2 ಸಾವಿರಕ್ಕೂ ಹೆಚ್ಚು KSRP ಕಾನ್​ಸ್ಟೆಬಲ್ ನೇಮಕಾತಿಗೆ ಸರ್ಕಾರ ಗ್ರೀನ್ ಸಿಗ್ನಲ್

ಬೆಂಗಳೂರು: ಸಶಸ್ತ್ರ ಮೀಸಲು ಪಡೆ (ಕೆಎಸ್​ಆರ್​ಪಿ) ಯಲ್ಲಿ ಸದ್ಯದಲ್ಲೇ 2 ಸಾವಿರಕ್ಕೂ ಹೆಚ್ಚು ಉದ್ಯೋಗಗಳನ್ನು ನೇಮಕಾತಿ ಮಾಡಲಾಗುತ್ತದೆ. ಈಗಾಗಲೇ ರಾಜ್ಯ ಸರ್ಕಾರವು ಪೊಲೀಸ್ ಇಲಾಖೆಗೆ ಗ್ರೀನ್ ಸಿಗ್ನಲ್ ನೀಡಿದ್ದು ರಾಜ್ಯ ಪತ್ರ ಬರೆಯಲಾಗಿದೆ. ಪೊಲೀಸ್ ಇಲಾಖೆಯಲ್ಲಿ ಕೆಲಸ ಬೇಕೆಂದು ಕಾದು ಕುಳಿತಿರುವವರು ಈಗಿನಿಂದಲೇ ತಯಾರಿ ನಡೆಸಿದರೆ ಈ ಹುದ್ದೆ ಪಡೆಯಬಹುದು.

ರಾಜ್ಯ ಸರ್ಕಾರವು 2,400 ಕೆಎಸ್‌ಆರ್‌ಪಿ ಕಾನ್​​ಸ್ಟೆಬಲ್‌ ಹುದ್ದೆಗಳ ನೇಮಕಕ್ಕೆ ಪೊಲೀಸ್‌ ಇಲಾಖೆಗೆ ಆದೇಶ ನೀಡಿದೆ. ಈ ಹಿನ್ನೆಲೆಯಲ್ಲಿ 2 ಬೆಟಾಲಿಯನ್‌ ಪ್ರಾರಂಭಕ್ಕೆ ಅಧಿಕೃತವಾಗಿ ಸರ್ಕಾರದಿಂದ ಅನುಮತಿ ಸಿಕ್ಕಿದೆ. ಸದ್ಯ ರಾಜ್ಯದಲ್ಲಿ 12 ಕೆಎಸ್‌ಆರ್‌ಪಿ, 2 ಐಆರ್‌ಬಿ ಬೆಟಾಲಿಯನ್‌ ಇವೆ. ಇವಕ್ಕೆ ಇನ್ನೆರಡು ಬೆಟಾಲಿಯನ್​ ಸೇರಿಕೊಳ್ಳಲಿವೆ. ಆದರೆ ಎಲ್ಲ ಸಿದ್ಧತೆಗಳು ಆಗಬೇಕಾದ ಹಿನ್ನೆಲೆಯಲ್ಲಿ ಇನ್ನಷ್ಟು ಕಾಲಾವಕಾಶ ತೆಗೆದುಕೊಳ್ಳಲಿದೆ.

ಇದನ್ನೂ ಓದಿ:600 ಜೂನಿಯರ್ ಅಸಿಸ್ಟೆಂಟ್ ಮ್ಯಾನೇಜರ್ ಹುದ್ದೆಗೆ ಇಂದೇ ಕೊನೆ ದಿನ.. ಅಪ್ಲೇ ಮಾಡಿ!

ರಾಜ್ಯದಲ್ಲಿ ನೈಸರ್ಗಿಕ ವಿಪತ್ತು, ಬೃಹತ್ ಹೋರಾಟ, ಸಭೆ, ಸಮಾರಂಭ, ಚುನಾವಣೆಗಳಲ್ಲಿ ಭದ್ರತೆಗಾಗಿ ಪೊಲೀಸ್ ಸಿಬ್ಬಂದಿ ಅಗತ್ಯವಿತ್ತು. ಬೆಟಾಲಿಯನ್​ ಬೇಕೆಂದು ಸಲ್ಲಿಸಿದ್ದ ಪ್ರಸ್ತಾವನೆಗೆ ಸರ್ಕಾರ ಒಪ್ಪಿಗೆ ಸೂಚಿಸಿರುವುದು ಖುಷಿ ವಿಚಾರ. ಜೊತೆಗೆ ಉದ್ಯೋಗಗಳು ಕೂಡ ಸೃಷ್ಟಿಯಾಗುತ್ತಿವೆ. ಸರ್ಕಾರದ ಒಪ್ಪಿಗೆ ಇರುವುದರಿಂದ ಹೊಸ ಬೆಟಾಲಿಯನ್‌ಗಳಿಗೆ ನೇಮಕಾತಿ ಪ್ರಕ್ರಿಯೆ ಇನ್ನೆರಡು- ಮೂರು ತಿಂಗಳಲ್ಲಿ ಆರಂಭವಾಗಲಿದೆ. ಹೀಗಾಗಿ ಅಭ್ಯರ್ಥಿಗಳು ಮೊದಲೇ ಎಲ್ಲ ಪ್ರಮಾಣ ಪತ್ರ ಸಿದ್ಧ ಪಡಿಸಿಕೊಳ್ಳುವುದರ ಜೊತೆಗೆ ದೈಹಿಕ ಪರೀಕ್ಷೆ ಹಾಗೂ ಲಿಖಿತ ಪರೀಕ್ಷೆಗೆ ತಯಾರಿ ಮಾಡಿಕೊಂಡರೆ ಉತ್ತಮ.

18 ವರ್ಷದಿಂದ 28 ವರ್ಷದೊಳಿಗಿನ ಅಭ್ಯರ್ಥಿಗಳನ್ನು ಈ ಹುದ್ದೆಗಳಿಗೆ ಪರಿಗಣಿಸಬಹುದು. ವಿದ್ಯಾರ್ಹತೆಯು ಮೊದಲು 10ನೇ ತರಗತಿ ಮೇಲೆ ಪೊಲೀಸ್ ಇಲಾಖೆಗೆ ನೇಮಕಾತಿ ಮಾಡಲಾಗುತ್ತಿತ್ತು. ಆದರೆ ಈ ಬಾರಿ ದ್ವಿತೀಯ ಪಿಯುಸಿಯನ್ನ ಪರಿಗಣಿಸಬಹುದು. ಏನೇ ಆಗಲಿ ಶೀಘ್ರವೇ ನೋಟಿಫಿಕೇಶನ್‌ ರಿಲೀಸ್ ಮಾಡುವ ಚಾನ್ಸ್ ಇದ್ದು ಸರ್ಕಾರಿ ಉದ್ಯೋಗಕ್ಕಾಗಿ ಆಕಾಂಕ್ಷಿಗಳು ತಯಾರಿ ನಡೆಸಿದರೆ ಅರ್ಧ ಉದ್ಯೋಗ ಪಡೆದಂತೆ ಆಗಬಹುದು.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ