ಯುವರಾಜನಿಗೆ ಇಂಗ್ಲೆಂಡ್​ನಲ್ಲಿ ಐದು ಚಾಲೆಂಜ್.. 18 ವರ್ಷಗಳ ಆ ಕೊರಗಿಗೆ ಬೀಳುತ್ತಾ ಬ್ರೇಕ್..?

ಟೀಮ್​ ಇಂಡಿಯಾ ಟೆಸ್ಟ್​ ತಂಡದಲ್ಲಿ ಹೊಸ ಪರ್ವ ಆರಂಭಕ್ಕೆ ಕೌಂಟ್​​ಡೌನ್ ಶುರುವಾಗಿದೆ. ಹೊಸ ತಂಡ, ಹೊಸ ಆಟಗಾರರು, ಹೊಸ ಹುರುಪಿನೊಂದಿಗೆ ಮಹತ್ವದ ಸರಣಿಗೆ ಹೊಸ ನಾಯಕ ಸಜ್ಜಾಗಿದ್ದಾರೆ. ಸಿಂಹಾಸನ ಏರಿರುವ ನೂತನ ಸಾರಥಿ ​ಗಿಲ್​ ಇಂಗ್ಲೆಂಡ್​ ಪ್ರವಾಸದಲ್ಲಿ ತಂಡವನ್ನು ಮುನ್ನಡೆಸಲಿದ್ದಾರೆ. ಭಾರತ ತಂಡದ ನೂತನ ಟೆಸ್ಟ್​ ಸಾರಥಿಗೆ ಮೊದಲ ಪ್ರವಾಸದಲ್ಲೇ ಕಠಿಣ ಸವಾಲು ಎದುರಾಗಲಿದೆ. ಅಗ್ನಿಪರೀಕ್ಷೆಯ ಕಣದಲ್ಲಿರೋ ಗಿಲ್​ಗೆ ಪ್ರಮುಖವಾಗಿ 5 ಚಾಲೆಂಜ್​​ಗಳು ಎದುರಾಗಿವೆ.

ಚಾಲೆಂಜ್​ ನಂ.1: ನಾಯಕತ್ವದ ನಿರ್ವಹಣೆ

ನಾಯಕನಾಗಿ ಗಿಲ್​ ಐಪಿಎಲ್​ನಲ್ಲಿ ತಂಡ ಮುನ್ನಡೆಸಿದ್ದಾರೆ. ಐಪಿಎಲ್​ನ ಆಟವೇ ಬೇರೆ, ರಿಯಲ್​ ಕ್ರಿಕೆಟ್​ ಟೆಸ್ಟ್​ನ ಆಟವೇ ಬೇರೆ. ಇದು 5 ದಿನಗಳ ಸುದೀರ್ಘ ಗೇಮ್​. ಇಲ್ಲಿ ತಾಳ್ಮೆ ಸಿಕ್ಕಾಪಟ್ಟೆ ಮುಖ್ಯ. ನಾಯಕ ವಿಚಲಿತನಾದ್ರೆ ಇಡೀ ತಂಡಕ್ಕೆ ಏಟು ಬೀಳುತ್ತೆ. ರೆಡ್​ ಬಾಲ್​ ಫಾರ್ಮೆಟ್​ಗೆ ಬಂದ್ರೆ ಒಂದು ರಣಜಿ ಪಂದ್ಯದಲ್ಲಿ ಮಾತ್ರ ಗಿಲ್​ ನಾಯಕತ್ವ ನಿಭಾಯಿಸಿದ್ದಾರೆ. ಇದೀಗ ಒತ್ತಡದ​​ ಸರಣಿಯಲ್ಲಿ ಮೊದಲ ಬಾರಿಗೆ ತಂಡದ ನಾಯಕತ್ವದ ಜವಾಬ್ದಾರಿ ಗಿಲ್​ ಹೆಗಲೇರಿದೆ. ಒತ್ತಡಕ್ಕೆ ಒಳಗಾಗದೇ ಸಮರ್ಥವಾಗಿ ನಿರ್ವಹಿಸೋದೇ ಗಿಲ್​ಗೆ ಬಿಗ್​​ ಚಾಲೆಂಜ್​ ಆಗಲಿದೆ.

ಇದನ್ನೂ ಓದಿ: ವಿಜಯ್ ಮಲ್ಯಗೆ ತಪ್ಪದ ಸಂಕಷ್ಟಗಳು.. ಸಾಲ, ಬಡ್ಡಿ, ಚಕ್ರ ಬಡ್ಡಿಯ ಅಸಲಿ ಲೆಕ್ಕಾಚಾರ ಇಲ್ಲಿದೆ..!

ಚಾಲೆಂಜ್​ ನಂ.2: ವಿದೇಶದಲ್ಲಿ ಬ್ಯಾಟಿಂಗ್​​ ವೈಫಲ್ಯ

ಗಿಲ್ ಭಾರತದಲ್ಲಿ ಟೆಸ್ಟ್​ ಕ್ರಿಕೆಟ್​ನಲ್ಲಿ ಸಾಲಿಡ್​ ರೆಕಾರ್ಡ್​ ಹೊಂದಿದ್ದಾರೆ. ವಿದೇಶಿ ಪಿಚ್​ಗಳಲ್ಲಿ ಶುಭ್​ಮನ್​ ಸೈಲೆಂಟ್​ ಆಗಿದ್ದಾರೆ. ವಿದೇಶದಲ್ಲಿ ಕೇವಲ 27.53ರ ಸರಾಸರಿ ಹೊಂದಿರೋ ಗಿಲ್​​, ಬಾಂಗ್ಲಾದೇಶ ವಿರುದ್ಧ ಒಂದು ಶತಕ ಸಿಡಿಸಿದ್ದಾರಷ್ಟೇ. ಇದೀಗ ನಾಯಕನ ಪಟ್ಟವೇರಿರುವ ಗಿಲ್​, ವಿದೇಶದಲ್ಲಿ ಬ್ಯಾಟಿಂಗ್​ ಸಾಮರ್ಥ್ಯವನ್ನ ಪ್ರೂವ್​ ಮಾಡಬೇಕಿದೆ. ಗಿಲ್​ ಟೀಕಾಕಾರರಿಗೆ ಆಹಾರ ಆಗೋದು ಪಕ್ಕಾ.

ಚಾಲೆಂಜ್​ ನಂ.3: ಇಂಗ್ಲೆಂಡ್​​ನಲ್ಲಿ ಟೆಸ್ಟ್​ ಸರಣಿ ಗೆಲುವು

18 ವರ್ಷ.. ಬರೋಬ್ಬರಿ 18 ವರ್ಷಗಳಿಂದ ಆಂಗ್ಲರ ನೆಲದಲ್ಲಿ ಟೆಸ್ಟ್​ ಸರಣಿ ಗೆಲುವಿಗೆ ಟೀಮ್​ ಇಂಡಿಯಾ ಹರಸಾಹಸ ಪಡ್ತಿದೆ. 2011, 2014, 2018, 2022ರ ಪ್ರವಾಸದಲ್ಲಿ ಸೋಲುಂಡಿದೆ. ಇಂಗ್ಲೆಂಡ್​​ ನೆಲದ ಸತತ ಸೋಲಿನ ಇತಿಹಾಸವನ್ನ ಈ ಬಾರಿಯ ಪ್ರವಾಸದಲ್ಲಿ ಟೀಮ್​ ಇಂಡಿಯಾ ಬದಲಾಯಿಸಬೇಕಿದೆ. 18 ವರ್ಷಗಳ ಇಂಗ್ಲೆಂಡ್​ನಲ್ಲಿ ಬಳಿಕ ಟೆಸ್ಟ್​ ಸರಣಿ ಗೆಲ್ಲೋ ಬಿಗ್​ ಟಾಸ್ಕ್​ ಗಿಲ್​ ಮುಂದಿದೆ.

ಇದನ್ನೂ ಓದಿ: BCCI ಮೇಲೆ ಅಭಿಮಾನಿಗಳು ಕೋಪ.. ಕೊಹ್ಲಿ, ರೋಹಿತ್​ ಅಂದ್ರೆ ಯಾಕಿಷ್ಟು ನಿರ್ಲಕ್ಷ್ಯ..?

ಚಾಲೆಂಜ್​ ನಂ.4: ಯುವ ತಂಡದ ಮ್ಯಾನೇಜ್​ಮೆಂಟ್​

ಕೊಹ್ಲಿ, ರೋಹಿತ್​, ಅಶ್ವಿನ್​ರಂತ ಅನುಭವಿಗಳು ಟೆಸ್ಟ್​ ತಂಡದಲ್ಲಿಲ್ಲ. ಟೆಸ್ಟ್​ ತಂಡದಲ್ಲಿರೋ ಬಹುತೇಕರು ಯುವ ಆಟಗಾರರೇ ಇದ್ದಾರೆ. ಅದ್ರಲ್ಲಿ ಕೆಲವರರಿಗೆ ಇದು ಮೊದಲ ಇಂಗ್ಲೆಂಡ್​ ಟೂರ್. ಇಂತಹ ಸಮಯದಲ್ಲಿ ಯುವ ನಾಯಕ ಗಿಲ್​ಗೆ ನೆರವಾಗಲು ಕೊಹ್ಲಿ, ರೋಹಿತ್​​ರಂತ ಮಾಜಿ ನಾಯಕರು ತಂಡದಲ್ಲಿಲ್ಲ. ಹೀಗಾಗಿ ಯುವ ತಂಡವನ್ನ ಆನ್​ಫೀಲ್ಡ್​ ಹಾಗೂ ಆಫ್​ ದ ಫೀಲ್ಡ್​ನಲ್ಲಿ ಮ್ಯಾನೇಜ್​ ಮಾಡೋ ದೊಡ್ಡ ಸವಾಲು ಗಿಲ್​ಗೆ ಎದುರಾಗಲಿದೆ.

ಚಾಲೆಂಜ್​ ನಂ.5: ಟೆಸ್ಟ್​ ಪ್ರದರ್ಶನ ಸುಧಾರಣೆ ಮತ್ತು WTC ಫೈನಲ್​​

ಕೊಹ್ಲಿ ನಾಯಕತ್ವದಲ್ಲಿ ಮೊದಲ 2 ಆವೃತ್ತಿಗಳಲ್ಲಿ ವಿಶ್ವ ಟೆಸ್ಟ್​ ಚಾಂಪಿಯನ್​ಶಿಪ್​ ಪೈನಲ್​ಗೆ ಎಂಟ್ರಿ ಕೊಟ್ಟಿದ್ದ ಟೀಮ್​ ಇಂಡಿಯಾ ಈ ಬಾರಿ ಮುಗ್ಗರಿಸಿದೆ. ಕಳೆದ 2 ಟೆಸ್ಟ್​ ಸರಣಿಗಳಲ್ಲಂತೂ ಹೀನಾಯ ಪ್ರದರ್ಶನ ನೀಡಿದೆ. ತವರಿನಲ್ಲಿ 3-0 ಅಂತರದಲ್ಲಿ ನ್ಯೂಜಿಲೆಂಡ್​​ ವಿರುದ್ಧ ಕ್ಲೀನ್​ ಸ್ವೀಪ್​ ಮುಖಭಂಗ ಅನುಭವಿಸಿದ ಟೀಮ್​ ಇಂಡಿಯಾ, ಆಸ್ಟ್ರೇಲಿಯಾದಲ್ಲಿ 1-3 ಅಂತರದಲ್ಲಿ ಸರಣಿ ಸೋತಿದೆ. ಱಂಕಿಂಗ್​ನಲ್ಲಿ 4ನೇ ಸ್ಥಾನಕ್ಕೆ ಕುಸಿದಿದೆ. ತಂಡದ ಪ್ರದರ್ಶನದಲ್ಲಿ ಸುಧಾರಣೆ ಕಾಣಬೇಕಿದೆ. ಜೊತೆಗೆ 2027ರ WTC ಫೈನಲ್​ಗೆ ತಂಡವನ್ನು ಕ್ವಾಲಿಫೈ ಮಾಡಬೇಕಿದೆ.

ಒಟ್ಟಿನಲ್ಲಿ ಮೊದಲ ಟೆಸ್ಟ್​​ ಸರಣಿಯಲ್ಲೇ ಯುವ ನಾಯಕ ಗಿಲ್​​ಗೆ ಕಠಿಣ ಸವಾಲುಗಳು ಎದುರಾಗಲಿವೆ. ಆರಂಭದಲ್ಲೇ ಎದುರಾಗಿರೋ ಅಗ್ನಿಪರೀಕ್ಷೆಗಳನ್ನ ಗಿಲ್​ ಗೆಲ್ತಾರಾ? ಕಿಂಗ್​​ ಕೊಹ್ಲಿಯಂತೆ, ಪ್ರಿನ್ಸ್​ ಟೆಸ್ಟ್​ನಲ್ಲಿ​ ಸಕ್ಸಸ್​ಫುಲ್​ ಕ್ಯಾಪ್ಟನ್​ ಎನಿಸಿಕೊಳ್ತಾರಾ? ಕಾದು ನೋಡೋಣ.

ಇದನ್ನೂ ಓದಿ: ಗಾಯಕಿ ಮಂಗ್ಲಿಗೆ ಬಿಗ್ ಶಾಕ್‌.. ಬರ್ತ್‌ ಡೇ ಪಾರ್ಟಿಗೆ ಬಂದವರು ಯಾರು? ಪೊಲೀಸರಿಗೆ ಸಿಕ್ಕಿದ್ದೇನು?

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.30ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ