6, 6, 6, 6, 6, 6, 6, 6, 6; ಸ್ಫೋಟಕ ಸೆಂಚುರಿ ಬಾರಿಸಿದ ಕ್ಲಾಸೆನ್​​.. ಕೆಕೆಆರ್​ಗೆ 278 ರನ್​​ ಟಾರ್ಗೆಟ್​ ಕೊಟ್ಟ SRH

ಹೆನ್ರಿಚ್ ಕ್ಲಾಸೆನ್ ಅವರ ಭರ್ಜರಿ ಸೆಂಚುರಿಯಿಂದ ಹೈದ್ರಾಬಾದ್ ತಂಡ ಈ ಸೀಸನ್​ನ ಅಂತಿಮ ಪಂದ್ಯದಲ್ಲಿ 278 ರನ್​ಗಳ ಬೃಹತ್ ಮೊತ್ತದ ಟಾರ್ಗೆಟ್ ಅನ್ನು ಕೋಲ್ಕತ್ತಾದ ನೈಟ್​ ರೈಡರ್ಸ್​ಗೆ ನೀಡಿದೆ.

ದೆಹಲಿಯ ಅರುಣ್​ ಜೇಟ್ಲಿ ಕ್ರಿಕೆಟ್​ ಮೈದಾನದಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಹೈದ್ರಾಬಾದ್ ತಂಡದ ಕ್ಯಾಪ್ಟನ್ ಪ್ಯಾಟ್ ಕಮಿನ್ಸ್​ ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡರು. ತಮ್ಮ ಯೋಜನೆಯಂತೆ ಬ್ಯಾಟಿಂಗ್ ಆರಂಭಿಸಿದ ಹೈದ್ರಾಬಾದ್​, ಕೋಲ್ಕತ್ತಾ ನೈಟ್ ರೈಡರ್ಸ್​ ಮೇಲೆ ಅಬ್ಬರದ ಬ್ಯಾಟಿಂಗ್ ಮಾಡಿತು. ಆರಂಭಿಕರಾದ ಅಭಿಷೇಕ್ ಶರ್ಮಾ 32 ರನ್ ಹಾಗೂ ಟ್ರಾವಿಸ್​ ಹೆಡ್​ 76 ರನ್​ಗಳಿಂದ ಭದ್ರ ಬುನಾದಿ ಹಾಕಿದರು.

3ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್​ಗೆ ಬಂದ ಹೆನ್ರಿಚ್ ಕ್ಲಾಸೆನ್, ಎದುರಾಳಿ ಬೌಲರ್​ಗಳ ಮೇಲೆ ಎರಗಿದರು. ಈ ಐಪಿಎಲ್ ಆರಂಭದಿಂದಲೂ ಬ್ಯಾಟಿಂಗ್​ನಲ್ಲಿ ಕೊಂಚ ಹಿನ್ನಡೆ ಅನುಭವಿಸಿದ್ದ ಹೆನ್ರಿಚ್ ಕ್ಲಾಸೆನ್, ಈ ಪಂದ್ಯದಲ್ಲಿ ಅಕ್ಷರಶಃ ಬಿರುಗಾಳಿ ಎಬ್ಬಿಸಿದರು. ಕೇವಲ 37 ಎಸೆತಗಳಲ್ಲಿ 6 ಬೌಂಡರಿ ಹಾಗೂ 9 ಸಿಕ್ಸರ್​ಗಳಿಂದ ಭರ್ಜರಿ ಸೆಂಚುರಿ ಸಿಡಿಸಿದರು. ಪಂದ್ಯದಲ್ಲಿ ಒಟ್ಟು 105 ರನ್​ಗಳನ್ನು ಗಳಿಸಿದ ಹೆನ್ರಿಚ್ ಕ್ಲಾಸೆನ್ ಕೊನೆವರೆಗೂ ಅಜೇಯರಾಗಿ ಉಳಿದರು.

ಇದನ್ನೂ ಓದಿ: ಚೆನ್ನೈ ಗೆಲುವು, RCBಗೆ ದೊಡ್ಡ ವರದಾನ.. ಈ ಚಾನ್ಸ್​ ಆದರೂ ಉಪಯೋಗ ಮಾಡಿಕೊಳ್ಳುತ್ತಾ ಬೆಂಗಳೂರು?

ಇದರಿಂದ ಹೈದ್ರಾಬಾದ್ ತಂಡ ನಿಗದಿತ 20 ಓವರ್​​ಗಳಲ್ಲಿ ಕೇವಲ 3 ವಿಕೆಟ್​ ಕಳೆದುಕೊಂಡು 278 ರನ್​ಗಳ ಬೃಹತ್ ಟಾರ್ಗೆಟ್ ಅನ್ನು ಎದುರಾಳಿಗೆ ನೀಡಿದೆ. ಕಳೆದ ವರ್ಷದ ಸೀಸನ್​ನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್​, ಆರ್​ಸಿಬಿ ವಿರುದ್ಧ 22 ಸಿಕ್ಸರ್​ಗಳನ್ನು ಹೈದ್ರಾಬಾದ್ ತಂಡ ಬಾರಿಸಿತ್ತು. ಅದರಂತೆ ಈ ಬಾರಿ ಕೆಕೆಆರ್ ವಿರುದ್ಧ 19 ಸಿಕ್ಸರ್​ಗಳನ್ನು ಸಿಡಿಸುವ ಮೂಲಕ ಒಂದು ಇನ್ನಿಂಗ್ಸ್​​ನಲ್ಲಿ 2ನೇ ಅತಿ ಹೆಚ್ಚು ಸಿಕ್ಸರ್​ ಸಿಡಿಸಿದ ದಾಖಲೆ ಮಾಡಿದೆ.

ಕೆಕೆಆರ್​ ವಿರುದ್ಧ 3 ವಿಕೆಟ್​ಗೆ 278 ರನ್​ ಗಳಿಸುವ ಮೂಲಕ ಇಡೀ ಐಪಿಎಲ್​ನಲ್ಲೇ 3ನೇ ಅತ್ಯಧಿಕ ಬೃಹತ್​​ ಸ್ಕೋರ್ ಆಗಿದೆ. ಈ ಮೊದಲು ಇದೇ ಸೀಸನ್​ನಲ್ಲಿ ರಾಜಸ್ಥಾನ್​ ರಾಯಲ್ ವಿರುದ್ಧ 286 ರನ್​ಗಳನ್ನು ಬಾರಿಸಿತ್ತು. 2024ರಲ್ಲಿ ಆರ್​ಸಿಬಿ ವಿರುದ್ಧ 287 ರನ್​ ಗಳಿಸಿರುವುದು ಐಪಿಎಲ್​ನ ಇತಿಹಾಸದಲ್ಲೇ ದೊಡ್ಡ ರನ್​ಗಳು ಆಗಿವೆ. ಈ ದಾಖಲೆಯನ್ನು ಇದುವರೆಗೂ ಯಾರೂ ಕೂಡ ಬ್ರೇಕ್ ಮಾಡಿ ಇಲ್ಲ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.30ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ