KL ರಾಹುಲ್, ಕ್ಯಾಪ್ಟನ್​ ಈಶ್ವರನ್ ಭರ್ಜರಿ ಹಾಫ್​​ಸೆಂಚುರಿ.. ಕನ್ನಡಿಗ ಕರುಣ್​ ಔಟ್​!

ಇಂಗ್ಲೆಂಡ್​​ ಲಯನ್ಸ್​ ವಿರುದ್ಧದ 2ನೇ ಅನಧಿಕೃತ ಟೆಸ್ಟ್​ ಪಂದ್ಯದ ಎರಡನೇ ಇನ್ನಿಂಗ್ಸ್​ನಲ್ಲಿ ಭಾರತ- ಎ ತಂಡದ ಪರವಾಗಿ ಬ್ಯಾಟಿಂಗ್ ಮಾಡಿದ ಕನ್ನಡಿಗ ಕೆ.ಎಲ್ ರಾಹುಲ್ ಅರ್ಧಶತಕ ಗಳಿಸಿ ವಿಕೆಟ್​ ಒಪ್ಪಿಸಿದ್ದಾರೆ.

ನಾರ್ಥಾಂಪ್ಟನ್​ನ ಕೌಂಟಿ ಮೈದಾನದಲ್ಲಿ ನಡೆಯುತ್ತಿರುವ 2ನೇ ಅನಧಿಕೃತ ಟೆಸ್ಟ್​ ಪಂದ್ಯದ 3ನೇ ದಿನದಾಟದಲ್ಲಿ ಇಂಗ್ಲೆಂಡ್​​ ಲಯನ್ಸ್​ ತಂಡ 327 ರನ್​ಗೆ ತನ್ನೆಲ್ಲಾ ವಿಕೆಟ್​ ಕಳೆದುಕೊಂಡಿತು. ಇದರಿಂದ ಭಾರತ- ಎ ತಂಡ 21 ರನ್​ಗಳ ಮುನ್ನಡೆ ಕಾಯ್ದುಕೊಂಡಿತು. ಇಂಗ್ಲೆಂಡ್​​ ಲಯನ್ಸ್​ ತಂಡದ ಆಟಗಾರರು ಆಲೌಟ್ ಆಗಿದ್ದರಿಂದ ಎರಡನೇ ಇನ್ನಿಂಗ್ಸ್​ನಲ್ಲಿ ಓಪನರ್​ಗಳಾಗಿ ಯಶಸ್ವಿ ಜೈಸ್ವಾಲ್ ಹಾಗೂ ಕನ್ನಡಿಗ ಕೆ.ಎಲ್ ರಾಹುಲ್ ಅವರು ಬ್ಯಾಟಿಂಗ್​ಗೆ ಆಗಮಿಸಿದ್ದರು.

ಇದನ್ನೂ ಓದಿ:ಚಿನ್ನಸ್ವಾಮಿ ಸ್ಟೇಡಿಯಂ ಕಾಲ್ತುಳಿತ; ಮೊದಲೇ ಅಪಾಯದ ಎಚ್ಚರಿಕೆ, ದೊಡ್ಡ ನಿರ್ಲಕ್ಷ್ಯ ಮಾಡಿದವರು ಯಾರು?

ಮೊದಲ ಟೆಸ್ಟ್​ನಲ್ಲಿ ಬ್ಯಾಟಿಂಗ್​ನಲ್ಲಿ ವಿಫಲರಾಗಿದ್ದ ಜೈಸ್ವಾಲ್ ಎರಡನೇ ಟೆಸ್ಟ್​ನ ಎರಡೂ ಇನ್ನಿಂಗ್ಸ್​ಗಳಲ್ಲೂ ಕೆಟ್ಟ ಪ್ರದರ್ಶನ ನೀಡಿದರು. ಆದರೆ ಕೆ.ಎಲ್ ರಾಹುಲ್ ಅಂತೂ ಭರ್ಜರಿ ಫಾರ್ಪಮೆನ್ಸ್​ ನೀಡಿ ತಂಡಕ್ಕೆ ನೆರವಾದರು. 2ನೇ ಇನ್ನಿಂಗ್ಸ್​ನಲ್ಲಿ 64 ಎಸೆತಗಳನ್ನು ಎದುರಿಸಿದ ಕೆ.ಎಲ್ ರಾಹುಲ್ ಅವರು ಸಿಕ್ಸರ್​ ಇಲ್ಲದೇ 9 ಬೌಂಡರಿಗಳಿಂದ 51 ರನ್​ ಸಿಡಿಸಿದ್ದಾರೆ. ಅರ್ಧಶತಕದಿಂದ ಬ್ಯಾಟಿಂಗ್ ಮುಂದುವರೆಸಿದ್ದ ರಾಹುಲ್, ಎಡ್ಡಿ ಜ್ಯಾಕ್ ಬೌಲಿಂಗ್​ನಲ್ಲಿ ವಿಕೆಟ್ ಒಪ್ಪಿಸಿದರು.

ಇನ್ನು ಕ್ಯಾಪ್ಟನ್​ ಅಭಿಮನ್ಯು ಈಶ್ವರನ್ ಕೂಡ ಅರ್ಧಶತಕ ಸಿಡಿಸಿದ್ದು ಬ್ಯಾಟಿಂಗ್ ಮುಂದುವರೆಸಿದ್ದಾರೆ. ಮೊದಲ ಟೆಸ್ಟ್​ನಲ್ಲಿ ದ್ವಿಶತಕ ಬಾರಿಸಿದ್ದ ಕನ್ನಡಿಗ ಕರುಣ್ ನಾಯರ್ ಈ ಇನ್ನಿಂಗ್ಸ್​ನಲ್ಲಿ ಕೇವಲ 15 ರನ್​ಗಳಿಗೆ ವಿಕೆಟ್​ ಒಪ್ಪಿಸಿ ನಿರಾಶೆ ಅನುಭವಿಸಿದ್ದಾರೆ. ಸದ್ಯ ಭಾರತ- ಎ ತಂಡ 3 ವಿಕೆಟ್​ಗೆ 137 ರನ್​ಗಳಿಂದ ಆಡುತ್ತಿದ್ದು 158 ರನ್​ಗಳ ಲೀಡ್ ಕಾಯ್ದುಕೊಂಡಿದೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.30ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ