ಅಮೆರಿಕಾ ಅಧ್ಯಕ್ಷೀಯ ಚುನಾವಣೆಗೆ ಕ್ಷಣಗಣನೆ; ಯಾರ ಪಾಲಿಗೆ ವೈಟ್​ಹೌಸ್​ ಅರಸೊತ್ತಿಗೆ?

ಜಗತ್ತಿನ ಎಲ್ಲ ರಾಷ್ಟ್ರಗಳು ತಮ್ಮ ದೇಶದ ಚುನಾವಣೆಯನ್ನು ಬಿಟ್ಟು ಬೇರಾವ ರಾಷ್ಟ್ರದ ಚುನಾವಣೆಯ ಬಗ್ಗೆ ಕುತೂಹಲ ಇಟ್ಟುಕೊಳ್ಳುತ್ತದೆ ಅಂದ್ರೆ ಅದು ಅಮೆರಿಕಾದ ಅಧ್ಯಕ್ಷೀಯ ಚುನಾವಣೆ. ಈ ಚುನಾವಣೆಯನ್ನು ಇಡೀ ಜಗತ್ತೇ ತುದಿಗಾಲಿನ ಮೇಲೆ ನಿಂತುಕೊಂಡು ನೋಡುತ್ತದೆ. ಯಾರ ಪಾಲಿಗೆ ವೈಟ್​ಹೌಸ್ ಗದ್ದುಗೆ ಒಲಿಯಲಿದೆ ಎಂದು ಕುತೂಹಲ ಕಣ್ಣಿನಿಂದ ನೋಡುತ್ತಿರುತ್ತಾರೆ. ನಾಲ್ಕು ವರ್ಷಗಳ ಜೋ ಬೈಡನ್ ಆಡಳಿತ ಕೊನೆಯಾಗಲು, ಹೊಸ ಅಧ್ಯಕ್ಷರು ಬಂದು ಕೂರಲು ಇನ್ನೇನು ಕೆಲವೇ ದಿನಗಳು ಬಾಕಿ ಇವೆ. ನಾಳೆ ಅಂದ್ರೆ ನವೆಂಬರ್ 5 ರಂದು ಅಮೆರಿಕಾದಲ್ಲಿ ಅಧ್ಯಕ್ಷೀಯ ಚುನಾವಣೆಗೆ ಮತದಾನ ನಡೆಯಲಿದೆ.

ಈ ಮತದಾನ ನಡುವೆಯೇ ಈ ಬಾರಿ ಅಮೆರಿಕಾ ತನ್ನ ಮೊದಲ ಮಹಿಳಾ ಅಧ್ಯಕ್ಷೆಯನ್ನು ಪಡೆಯುತ್ತೋ ಇಲ್ಲ ಟ್ರಂಪ್​ರನ್ನು ಎರಡನೇ ಬಾರಿಯಾಗಿ ಅಧ್ಯಕ್ಷರನ್ನಾಗಿ ಪಡೆಯುತ್ತೋ ಅನ್ನೋ ಎನ್ನುವ ಕುತೂಹಲಗಳು ಮೊಳಕೆಯೊಡೆದಿವೆ. ಈ ಎಲ್ಲಾ ಕುತೂಹಲಗಳಿಗೂ ನಾಳೆ ಅಂದ್ರೆ ನವೆಂಬರ್ 5 ರಂದು ಉತ್ತರ ದೊರಕಲಿದೆ.
ಈ ಬಾರಿಯ ಚುನಾವಣೆ ಈ ಹಿಂದೆ ನಡೆದ ಚುನಾವಣೆಗಿಂತ ರಣರೋಚಕವಾಗಿದೆ. ಟ್ರಂಪ್ ಹಾಗೂ ಕಮಲಾ ಹ್ಯಾರಿಸ್ ಮಧ್ಯೆ ನೆಕ್​ ಟು ನೆಕ್ ಫೈಟ್​ ಒಂದು ಗೋಚರವಾಗುತ್ತಿದೆ. ಎಲ್ಲಾ ಓಪಿನಿಯನ್ ಪೋಲ್​ಗಳು ಸ್ಪಷ್ಟವಾದ ಫಲಿತಾಂಶವನ್ನು ಕಟ್ಟಿಕೊಡುವಲ್ಲಿ ವಿಫಲವಾಗಿವೆ.

ಇದನ್ನೂ ಓದಿ:ಹಬ್ಬದ ಸಂಭ್ರಮದಂದೇ ಭಾರತ-ಚೀನಾ ಗಡಿಯಲ್ಲಿ ಮಹತ್ವದ ಬೆಳವಣಿಗೆ.. 2 ದೇಶಗಳ ನಿರ್ಧಾರ ಸ್ವಾಗತಿಸಿದ USA

ಹಾಗಿದ್ರೆ ಚುನಾವಣಾ ಸಮೀಕ್ಷೆಗಳು ಏನು ಹೇಳಲಿವೆ. ಯಾರ ಪಾಲಿಗೆ ವೈಟ್​ಹೌಸ್​ನ ಗದ್ದುಗೆ ಒಲಿದು ಬರಲಿದೆ. ಅಮೆರಿಕಾದ ಮೊದಲ ಮಹಿಳಾ ಅಧ್ಯಕ್ಷೆಯಯಾಗುವಲ್ಲಿ ಕಮಲಾ ಹ್ಯಾರಿಸ್ ಯಶಸ್ವಿಯಾಗುತ್ತಾರಾ. ಎರಡನೇ ಬಾರಿ ಅಧ್ಯಕ್ಷ ಗಾದಿ ಏರುವಲ್ಲಿ ಟ್ರಂಪ್ ಸಫಲರಾಗುತ್ತಾರಾ?

ಒಂದು ಕಡೆ ಅಟ್ಲಾಸ್ ಇಂಟೆಲ್ ನಡೆಸಿದ ಚುನಾವಣೆ ಸಮೀಕ್ಷೆಯಲ್ಲಿ ಈ ಬಾರಿ ಅಮೆರಿಕಾ ಪ್ರಜೆಗಳು ಡೊನಾಲ್ಡ್ ಟ್ರಂಪ್​ಗೆ ಮಣೆ ಹಾಕುವುದು ನಿಶ್ಚಿತ ಎಂದೇ ಹೇಳುತ್ತಿದೆ. ಕನಿಷ್ಠ ಏಳು ರಾಜ್ಯಗಳಲ್ಲಿ ಡೊನಾಲ್ಡ್ ಟ್ರಂಪ್ ಕಮಲಾ ಹ್ಯಾರಿಸ್​ಗೆ ಕಂಟಕವಾಗಿ ಕಾಡುತ್ತಾರೆ ಎಂದು ಈ ಚುನಾವಣಾ ಪೂರ್ವ ಸಮೀಕ್ಷೆ ವರದಿ ಮಾಡಿದೆ. ಸರ್ವೇ ಹೇಳುವ ಪ್ರಕಾರ ಟ್ರಂಪ್​ಗೆ ಅರಿಜೊನಾದಲ್ಲಿ ಶೇಕಡಾ 52.3 ರಷ್ಟು ಬೆಂಬಲ ದೊರಕಿದರೆ ಕಮಲಾ ಹ್ಯಾರಿಸ್​ಗೆ 45.8 ರಷ್ಟು ಬೆಂಬಲ ದೊರೆಯಲಿದೆ. ನೆವಾಡದಲ್ಲಿ ಟ್ರಂಪ್​ ಶೇಕಡಾ 51.2ರಷ್ಟು ಬೆಂಬಲ ದಕ್ಕಿಸಿಕೊಂಡರೆ ಕಮಲಾ ಹ್ಯಾರಿಸ್ 46 ರಷ್ಟು ಬೆಂಬಲ ದಕ್ಕಿಸಿಕೊಂಡಿದ್ದಾರೆ. ನಾರ್ಥ್​ ಕ್ಯಾರೊಲಿನಾದಲ್ಲಿ ಟ್ರಂಪ್​ ಶೇಕಡಾ 50.5 ರಷ್ಟು ಬೆಂಬಲವನ್ನು ಹೊಂದಿದ್ದರೆ,. ಹ್ಯಾರಿಸ್​ 47.1ರಷ್ಟು ಬೆಂಬಲ ಹೊಂದಿದ್ದಾರೆ. ಹೀಗೆ ಗಾರ್ಜಿಯಾ ಮಿಚಿಗನ್ ಪೆನ್ಸಿಲ್​ನ್ವಿಯಾ, ವಿಸ್ಕಾನ್ಸಿನ್​ನಲ್ಲಿಯೂ ಕೂಡ ಟ್ರಂಪ್​​ಗೆ ಬಹುದೊಡ್ಡ ಬೆಂಬಲ ದೊರೆಯಲಿದೆ ಈ ಎಳು ರಾಜ್ಯಗಳಲ್ಲಿ ಟ್ರಂಪ್ ದೊಡ್ಡದಾಗಿ ಸಾಧನೆ ಮಾಡಲಿದ್ದು, ಕಮಲಾ ಹ್ಯಾರಿಸ್​ಗೆ ಹಿನ್ನಡೆ ಆಗಲಿದೆ ಎಂದು ಸರ್ವೆ ಹೇಳಿದೆ.

ಇದನ್ನೂ ಓದಿ: ಅರಬ್ ಅಮೆರಿಕನ್ ಮತಗಳ ಮೇಲೆ ಕಣ್ಣು; ಮಿಚಿಗನ್​ನಲ್ಲಿ ಹ್ಯಾರಿಸ್, ಟ್ರಂಪ್ ಭರ್ಜರಿ ಕ್ಯಾಂಪೇನ್

ಇನ್ನೂ ಎನ್​ವೈಟಿ ಸೈನಾ ಕಾಲೇಜ್ ನಡೆಸಿರುವ ಸಮೀಕ್ಷೆ ಪ್ರಕಾರ ಎರಡು ಬದಿ ನೆಕ್​ ಟು ನೆಕ್ ಫೈಟ್ ಆಗಲಿದೆ ಅಂತ ಇದೆ. ಈ ಹಿಂದೆ ನಡೆದ ಎಲ್ಲಾ ಚುನಾವಣೆಗಳಿಗಿಂತ ಈ ಚುನಾವಣೆ ಅತ್ಯಂತ ರಣರೋಚಕ ಫೈಟ್​ ಕಟ್ಟಿಕೊಡಲಿದೆ ಎಂದು ಸೈನಾ ಕಾಲೇಜ್​ನ ಸಮಿಕ್ಷೆ ಹೇಳಿದೆ. ಹೆಚ್ಚು ಕಡಿಮೆ ಶೇಕಡಾ 40 ರಷ್ಟು ಜನರು ನಾವು ಈಗಾಗಲೇ ಕಮಲಾ ಹ್ಯಾರಿಸ್​ಗೆ ಮತ ಹಾಕಿರುವುದಾಗಿ ಹೇಳಿಕೊಂಡಿದ್ದಾರೆ. ಹೀಗೆ ಈಗಾಗಲೇ ವೋಟು ಮಾಡಿದವರ ವಿಚಾರದಲ್ಲಿ ಟ್ರಂಪ್ ಕೊಂಚ ಮುಂದೆ ಇರುವುದು ಈ ಒಂದು ಸಮೀಕ್ಷೆಯಲ್ಲಿ ಸ್ಪಷ್ಟವಾಗಿದೆ.

ಒಟ್ಟಾರೆ ಈ ಬಾರಿ ಅಮೆರಿಕಾದ ಅಧ್ಯಕ್ಷೀಯ ಚುನಾವಣೆ ಹೊಸದೊಂದು ರೋಚಕತೆ ಪಡೆಯುವದಂತೂ ಪಕ್ಕಾ ಆಗಿದೆ. ಯಾರು ಅಧ್ಯಕ್ಷೀಯ ಗಾದಿ ಏರಲಿದ್ದಾರೆ. ಯಾರಿಗೆ ಅಮೆರಿಕಾದ ಮತದಾರ ಪ್ರಭು ಜೈ ಎನ್ನಲಿದ್ದಾರೆ ಅನ್ನೋದರ ಸ್ಪಷ್ಟ ಚಿತ್ರಣ ನವೆಂಬರ್ 5 ರಂದು ಗೊತ್ತಾಗಲಿದೆ. ಟ್ರಂಪ್​ ಎರಡನೇಯ ಅವಧಿಯೋ. ಕಮಲ ಹ್ಯಾರಿಸ್ ಅಮೆರಿಕಾದ ಮೊದಲ ಮಹಿಳಾ ಅಧ್ಯಕ್ಷೆಯೋ ಅನ್ನೋದರ ಸ್ಪಷ್ಟನೆಗೆ ಇನ್ನೂ ಕೆಲವು ಗಂಟೆಗಳು ಕಾಯಲೇಬೇಕಿದೆ.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ