ಇರಾನ್‌ನ ಖಮೇನಿ ಹತ್ಯೆ- ಗಲ್ಪ್ ರಾಷ್ಟ್ರಗಳ ಅಮೆರಿಕಾ ಸೇನಾ ನೆಲೆಗಳ ಮೇಲೆ ಇರಾನ್ ಅಟ್ಯಾಕ್‌

ಇರಾನ್‌ನ ಸರ್ವೋಚ್ಚ ನಾಯಕ ಖಮೇನಿಯ ಹತ್ಯೆಗೆ ಪ್ರತೀಕಾರವಾಗಿ ಇರಾನ್ ನರಕದ ಬಾಗಿಲುಗಳನ್ನು ತೆರೆದಿದೆ. ಗಲ್ಫ್​​ ರಾಷ್ಟ್ರಗಳಲ್ಲಿನ ಅಮೇರಿಕ ಸೇನಾ ನೆಲೆಗಳ ಗುರಿಯಾಗಿಸಿಕೊಂಡು ದಾಳಿಗೆ ಇಳಿದೆ. ಇರಾನ್‌ನ  ಕ್ಷಿಪಣಿಗಳ ಆರ್ಭಟಕ್ಕೆ ಅಮೆರಿಕಾ, ಇಸ್ರೇಲ್​​​ ಬೆಚ್ಚಿಬಿದೆ. ಇರಾನ್‌ ದಾಳಿಯಲ್ಲಿ ದುಬೈನ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೂ ಹಾನಿ ಆಗಿದ್ದು ವಿಮಾನ ಹಾರಾಟ ಬಂದ್‌ ಮಾಡಲಾಗಿದೆ.

ಖಮೇನಿ ಹತ್ಯೆಯ ಬಳಿಕ ಮತ್ತಷ್ಟು ಕೆರಳಿದ ಕೆಂಡವಾದ ಇರಾನ್ 
ಗಲ್ಫ್​​ ರಾಷ್ಟ್ರಗಳಲ್ಲಿರುವ ಅಮೆರಿಕಾದ ಸೇನಾ ನೆಲೆಗಳು ಉಡೀಸ್​​​
ಗಾಯಗೊಂಡಿರುವ ಸಿಂಹದ ಉಸಿರು ಘರ್ಜನೆಗಿಂತ ಭಯಾನಕವಾಗಿರುತ್ತೆ.. ಅದೇ ರೀತಿ.. ತಮ್ಮ ಸರ್ವೋಚ್ಛ ನಾಯಕನನ್ನು ಕಳೆದು ಕೊಂಡಿರುವ ಇರಾನ್​​.. ಆಕ್ರೋಶದ ಜ್ವಾಲೆಯಲ್ಲಿ ಕುದಿಯುತ್ತಿದೆ. ಖಮೇನಿ ಮೃತಪಟ್ಟಿರುವುದು ದೃಢಪಟ್ಟ ಕೆಲ ಗಂಟೆಗಳ ಬಳಿಕ ಇರಾನ್​​​ ಪ್ರತೀಕಾರದ ಹೆಜ್ಜೆ ಇಟ್ಟಿದ್ದು, ಅಮೆರಿಕಾ ಸೇನಾ ನೆಲೆಗಳ ಮೇಲೆ ಡ್ರೋನ್ ಅಟ್ಯಾಕ್ ನಡೆಸಿದೆ.. ಬಹ್ರೇನ್, ಕತಾರ್ ಮತ್ತು ಕುವೈತ್​ನಲ್ಲಿರುವ ಅಮೆರಿಕಾ ಸೇನಾ ನೆಲೆಗಳನ್ನು ಉಡೀಸ್​ ಮಾಡಿ, ಟ್ರಂಪ್​​ಗೆ ತಿರುಗೇಟು ನೀಡಿದೆ.
ದುಬೈನಲ್ಲಿ ಜನಪ್ರಿಯ ಕಟ್ಟಡಗಳ ಮೇಲೂ ಇರಾನ್​ ದಾಳಿ 
ವಿಶ್ವ ನಕ್ಷೆಯ ಮಧ್ಯಭಾಗದಲ್ಲಿರುವ ದುಬೈ, 110 ದೇಶಗಳ 291 ಸ್ಥಳಗಳನ್ನು ಸಂಪರ್ಕಿಸುವ ಅತ್ಯಂತ ಪ್ರಮುಖ ಕೊಂಡಿಯಾಗಿದೆ. ಜಗತ್ತಿನಲ್ಲೇ ಬಾಂಬ್​ ಸದ್ದು ಕೇಳಿಸದ ಸುರಕ್ಷಿತ ಸ್ಥಳ ಎಂದು ಜನರು ದುಬಾರಿ ದುಬೈನಲ್ಲಿ ನೆಲೆಸಲು ಇಷ್ಟ ಪಡ್ತಾರೆ. ಆದ್ರೆ ಇವತ್ತು ದುಬೈನಲ್ಲಿ ಬೆಳ್ಳಂ ಬೆಳ್ಳಗೆ ಮೂರು ಸ್ಫೋಟದ ಸದ್ದುಗಳ ಕೇಳಿ ಬಂದಿವೆ. ಇರಾನ್​​ ದುಬೈನ ಐದು ಸ್ಥಳಗಳ ಮೇಲೆ ದಾಳಿ ಮಾಡಿದೆ. ಜಗತ್ತಿನ ಅತಿ ಎತ್ತರದ ಟವರ್‌ ಭುರ್ಜ್‌ ಖಲೀಫಾ ಸಮೀಪದ ನೆಲೆಗಳನ್ನೂ ಟಾರ್ಗೆಟ್‌ ಮಾಡಿದ್ದು, ಮಾನವ ನಿರ್ಮಿತ ಪಾಮ್‌ ಐಲ್ಯಾಂಡ್‌ಗಳ ಬಳಿಯೂ ಕ್ಷಿಪಣಿ ಸ್ಫೋಟಗೊಂಡಿವೆ. ಇನ್ನು ಜಬೇಲ್ ಅಲಿ ಪೋರ್ಟ್​​ನಲ್ಲೂ ದಾಳಿ ಮಾಡಿದೆ. ಪೋರ್ಟ್​​ ಮೇಲೆ ದಾಳಿಯಿಂದ ಆವರಿಸಿದ ದಟ್ಟ ಹೊಗೆ ಜನರಲ್ಲಿ ಭಯ ಭೀತಿ ಉಂಟು ಮಾಡಿದೆ.
ಕತಾರ್​ ರಾಜಧಾನಿ ದೋಹಾದ ಮೇಲೂ ಇರಾನ್ ಅಟ್ಯಾಕ್​
ಕತಾರ್​ನ ರಾಜಧಾನಿ ದೋಹಾದ ಮೇಲೆ ಇರಾನ್​ ಡ್ರೋನ್​ ದಾಳಿ ನಡೆಸಿದೆ. ದೋಹಾದಲ್ಲಿ  24 ಹೆಕ್ಟೇರ್ ವಿಸ್ತೀರ್ಣದ ಅಲ್ ಉದೈದ್ ವಾಯುನೆಲೆಯು ಯುಎಸ್ ಸೆಂಟ್ರಲ್ ಕಮಾಂಡ್‌ನ ಮುಂಚೂಣಿ ಪ್ರಧಾನ ಕಚೇರಿಯಾಗಿದೆ. ಇದನ್ನು ಗುರಿಯಾಗಿಸಿಕೊಂಡು ಇರಾನ್​​ ಅಟ್ಯಾಕ್​ ಮಾಡಿದೆ. ದೋಹಾ ಗುರಿಯಾಗಿಸಿಕೊಂಡು ನಡೆದ ದಾಳಿಗಳನ್ನು ಯಶಸ್ವಿಯಾಗಿ ತಡೆದಿದೆ ಎಂದು ಕತಾರ್ ಹೇಳಿಕೊಂಡಿದೆ.
ಹಾರ್ಮುಜ್ ಜಲಸಂಧಿಯಲ್ಲಿ ತೈಲ ಟ್ಯಾಂಕರ್​ ಮೇಲೆ ದಾಳಿ 
ತೈಲ ಟ್ಯಾಂಕರ್​​​ಗಳನ್ನು ಸಾಗಿಸುತ್ತಿದ್ದ ಇಸ್ರೇಲ್ ಹಡಗಿನ ಮೇಲೆ ಇರಾನ್ ಭೀಕರ ದಾಳಿ ನಡೆಸಿದೆ.. ಓಮನ್ ಕರಾವಳಿಯ ಬಳಿಯ ಹಾರ್ಮುಜ್ ಜಲಸಂಧಿಯ ಮೂಲಕ ಹಾದುಹೋಗುತ್ತಿದ್ದ ಸ್ಕೈಲೈಟ್ ತೈಲ ಟ್ಯಾಂಕರ್ ಮೇಲೆ ಇರಾನ್ ಮಿಸೈಲ್ ದಾಳಿ ನಡೆಸಿದೆ.. ದಾಳಿಯಲ್ಲಿ 4 ಜನ ನಾವಿಕರು ಗಂಭೀರವಾಗಿ ಗಾಯಗೊಂಡಿದ್ದಾರೆ.
ಬಹ್ರೇನ್‌ನಲ್ಲಿ ಯುಎಸ್ ಫ್ಲೀಟ್ ಮೇಲೆ ದಾಳಿ
 ಇನ್ನು, ಬಹ್ರೇನ್‌ನಲ್ಲಿ ಮನಾಮದಲ್ಲಿರುವ ಯುಎಸ್ ನೌಕಾಪಡೆಯ 5 ನೇ ಫ್ಲೀಟ್ ಪ್ರಧಾನ ಕಚೇರಿಯನ್ನು ಗುರಿಯಾಗಿಸಿಕೊಂಡು ಕ್ಷಿಪಣಿ ದಾಳಿ ನಡೆಸಲಾಗಿದೆ ಎಂದು ಬಹ್ರೇನ್ ಹೇಳಿಕೊಂಡಿದೆ. ಇರಾನ್​ ಕುವೈತ್​​ನ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಮೇಲೂ ದಾಳಿ ನಡೆಸಿದೆ. ಸದ್ಯ ಕುವೈತ್​​ ವಿಮಾನ ನಿಲ್ದಾಣದಲ್ಲಿ ತುರ್ತು ಪ್ರೋಟೋಕಾಲ್‌ ಘೋಷಿಸಲಾಗಿದೆ.

ದೋಹಾ ಪರಿಸ್ಥಿತಿ ಬಗ್ಗೆ ವಿವರಿಸಿದ ಬಾಗಲಕೋಟೆ ಮೂಲದ ಟೆಕ್ಕಿ
 ದೋಹಾದಲ್ಲಿರುವ ಅಮೆರಿಕಾದ ಏರ್ ಬೆಸ್ ಮೇಲೆ ಇರಾನ್​ ದಾಳಿ ಬೆನ್ನಲ್ಲೇ ಹೈಅಲರ್ಟ್​ ಘೋಷಿಸಲಾಗಿದೆ. ಮೊಬೈಲ್​ಗಳಿಗೆ ಅಲರ್ಟ್​ ಮೆಸೇಜ್​​ ಬರ್ತಿದ್ದಂತಿ ಜನರು ಅಗತ್ಯವಸ್ತು ಸಂಗ್ರಹಕ್ಕೆ ಮುಗಿಬಿದ್ದಿದ್ದಾರೆ. ದೋಹಾದ ಐಟಿ ಕಂಪನಿಯಲ್ಲಿ ಬಾಗಲಕೋಟೆ ಮೂಲಕ ಅರವಿಂದ್​ ಎಂಬುವವರು ಪ್ರಾಜೆಕ್ಟ್​ ಮ್ಯಾನೇಜರ್​ ಆಗಿ ಕೆಲಸ ಮಾಡ್ತಿದ್ದಾರೆ. ಕಳೆದ 3 ವರ್ಷಗಳಿಂದ ಅರವಿಂದ್ ದೋಹಾದಲ್ಲಿ ವಾಸ್ತಿದ್ದಾರೆ. ಇವರು ಇರೋ ಜಾಗದ ಸುತ್ತಮುತ್ತ ಪ್ರದೇಶದಲ್ಲಿ 2-3 ಸಾವಿರ ಭಾರತೀಯರಿದ್ದಾರೆ. ದೋಹಾದಲ್ಲಿ ಕ್ಷಿಪಣಿಗಳು ಬೀಳುತ್ತಿರುವ ವಿಡಿಯೋಗಳನ್ನ ಅರವಿಂದ್​ ಹಂಚಿಕೊಂಡಿದ್ದಾರೆ.
ಒಟ್ಟಾರೆ.. ಇರಾನ್‌ನ ಈ ಸರಣಿ ದಾಳಿಗೆ ಅಮೇರಿಕಾ ಮತ್ತು ಇಸ್ರೇಲ್ ಯಾವ ರೀತಿ ಪ್ರತಿಕ್ರಿಯ ನೀಡಲಿವೆ ಎಂಬುದು ಈಗ ಕುತೂಹಲದ ಸಂಗತಿಯಾಗಿದೆ. ಮಧ್ಯಪ್ರಾಚ್ಯದ ಆಕಾಶ ಈಗ ಕ್ಷಿಪಣಿಗಳಿಂದ ತುಂಬಿಹೋಗಿದ್ದು, ಮೂರನೇ ಮಹಾಯುದ್ಧದ ಭೀತಿ ಎದುರಾಗಿದೆ.

ನ್ಯೂಸ್​ಫಸ್ಟ್​ ಬ್ಯೂರೋ.
ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ