂ 4 ಬೌಂಡರಿ ಹಾಗೂ 5 ಸಿಕ್ಸರ್​ಗಳಿಂದ ಸಿಡಿಲಬ್ಬರದ 57 ರನ್​ ಬಾರಿಸಿದರು. ಆಲ್​ರೌಂಡರ್​ ರವೀಂದ್ರ ಜಡೇಜಾ (21) ಕೂಡ ತಂಡಕ್ಕೆ ಉತ್ತಮ ಕಾಣಿಕೆ ನೀಡಿದರು. ಇದರಿಂದ ಚೆನ್ನೈ ತಂಡ ನಿಗದಿತ 20 ಓವರ್​ಗಳಲ್ಲಿ 5 ವಿಕೆಟ್​ಗೆ 231 ರನ್​​ಗಳ ಬೃಹತ್​ ಗುರಿ ನೀಡಿದೆ. ಗುಜರಾತ್ ಪರ ಕನ್ನಡಿಗ ಪ್ರಸಿದ್ಧ್ ಕೃಷ್ಣ ಎರಡು ವಿಕೆಟ್​ ಪಡೆದು ಸಂಭ್ರಮಿಸಿದರು. ಉಳಿದವರು ಒಂದೊಂದು ವಿಕೆಟ್​ ಉರುಳಿಸಿದರು.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.30ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ