ಆರಂಭಿಕ ಬ್ಯಾಟರ್​ಗಳ ಸ್ಫೋಟಕ ಬ್ಯಾಟಿಂಗ್​.. ಗುಜರಾತ್​​ನ ಗಿಲ್​​ ಸೇನೆಗೆ ಮತ್ತೊಂದು ವಿಜಯ

ಕೋಲ್ಕತ್ತಾ ನೈಟ್​ ರೈಡರ್ಸ್​ ಜೊತೆಗಿನ ಐಪಿಎಲ್​ ಪಂದ್ಯದಲ್ಲಿ ಗುಜರಾತ್ ಟೈಟನ್ಸ್ ಭರ್ಜರಿ ಗೆಲುವು ಸಾಧಿಸಿದೆ. ಓಪನರ್​ ಬ್ಯಾಟರ್​ಗಳಾದ ಸಾಯಿ ಸುದರ್ಶನ್ ಹಾಗೂ ಶುಭ್​ಮನ್​ ಗಿಲ್​ ಅವರ ಅಮೋಘ ಅರ್ಧಶತಕದ ನೆರವಿನಿಂದ ಗುಜರಾತ್ ಗೆಲುವನ್ನು ಮುಂದುವರೆಸಿದೆ.

ಈಡನ್​ ಗಾರ್ಡನ್ಸ್ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಅಜಿಂಕ್ಯಾ ರಹಾನೆ ಟಾಸ್ ಗೆದ್ದು ಎದುರಾಳಿ ಗುಜರಾತ್ ಟೈಟನ್ಸ್ ಅನ್ನು ಬ್ಯಾಟಿಂಗ್​ಗೆ ಆಹ್ವಾನವಿತ್ತರು. ಹೀಗಾಗಿ ಗುಜರಾತ್ ಪರ ಮೊದಲ ಬ್ಯಾಟಿಂಗ್​​ಗೆ ಆಗಮಿಸಿದ ಕ್ಯಾಪ್ಟನ್​ ಶುಭ್​ಮನ್ ಗಿಲ್ ಹಾಗೂ ಸಾಯಿ ಸುದರ್ಶನ್​ ಅತ್ಯುತ್ತಮ ಆರಂಭ ಪಡೆದರು. ಭರ್ಜರಿ ಬ್ಯಾಟಿಂಗ್ ಮಾಡಿದ ಗಿಲ್​ ಮತ್ತೊಂದು ಅರ್ಧಶತಕ ಬಾರಿಸಿದರು.

ಇದನ್ನೂ ಓದಿ: RCB vs RR ಹೈವೋಲ್ಟೇಜ್ ಮ್ಯಾಚ್​.. ಪಂದ್ಯದಿಂದಲೇ ರಾಯಲ್ಸ್​ ಕ್ಯಾಪ್ಟನ್​ ಔಟ್, ಆಗಿದ್ದೇನು?​

ಪಂದ್ಯದಲ್ಲಿ ಕೇವಲ 34 ಎಸೆತ ಎದುರಿಸಿದ ಶುಭ್​ಮನ್ ಗಿಲ್ 6 ಬೌಂಡರಿ ಹಾಗೂ 1 ಸಿಕ್ಸರ್​ನಿಂದ 50 ರನ್​ ಗಳಿಸಿದರು. ಬಳಿಕ ಬ್ಯಾಟಿಂಗ್ ಮುಂದುವರೆಸಿ ಗಿಲ್ ಒಟ್ಟು 55 ಎಸೆತದಲ್ಲಿ 10 ಫೋರ್, 3 ಸಿಕ್ಸರ್​ನಿಂದ 90 ರನ್​ ಗಳಿಸಿ ಔಟ್ ಆದರು. ಗಿಲ್​ಗೆ ಒಳ್ಳೆ ಸಾಥ್ ಕೊಟ್ಟ ಸಾಯಿ ಸುದರ್ಶನ್​ ಕೂಡ ಹಾಫ್​ಸೆಂಚುರಿ ಬಾರಿಸಿದರು. ಜೋಶ್ ಬಟ್ಲರ್​ ಕೂಡ ಮತ್ತೆ ಅಬ್ಬರಿಸಿ 23 ಎಸೆತದಲ್ಲಿ 8 ಬೌಂಡರಿಗಳಿಂದ 41 ರನ್​ ಗಳಿಸಿದ್ದು ತಂಡಕ್ಕೆ ನೆರವಾಯಿತು. ಹೀಗಾಗಿ ಗುಜರಾತ್ ಟೈಟನ್ಸ್​ 20 ಓವರ್​ಗಳಲ್ಲಿ 3 ವಿಕೆಟ್​ಗೆ 198 ರನ್​ಗಳ ಟಾರ್ಗೆಟ್ ನೀಡಿತ್ತು.

ಈ ರನ್​ಗಳ ಹಿಂದೆ ಬಿದ್ದ ಕೆಕೆಆರ್​ ಆರಂಭದಲ್ಲೇ ಆತಂಕಕ್ಕೆ ಒಳಗಾಯಿತು. ಏಕೆಂದರೆ ರಹಮಾನುಲ್ಲಾ ಗುರ್ಬಾಜ್ 1, ಸುನಿಲ್ ನರೈನ್ 17 ರನ್​ಗೆ ಔಟ್ ಆದರು. ವೆಂಕಟೇಶ್ ಅಯ್ಯರ್ ಮತ್ತೆ ಬ್ಯಾಟಿಂಗ್​ನಲ್ಲಿ ವಿಫಲರಾಗಿದ್ದು 14ಕ್ಕೆ ಕ್ಯಾಚ್ ಕೊಟ್ಟರು. ಇನ್ನು ಕ್ಯಾಪ್ಟನ್​ ಅಜಿಂಕ್ಯಾ ರಹಾನೆ, ಹಾಫ್​​ಸೆಂಚುರಿ ಸಿಡಿಸಿ, ತಂಡವನ್ನು ಗೆಲ್ಲಿಸಲು ಪ್ರಯತ್ನಿಸಿದರೂ ಆದರೆ, ಅದು ಸಾಧ್ಯವಾಗಲಿಲ್ಲ. ಆ್ಯಂಡ್ರೆ ರಸೆಲ್ ಅಬ್ಬರಿಸಲು ಮುಂದಾಗಿದ್ದರು. ಆದ್ರೆ ರಶೀದ್​ ಖಾನ್ ಅವಕಾಶ ಮಾಡಿಕೊಡಲಿಲ್ಲ. ರಿಂಕು ಸಿಂಗ್ (17)​ ಬಳಿಕ ಬಂದ ಎಲ್ಲ ಬ್ಯಾಟರ್​ಗಳು ಹೀಗೆ ಬಂದು ಹಾಗೇ ಪೆವಿಲಿಯನ್​ಗೆ ಕಡೆಗೆ ಹೊರಟರು. ಇದರಿಂದ ಕೆಕೆಆರ್​ ತವರಿನಲ್ಲೇ ಹೀನಾಯ ಸೋಲು ಕಂಡಿತು. ಗುಜರಾತ್​ ಟೈಟನ್ಸ್​ 39 ರನ್​ಗಳಿಂದ ಜಯ ಸಾಧಿಸಿತು.   ​​
​​
ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ