ರಣರೋಚಕ ಪಂದ್ಯ.. ಕೇವಲ 2 ರನ್​ಗಳಿಂದ ರಿಷಭ್​ ಪಂತ್ ಪಡೆಗೆ ಭರ್ಜರಿ ಗೆಲುವು

ಲಕ್ನೋ ಸೂಪರ್ ಜೈಂಟ್ಸ್ ತಂಡದ ಸಾಧಾರಣ ಮೊತ್ತದ ಟಾರ್ಗೆಟ್​ ಅನ್ನು ರಾಜಸ್ಥಾನ್ ರಾಯಲ್ಸ್ ಚೇಸ್​ ಮಾಡಲಾಗದೇ ಸೋಲೋಪ್ಪಿಕೊಂಡಿದೆ. ಪಂದ್ಯವನ್ನು ಕೊನೆವರೆಗೆ ಎಳೆದುಕೊಂಡು ಬಂದ ರಾಜಸ್ಥಾನ್ ಕೇವಲ 2 ರನ್​ಗಳಿಂದ ಸೋತಿದೆ.

ಸವಾಯಿ ಮಾನ್ಸಿಂಗ್ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಲಕ್ನೋ ಕ್ಯಾಪ್ಟನ್ ರಿಷಭ್ ಪಂತ್ ಟಾಸ್ ಗೆದ್ದು, ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡು ಆರಂಭದಲ್ಲೇ ಆಘಾತಕ್ಕೆ ಒಳಗಾದರು. ಏಕೆಂದರೆ ತಂಡದ ಪರ ಆರಂಭಿಕರಾದ ಮಿಚೆಲ್ ಮಾರ್ಷ್ ಕೇವಲ 4 ರನ್​ಗೆ ಕ್ಯಾಚ್ ನೀಡಿದರು. ಆದರೆ ಮಾರ್ಕ್ರಾಮ್ ಉತ್ತಮ ಬ್ಯಾಟಿಂಗ್​ನಿಂದ 45 ಎಸೆತದಲ್ಲಿ 66 ರನ್​ ಗಳಿಸಿ ರಿಯಾನ್​ ಪರಾಗ್​ಗೆ ಕ್ಯಾಚ್ ಕೊಟ್ಟರು.

ನಿಕೋಲಸ್ ಪೂರನ್ 11, ರಿಷಭ್ ಪಂತ್ ಕೇವಲ 3, ಆಯುಷ್ ಬದೋನಿಯ ಅತ್ಯುತ್ತಮ ಬ್ಯಾಟಿಂಗ್​​ನಿಂದ ಅರ್ಧಶತಕ ಬಾರಿಸಿದರು. ಅಬ್ದುಲ್ ಸಮದ್ 10 ಎಸೆತದಲ್ಲಿ 4 ಸಿಕ್ಸರ್​​ಗಳಿಂದ 30 ರನ್​ಗಳ ಕಾಣಿಕೆ ನೀಡಿದ್ದರಿಂದ ಲಕ್ನೋ ಟೀಮ್ 20 ಓವರ್​​​ಗಳಲ್ಲಿ 5 ವಿಕೆಟ್​ಗೆ 181 ರನ್​ಗಳ ಟಾರ್ಗೆಟ್ ನೀಡಿತ್ತು.

ಇದನ್ನೂ ಓದಿ:IPL ಪಾಯಿಂಟ್​ ಟೇಬಲ್​ನಲ್ಲಿ ಭಾರೀ ಬದಲಾವಣೆ.. ಗುಜರಾತ್​ಗೆ ಗೆಲುವು, ಕುಸಿದ ಡೆಲ್ಲಿ

ಬ್ಯಾಟಿಂಗ್ ಇನ್ನಿಂಗ್ಸ್​ ಆರಂಭಿಸಿದ ರಾಜಸ್ಥಾನ್ ರಾಯಲ್ಸ್ ಭದ್ರ ಅಡಿಪಾಯ ಹಾಕಿತು. 14 ವರ್ಷ ಯುವ ಪ್ರತಿಭೆ ವೈಭವ್ ಸೂರ್ಯವಂಶಿ ಹಾಗೂ ಜೈಸ್ವಾಲ್​ ಈ ಇಬ್ಬರ ಭರ್ಜರಿ ಬ್ಯಾಟಿಂಗ್​ ಮೂಡಿ ಬಂದಿತು. 14 ವರ್ಷದ ವೈಭವ್​ ಸಿಡಿಲಬ್ಬರದ ಬ್ಯಾಟಿಂಗ್ ಪ್ರದರ್ಶಿಸಿ 20 ಎಸೆತದಲ್ಲಿ 2 ಬೌಂಡರಿ, 3 ಭರ್ಜರಿ ಸಿಕ್ಸರ್​​ಗಳಿಂದ 34 ರನ್​ ಚಚ್ಚಿದರು. ವೈಭವ್ ಸೂರ್ಯವಂಶಿ ಚೊಚ್ಚಲ ಪಂದ್ಯದಲ್ಲೇ ನಿರರ್ಗಳವಾಗಿ ಬ್ಯಾಟ್​ ಬೀಸಿದರು.

ಪಂದ್ಯದಲ್ಲಿ ಯಶಸ್ವಿ ಜೈಸ್ವಾಲ್ ಮತ್ತೊಂದು ಹಾಫ್​ ಸೆಂಚುರಿ ಬಾರಿಸಿ ಸಂಭ್ರಮಿಸಿದರು. ಪಂದ್ಯದಲ್ಲಿ 52 ಎಸೆತಗಳನ್ನ ಎದುರಿಸಿದ ಜೈಸ್ವಾಲ್​ 5 ಬೌಂಡರಿ, ಭರ್ಜರಿಯಾಗಿ 4 ಸಿಕ್ಸ್​ಗಳಿಂದ 74 ರನ್​ಗಳ ಕಾಣಿಕೆ ನೀಡಿದೆ. ಆದರೆ ಆವೇಶ್​ ಖಾನ್ ಬೌಲಿಂಗ್​ನಲ್ಲಿ ವಿಕೆಟ್ ಒಪ್ಪಿಸಿ ಹೊರನಡೆದರು.

ಇನ್ನು ನಾಯಕ ರಿಯಾನ್ ಪರಾಗ್​ ಕೂಡ ಜವಾಬ್ದಾರಿಯುತ ಬ್ಯಾಟಿಂಗ್ ಮಾಡಿದರು. ಹೀಗಾಗಿ 26 ಬಾಲ್​ನಲ್ಲಿ 3 ಬೌಂಡರಿ 2 ಸಿಕ್ಸರ್​ನಿಂದ 39 ರನ್​ ಗಳಿಸಿದರು. ಶಿಮ್ರಾನ್ ಹೆಟ್ಮೆಯರ್ 12ಕ್ಕೆ ವಿಕೆಟ್​ ಒಪ್ಪಿಸಿದರು. ಕೊನೆಯಲ್ಲಿ ಧೃವ್​ ಜುರೆಲ್ 6 ಹಾಗೂ ಶುಭಂ ದುಬೆ 3 ಈ ಇಬ್ಬರು ತಂಡವನ್ನು ದಡ ಸೇರಿಸುವಲ್ಲಿ ವಿಫಲವಾದರು. ಹೀಗಾಗಿ ಮತ್ತೊಂದು ರಣರೋಚಕ ಪಂದ್ಯದಲ್ಲಿ ರಾಜಸ್ಥಾನ್ ಸೋಲಿಗೆ ಶರಣಾಯಿತು. ರಾಜಸ್ಥಾನ್ 5 ವಿಕೆಟ್​ಗೆ 178 ರನ್​ ಗಳಿಸಿ ಕೇವಲ 2 ರನ್​ಗಳಿಂದ ಲಕ್ನೋ ತಂಡದ ವಿರುದ್ಧ ತಲೆ ಬಾಗಿತು.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ