ಚೆನ್ನೈ ಸೂಪರ್ ಕಿಂಗ್ಸ್​ ಅಲ್ಲವೇ ಅಲ್ಲ.. RCBಗೆ ಅಸಲಿ ವಿಲನ್ ಯಾರು?

ಚೆನ್ನೈ ಸೂಪರ್​ ಕಿಂಗ್ಸ್​​ ಅಲ್ಲ, ಐಪಿಎಲ್​ನಲ್ಲಿ ಆರ್​​ಸಿಬಿ ಪಾಲಿಗೆ ಬಿಗ್ಗೆಸ್ಟ್​ ವಿಲನ್​ ಅಂದ್ರೆ ಅದು ಸನ್​​ರೈಸರ್ಸ್​ ಹೈದ್ರಾಬಾದ್​​. ಈ ಸೀಸನ್​ನಲ್ಲಿ ಟಾಪ್​ 2 ಸ್ಥಾನದ ಮೇಲೆ ಕಣ್ಣಿಟ್ಟಿರೋ ಆರ್​​ಸಿಬಿ ನಾಳೆ ಹೈದ್ರಾಬಾದ್​ ವಿರುದ್ಧ ಸೆಣೆಸಲಿದೆ. ಹೈದ್ರಾಬಾದ್​​ ಮಣಿಸಿ ಟಾಪ್-​​ 2 ಸ್ಥಾನ ಭದ್ರಪಡಿಸಿಕೊಳ್ಳೋ ಆತ್ಮವಿಶ್ವಾಸದಲ್ಲಿ ಆರ್​​ಸಿಬಿ ಇದೆ. ಇದರ ನಡುವೆ ಆತಂಕವೂ ಕಾಡ್ತಿದೆ. ಮಳೆ ಕಾಟದಿಂದ ತಪ್ಪಿಸಿಕೊಂಡ ಆರ್​ಸಿಬಿ, ಹೈದ್ರಾಬಾದ್​​ ಕಂಟಕದಿಂದ ಬಚಾವ್​ ಆಗುತ್ತಾ ಅನ್ನೋ ಪ್ರಶ್ನೆ ಎದುರಾಗಿದೆ.

2025 ಐಪಿಎಲ್​ ಟೂರ್ನಿಯಲ್ಲಿ ಪ್ಲೇ ಆಫ್​ಗೆ ರಾಯಲ್​ ಎಂಟ್ರಿ ನೀಡಿರುವ ಆರ್​​ಸಿಬಿ, ಟಾಪ್​ 2 ಸ್ಥಾನದ ಫೈಟ್​ಗಿಳಿದಿದೆ. ಮುಂದಿನ 2 ಪಂದ್ಯ ಗೆದ್ದು ಟೇಬಲ್​ ಟಾಪ್​ 2 ಸ್ಥಾನಗಳನ್ನ ಭದ್ರ ಪಡಿಸಿಕೊಳ್ಳೋ ಲೆಕ್ಕಾಚಾರ ಆರ್​​ಸಿಬಿಯದ್ದಾಗಿದೆ. ಬೆಂಗಳೂರಿನಲ್ಲಿ ಮಳೆ ಕಾಡಿದ್ರೆ ಈ ಕನಸು ನುಚ್ಚು ನೂರಾಗುತ್ತೆ ಎಂದು ಅರಿತ ಆರ್​​ಸಿಬಿ, ಹೈದ್ರಾಬಾದ್​ ವಿರುದ್ಧದ ಪಂದ್ಯವನ್ನ ಹೋಮ್​​ಗ್ರೌಂಡ್​​ನಿಂದ ಲಕ್ನೋಗೆ ಶಿಫ್ಟ್​​​ ಮಾಡಿಸಿಕೊಂಡಿದೆ. ಈ ಮೂಲಕ ಮಳೆ ಕಾಟದಿಂದ ಆರ್​​ಸಿಬಿ ತಪ್ಪಿಸಿಕೊಂಡಿದೆ. ಆದ್ರೆ, ಸನ್​ರೈಸರ್ಸ್​​ ಹೈದ್ರಾಬಾದ್​ ಕಾಟದಿಂದ ಆರ್​​ಸಿಬಿ ಬಚಾವ್​ ಆಗುತ್ತಾ ಅನ್ನೋದು ದೊಡ್ಡ ಪ್ರಶ್ನೆಯಾಗಿದೆ.

ಸೀಸನ್​ 2ರಿಂದಲೂ ಹೈದ್ರಾಬಾದ್​ನದ್ದೇ ಅಡ್ಡಗಾಲು.!

ಐಪಿಎಲ್​ನಲ್ಲಿ ಮುಂಬೈ ಇಂಡಿಯನ್ಸ್​, ಚೆನ್ನೈ ಸೂಪರ್​​ ಕಿಂಗ್ಸ್​ ಆರ್​​ಸಿಬಿ ಬದ್ಧವೈರಿಗಳು ಎಂಬಂತೆ ಬಿಂಬಿತವಾಗಿವೆ. ಆದ್ರೆ, ಆರ್​ಸಿಬಿಯ ಅಸಲಿ ವಿಲನ್​ ಸನ್​ರೈಸರ್ಸ್​ ಹೈದ್ರಾಬಾದ್​. 2009ರ ಸೀಸನ್​ನಿಂದ ಹಿಡಿದು 2021ರವರೆಗೆ ಆರ್​​ಸಿಬಿ ಕನಸನ್ನ ಈ ಹೈದ್ರಾಬಾದ್ ತಂಡ​ ಹಲವು ಬಾರಿ ನುಚ್ಚು ನೂರು ಮಾಡಿದೆ.

2 ಬಾರಿ ಫೈನಲ್​​ನಲ್ಲಿ ಕಪ್​ ಗೆಲುವಿಗೆ ವಿಲನ್​​.!

IPL ಇತಿಹಾಸದಲ್ಲಿ 3 ಬಾರಿ ಆರ್​​ಸಿಬಿ ಐಪಿಎಲ್​ ಫೈನಲ್​ಗೆ ಎಂಟ್ರಿ ಕೊಟ್ಟಿದೆ. ಈ ಪೈಕಿ 2 ಬಾರಿ ಇದೇ ಹೈದ್ರಾಬಾದ್​ ತಂಡ ಕಪ್​ ಕನಸಿಗೆ ಕೊಳ್ಳಿ ಇಟ್ಟಿದೆ. 2009ರಲ್ಲಿ ನಡೆದ 2ನೇ ಸೀಸನ್​ನಲ್ಲೇ ಆರ್​​ಸಿಬಿ ಐಪಿಎಲ್​ ಫೈನಲ್​ಗೆ ಭರ್ಜರಿ ಎಂಟ್ರಿ ನೀಡಿತ್ತು. ಕಪ್​ ಗೆಲ್ಲೋ ಭರವಸೆಯನ್ನೂ ಹುಟ್ಟು ಹಾಕಿತ್ತು. ಆದ್ರೆ, ಆ ಅಂದಿನ ಡೆಕ್ಕನ್​ ಚಾರ್ಜಸ್​ ತಂಡ ಫೈನಲ್​ನಲ್ಲಿ​​ ಆರ್​ಸಿಬಿಯನ್ನ ಸೋಲಿಸಿ ಕಪ್​ ಕನಸನ್ನ ಛಿದ್ರಗೊಳಿಸಿತ್ತು.

2016ರಲ್ಲಿ ಬೆಂಗಳೂರಿನ ನಮ್ಮ ಹೋಮ್​​ಗ್ರೌಂಡ್​ನಲ್ಲೇ ಹೈದ್ರಾಬಾದ್​​​ ಅಸಂಖ್ಯ ಅಭಿಮಾನಿಗಳ ಕನಸನ್ನ ನುಚ್ಚು ನೂರು ಮಾಡಿತ್ತು. ಚಿನ್ನಸ್ವಾಮಿ ಮೈದಾನದಲ್ಲಿ ನಡೆದ ಫೈನಲ್​ ಫೈಟ್​ನಲ್ಲಿ ಗೆದ್ದು ಚಾಂಪಿಯನ್​ ಪಟ್ಟದ ಕನಸನ್ನ ಕಸಿದುಕೊಂಡಿತ್ತು.

2 ಸೀಸನ್​​​​​ಗಳಲ್ಲಿ ಟಾಪ್​​-2 ಕನಸಿಗೆ ಕೊಳ್ಳಿ ಇಟ್ಟ SRH.!

UAEನಲ್ಲಿ ನಡೆದಿದ್ದ 2020ರ ಐಪಿಎಲ್​ನಲ್ಲೂ ಆರ್​​ಸಿಬಿ ಇದೇ ರೀತಿ ಟಾಪ್​ 2 ಸ್ಥಾನದ ಕನಸು ಕಾಣ್ತಿತ್ತು. ಆದ್ರೆ, ಲೀಗ್​ ಹಂತದ ಕೊನೆಯ 2 ಪಂದ್ಯಗಳಲ್ಲಿ ಸೋತಿದ್ದು ಮುಳುವಾಯ್ತು. 5 ವಿಕೆಟ್​ಗಳ​ ಭಾರೀ ಅಂತರದಲ್ಲಿ ಸೋಲಿಸಿದ ಹೈದ್ರಾಬಾದ್​ ಆರ್​​ಸಿಬಿಯ ಟಾಪ್​ 2 ಸ್ಥಾನಕ್ಕೇರೋ ಕನಸಿಗೆ ಕೊಳ್ಳಿ ಇಟ್ಟಿತ್ತು.

ಇಷ್ಟೇ ಅಲ್ಲ.. ಆ ಬಳಿಕ ಪ್ಲೇ ಆಫ್​ ಹಂತದಲ್ಲೂ ಕಾಟ ಕೊಡ್ತು. ಎಲಿಮಿನೇಟರ್​ ಕದನದಲ್ಲಿ ಸೋಲಿಸಿ ಆರ್​​ಸಿಬಿಯನ್ನ ಎಲಿಮಿನೇಟ್​ ಮಾಡ್ತು. ಇದ್ರೊಂದಿಗೆ ಟ್ರೋಫಿ ಕನಸು ನುಚ್ಚು ನೂರಾಯ್ತು.

2021ರ ಐಪಿಎಲ್​ನಲ್ಲಿ ಆರ್​​​ಸಿಬಿ ಟಾಪ್​ 2 ಸ್ಥಾನಕ್ಕೇರಲು ಕೊನೆಯ 2 ಲೀಗ್​ ಪಂದ್ಯಗಳಲ್ಲಿ ಗೆಲ್ಲಲೇಬೇಕಿತ್ತು. ಆ ಪೈಕಿ ಒಂದು ಪಂದ್ಯ ಸನ್​ರೈಸರ್ಸ್​ ಹೈದ್ರಾಬಾದ್​ ವಿರುದ್ಧ ಇತ್ತು. ಆ ಸೀಸನ್​ನಲ್ಲೂ ಕಳಪೆ ಪರ್ಫಾಮೆನ್ಸ್​ ನೀಡಿದ್ದ ಹೈದ್ರಾಬಾದ್​ ಅದಾಗಲೇ ಎಲಿಮಿನೇಟ್​ ಆಗಿತ್ತು. ಆದ್ರೂ, ಆರ್​​ಸಿಬಿ ವಿರುದ್ಧದ ಪಂದ್ಯದಲ್ಲಿ ಜಿದ್ದಿನ ಹೋರಾಟ ನಡೆಸಿದ್ದ ಹೈದ್ರಾಬಾದ್​ ಗೆದ್ದಿ ಆರ್​​ಸಿಬಿಯ ಟಾಪ್​ 2 ಕನಸಿಗೆ ಕೊಳ್ಳಿ ಇಟ್ಟಿತ್ತು.

ಇದನ್ನೂ ಓದಿ: ಕಾನ್ ಚಿತ್ರೋತ್ಸವದಲ್ಲಿ ಹಣೆಗೆ ‘ಸಿಂಧೂರ’ವಿಟ್ಟು ಐಶ್ವರ್ಯ ರೈ ಹೊಸ ಲುಕ್​.. ಇದರ ಅರ್ಥ ಏನು?

ಈ ಸೀಸನ್​ನಲ್ಲೂ ಕಾಟ ಕೊಡುತ್ತಾ ಹೈದ್ರಾಬಾದ್​.?

ಈ ಸೀಸನ್​ನಲ್ಲೂ ಟಾಪ್​ 2 ಸ್ಥಾನ ಭದ್ರ ಪಡಿಸಿಕೊಳ್ಳಲು ಆರ್​​ಸಿಬಿ ತಂಡ ಕೊನೆಯ 2 ಪಂದ್ಯಗಳನ್ನ ಗೆಲ್ಲಬೇಕಿದೆ. ಅದ್ರಲ್ಲಿ ಒಂದು ಪಂದ್ಯ ಇದೇ ಸನ್​ರೈಸರ್ಸ್​ ಹೈದ್ರಾಬಾದ್​ ವಿರುದ್ಧ ಇದೆ. ನಾಳೆ ಲಕ್ನೋನ ಎಕಾನ ಮೈದಾನದಲ್ಲಿ ಹೈದ್ರಾಬಾದ್​​ -ಬೆಂಗಳೂರಿನ ಕಾಳಗ ನಡೆಯಲಿದೆ. ಈ ಪಂದ್ಯದಲ್ಲೂ ಹೈದ್ರಾಬಾದ್​ spoilsport ಆಡುತ್ತಾ ಅನ್ನೋ ಆತಂಕ ಅಭಿಮಾನಿಗಳಲ್ಲಿದೆ.

ಈ ಸೀಸನ್​ನಲ್ಲಿ ಆರ್​​ಸಿಬಿ ಆಡಿರೋ ಆಟ ನೋಡಿದ್ರೆ, ಹೈದ್ರಾಬಾದ್​ನ ಮಣಿಸೋದು ಕಷ್ಟದ ವಿಚಾರವೇನಲ್ಲ. ಆದ್ರೂ, ಆರ್​​ಸಿಬಿ ಎಚ್ಚರಿಕೆಯ ಹೆಜ್ಜೆ ಇಡಬೇಕಿದೆ. ಸ್ವಲ್ಪ ಯಾಮಾರಿದ್ರೂ ಟಾಪ್​​ 2 ಕನಸು ಮತ್ತೊಮ್ಮೆ ಛಿದ್ರವಾಗಲಿದೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.30ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ