ಹಠಾತ್​ ಆಗಿ ನೆಲಕ್ಕೆ ಕುಸಿದು ಬಿದ್ದಿದ್ದ ಪೊಲೀಸ್​​ ಸಬ್​ ಇನ್​ಸ್ಪೆಕ್ಟರ್

ಪ್ರತಿಭಟನೆ ಹಿನ್ನೆಲೆ ಒಂದು ವಾರದಿಂದ ಕರ್ತವ್ಯ ನಿರ್ವಹಿಸುತ್ತಿದ್ದ ಸಿಬ್ಬಂದಿ

ಅಂಬಾಲಾದ ಶಂಭು ಗಡಿ ಭಾಗದಲ್ಲಿ ಸಬ್​​ ಇನ್​ಸ್ಪೆಕ್ಟರ್ ಸಾವು

ನವದೆಹಲಿ: ರೈತರ ಪ್ರತಿಭಟನೆ ಹಿನ್ನೆಲೆಯಲ್ಲಿ ಒಂದು ವಾರದಿಂದ ನಿಯೋಜನೆಗೊಂಡಿದ್ದ ಹರಿಯಾಣದ ಪೊಲೀಸ್​ ಸಬ್​ ಇನ್ಸ್​​ಸ್ಪೆಕ್ಟರ್​ರೊಬ್ಬರು ಹಠಾತ್ ಅನಾರೋಗ್ಯದಿಂದ ಸಾವನ್ನಪ್ಪಿದ್ದಾರೆ.

ಹರಿಯಾಣದ ಪೊಲೀಸ್​ ಸಬ್​ ಇನ್ಸ್​​ಸ್ಪೆಕ್ಟರ್ ಹೀರಾಲಾಲ್ (52) ಮೃತಪಟ್ಟವರು. ರೈತರ ಪ್ರತಿಭಟನೆ ಹಿನ್ನೆಲೆಯಲ್ಲಿ ಅಂಬಾಲಾದ ಶಂಭು ಗಡಿಭಾಗದಲ್ಲಿ ಹೀರಾಲಾಲ್ ಒಂದು ವಾರದಿಂದ ಕರ್ತವ್ಯ ನಿರ್ವಹಿಸುತ್ತಿದ್ದರು. ಇದೇ ವೇಳೆ ಅವರ ಆರೋಗ್ಯದಲ್ಲಿ ಏರುಪೇರಾಗಿದ್ದು ಕರ್ತವ್ಯದ ಸ್ಥಳದಲ್ಲೇ ಹಠಾತ್ ಆಗಿ ಕುಸಿದು ಬಿದ್ದಿದ್ದಾರೆ. ತಕ್ಷಣ ಅವರನ್ನು ಅಂಬಾಲಾದಲ್ಲಿರುವ ಸರ್ಕಾರಿ ಆಸ್ಪತ್ರೆಗೆ ಕರೆದುಕೊಂಡು ಹೋಗಲಾಯಿತು. ಚಿಕಿತ್ಸೆ ನೀಡಿದ ವೈದ್ಯರು ಅವರನ್ನು ಉಳಿಸಿಕೊಳ್ಳಲು ಆಗಲಿಲ್ಲ ಎಂದು ಹೇಳಿದ್ದಾರೆ ಎನ್ನಲಾಗಿದೆ.

ಈ ಸಂಬಂಧ ಮಾತನಾಡಿರುವ ಹರಿಯಾಣದ ಡಿಜಿಪಿ ಶತ್ರುಜೀತ್ ಕಪೂರ್ ಅವರು, ಅಧಿಕಾರಿ ಹೀರಾಲಾಲ್ ಯಾವಾಗಲೂ ಅತ್ಯಂತ ಶ್ರದ್ಧೆಯಿಂದ ತಮ್ಮ ಕರ್ತವ್ಯವನ್ನು ನಿರ್ವಹಿಸುತ್ತಿದ್ದರು. ಅವರ ಸಾವು ಪೊಲೀಸ್ ಪಡೆಗೆ ನಷ್ಟವಾಗಿದೆ ಎಂದು ಹೇಳಿದ್ದಾರೆ.

ಹಿರಿಯ ರೈತ ಮುಖಂಡ ನಿಧನ

ಕೇಂದ್ರ ಸರ್ಕಾರದ ವಿರುದ್ಧದ ಹೋರಾಟ ಮಾಡುವಾಗ ಹಿರಿಯ ರೈತ ಮುಖಂಡ ಜ್ಞಾನ್ ಸಿಂಗ್ ನಿಧನ ಹೊಂದಿದ್ದಾರೆ. ನಿನ್ನೆ ಶಂಭು ಗಡಿಯಲ್ಲಿ ರೈತರ ಜೊತೆ ಚಳವಳಿಯಲ್ಲಿ ಜ್ಞಾನ್ ಸಿಂಗ್‌ ಭಾಗಿಯಾಗಿದ್ರು. ಈ ವೇಳೆ ಅವರಿಗೆ ತೀವ್ರ ಎದೆ ನೋವು ಕಾಣಿಸಿಕೊಂಡಿತ್ತು. ಬಳಿಕ ಅವರನ್ನ ಸಮೀಪದ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಚಿಕಿತ್ಸೆ ಫಲಕಾರಿಯಾಗದೇ ಮೃತಪಟ್ಟಿದ್ದಾರೆ. ಪೊಲೀಸ್ ಅಧಿಕಾರಿ ಹಾಗೂ ರೈತ ಮುಖಂಡ ಸೇರಿ ಒಟ್ಟು ಇಬ್ಬರು ಪ್ರತಿಭಟನೆ ವೇಳೆ ಸಾವನ್ನಪ್ಪಿದವರಾಗಿದ್ದಾರೆ ಎಂದು ಹೇಳಲಾಗಿದೆ.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ