ದರ್ಶನ್‌ಗೆ ಕೋರ್ಟ್​ ಬಿಗ್‌ ಶಾಕ್​.. ಜೈಲಲ್ಲೇ ಲಾಕ್​; ಜಾಮೀನು ಯಾಕೆ ಸಿಗಲಿಲ್ಲ? 10 ಕಾರಣಗಳು ಇಲ್ಲಿವೆ!

ಬರೋಬ್ಬರಿ 120 ದಿನಗಳು.. ದರ್ಶನ್ ಜೈಲು ಸೇರಿ 120ಕ್ಕೂ ಹೆಚ್ಚು ದಿನಗಳೇ ಉರುಳಿವೆ. ಆಚೆ ಬಂದ್ಬಿಡಿ ಬಾಸ್​ ಅಂತಾ ದರ್ಶನ್ ಫ್ಯಾನ್ಸ್​ ಕಾಯ್ತಾನೆ ಇದ್ರು. ಬೆಳಗ್ಗೆಯಿಂದಲೇ ಬಳ್ಳಾರಿ ಜೈಲಿನ ಮುಂಭಾಗವೇ ಬೀಡು ಬಿಟ್ಟಿದ್ರು. ದರ್ಶನ್​​ ಸಹ ಭಾನುವಾರದಿಂದಲೇ ಬೆನ್ನು ನೋವಿನ ಮಧ್ಯೆಯೂ ಟೆನ್ಶನ್​​ನಲ್ಲೇ ಇದ್ರು. ಬೇಲ್ ಸಿಗುತ್ತೋ? ಇಲ್ಲವೋ? ಅನ್ನೋ ಒತ್ತಡದಲ್ಲೇ ಒದ್ದಾಡುತ್ತಿದ್ದರು. ಇತ್ತ ಬೆಂಗಳೂರಿನ 57ನೇ ಸಿಸಿಹೆಚ್​​ ನ್ಯಾಯಾಲಯ ಕೊನೆಗೂ ದರ್ಶನ್, ಪವಿತ್ರಾ ಗೌಡ ಸೇರಿ 6 ಮಂದಿಯ ಜಾಮೀನು ಅರ್ಜಿ ವಿಚಾರವಾಗಿ ಮಹತ್ವದ ಆದೇಶ ಹೊರಡಿಸಿದೆ.

ಕೊನೆಗೂ ದರ್ಶನ್​​ಗೆ ಜಾಮೀನು ಇಲ್ಲ, ಜೈಲೇ ಗತಿ ಆಯ್ತು!
6 ಮಂದಿಯ ಬೇಲ್ ಅರ್ಜಿ ಪೈಕಿ ಇಬ್ಬರಿಗಷ್ಟೇ ಜಾಮೀನು!
ಸೋಮವಾರ.. ಸಂಜೆ ಸುಮಾರು 5.45ರ ಹೊತ್ತಿನ ತನಕ 57ನೇ ಸಿಸಿಹೆಚ್​​ ಕೋರ್ಟ್​​ ಕರ್ನಾಟಕವನ್ನೇ ಕುರ್ಚಿಯ ಕೊನೆಯ ತುದಿಯ ಮೇಲೆ ಕೂರುವಂತೆ ಮಾಡಿತ್ತು. ಕಾರಣ, ರೇಣುಕಾಸ್ವಾಮಿ ಕೊ*ಲೆ ಕೇಸ್​​ನ ಆರು ಮಂದಿ ಬೇಲ್ ಅರ್ಜಿಯ ವಿಚಾರಣೆ ನಡೆಸಿದ್ದ ಕೋರ್ಟ್, ಸೋಮವಾರ ತೀರ್ಪು ನೀಡುವುದಿತ್ತು. ಹಾಗಾಗಿಯೇ ನ್ಯಾಯಾಧೀಶರಾದ ಜೈ ಶಂಕರ್​​ ತೀರ್ಪು ಓದುವ ತನಕ ಎಲ್ಲರ ಚಿತ್ತ ಕೋರ್ಟ್​​ನತ್ತಲೇ ಇತ್ತು. ಎ1 ಪವಿತ್ರಾ ಗೌಡ, ಎ2 ದರ್ಶನ್, ಎ8 ರವಿಶಂಕರ್​, ಎ11 ನಾಗರಾಜ್, ಎ12 ಲಕ್ಷ್ಮಣ್ ಹಾಗೂ ಎ13 ದೀಪಕ್ ಬೇಲ್ ಪೈಕಿ ಇಬ್ಬರಿಗಷ್ಟೇ ಕೋರ್ಟ್​​ ಜಾಮೀನು ಮಂಜೂರು ಮಾಡಿದೆ. ಎ8 ರವಿ ಶಂಕರ್​ ಹಾಗೂ ಎ13 ದೀಪಕ್​​​ಗೆ ಕೋರ್ಟ್​ ಜಾಮೀನು ನೀಡಿದೆ. ಇನ್ನುಳಿದಂತೆ, ಪವಿತ್ರಾ ಗೌಡ, ದರ್ಶನ್, ನಾಗರಾಜ್, ಲಕ್ಷ್ಮಣ್ ಈ ನಾಲ್ವರಿಗೂ ಬೇಲ್ ನಿರಾಕರಿಸಿದೆ.

ಒಂದು ಸಾಲಿನ ತೀರ್ಪಿಗಿಂತ ಆದೇಶದಲ್ಲೇ ಅಸಲಿ ಮ್ಯಾಟರ್!
ಸದ್ಯ ಸಿಂಗಲ್ ಲೈನ್ ಆರ್ಡರ್​​ ಪಾಸ್​​ ಮಾಡಿದ್ದಾರೆ ಜಡ್ಜ್ ಜೈ ಶಂಕರ್​. ದರ್ಶನ್​​ಗೆ ಬೇಲ್ ಏಕೆ ನೀಡಿಲ್ಲ ಅನ್ನೋ ಅಸಲಿ ಪ್ರಶ್ನೆಗೆ ಪಿನ್ ಟು ಪಿನ್ ಆನ್ಸರ್​ ಸಿಗೋದು ಅಸಲಿ ಆದೇಶ ಪ್ರತಿಯಲ್ಲಿ. ಯಾವ ಗ್ರೌಂಡ್ಸ್​​ ಮೇಲೆ ಕೋರ್ಟ್​​ ದರ್ಶನ್ ಸೇರಿ ಮೂವರಿಗೆ ಸೋಮವಾರ ಜಾಮೀನು ನೀಡಿಲ್ಲ ಅನ್ನೋ ಕಂಪ್ಲೀಟ್​​ ಮಾಹಿತಿ ಆದೇಶ ಪ್ರತಿಯಲ್ಲಿ ಇರುತ್ತದೆ. ಸಿಂಗಲ್ ಲೈನ್ ಆರ್ಡರ್​​ ಬಂದ ನಾಲ್ಕೈದು ಗಂಟೆಗಳಲ್ಲಿ ತೀರ್ಪಿನ ಆದೇಶ ಪ್ರತಿ ಸಿಗಲಿದೆ. ಇನ್ನು, ತನಗೆ ಬೇಲ್ ಸಿಕ್ಕಿಲ್ಲ ಅನ್ನೋದು ಗೊತ್ತಾದ ಕೂಡಲೇ ಪ್ರಕರಣದ ಎ1 ಆರೋಪಿ ಪವಿತ್ರಾ ಗೌಡ ಬಿಕ್ಕಳಿಸಿ ಬಿಕ್ಕಳಿಸಿ ಅತ್ತಿದ್ದಾಳೆ ಅನ್ನೋ ಮಾಹಿತಿ ಲಭ್ಯವಾಗಿದೆ. ಅಸಲಿಗೆ ದರ್ಶನ್​​ಗೆ ಬೇಲ್ ಸಿಗದೇ ಇರೋದಕ್ಕೆ ಕಾರಣ ಏನು ಗೊತ್ತಾ?

ಇದನ್ನೂ ಓದಿ: ಮುಂದಿನ ತಿಂಗಳು ರೇಣುಕಾಸ್ವಾಮಿ ಮಗು ಜನನ.. ದರ್ಶನ್ ಗ್ಯಾಂಗ್‌ಗೆ ಶಿಕ್ಷೆ ವಿಧಿಸಲು ಕುಟುಂಬಸ್ಥರ ಒತ್ತಾಯ 

ಬೇಲ್ ಏಕಿಲ್ಲ? ಕಾರಣ 1
ತಡವಾಗಿ ಸಾಕ್ಷಿ ದಾಖಲು ಮಾಡಿದ್ದಕ್ಕೆ SPP ಕೊಟ್ಟಿದ್ದ ಸ್ಪಷ್ಟನೆ!
ದರ್ಶನ್ ಪರ ವಕೀಲ ಸಿ.ವಿ ನಾಗೇಶ್​​ ನನ್ನ ಕಕ್ಷಿದಾರರನ್ನು ಕೇಸ್​​ನಲ್ಲಿ ಸಿಲುಕಿಸುವ ಕಾರಣಕ್ಕೆ ಪೊಲೀಸರು ತಡವಾಗಿ ಹೇಳಿಕೆ ದಾಖಲಿಸಿದ್ದಾರೆ. ಸಾಕ್ಷಿಗಳನ್ನ ಸೃಷ್ಟಿಸುವ ಮೂಲಕ ದರ್ಶನ್​​ನ ಸಿಲುಕಿಸುವುದೇ ಉದ್ಧೇಶದಂತೆ ಕಾಣುತ್ತಿದೆ ಅಂತ ವಾದಿಸಿದ್ರು. ಇದಕ್ಕೆ ಎಸ್​​ಪಿಪಿ ಪ್ರಸನ್ನ ಕುಮಾರ್​ ಯಾವ ಕಾರಣಕ್ಕೇ 164 ಹೇಳಿಕೆಯನ್ನು ದಾಖಲಿಸಲು ತಡವಾಯ್ತು, ಆರೋಪಿಯನ್ನು ಪೊಲೀಸರು ಹಲವು ಸ್ಥಳಗಳ ಪರಿಶೀಲನೆಗಾಗಿ ಕರೆದುಕೊಂಡು ಹೋಗಿದ್ದದ್ದು, ಎಲ್ಲವನ್ನೂ ಜಡ್ಜ್​ ಮುಂದಿಟ್ಟಿದ್ರು. ಆದಾಗ್ಯೂ ಕಾನೂನಿನ ಪ್ರಕಾರವೇ ಕೇಸ್​​ ಡೈರಿಯಲ್ಲಿ ಹೇಳಿಕೆ ದಾಖಲಿಸಿಕೊಳ್ಳಲಾಗಿದೆ ಅನ್ನೋ ವಿಚಾರವನ್ನು ತಿಳಿಸುವ ಮೂಲಕ ತಡವಾಗಿದ್ದಕ್ಕೆ ಕಾರಣ ಏನು ಅನ್ನೋ ವಿಚಾರವನ್ನು ಕೋರ್ಟ್​​ ಗಮನಕ್ಕೆ ತಂದಿದ್ದರು.

ಬೇಲ್ ಏಕಿಲ್ಲ? ಕಾರಣ 2
ತಡವಾಗಿ ಮರಣೋತ್ತರ ಪರೀಕ್ಷೆಗೆ ಕೊಟ್ಟ ಕಾರಣ!
ನಾಗೇಶ್​​ ತಮ್ಮ ವಾದ ಮಂಡಿಸುವ ಸಂದರ್ಭ ತಡವಾಗಿ ಮರಣೋತ್ತರ ಪರೀಕ್ಷೆ ಮಾಡಿದ್ದು ಏಕೆ ಅಂತ ಪ್ರಶ್ನಿಸಿದ್ದರು. ಎಸ್​ಪಿಪಿ ಮಹತ್ವದ ಲಾ ಪಾಯಿಂಟ್​​ ಮುಂದಿಟ್ಟು ವಾದಿಸಿದ್ರು. ಮೃತ ವ್ಯಕ್ತಿಯ ಗುರುತು ಪತ್ತೆ ಆಗದ ಕಾರಣಕ್ಕೇ ತಡವಾಗಿ ಮರಣೋತ್ತರ ಪರೀಕ್ಷೆ ನಡೆದಿದೆ. ಅಷ್ಟರ ಮಟ್ಟಿಗಿನ ಕ್ರೌರ್ಯ ಕೊಲೆಯಲ್ಲಿದ್ದ ಕಾರಣವೇ ರೇಣುಕಾಸ್ವಾಮಿಯ ಮೃತ ದೇಹವನ್ನೂ ಪತ್ತೆ ಮಾಡೋದಕ್ಕೆ ಆಗಿರ್ಲಿಲ್ಲ ಅನ್ನೋ ಅಂಶವನ್ನು ಉಲ್ಲೇಖಿಸಿದ್ರು. ಹಾಗಾಗಿಯೇ ಕೋರ್ಟ್​ ಪ್ರಸನ್ನ ಕುಮಾರ್​ ವಾದಕ್ಕೆ ಮನ್ನಣೆ ನೀಡಿದೆ. ದರ್ಶನ್​​ಗೆ ಬೇಲ್ ನೀಡಿಲ್ಲ.

ಬೇಲ್ ಏಕಿಲ್ಲ? ಕಾರಣ 3
ತನಿಖೆಯ ಹಂತದಲ್ಲಿ ಹಲವು ಲೋಪಗಳು ಕಂಡು ಬಂದಿವೆ!
ದರ್ಶನ್ ಪರ ವಕೀಲ ನಾಗೇಶ್​​ ತನಿಖೆ ಕಳಪೆ ಮಟ್ಟದಲ್ಲಿ ಆಗಿದೆ. ತನಿಖಾಧಿಕಾರಿ ಸಾಕಷ್ಟು ಲೋಪಗಳನ್ನು ಎಸಗಿದ್ದಾರೆ ಅಂತ ವಾದ ಮಂಡಿಸಿದ್ರು. ಇದಕ್ಕೆ ಪ್ರತಿಯಾಗಿ ಸರ್ಕಾರಿ ಅಭಿಯೋಜಕ ಪ್ರಸನ್ನ ಕುಮಾರ್​ ಲೀಗಲ್ ಪಾಯಿಂಟ್ ಮೆನ್ಷನ್ ಮಾಡುವ ಮೂಲಕವೇ ಸ್ಪಷ್ಟನೆ ನೀಡಿದ್ರು. ತನಿಖೆಯಲ್ಲಿ ಲೋಪಗಳಿದ್ದರೇ ತನಿಖಾಧಿಕಾರಿಯನ್ನು ಕ್ರಾಸ್​​ ಎಗ್ಸಾಮಿನೇಷನ್ ವೇ ಳೆ ಪತ್ತೆ ಮಾಡಬಹುದು. ಪ್ರಶ್ನಿಸಬಹುದು. ಆದು ಬಿಟ್ಟು ಜಾಮೀನು ಅರ್ಜಿ ವಿಚಾರಣೆ ವೇಳೆ ಇದರ ಅಗತ್ಯವಿದ್ಯಾ ಅಂತ ಪ್ರಶ್ನಿಸಿದ್ರು. ಇದೇ ಕಾರಣಕ್ಕೇ ದರ್ಶನ್​ಗೆ ಜಾಮೀನು ಸಿಕ್ಕಿಲ್ಲ ಎಂಬ ಚರ್ಚೆ ನಡೀತಿದೆ.

ಬೇಲ್ ಏಕಿಲ್ಲ? ಕಾರಣ 4
ನೈಟ್ಸ್​​ ಕಥೆ ಅಲ್ಲ. ಇದು ರಕ್ತ ಚರಿತ್ರೆ ಅಂತ ಒಪ್ಪಿದ್ರಾ?
ರೇಣುಕಾಸ್ವಾಮಿಯದ್ದು ಕೊಲೆಯೋ? ಆತ್ಮಹತ್ಯೆಯೋ? ಅನ್ನೋ ಮೂಲಕ ಭಿನ್ನ ರೂಪದ ಅಭಿಪ್ರಾಯ ಮೂಡಿಸೋ ವಾದವನ್ನು ದರ್ಶನ್ ಪರ ವಕೀಲರಾದ ಸಿ.ವಿ ನಾಗೇಶ್​​ ಮಂಡಿಸಿದ್ರು. ಅಷ್ಟೇ ಅಲ್ಲ, ರೇಣುಕಾಸ್ವಾಮಿ ಕೊಲೆ ಕೇಸ್​ ಹಾಗೂ ಪೊಲೀಸರ ಜಾರ್ಜ್​​ಶೀಟ್​ ನೋಡಿದರೇ ಅರೇಬಿಯನ್ ನೈಟ್ಸ್​ ಕಥೆಗಳು ನೆನಪಾಗುತ್ತವೆ ಅಂತ ಚಟಾಕಿ ಹಾರಿಸಿದ್ರು. ಇದಕ್ಕೆ ಪ್ರತಿಯಾಗಿ ಎಸ್​ಪಿಪಿ ಪ್ರಸನ್ನ ಕುಮಾರ್​ ರೇಣುಕಾಸ್ವಾಮಿ ದೇಹದ ಮೇಲಿದ್ದ ಗಾಯಗಳ ಲೆಕ್ಕ, ಹಲ್ಲೆಯ ಪಟ್ಟಿನ ಪಟ್ಟಿನ್ನು ಮರಣೋತ್ತರ ಪರೀಕ್ಷಾ ವರದಿಯ ಸಮೇತ ಕೋರ್ಟ್​​ ಮುಂದಿರಿಸಿದ್ರು. ಹಾಗಾಗಿಯೇ ಕೋರ್ಟ್​​ ಇದು ರಕ್ತ ಚರಿತ್ರೆ ಅನ್ನೋ ಪ್ರಸನ್ನ ಕುಮಾರ್​ ವಾದವನ್ನು ಎತ್ತಿ ಹಿಡಿದು ಬೇಲ್ ನೀಡಿಲ್ಲ.

ಇದನ್ನೂ ಓದಿ: Big Breaking: ಆರೋಪಿ ದರ್ಶನ್​​​ಗೆ ಜೈಲೇ ಗತಿ.. ಜಾಮೀನು ಅರ್ಜಿ ವಜಾ! 

ಬೇಲ್ ಏಕಿಲ್ಲ? ಕಾರಣ 5
ರೇಣುಕಾ ಅಮಾನುಷ ಕೊಲೆ ಸಾಮಾಜಿಕ ಹೊಣೆಗಾರಿಕೆ!
ಇಲ್ಲಿ ದರ್ಶನ್​​ಗೆ ಬೇಲ್ ಸಿಗದೇ ಇರೋದಕ್ಕೆ ಬಹುಮುಖ್ಯ ಕಾರಣ ಸಾಮಾಜಿಕ ಹೊಣೆಗಾರಿಕೆ. ಕೋರ್ಟ್​​ ಎಲ್ಲವನ್ನೂ ಸೂಕ್ಷ್ಮವಾಗಿ ನೋಡಿದೆ. ರೇಣುಕಾಸ್ವಾಮಿಯನ್ನು ಅತ್ಯಂತ ನಿರ್ದಯವಾಗಿ ಕೊಂದ ಆರೋಪ ಹೊತ್ತಿರೋ ಮಂದಿಗೆ ಜಾಮೀನು ನೀಡಿದರೇ ಸಮಾಜ ಯಾವ ರೀತಿ ಪ್ರತಿಕ್ರಿಯಿಸಬಹುದು. ಮುಂದಿನ ದಿನಮಾನಗಳಲ್ಲಿ ಇಂಥಾ ಪ್ರಕರಣಗಳು ಎದುರಾದರೇ ದರ್ಶನ್​​ ಕೇಸ್​​ ಎಗ್ಸಾಂಪಲ್ ಪಡೆಯೋ ಸಾಧ್ಯತೆ ಇರುತ್ತದೆ. ಹಾಗಾಗಿಯೇ ಕೋರ್ಟ್​​ ಒಂದು ಕಡೆ ರೇಣುಕಾಸ್ವಾಮಿಯ ಬರ್ಬರ ಹತ್ಯೆಯನ್ನು ಮತ್ತೊಂದು ಕಡೆ ಎಲ್ಲವನ್ನೂ ನೋಡುತ್ತಿರೋ ಸಮಾಜವನ್ನು ಗಂಭೀರವಾಗಿ ತೂಗಿ ಬೇಲ್ ನೀಡಿಲ್ಲ ಎನ್ನಲಾಗುತ್ತಿದೆ.

ಬೇಲ್ ಏಕಿಲ್ಲ? ಕಾರಣ 6
ಐ ವಿಟ್ನೆಸ್​​ ಹೇಳಿಕೆಯಲ್ಲೂ ಲೋಪವಿಲ್ಲ ಎಸ್​ಪಿಪಿ ವಾದ!
ರೇಣುಕಾಸ್ವಾಮಿ ಕೊಲೆ ಕೇಸ್​​ನ ಏಕೈಕ ಐ ವಿಟ್ನೆಸ್​​ ಪಟ್ಟಣಗೆರೆ ಶೆಡ್​​ ಸೆಕ್ಯೂರಿಟಿ ಗಾರ್ಡ್​. ಈತನಿಗೆ ಕನ್ನಡವೇ ಬರೋದಿಲ್ಲ. ಅದ್ಹೇಗೆ ಕನ್ನಡದಲ್ಲೇ 164 ಹೇಳಿಕೆ ದಾಖಲಿಸಿದ್ದೀರಿ ಅಂತ ಸಿವಿ ನಾಗೇಶ್​​ ವಾದ ಮಂಡಿಸಿದ್ರು. ಅಷ್ಟೇ ಅಲ್ಲ, ಈ ಹೇಳಿಕೆ ಪಡೆಯುವ ವೇಳೆ ಲೋಪ ಆಗಿದೆ ಅಂತಲೂ ಉಲ್ಲೇಖಿಸಿದ್ರು. ಸರ್ಕಾರಿ ಅಭಿಯೋಜಕ ಪ್ರಸನ್ನ ಕುಮಾರ್​ ಕೇವಲ ಐ ವಿಟ್ನೆಸ್​ ಹೇಳಿಕೆಯಲ್ಲಿ ಲೋಪ ಆಗಿಲ್ಲ. ದರ್ಶನ್ ವಿರುದ್ಧ ಸಿಕ್ಕ ಸಿಡಿಆರ್​ ಟೆಕ್ನಿಕಲ್ ಎವಿಡೆನ್ಸ್​ ಕೂಡ ದರ್ಶನ್ ಅಲ್ಲಿದ್ದ ಅನ್ನೋದನ್ನ ಹೇಳುತ್ತಿದೆ ಅಂತ ದಾಖಲೆ ಸಮೇತ ವಾದಿಸಿದ್ದರು. ಹೇಳಿಕೆಯಲ್ಲಿ ಲೋಪ ಇದೆ ಅಂತಾ ಅದನ್ನೇ ಪರಿಗಣಿಸಲು ಸಾಧ್ಯವಿಲ್ಲ.. ಹೇಳಿಕೆ ತಡವಾಗಿದ್ರೂ, ಅದರ ಅಂಶಗಳ ಅಲ್ಲಗಳೆಯಲು ಸಾಧ್ಯವಿಲ್ಲ ಅನ್ನೋದನ್ನ ಕೋರ್ಟ್​ ಗಮನಕ್ಕೆ ತಂದಿದ್ರು. ಹಾಗಾಗಿಯೇ ಪ್ರಸನ್ನ ಕುಮಾರ್​ ವಾದಕ್ಕೆ ಮನ್ನಣೆ ಸಿಕ್ಕಿ ದರ್ಶನ್​​ಗೆ ಬೇಲ್ ನಿರಾಕರಣೆ ಆಗಿದೆ.

ಬೇಲ್ ಏಕಿಲ್ಲ? ಕಾರಣ 7
ಕುಕ್ಕಿ ಒಗೆದ ಬಟ್ಟೆಯಲ್ಲಿ SPP ತೆಗೆದ DNA ಪಾಯಿಂಟ್!
ದರ್ಶನ್ ಪರ ವಕೀಲರ ಸಿ.ವಿ ನಾಗೇಶ್​​ ಪೊಲೀಸರು ಪಡೆದ ಸಾಕ್ಷಿಯನ್ನೇ ಉಲ್ಲೇಖಿಸಿ ಮಹತ್ವದ ಸಂಗತಿ ಹೇಳಿದ್ರು. ಕೊಲೆಯ ಸಂದರ್ಭ ದರ್ಶನ್ ಧರಿಸಿದ್ದರು ಎನ್ನಲಾದ ಬಟ್ಟೆಯನ್ನು ಮನೆಗೆಲಸದಾಕೆ ಕುಕ್ಕಿ ಕುಕ್ಕಿ ಒಗೆದ ಮೇಲೆ ವಶಕ್ಕೆ ಪಡೆದಿದ್ದಾರೆ. ಅದರಲ್ಲಿ ರಕ್ತದ ಕಲೆ ಇರಲು ಸಾಧ್ಯವೇ ಅಂತ ಕೋರ್ಟ್​​ ಮುಂದೆ ಪ್ರಶ್ನಿಸಿದ್ದರು. ಆದರೇ, ಸರ್ಕಾರಿ ಅಭಿಯೋಜಕ ಪ್ರಸನ್ನ ಕುಮಾರ್​ ಟೆಕ್ನಿಕಲ್ ಎವಿಡನ್ಸ್​ ನೀಡುವ ಮೂಲಕ ಮೃತ ವ್ಯಕ್ತಿಯ DNA ಅಂಶ ಆರೋಪಿಗಳ ಬಟ್ಟೆಯಲ್ಲಿ ಪತ್ತೆ ಆಗಿದೆ. ಮೃತ ರೇಣುಕಾಸ್ವಾಮಿ ಡಿಎನ್ಎ ಜೊತೆ ಮ್ಯಾಚ್ ಆಗಿದೆ ಅನ್ನೋದನ್ನ ಕೋರ್ಟ್​​ ಗಮನಕ್ಕೆ ತಂದಿದ್ದರು. ಹಾಗಾಗಿಯೇ ನಾಗೇಶ್​​ ವಾದಕ್ಕಿಂತ್ಲೂ ಹೆಚ್ಚು ಪ್ರಸನ್ನ ಕುಮಾರ್​ ವಾದವನ್ನು ನ್ಯಾಯಾಧೀಶರು ಎತ್ತಿ ಹಿಡಿದಿದ್ದಾರೆ. ಇದೇ ಕಾರಣಕ್ಕೇ ದರ್ಶನ್​​ಗೆ ಬೇಲ್ ಸಿಕ್ಕಿಲ್ಲ.

ಬೇಲ್ ಏಕಿಲ್ಲ? ಕಾರಣ 8
ಭೀಕರ ಕೊಲೆ ವೃತ್ತಾಂತವೇ ಬೆಚ್ಚಿಬೀಳಿಸಿದೆ
ಮೇಲ್ನೋಟಕ್ಕೆ ಇಲ್ಲಿ ಜಡ್ಜ್ ದರ್ಶನ್​​ಗೆ ಬೇಲ್ ನೀಡದೇ ಇರೋದಕ್ಕೆ ಕಾರಣ ಕೊಲೆಯ ಕ್ರೌರ್ಯ. ಅತ್ಯಂತ ಅಮಾನುಷವಾಗಿ ರೇಣುಕಾಸ್ವಾಮಿಯನ್ನು ಕೊಂದ ವಿಚಾರವನ್ನು ಎಸ್​ಪಿಪಿ ಪ್ರಸನ್ನಕುಮಾರ್​​ ಕೋರ್ಟ್​​ ಮುಂದೆ ದಾಖಲೆಗಳ ಸಮೇತ ವಿವರಿಸಿದ್ರು. ಅಷ್ಟೇ ಅಲ್ಲ, ಸಾಕಷ್ಟು 164 ಸಾಕ್ಷಿ ಹಾಗೂ ಟೆಕ್ನಿಕಲ್ ಎವಿಡೆನ್ಸ್​​ ಮೂಲಕ ಕೊಲೆಯ ಭೀಕರತೆಯನ್ನು ನ್ಯಾಯಾಧೀಶರ ಗಮನಕ್ಕೆ ತಂದಿದ್ರು. ರೇಣುಕಾಸ್ವಾಮಿ ದೇಹದ ಮೇಲಿದ್ದ ರಕ್ತ ಸಿಕ್ತ 39ಕ್ಕೂ ಹೆಚ್ಚು ಗಾಯಗಳು. ಇನ್ನು, ಎದೆಯ ಗೂಡು 17 ಕಡೆ ಮುರಿದಿದ್ದ ಕ್ರೌರ್ಯದ ಅಟ್ಟಹಾಸ ಸಹ ಇಲ್ಲಿ ಜಡ್ಜ್ ಸೂಕ್ಷ್ಮವಾಗಿ ಪರಿಗಣಿಸಿದ್ದಾರೆ ಎನ್ನಲಾಗುತ್ತಿದೆ.

ಬೇಲ್​ ಏಕಿಲ್ಲ? ಕಾರಣ 9
ಬೇಲ್ ಕೊಡಬಾರದು ಅಂತ ಸುಪ್ರೀಂ ​ಆದೇಶವಿದೆ!
ಸದ್ಯ, ಸಿಸಿಹೆಚ್​​ ಕೋರ್ಟ್​​ ದರ್ಶನ್​​ ಹಾಗೂ ಪವಿತ್ರಾ ಗೌಡ ಸೇರಿ ನಾಲ್ವರಿಗೆ ಬೇಲ್ ನೀಡಿಲ್ಲ. ಒಂದು ವೇಳೆ ಈ ಡಿ ಗ್ಯಾಂಗ್​​ ಸುಪ್ರೀಂ ಕೋರ್ಟ್​ಗೆ ಹೋದ್ರೂ ಹಿನ್ನಡೆ ಆಗುವ ಸಾಧ್ಯತೆ ಹೆಚ್ಚು ಎನ್ನಲಾಗುತ್ತಿದೆ. ಅತ್ಯಂತ ಪ್ರಭಾವಿ ಆಗಿದ್ದು ಬೇಲ್ ನೀಡಿದರೇ ಸಾಕ್ಷಿಗಳ ಮೇಲೆ ಪ್ರಭಾವ ಬೀರಬಹುದು ಅನ್ನೋ ಕಾರಣಕ್ಕೂ ಬೇಲ್ ಸಿಗೋದಿಲ್ಲ. ಇದಿಷ್ಟೇ ಅಲ್ಲ, ಗ್ರಾವಿಟಿ ಆಫ್ ಕೇಸ್​​ ನೋಡಿಕೊಂಡೇ ಜಡ್ಜ್ ಬೇಲ್ ನೀಡುತ್ತಾರೆ. ಅತ್ಯಾಚಾರ, ಕೊಲೆಯಂತಹ ಸೂಕ್ಷ್ಮ, ಗಂಭೀರ ಪ್ರಕರಣಗಳಲ್ಲಿ ಯಾವುದೇ ಕಾರಣಕ್ಕೂ ಬೇಲ್ ನೀಡಬಾರದು ಅಂತ ಸುಪ್ರೀಂ ಕೋರ್ಟ್​​ ಆದೇಶವೇ ಇದೆ. ಹಾಗಾಗಿಯೇ ದರ್ಶನ್​​ಗೆ ಬೇಲ್ ಸಿಗೋದು ಅನುಮಾನ ಅಂತ ಹಿರಿಯ ವಕೀಲ ಸುನೀಲ್ ಕುಮಾರ್​ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಇದನ್ನೂ ಓದಿ: ನಟಿ ಪವಿತ್ರಾಗೌಡಗೆ ಬಿಗ್​ ಶಾಕ್; ಕೊಲೆ ಕೇಸಲ್ಲಿ ಕೋರ್ಟ್​ನಿಂದ ಮಹತ್ವದ ತೀರ್ಪು 

ಬೇಲ್ ಏಕಿಲ್ಲ? ಕಾರಣ 10
ಎಸ್​​ಪಿಪಿ ನೀಡಿದ ಮಹತ್ವದ ಡಿಜಿಟಲ್​ ಎವಿಡೆನ್ಸ್​!
ದರ್ಶನ್​​ ಪರ ವಕೀಲ ಸಿ.ವಿ ನಾಗೇಶ್​​ ತಮ್ಮ ವಾದ ಮಂಡಿಸುವ ಸಂದರ್ಭ ಮಹತ್ವದ ಅನುಮಾನಗಳನ್ನು ಎತ್ತಿದ್ದರು. ದರ್ಶನ್​​ ಅಲ್ಲಿ ಇದ್ದರು ಅನ್ನೋದಕ್ಕೆ ಸಾಕ್ಷಿ ಏನು? ತನಿಖಾಧಿಕಾರಿಗಳು ಇಲ್ಲಿ ಸರಿಯಾಗಿ ನಿಯಮಗಳನ್ನೇ ಪಾಲಿಸಿಲ್ಲ ಅಂತ ಕಟುವಾಗಿಯೇ ಲಾ ಪಾಯಿಂಟ್ಸ್​ ಮೂಲಕ ಕೋರ್ಟ್​​ ಗಮನಕ್ಕೆ ಮಹತ್ವದ ಸಂಗತಿಗಳನ್ನು ತಂದಿದ್ದರು. ಇದೇ ವಿಚಾರಕ್ಕೆ ಎಸ್​ಪಿಪಿ ಪ್ರಸನ್ನ ಕುಮಾರ್​ ಟವರ್​ ಡಂಪಿಂಗ್ ಸೇರಿದಂತೆ ಅನೇಕ ಡಿಜಿಟಲ್​ ಎವಿಡೆನ್ಸ್​​ ಮೂಲಕ ರೇಣುಕಾಸ್ವಾಮಿ ಕೊಲೆಗೂ ದರ್ಶನ್​​ಗೂ ಸಂಬಂಧ ಏನು? ಯಾವಾಗೆಲ್ಲಾ ದರ್ಶನ್ ರೇಣುಕಾಸ್ವಾಮಿ ಸನಿಹದಲ್ಲಿ ಇದ್ದರು ಅನ್ನೋದನ್ನ ವೈಜ್ಞಾನಿಕವಾಗಿ ನಿರೂಪಿಸುವ ದಾಖಲೆಗಳನ್ನು ಒದಗಿಸಿದ್ದರು. ಹಾಗಾಗಿಯೇ ಕೋರ್ಟ್​ ಎಸ್​ಪಿಪಿ ವಾದವನ್ನು ಎತ್ತಿ ಹಿಡಿದಿದೆ.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ