ಕೇರಳದ ನವಜಾತ ಶಿಶು ಮರಣ ಪ್ರಮಾಣ ಅಮೆರಿಕಕ್ಕಿಂತ ಕಡಿಮೆ! ಇದು ಸಾಧ್ಯವಾಗಿದ್ದು ಹೇಗೆ?

ಕೇರಳ ರಾಜ್ಯದ ಶಿಶು ಮರಣ ಪ್ರಮಾಣದಲ್ಲಿ ಭಾರೀ ಇಳಿಕೆ ಕಂಡುಬಂದಿದೆ.  ಕೇರಳದಲ್ಲಿ ಅಮೆರಿಕಾಗಿಂತಲೂ ಕಡಿಮೆ ಪ್ರಮಾಣದಲ್ಲಿ ಶಿಶುಗಳ ಸಾವುಗಳು ವರದಿಯಾಗುತ್ತಿದೆ ಎಂಬ ಮಾಹಿತಿ ಲಭ್ಯವಾಗಿದೆ.. ಕೇರಳದಲ್ಲಿ ಪ್ರತಿ 1000 ಮಗುವಿನ ಜನನಗಳಲ್ಲಿ ಕೇವಲ 5 ಮಕ್ಕಳು ಸಾವನಪ್ಪುತ್ತಿದ್ದಾರೆ ಎಂದು ಮಾದರಿ ನೋಂದಣಿ ಸಂಸ್ಥೆಯ ವರದಿ ತಿಳಿಸಿದೆ.
ಸೆಪ್ಟೆಂಬರ್​1ರ ಸೋಮವಾರ ಬಿಡುಗಡೆಯಾದ ರಾಷ್ಟ್ರೀಯ ಶಿಶು ಮರಣ ದರ ವರದಿ ಪ್ರಕಾರ ದೇಶದಲ್ಲಿ ಶಿಶುಗಳ ಮರಣ ಪ್ರಮಾಣವು 25 ಇದೆ. ಅಂದರೆ ಜನಿಸುವ ಪ್ರತಿ 1000 ಜೀವಂತ ಶಿಶುಗಳಲ್ಲಿ 25 ಮಗು ಸಾವನ್ನಪ್ಪುತ್ತಿವೆ. ಈ ಸರಾಸರಿಗೆ ಹೋಲಿಸಿದ್ರೆ ಕೇರಳ ರಾಜ್ಯದಲ್ಲಿನ ಶಿಶು ಮರಣ ಪ್ರಮಾಣವು ಐದು ಪಟ್ಟು ಕಡಿಮೆಯಾಗಿದೆ.
ಇನ್ನು,  ಈ ಬಗ್ಗೆ ಕೇರಳದ ಆರೋಗ್ಯ ಸಚಿವೆ ವೀಣಾ ಜಾರ್ಜ್​ ಮಾತನಾಡಿ, ಕೇರಳದಲ್ಲಿ ಶಿಶು ಮರಣ ಪ್ರಮಾಣವು ದೇಶದಲ್ಲೇ ಅತ್ಯಂತ ಕಡಿಮೆ. ಮಾತ್ರವಲ್ಲ, ಅಮೆರಿಕಕ್ಕಿಂತಲೂ ಕಡಿಮೆಯಾಗಿದೆ. ಕೇರಳದಲ್ಲಿನ ಶಿಶು ಮರಣ ಪ್ರಮಾಣವು 2022ರಲ್ಲಿ 1000ಕ್ಕೆ 5.6 ಇತ್ತು. ಈಗ, 5ಕ್ಕೆ ಇಳಿದಿದೆ. ದೇಶದ ಉಳಿದ ರಾಜ್ಯಗಳಲ್ಲಿ  ಗ್ರಾಮೀಣ ಪ್ರದೇಶಗಳಲ್ಲಿ ಈ ಪ್ರಮಾಣ 28 ಆಗಿದ್ರೆ, ನಗರ ಪ್ರದೇಶಗಳಲ್ಲಿ 19 ರಷ್ಟಿದೆ. ಆದ್ರೆ ಕೇರಳದ ಶಿಶು ಮರಣ ಪ್ರಮಾಣದಲ್ಲಿ ನಗರ-ಗ್ರಾಮೀಣ ವ್ಯತ್ಯಾಸವಿಲ್ಲ. ಇದು ಕೇರಳದ ಜನರು ಯಾವುದೇ ನಗರ-ಗ್ರಾಮೀಣ ಅಂತರವಿಲ್ಲದೆ ಆರೋಗ್ಯ ಸೇವೆಗಳನ್ನು ಪಡೆಯಬಹುದು ಎಂಬುದನ್ನು ತೋರಿಸುತ್ತದೆ ಎಂದು ಹೇಳಿದ್ದಾರೆ.

ಕೇರಳದ ಆರೋಗ್ಯ ಖಾತೆ ಸಚಿವೆ ವೀಣಾ ಜಾರ್ಜ್


ಇನ್ನು, ರಾಜ್ಯ ಆರ್ಥಿಕ ಮತ್ತು ಅಂಕಿಅಂಶ ಇಲಾಖೆಯ ಪ್ರಕಾರ, ಕೇರಳದ ಶಿಶು ಮರಣ ಪ್ರಮಾಣ 2010ರಲ್ಲಿ 7.42 ರಷ್ಟಿತ್ತು. 2012 ರಲ್ಲಿ ಈ ಅಂಕಿ ಅಂಶವು 8.2ಕ್ಕೆ ಏರಿತ್ತು. ಅಂದಿನಿಂದ, ಆರೋಗ್ಯ ಕ್ಷೇತ್ರದಲ್ಲಿ ತೆಗೆದುಕೊಳ್ಳಲಾದ ಅಗತ್ಯ ಕ್ರಮಗಳಿಂದಾಗಿ, ಈಗ ಶಿಶು ಮರಣ ಪ್ರಮಾಣವು ಕಡಿಮೆಯಾಗಿದೆ ಎಂದು ಹೇಳಲಾಗುತ್ತಿದೆ..