ಹೆಂಡತಿ ಜೀವವನ್ನೇ ತೆಗೆದು ಕಾರಿನ ಡಿಕ್ಕಿಯಲ್ಲಿ ಇಟ್ಟಿದ್ದ ಗಂಡ; ಈ ಕೃತ್ಯ ನಡೆದ ರೀತಿಯೇ ರೋಚಕ

ಭವಿಷ್ಯದ ಕನಸು ಹೊತ್ತು ಭಾರತದ ಅದೆಷ್ಟೋ ಯುವಕ ಯುವತಿಯರು ವಿದೇಶಕ್ಕೆ ಹೋಗಲು ಇಷ್ಟು ಪಡುತ್ತಾರೆ. ವಿದ್ಯಾಭ್ಯಾಸ ಮುಗಿಸಿ ಕೆಲಸ ಪಡೆದು ಹಾಗೋ ಹೀಗೋ ಅಲ್ಲೆ ನೆಲೆ ಕಲ್ಪಿಸಿಕೊಳ್ಳುತ್ತಾರೆ. ಹೀಗೆ ಭವಿಷ್ಯದ ಕನಸುಗಳನ್ನ ಬೆನ್ನೇರಿ ಲಂಡನ್​ಗೆ ಹೋಗಿದ್ದ 24 ವರ್ಷ ವಿವಾಹಿತೆಯೊಬ್ಬಳು ಕಾರಿನ ಡಿಕ್ಕಿಯಲ್ಲಿ ಶವವಾಗಿ ಪತ್ತೆಯಾಗಿದ್ದಾಳೆ.

ಮಗಳು ವಿದೇಶದಲ್ಲಿ ಗಂಡನ ಜೊತೆ ಸುಖ ಸಂಸಾರ ನಡೆಸುತ್ತಿದ್ದಾಳೆ ಎಂದು ಭಾವಿಸಿದ್ದ ಪೋಷಕರಿಗೆ ಮಗಳ ಸಾವಿನ ಸುದ್ದಿ ಕೇಳಿ ಶಾಕ್​ ಆಗಿದೆ. ಅತ್ತ ಮೃತ ಹರ್ಷಿತಾಳ ಗಂಡ ಎಸ್ಕೇಪ್​ ಆಗಿದ್ದು, ಆತನಿಗಾಗಿ ಬ್ರಿಟನ್​ ಪೊಲೀಸರು ಬಲೆ ಬೀಸಿದ್ದಾರೆ.

ಅಸಲಿಗೆ ಆಗಿದ್ದೇನು?

ಬ್ರಿಟನ್‌ನ ನಾರ್ಥಂಪ್ಟನ್‌ಶೈರ್‌ನಲ್ಲಿ ವಾಸಿಸುತ್ತಿದ್ದ ಭಾರತ ಮೂಲದ 24 ವರ್ಷದ ಮಹಿಳೆ ಹರ್ಷಿತಾ ಬ್ರೆಲ್ಲಾ ಅವರನ್ನು ಹತ್ಯೆ ಮಾಡಲಾಗಿದೆ. ಆ ಮಹಿಳೆ ಶವ ಪೂರ್ವ ಲಂಡನ್‌ನ ಇಲ್‌ಫೋರ್ಡ್‌ನಲ್ಲಿ ನಿಲ್ಲಿಸಿದ್ದ ಕಾರಿನ ಡಿಕ್ಕಿಯಲ್ಲಿ ಸಿಕ್ಕಿದೆ. ಪತಿ ಪಂಕಜ್ ಲಂಬಾನೇ ಆಕೆಯನ್ನು ಕೊಂದು ದೇಶ ಬಿಟ್ಟು ಪಲಾಯನ ಮಾಡಿರಬಹುದು ಎಂದು ಪೊಲೀಸರು ಶಂಕಿಸಿದ್ದಾರೆ.

ಮೃತ ಹರ್ಷಿತಾ ಅವರ ಪತಿ ಪಂಕಜ್ ಲಂಬಾ ಫೋಟೋವನ್ನು ಪೊಲೀಸರು ಬಿಡುಗಡೆ ಮಾಡಿದ್ದು, ಈ ಪ್ರಕರಣದಲ್ಲಿ 60ಕ್ಕೂ ಹೆಚ್ಚು ಪತ್ತೇದಾರರು ಕೆಲಸ ಮಾಡುತ್ತಿದ್ದಾರೆ ಎಂದು ನಾರ್ಥಂಪ್ಟನ್‌ಶೈರ್ ಪೊಲೀಸ್ ವಿಭಾಗದ ಮುಖ್ಯ ಇನ್‌ಸ್ಪೆಕ್ಟರ್ ಪೌಲ್ ಕ್ಯಾಶ್ ಭಾನುವಾರ ತಿಳಿಸಿದ್ದಾರೆ. ಆರೋಪಿ ಕುರಿತು ಯಾವುದೇ ಸುಳಿವು ಇದ್ದರೆ ಮಾಹಿತಿ ನೀಡುವಂತೆ ಅವರು ಮನವಿ ಮಾಡಿದ್ದಾರೆ. ಹರ್ಷಿತಾ ಅವರನ್ನು ನಾರ್ಥಂಪ್ಟನ್‌ಶೈರ್‌ನಲ್ಲಿ ಈ ತಿಂಗಳ ಆರಂಭದಲ್ಲಿ ಆಕೆಯ ಗಂಡ ಪಂಕಜ್ ಲಂಬಾ ಹತ್ಯೆ ಮಾಡಿದ್ದಾರೆ ಎಂಬ ಶಂಕೆಯು ನಮ್ಮ ತನಿಖೆಯಿಂದ ಉಂಟಾಗಿದೆ ಎಂದು ಅವರು ಹೇಳಿದ್ದಾರೆ.

ಇದನ್ನೂ ಓದಿ: ಅಬ್ಬಾ.. ಸಿಕ್ಕಾಪಟ್ಟೆ ವೈರಲ್ ಆದ ನೀತಾ ಅಂಬಾನಿ ಪಾಪ್​ಕಾರ್ನ್​ ಬ್ಯಾಗ್​! ಇದರ ಬೆಲೆ ಎಷ್ಟು ಗೊತ್ತಾ?

ಹರ್ಷಿತಾ ಅವರ ಕ್ಷೇಮಕ್ಕೆ ತೊಂದರೆ ಉಂಟಾಗಿದೆ ಎಂದು ಕಳೆದ ಬುಧವಾರ ಕರೆ ಬಂದಿದ್ದು, ಕೂಡಲೇ ನಾರ್ಥಂಪ್ಟನ್‌ಶೈರ್‌ನ ಸ್ಕೆಗ್ನೆಸ್ ವಾಲ್ಕ್‌ನಲ್ಲಿನ ಅವರ ಮನೆಗೆ ಅಧಿಕಾರಿಗಳನ್ನು ನಿಯೋಜಿಸಲಾಗಿತ್ತು. ಮನೆಯಲ್ಲಿ ಯಾವುದೇ ಸ್ಪಂದನೆ ಬಾರದ ಹಿನ್ನೆಲೆಯಲ್ಲಿ ಪೊಲೀಸರು ಕಾಣೆಯಾದ ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದರು. ಗುರುವಾರ ನಸುಕಿನಲ್ಲಿ ಪೂರ್ವ ಲಂಡನ್‌ನ ಇಲ್‌ಫೋರ್ಡ್ ಪ್ರದೇಶದ ಬ್ರಿಸ್ಬೇನ್ ರಸ್ತೆಯಲ್ಲಿ ನಿಂತಿದ್ದ ವಾಹನವೊಂದರ ಡಿಕ್ಕಿಯಲ್ಲಿ ಹರ್ಷಿತಾ ಮೃತದೇಹ ಪತ್ತೆಯಾಗಿತ್ತು.

ಇನ್ನೂ ಹರ್ಷಿತಾ ಅವರ ದೇಹವನ್ನು ಕಾರಿನಲ್ಲಿ ನಾರ್ಥಂಪ್ಟನ್‌ಶೈರ್‌ನಿಂದ ಇಲ್‌ಫೋರ್ಡ್‌ಗೆ ಲಂಬಾ ಸಾಗಿಸಿದ್ದಾನೆ ಎನ್ನುವುದು ನಮ್ಮ ಅನುಮಾನ. ಆತ ಈಗ ದೇಶ ಬಿಟ್ಟು ಪರಾರಿಯಾಗಿರಬಹುದು. ಈ ಪ್ರಕರಣದಲ್ಲಿ 60ಕ್ಕೂ ಹೆಚ್ಚು ಡಿಟೆಕ್ಟೀವ್‌ಗಳು ಕೆಲಸ ಮಾಡುತ್ತಿದ್ದಾರೆ. ಮನೆ ಮನೆಗೆ ಹೋಗಿ ಪರಿಶೀಲನೆ, ವಸ್ತುಗಳ ಶೋಧ, ಸಿಸಿಟಿವಿ ಕ್ಯಾಮೆರಾಗಳು ಮತ್ತು ಸ್ವಯಂಚಾಲಿತ ನಂಬರ್ ಪ್ಲೇಟ್ ಪತ್ತೆ (ಎಎನ್‌ಪಿಆರ್‌) ಸೇರಿದಂತೆ ಎಲ್ಲ ಬಗೆಯ ತನಿಖೆಗಳನ್ನು ನಡೆಸುತ್ತಿದ್ದೇವೆ. ಹರ್ಷಿತಾ ಅವರಿಗೆ ನ್ಯಾಯ ದೊರಕಿಸಲು, ನಿಜಕ್ಕೂ ಏನು ನಡೆಯಿತು ಎಂಬುದನ್ನು ನಿಖರವಾಗಿ ತಿಳಿಯಲು ಮಾಹಿತಿಗಳನ್ನು ಕ್ರೋಢೀಕರಿಸಲು ಸಹಾಯಕ್ಕಾಗಿ ಮನವಿ ಮಾಡುತ್ತಿದ್ದೇವೆ ಎಂದು ತಿಳಿಸಿದ್ದಾರೆ.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ