ವಿಶ್ವದ ವೇಗದ ಬೌಲರ್ ರೆಕಾರ್ಡ್​ ಬ್ರೇಕ್ ಮಾಡಿದ ಬೂಮ್ರಾ.. ಮುಂಬೈಕರ್ ಬೆಸ್ಟ್ ಇನ್ ಟೆಸ್ಟ್

ಆಸ್ಟ್ರೇಲಿಯಾ ಜೊತೆ ನಡೆದ ಬಾರ್ಡರ್​ ಗವಾಸ್ಕರ್ ಟ್ರೋಫಿಯ 4ನೇ ಪಂದ್ಯದಲ್ಲಿ ಟೀಮ್ ಇಂಡಿಯಾ ಸೋಲು ಕಂಡಿದೆ. 184 ರನ್​ಗಳ ಅಂತರದಿಂದ ರೋಹಿತ್ ಶರ್ಮಾ ಪಡೆ ಆಸಿಸ್​ಗೆ ತಲೆ ಬಾಗಿದೆ. ಆದರೆ ಈ ಸರಣಿಯಲ್ಲಿ ಯಾರ್ಕರ್​ ಸ್ಪೆಷಲಿಸ್ಟ್ ಜಸ್​ಪ್ರಿತ್ ಬೂಮ್ರಾ ಅವರು ವಿಶೇಷ ದಾಖಲೆ ಮಾಡುವ ಮೂಲಕ ಎಲ್ಲರ ಗಮನ ಸೆಳೆದಿದ್ದಾರೆ. ಪಾಕ್​ನ ಮಾಜಿ ವೇಗಿ ದಾಖಲೆಯನ್ನ ಉಡೀಸ್ ಮಾಡಿದ್ದಾರೆ.

ಕ್ರಿಕೆಟ್‌ನಲ್ಲಿ ವಿಶ್ವದ ವೇಗದ ಬೌಲರ್​ ಎಂದೇ ಒಂದು ಸಮಯದಲ್ಲಿ ಖ್ಯಾತಿ ಪಡೆದಿದ್ದ ಶೋಯೆಬ್ ಅಖ್ತರ್ ಅವರು 12 ಬಾರಿ ಐದೈದು ವಿಕೆಟ್‌ಗಳ ಕಬಳಿಸಿ ಮುಂದಿದ್ದರು. ಆದರೆ ಈ ರೆಕಾರ್ಡ್​ ಅನ್ನು ಮುಂಬೈಕರ್, ಯಾರ್ಕರ್ ಸ್ಪೆಷಲಿಸ್ಟ್​ ಜಸ್​ಪ್ರಿತ್ ಬೂಮ್ರಾ ಬ್ರೇಕ್ ಮಾಡಿ, ಇತಿಹಾಸ ಬರೆದಿದ್ದು, ಅಖ್ತರ್​ನ ಆ ಸ್ಥಾನವನ್ನು ಅಲಂಕರಿಸಿದ್ದಾರೆ.

ಮೆಲ್ಬೋರ್ನ್ ಕ್ರಿಕೆಟ್ ಗ್ರೌಂಡ್‌ನಲ್ಲಿ ಆಸ್ಟ್ರೇಲಿಯಾ ವಿರುದ್ಧದ ಬಾಕ್ಸಿಂಗ್ ಡೇ ಟೆಸ್ಟ್‌ನ 2ನೇ ಇನ್ನಿಂಗ್ಸ್​​ನಲ್ಲಿ 57 ರನ್​ ನೀಡಿ 5 ವಿಕೆಟ್​ಗಳನ್ನು ಉರುಳಿಸಿದರು. ಈ ಮೂಲಕ ಬೂಮ್ರಾ ಒಟ್ಟು 13 ಬಾರಿ ಐದು ವಿಕೆಟ್ ಗಳಿಕೆಯೊಂದಿಗೆ ಪಾಕ್​ನ ಮಾಜಿ ವೇಗಿಯ ದಾಖಲೆಯನ್ನು ಹಿಂದಿಕ್ಕಿದರು. ಶೋಯೆಬ್ ಅಖ್ತರ್ ಮಾತ್ರವಲ್ಲ ಇವರ ಜೊತೆ ಶ್ರೀಲಂಕಾದ ಚಮಿಂದಾ ವಾಸ್ ಮತ್ತು ಆಸ್ಟ್ರೇಲಿಯಾದ ಮಿಚೆಲ್ ಜಾನ್ಸನ್​ರ ರೆಕಾರ್ಡ್ ಕೂಡ​ ಬ್ರೇಕ್ ಮಾಡಿದರು. ಆಸ್ಟ್ರೇಲಿಯಾ ವಿರುದ್ಧ ಇಂತಹ ಸಾಧನೆ ಮಾಡಿರುವುದು ವಿಶೇಷ ಎನಿಸಿದೆ.

ಬೂಮ್ರಾ ಅವರು 2024ರ ಸಾಲಿನಲ್ಲಿ 13 ಟೆಸ್ಟ್​ಗಳನ್ನು ಆಡಿದ್ದು ಒಟ್ಟು 71 ವಿಕೆಟ್​ಗಳನ್ನು ತೆಗೆದುಕೊಂಡಿದ್ದಾರೆ. ಬೌಲಿಂಗ್​ನಲ್ಲಿ 14.92 ಸರಾಸರಿ ಹೊಂದಿದ್ದು 30.1 ಸ್ಟ್ರೈಕ್ ರೇಟ್​ನಲ್ಲಿ ಬೂಮ್ರಾ ಇದ್ದಾರೆ. ಇನ್ನೊಂದು ವಿಶೇಷ ಎಂದರೆ ಬಾರ್ಡರ್​ ಗವಾಸ್ಕರ್​ ಟ್ರೋಫಿಯಲ್ಲಿ ಇನ್ನೊಂದು ಮ್ಯಾಚ್ ಬಾಕಿ ಇರುವಾಗಲೇ 30 ವಿಕೆಟ್​ಗಳನ್ನು ಗಳಿಸಿರುವುದು ಬೂಮ್ರಾರ ಮತ್ತೊಂದು ಸಾಧನೆ ಆಗಿದೆ.

ಇದನ್ನೂ ಓದಿ: ಶಾಪವಾದ 3ನೇ ಅಂಪೈರ್​.. ಯಶಸ್ವಿ ಜೈಸ್ವಾಲ್​ ಔಟ್​ಗೆ BCCI, ಅಭಿಮಾನಿಗಳು ಆಕ್ರೋಶ

• ಬೂಮ್ರಾ ಕೇವಲ 44 ಟೆಸ್ಟ್‌ಗಳಲ್ಲಿ 203 ವಿಕೆಟ್‌ಗಳನ್ನು ಉರುಳಿಸಿದ್ದಾರೆ
• ಅಖ್ತರ್ ತಮ್ಮ ವೃತ್ತಿಜೀವನದಲ್ಲಿ 46 ಪಂದ್ಯಗಳಲ್ಲಿ 178 ವಿಕೆಟ್ ಪಡೆದಿದ್ದರು
• ಆಸ್ಟ್ರೇಲಿಯಾ ವಿರುದ್ಧ ನಡೆದ 4ನೇ ಟೆಸ್ಟ್​​ನಲ್ಲಿ ಬೂಮ್ರಾ ಸಾಧನೆ ಮಾಡಿದರು
• ಬಾರ್ಡರ್​ ಗವಾಸ್ಕರ್​ ಟ್ರೋಫಿಯಲ್ಲಿ 4 ಪಂದ್ಯಗಳಿಗೆ 30 ವಿಕೆಟ್​ ಗಳಿಸಿದ್ದಾರೆ
• ಬೂಮ್ರಾ ಆಡಿರುವ 44 ಪಂದ್ಯಗಳಲ್ಲಿ 203 ವಿಕೆಟ್​ ತೆಗೆದುಕೊಂಡಿದ್ದಾರೆ
• ಇನ್ನಿಂಗ್ಸ್​ನಲ್ಲಿ ಬೆಸ್ಟ್ ಎಂದರೆ- 27 ರನ್​ಗೆ 6 ವಿಕೆಟ್​ ಕಬಳಿಸಿರುವುದು
• ಪಂದ್ಯದಲ್ಲಿ ಬೆಸ್ಟ್ ಎಂದರೆ- 86 ರನ್​ಗೆ 9 ವಿಕೆಟ್​ ಉರುಳಿಸಿರುವುದು
• 13 ಬಾರಿ ಐದು ಐದು ವಿಕೆಟ್​ಗಳನ್ನು ತೆಗೆದುಕೊಂಡು ಸಾಧನೆ ಮಾಡಿದ್ದಾರೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ