ಸಾಯಿ ಸುದರ್ಶನ್ ಬ್ಯಾಟಿಂಗ್ ಆರ್ಭಟ.. ಮುಂದುವರೆದ ಗಿಲ್​ ಸೇನೆಯ ಗುಜರಾತ್ ಗೆಲುವಿನ ಓಟ

ರಾಜಸ್ಥಾನ್ ರಾಯಲ್ಸ್​ ವಿರುದ್ಧ ನಡೆದ 23ನೇ ಐಪಿಎಲ್​ ಪಂದ್ಯದಲ್ಲಿ ಓಪನರ್ ಸಾಯಿ ಸುದರ್ಶನ್ ಅವರ ಅದ್ಭುತವಾದ ಅರ್ಧಶತಕದ ನೆರವಿನಿಂದ ಗುಜರಾತ್ ಟೈಟನ್ಸ್ 58 ರನ್​ಗಳಿಂದ  ವಿಜಯಶಾಲಿಯಾಗಿದೆ.​ ಇನ್ನು ಟೂರ್ನಿಯಲ್ಲಿ ಶುಭ್​ಮನ್ ಗಿಲ್ ಪಡೆಯ ಗೆಲುವಿನ ಓಟ ಮುಂದುವರೆದಿದೆ.

ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದ ರಾಜಸ್ಥಾನ್ ರಾಯಲ್ಸ್​ ತಂಡದ ನಾಯಕ ಸಂಜು ಸ್ಯಾಮ್ಸನ್​ ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡರು. ಗುಜರಾತ್ ತಂಡವನ್ನು ಬ್ಯಾಟಿಂಗ್​ಗೆ ಆಹ್ವಾನ ಮಾಡಿದರು. ಓಪನರ್ ಆಗಿ ಕ್ರೀಸ್​ಗೆ ಆಗಮಿಸಿದ ಸಾಯಿ ಸುದರ್ಶನ್ ಹಾಗೂ ಗುಜರಾತ್ ನಾಯಕ ಗಿಲ್​ ಅವರ ಬ್ಯಾಟಿಂಗ್ ಆರಂಭ ಚೆನ್ನಾಗಿರಲಿಲ್ಲ.

ಗಿಲ್ ಕೇವಲ 2 ರನ್​ಗೆ ಕ್ಲೀನ್ ಬೋಲ್ಡ್​ ಆಗಿ ಹೊರ ನಡೆದರು. ಬಳಿಕ ಬಂದ ಜೋಶ್ ಬಟ್ಲರ್​ ಸಾಯಿ ಸುದರ್ಶನ್​ಗೆ ಒಳ್ಳೆಯ ಸಾಥ್ ಕೊಟ್ಟರು. ಇದರಿಂದ ಸಾಯಿ ಸುದರ್ಶನ್ ಅಮೋಘವಾದ ಅರ್ಧಶತಕ ಸಿಡಿಸಿದರು. 53 ಎಸೆತಗಳಲ್ಲಿ ಭರ್ಜರಿ 82 ರನ್​ ಗಳಿಸಿದರು. ಬಟ್ಲರ್ ಹಾಗೂ ಶಾರುಖ್​ ಖಾನ್ ತಲಾ 36 ರನ್​ಗೆ ವಿಕೆಟ್ ಒಪ್ಪಿಸಿದರು. ರಾಹುಲ್ ತೆವಾಟಿಯಾ 24, ರಶೀದ್ ಖಾನ್ ಅವರ 12 ರನ್​ಗಳ ಕಾಣಿಕೆಯಿಂದ ಗುಜರಾತ್ 6 ವಿಕೆಟ್​ಗೆ 218 ರನ್​ಗಳ ಬಿಗ್ ಟಾರ್ಗೆಟ್​ ನೀಡಿತ್ತು.

ಈ ಗುರಿ ಬೆನ್ನು ಹತ್ತಿದ್ದ ರಾಜಸ್ಥಾನ್ ಪಂದ್ಯದಲ್ಲಿ​ ಹೋರಾಡಿ ಕೊನೆಗೆ ತಲೆ ಬಾಗಿದೆ. ಕಳೆದ ಪಂದ್ಯದಲ್ಲಿ ಅರ್ಧಶತಕ ಸಿಡಿಸಿದ್ದ ರಾಜಸ್ಥಾನ್ ಪರ ಯಶಸ್ವಿ ಜೈಸ್ವಾಲ್ ಮತ್ತೆ ಬ್ಯಾಟಿಂಗ್​ನಲ್ಲಿ ವಿಫಲವಾಗಿ 6 ರನ್​ಗೆ ಔಟ್ ಆಗಿದ್ದಾರೆ. ಕ್ಯಾಪ್ಟನ್​ ಸಂಜು 41 ರನ್​ಗಳಿಂದ ಗುಜರಾತ್ ಬೌಲರ್​ಗಳನ್ನು ಕಾಡಿದರು. ಆದರೆ ನಿತೀಶ್​ ರಾಣ, ಶುಭಂ ದುಬೆ ತಲಾ ಒಂದೊಂದು ರನ್​ಗೆ ಔಟ್ ಆಗಿ ಹೊರ ನಡೆದರು. ರಿಯಾನ್ 26, ಧೃವ್ ಜುರೆಲ್ 05 ರನ್ನಿಂಗ್ ಬ್ಯಾಟಿಂಗ್​ ಚೆನ್ನಾಗಿ ಮಾಡಲಿಲ್ಲ. ಜೋಫ್ರಾ ಆರ್ಚರ್ 1 ರನ್​ಗೆ ಔಟ್ ಆದರು.

ಇದನ್ನೂ ಓದಿ: RCB ಜೊತೆ ರೋಹಿತ್ ಶರ್ಮಾ ಬ್ಯಾಟಿಂಗ್.. ಕಾಮೆಂಟರಿ ಮಾಡುವವರಿಗೂ ಬೇಸರನಾ, ಏನಂದ್ರು?

ಶಿಮ್ರಾನ್ ಹೆಟ್ಮೆಯರ್ ಅವರು ಕೊನೆಯಲ್ಲಿ ಭರ್ಜರಿ ಹೋರಾಟ ಮಾಡಿದರೂ ಬಾಲ್​ಗಳಿಗಿಂತ ರನ್​ಗಳು ಅಧಿಕವಾಗಿದ್ದರಿಂದ ತಂಡವನ್ನು ಗೆಲ್ಲಿಸುವಲ್ಲಿ ವಿಫಲವಾದರು. ಆದರೆ ಭರ್ಜರಿ ಬ್ಯಾಟಿಂಗ್ ಮಾಡಿದ ಹೆಟ್ಮೆಯರ್ 32 ಎಸೆತಗಳಿಗೆ 52 ರನ್​ ಗಳಿಸಿ ಪ್ರಸಿದ್ಧ್ ಕೃಷ್ಣ ಬೌಲಿಂಗ್​ನಲ್ಲಿ ಕ್ಯಾಚ್ ಕೊಟ್ಟರು. ಉಳಿದ ಬ್ಯಾಟರ್​ಗಳು ಬಂದಷ್ಟೇ ವೇಗವಾಗಿ ಪೆವಿಲಿಯನ್​ಗೆ ಹೆಜ್ಜೆ ಹಾಕಿದರು. ಹೀಗಾಗಿ ರಾಜಸ್ಥಾನ್ ರಾಯಲ್ಸ್ 19.2 ಓವರ್​ಗಳಲ್ಲಿ 159 ರನ್​ಗಳಿಗೆ ಆಲೌಟ್ ಆಗುವ ಮೂಲಕ ಸೋಲೋಪ್ಪಿಕೊಡಿತು. ಸದ್ಯ ಗುಜರಾತ್ ಟೈಟನ್ಸ್​ 5 ಪಂದ್ಯಗಳಲ್ಲಿ 4ರಲ್ಲಿ ಗೆಲುವು ಸಾಧಿಸಿ ತನ್ನ ವಿಜಯ ಪತಾಕೆ ಮುಂದುವರೆಸಿದೆ. ​

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ