ಟೀಂ ಇಂಡಿಯಾಗೆ ಮುಖಭಂಗ.. ಈ ಐದು ತಪ್ಪುಗಳಿಂದ ಗಿಲ್​ ಪಡೆಗೆ ಸೋಲು..

ಲೀಡ್ಸ್​​ ಟೆಸ್ಟ್​ ಪಂದ್ಯದ ಮೊದಲ ದಿನದಿಂದ ಟೀಮ್​ ಇಂಡಿಯಾ ಪಾರಮ್ಯ ಮೆರೆದಿತ್ತು. ಆದ್ರೆ ಅಂತ್ಯದಲ್ಲಿ ಸೋತು ಸುಣ್ಣವಾಗಿದೆ. ಇಂಗ್ಲೆಂಡ್​​ ದಾಖಲೆಯ ಜಯ ಸಾಧಿಸಿದೆ. ಗೆಲ್ಲೋ ಹಂತದಲ್ಲಿದ್ದ ಟೀಮ್​ ಇಂಡಿಯಾ ಸೋಲಿನ ಪ್ರಪಾತಕ್ಕೆ ಬಿದ್ದಿದ್ದು ಹೇಗೆ? ಶುಭ್​ಮನ್​ ಗಿಲ್​ ಪಡೆ ಎಡವಿದ್ದೆಲ್ಲಿ? ಅನ್ನೋ ವಿವರ ಇಲ್ಲಿದೆ.

ಇಂಗ್ಲೆಂಡ್​ ಪ್ರವಾಸದ ಮೊದಲ ಟೆಸ್ಟ್​ನಲ್ಲೇ ಟೀಮ್​ ಇಂಡಿಯಾ ಫೇಲ್​ ಆಗಿದೆ. ಪಂದ್ಯದ ಮೊದಲ ದಿನದಿಂದಲೂ ಡಾಮಿನೇಟಿಂಗ್​​ ಪರ್ಫಾಮೆನ್ಸ್​ ನೀಡಿದ್ದ ಟೀಮ್​ ಇಂಡಿಯಾನೇ ಗೆಲ್ಲೋ ಫೇವರಿಟ್​ ಅನಿಸಿತ್ತು. ಆದ್ರೆ, 5ನೇ ದಿನದಾಟದ ಅಂತ್ಯಕ್ಕೆ ಸೋಲಿಗೆ ಶರಣಾಗಿದೆ. ಇದಕ್ಕೆ ಹಲವು ಕಾರಣಗಳಿವೆ. ಪ್ರಮುಖವಾಗಿ ಈ 5 ಕಾರಣಗಳು ಗೆಲುವಿನ ಕನಸಿಗೆ ತಣ್ಣೀರೆರಚಿದ್ವು.

ರೀಸನ್​ ನಂ.1: ಕ್ಯಾಚ್​ ಡ್ರಾಪ್​ ಸುರಿಮಳೆ

CATCHES WIN MATCHES... ಅನ್ನೋ ಮಾತಿನ ಮಹತ್ವ ಟೀಮ್​ ಇಂಡಿಯಾ ಆಟಗಾರರಿಗೆ ತಿಳಿದಂತೆ ಕಾಣಲಿಲ್ಲ. ಲೀಡ್ಸ್​ ಟೆಸ್ಟ್​ನಲ್ಲಿ ಒಂದಾ.. ಎರಡಾ.. ಮೊದಲ ಇನ್ನಿಂಗ್ಸ್​​ನಲ್ಲಿ ಬರೋಬ್ಬರಿ 6 ಕ್ಯಾಚ್​, ಸೆಕೆಂಡ್​​​ ಇನ್ನಿಂಗ್ಸ್​ನಲ್ಲಿ ಒಂದು ಕ್ಯಾಚ್​.. ಒಟ್ಟು 7 ಕ್ಯಾಚ್​ ಡ್ರಾಪ್​ ಮಾಡಿದ್ರು. ಇನ್ನು ಹಾಫ್​ ಚಾನ್ಸ್​ಗಳನ್ನ ಕನ್ವರ್ಟ್​​ ಮಾಡೋ ಪ್ರಯತ್ನವನ್ನೇ ಮಾಡಲಿಲ್ಲ. ಬಿಟ್ಟ ಎಲ್ಲಾ ಕ್ಯಾಚ್​ಗಳು ದುಬಾರಿಯಾದ್ವು.

ಇದನ್ನೂ ಓದಿ: ಗಿಲ್ ಪಡೆಗೆ ಭಾರೀ ಮುಖಭಂಗ.. ಚೆನ್ನಾಗಿಯೇ ಆಡಿ, ಕೊನೆಯ ದಿನ ಫೇಲ್ ಆದ ಟೀಂ ಇಂಡಿಯಾ..!

ರೀಸನ್​ ನಂ.2: ಲೋವರ್​ ಆರ್ಡರ್​​ ಬ್ಯಾಟಿಂಗ್​ ವೈಫಲ್ಯ

ಟೀಮ್​ ಇಂಡಿಯಾದ ಟಾಪ್​ ಆರ್ಡರ್​​ ಬ್ಯಾಟರ್​ಗಳು ಬೊಂಬಾಟ್​ ಪ್ರದರ್ಶನ ನೀಡಿದ್ರೆ, ಲೋವರ್​ ಆರ್ಡರ್​ ಬ್ಯಾಟರ್​​ಗಳು ಅಟ್ಟರ್​ಫ್ಲಾಪ್​ ಶೋ ನೀಡಿದ್ರು. ಮೊದಲ ಇನ್ನಿಂಗ್ಸ್​​ನಲ್ಲಿ 3 ವಿಕೆಟ್​ ನಷ್ಟಕ್ಕೆ 430 ರನ್​ಗಳಿಸಿದ್ದ ಟೀಮ್​ ಇಂಡಿಯಾ ನಂತರ 41 ರನ್​ ಅಂತರದಲ್ಲಿ 7 ವಿಕೆಟ್​ ಕಳೆದುಕೊಳ್ತು. 2ನೇ ಇನ್ನಿಂಗ್ಸ್​​​ನಲ್ಲಿ 4 ವಿಕೆಟ್​ ನಷ್ಟಕ್ಕೆ 333 ರನ್​ಗಳಿಸಿದ್ದ ಟೀಮ್​ ಇಂಡಿಯಾ ನಂತರ 31 ರನ್​ಗಳಿಸುಷ್ಟರಲ್ಲಿ ಆಲೌಟ್​ ಆಯ್ತು. ಲೋವರ್​ ಆರ್ಡರ್​ನ ವೈಫಲ್ಯ ಸೋಲಿಗೆ ಮತ್ತೊಂದು ಪ್ರಮುಖ ಕಾರಣ.

ರೀಸನ್​ ನಂ.3 : ಜಸ್​​​ಪ್ರಿತ್​​ ಬೂಮ್ರಾಗೆ ಸಿಗಲಿಲ್ಲ ಸಾಥ್​​

ಬೌಲಿಂಗ್​ ಯುನಿಟ್​ನಿಂದ ವೇಗಿ ಜಸ್​​ಪ್ರಿತ್​ ಬೂಮ್ರಾಗೆ ಸರಿಯಾಗಿ ಸಾಥ್​ ಸಿಗಲೇ ಇಲ್ಲ. ಒಂದು ಎಂಡ್​ನಿಂದ ಬೂಮ್ರಾ ಆಂಗ್ಲರ ಬ್ಯಾಟ್ಸ್​​ಮನ್​ಗಳ ಮೇಲೆ ಒತ್ತಡ ಹೇರ್ತಾ ಇದ್ರು. ಇನ್ನೊಂದು ಎಂಡ್​ನ ಬೌಲರ್​ಗಳು ಆ ಪ್ರೆಶರ್​ನ ರಿಲೀಸ್​ ಮಾಡೋ ತರ ಬೌಲಿಂಗ್​ ಮಾಡಿದ್ರು. ಅಪಾರ ನಿರೀಕ್ಷೆ ಇಟ್ಟುಕೊಂಡಿದ್ದ ಮೊಹಮ್ಮದ್​ ಸಿರಾಜ್​ ಅಂತೂ ಅಟ್ಟರ್​ ಫ್ಲಾಪ್​ ಆದ್ರು. ಇದು ಟೀಮ್​ ಇಂಡಿಯಾಗೆ ದೊಡ್ಡ ಮೈನಸ್​ ಆಯ್ತು.

ಇದನ್ನೂ ಓದಿ: ‘ಮಗಾ, ಪ್ರಸಿದ್ಧ್ ಚೆನ್ನಾಗಿ ಹೋಗ್ತಿದೆ..’ ಮೈದಾನದಲ್ಲಿ ರಾಹುಲ್​​ರ ಕನ್ನಡ ಕೇಳೋದೇ ಚೆಂದ..! VIDEO

ರೀಸನ್​ ನಂ.4: ಶುಭ್​​​ಮನ್​ ಗಿಲ್​ ನಾಯಕತ್ವ

ಮೊದಲ ಟೆಸ್ಟ್​ನಲ್ಲಿ ಬ್ಯಾಟಿಂಗ್​ನಲ್ಲಿ ಸಿಕ್ಕ ಸಕ್ಸಸ್​​ ನಾಯಕನಾಗಿ ಗಿಲ್​ಗೆ ಸಿಗಲಿಲ್ಲ. ನಾಯಕನಾಗಿ ಎರಡೂ ಇನ್ನಿಂಗ್ಸ್​ಗಳಲ್ಲಿ ಶುಭ್​ಮನ್​ ಗಿಲ್​ ಇಂಪ್ರೆಸ್ಸಿವ್​ ಅನಿಸಲೇ ಇಲ್ಲ. ಬೌಲಿಂಗ್​ ರೋಟೆಷನ್, ಫೀಲ್ಡ್​ ಪ್ಲೇಸ್​ಮೆಂಟ್​ ವಿಚಾರದಲ್ಲಿ ತೀವ್ರ ನಿರಾಸೆ ಮೂಡಿಸಿದ್ರು. ಅನುಭವದ ಕೊರತೆ ಎದ್ದು ಕಾಣ್ತಿತ್ತು. ಆಂಗ್ಲರಿಗೆ ಇದು ವರವಾದ್ರೆ ಟೀಮ್​ ಇಂಡಿಯಾಗೆ ಶಾಪವಾಯ್ತು.

ರೀಸನ್​ ನಂ.5: ಅಟ್ಯಾಕಿಂಗ್​ ಬ್ಯಾಟಿಂಗ್​ಗೆ ಇಂಡಿಯಾ ಸುಸ್ತು

ಇಂಗ್ಲೆಂಡ್​ ತಂಡಕ್ಕೆ ಟೀಮ್​ ಇಂಡಿಯಾ 371 ರನ್​ಗಳ ಬಿಗ್​ ಟಾರ್ಗೆಟ್​ ನೀಡಿತ್ತು. ಈ ಸವಾಲಿನ ಟಾರ್ಗೆಟ್​ ಅನ್ನ ಆಂಗ್ಲರು ಸುಲಭಕ್ಕೆ ಚೇಸ್​ ಮಾಡಿದ್ರು. ಇಂಗ್ಲೆಂಡ್​ ಅಟ್ಯಾಕಿಂಗ್​ ಆಟಕ್ಕೆ ಟೀಮ್​ ಇಂಡಿಯಾ ಸುಸ್ತು ಹೊಡೆದು ಬಿಡ್ತು. ಕೌಂಟರ್​ ಅಟ್ಯಾಕ್​ ನಡೆಸೋಕೆ ಪ್ಲಾನೇ ಇರಲಿಲ್ಲ. ಇಂಗ್ಲೆಂಡ್​ ಅಗ್ರೆಸ್ಸಿವ್​ ಆಟವಾಡುತ್ತೆ ಅನ್ನೋದು ಗೊತ್ತಿದ್ರೂ, ಪ್ಲ್ಯಾನ್​ ಬಿ ಇಲ್ಲದೇ ಕಣಕ್ಕಿಳಿದಿದ್ದು ಸೋಲಿಗೆ ಗುರಿ ಮಾಡಿತು.

ಇದನ್ನೂ ಓದಿ: ಮೊದಲ ಟೆಸ್ಟ್ ಸೋಲಿಗೆ ಹೊಣೆ ಮಾಡಿದ ಗಿಲ್.. ನಾಯಕ ಬೊಟ್ಟು ಮಾಡಿದ್ದು ಯಾರ ಮೇಲೆ..?

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.30ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ