ಹೈದ್ರಾಬಾದ್​ಗೆ ಭಾರೀ ಮುಖಭಂಗ.. ಡುಪ್ಲೆಸಿಸ್​ ಅಬ್ಬರದ ಅರ್ಧಶತಕ, ಡೆಲ್ಲಿ ಕ್ಯಾಪಿಟಲ್ಸ್​ಗೆ ಜಯ

ಸನ್​ರೈಸರ್ಸ್​ ಹೈದ್ರಾಬಾದ್ ತಂಡದ ವಿರುದ್ಧ ನಡೆದ ಪಂದ್ಯದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಸುಲಭವಾಗಿ ಗೆಲುವು ಸಾಧಿಸಿದೆ. ಹೈದ್ರಾಬಾದ್ ಜೊತೆ ಡೆಲ್ಲಿ 7 ವಿಕೆಟ್​ಗಳಿಂದ ಜಯಶಾಲಿಯಾಗಿದೆ. ಓಪನರ್​ ಫಾಫ್​ ಡುಪ್ಲೆಸಿಸ್​ ಅವರ ಅಬ್ಬರದ ಅರ್ಧಶತಕದ ನೆರವಿನಿಂದ ಡೆಲ್ಲಿ ಟೀಮ್ ಸತತ 2ನೇ ಗೆಲುವನ್ನು ಪಡೆದುಕೊಂಡಿದೆ.

ವಿಶಾಖಪಟ್ಟಣಂ ಸ್ಟೇಡಿಯಂನಲ್ಲಿ ನಡೆದ ಐಪಿಎಲ್​ ಪಂದ್ಯದಲ್ಲಿ ಟಾಸ್ ಗೆದ್ದುಕೊಂಡ ಹೈದ್ರಾಬಾದ್ ಕ್ಯಾಪ್ಟನ್​ ಕಮಿನ್ಸ್​ ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡರು. ದೊಡ್ಡ ಮೊತ್ತದ ರನ್​ಗಳಿಕೆಯ ಯೋಜನೆಯಲ್ಲಿದ್ದ ಅವರು ಸಾಧಾರಣ ಮೊತ್ತಕ್ಕೆ ಆಲೌಟ್​ ಆದರು. ಮಿಚೆಲ್ ಸ್ಟಾರ್ಕ್ ಅವರ ಬೌಲಿಂಗ್​ ದಾಳಿಗೆ ಇಶನ್ ಕಿಶನ್, ನಿತೀಶ್ ಕುಮಾರ್ ರೆಡ್ಡಿ, ಟ್ರಾವಿಸ್ ಹೆಡ್ ಬೇಗ ಪೆವಿಲಿಯನ್ ಸೇರಿದರು. ಪ್ರಮುಖ ವಿಕೆಟ್ ಕಳೆದುಕೊಂಡರು ಅನಿಕೇತ್ ವರ್ಮಾ ಬಲಿಷ್ಠ ಬ್ಯಾಟಿಂಗ್ ಮಾಡಿ ಕೇವಲ 34 ಎಸೆತದಲ್ಲಿ 4 ಫೋರ್, 3 ಬಿಗ್ ಸಿಕ್ಸರ್ ಸಮೇತ ಅರ್ಧಶತಕ ಸಿಡಿಸಿದರು.

ಇದನ್ನೂ ಓದಿ:ಎದುರಾಳಿ ಪ್ಲಾನ್ ಉಲ್ಟಾ ಮಾಡೋ ನಂಬಿಕೆಯ ಆಟಗಾರ.. RCB ಆಪದ್ಬಾಂಧವ ಯಾರು?

ಇದೇ ಅಬ್ಬರದ ಬ್ಯಾಟಿಂಗ್ ಮುಂದುವರೆಸಿದ ಅನಿಕೇತ್ ವರ್ಮಾ, 41 ಎಸೆತಗಳಲ್ಲಿ 5 ಫೋರ್, 6 ಸಿಕ್ಸರ್​ನಿಂದ ಒಟ್ಟು 74 ರನ್​ಗಳಿಸಿ ಆಡುವಾಗ ಕುಲ್​ದೀಪ್ ಯಾದವ್ ಬ್ರೇಕ್ ಹಾಕಿದರು. ವಿಕೆಟ್ ಕೀಪರ್ ಹೆನ್ರಿಚ್ ಕ್ಲಾಸಿನ್ 2 ಫೋರ್, 2 ಸಿಕ್ಸರ್​ನಿಂದ 19 ಬಾಲ್​ನಲ್ಲಿ 32 ರನ್​ಗಳನ್ನು ಗಳಿಸಿ ಆಡುವಾಗ ಕ್ಯಾಚ್ ಕೊಟ್ಟು ಹೊರ ನಡೆದರು. ಹೈದ್ರಾಬಾದ್ ಬ್ಯಾಟಿಂಗ್​ ಬಲದ ಮೇಲೆ ಆಕ್ರಮಣ ಮಾಡಿದ ಮಿಚೆಲ್ ಸ್ಟಾರ್ಕ್ 5 ವಿಕೆಟ್​ ಹಾಗೂ ಕುಲ್​ದೀಪ್ ಯಾದವ್ 3 ವಿಕೆಟ್​ ಪಡೆದು ನೆರವಾದರು. ಇದರಿಂದ ಹೈದ್ರಾಬಾದ್ 18.4 ಓವರ್​ಗಳಲ್ಲಿ ಕೇವಲ 163 ರನ್​ಗಳ ಟಾರ್ಗೆಟ್ ನೀಡಿತ್ತು.

ಈ ಸುಲಭ ಟಾರ್ಗೆಟ್ ಹಿಂದೆ ಬಿದ್ದ ಡೆಲ್ಲಿ ಕ್ಯಾಪಿಟಲ್ಸ್​ ಬೇಗನೇ ವಿಜಯಮಾಲೆ ಧರಿಸಿಕೊಂಡಿತು. ಡೆಲ್ಲಿ ಪರವಾಗಿ ಓಪನರ್ ಆಗಿ ಕ್ರೀಸ್​ಗೆ ಆಗಮಿಸಿದ ಫಾಫ್​ ಡುಪ್ಲೆಸಿಸ್ ಅರ್ಧ ಶಕತ ಹಾಗೂ ಮೆಕ್‌ಗುರ್ಕ್ 38 ರನ್​ಗಳಿಂದ ಉತ್ತಮ ಆರಂಭ ಒದಗಿಸಿದರು. ಈ ಜೋಡಿಯನ್ನು ಜೀಶನ್ ಅನ್ಸಾರಿ ಮುರಿದರು. ನಂತರ ಬ್ಯಾಟಿಂಗ್​ಗೆ ಆಗಮಿಸಿದ ಪೊರೆಲ್,​ ತಂಡ ವಿಜಯ ಸಾಧಿಸುವವರೆಗೂ ಕ್ರೀಸ್​ನಲ್ಲೇ ಇದ್ದರು. ಕನ್ನಡಿಗ ಕೆ.ಎಲ್ ರಾಹುಲ್ ಅವರು ಕೇವಲ 5 ಎಸೆತದಲ್ಲಿ 2 ಫೋರ್, 1 ಸಿಕ್ಸರ್​ ನೆರವಿನಿಂದ 15 ರನ್​ ಬಾರಿಸಿದರು. ಇವರ ನಂತರ ಬಂದ ಸ್ಟಬ್ಸ್ 21 ರನ್​ಗಳಿಂದ ತಂಡವನ್ನು ದಡ ಸೇರಿಸಿದರು. ಡೆಲ್ಲಿ ಕ್ಯಾಪಿಟಲ್ಸ್ 16 ಓವರ್​​ನಲ್ಲಿ 3 ವಿಕೆಟ್​ ನಷ್ಟಕ್ಕೆ 166 ರನ್​ ಗಳಿಸಿ ಜಯಶಾಲಿ ಆಯಿತು.​

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ