1,00,000 ಉದ್ಯೋಗಿಗಳನ್ನ ಮನೆಗೆ ಕಳುಹಿಸಿದ ಟೆಕ್ ಕಂಪನಿಗಳು.. ಇನ್ನೂ 3 ವರ್ಷ ಇದೇ ಕತೆ -ಎಚ್ಚರಿಕೆ..!

2025ರಲ್ಲಿ ಔದ್ಯೋಗಿಕ ವಲಯದಲ್ಲಿ ದೊಡ್ಡ ಬಿಕ್ಕಟ್ಟು ಸೃಷ್ಟಿಯಾಗಿದೆ. ಜಗತ್ತಿನ ಪ್ರಮುಖ ಕಂಪನಿಗಳೇ ತಮ್ಮ ಉದ್ಯೋಗಿಗಳಿಗೆ ಲೇ ಆಫ್ ನೀಡುತ್ತಿವೆ. ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದು ಹಾಕಿ ಮುಲಾಜಿಲ್ಲದೇ ಗೇಟ್ ಪಾಸ್ ನೀಡುತ್ತಿವೆ.

2025ರಲ್ಲಿ ಮೊದಲ ಆರು ತಿಂಗಳಲ್ಲೇ ಬರೋಬ್ಬರಿ ಒಂದು ಲಕ್ಷ ಮಂದಿ ಉದ್ಯೋಗ ಕಳೆದುಕೊಂಡು ನಿರುದ್ಯೋಗಿಗಳಾಗಿದ್ದಾರೆ. ಮೈಕ್ರೋಸಾಫ್ಟ್, ಇಂಟೆಲ್, ಗೂಗಲ್, ಇನ್ಫೋಸಿಸ್ಸ್, ಐಬಿಎಂ ಸೇರಿದಂತೆ ಟೆಕ್ ಕಂಪನಿಗಳಲ್ಲಿ ಉದ್ಯೋಗಿಗಳು ಉದ್ಯೋಗ ಕಳೆದುಕೊಂಡು ಬೀದಿಗೆ ಬಿದ್ದಿದ್ದಾರೆ. ಕಂಪನಿಗಳಲ್ಲಿ ವೆಚ್ಚದ ಒತ್ತಡ ತಗ್ಗಿಸಲು, ಕಂಪನಿಯ ಉದ್ಯೋಗಿಗಳ ಸಂಖ್ಯೆ ಕಡಿತಗೊಳಿಸಿ, ಕಂಪನಿಯ ಪುನರ್ ರಚನೆ ಮಾಡುವ ಉದ್ದೇಶ ಹಾಗೂ ಆರ್ಟಿಫಿಷಿಯಲ್ ಇಂಟಲಿಜೆನ್ಸ್ ಅಳವಡಿಸಿಕೊಳ್ಳಲು ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದು ಹಾಕಿ ಮುಲಾಜಿಲ್ಲದೆ ಮನೆಗೆ ಕಳಿಸಲಾಗಿದೆ.

ಇದನ್ನೂ ಓದಿ: ನಿನ್ನೆ ತೆರವು.. ಇಂದು ಮತ್ತೆ ಬ್ಯಾನ್..! ಪಾಕ್ ಸೆಲೆಬ್ರಿಟಿಗಳಿಗೆ ಭಾರತ ಸರ್ಕಾರ ಮತ್ತೆ ಶಾಕ್..!

ಜಾಗತಿಕವಾಗಿ ಐ.ಟಿ. ಕಂಪನಿಗಳಲ್ಲಿ ಉದ್ಯೋಗಕ್ಕೆ ಡಿಮ್ಯಾಂಡ್ ಕಡಿಮೆಯಾಗಿದೆ. ಆರ್ಟಿಫಿಷಿಯಲ್ ಇಂಟಲಿಜೆನ್ಸ್, ಆಟೋಮೆಷನ್​​ನಿಂದಾಗಿ ಹೊಸ ಉದ್ಯೋಗಗಳು ಹೆಚ್ಚಾಗಿ ಸೃಷ್ಟಿಯಾಗುತ್ತಿಲ್ಲ. ಕಳೆದ ವರ್ಷವೂ ಐ.ಟಿ. ವಲಯದಲ್ಲಿ ಉದ್ಯೋಗ ಸೃಷ್ಟಿ ಕಡಿಮೆ ಇತ್ತು. ಈ ವರ್ಷ ಮತ್ತಷ್ಟು ಬಿಕ್ಕಟ್ಟು ಸೃಷ್ಟಿಯಾಗಿ ಉದ್ಯೋಗಗಳೇ ಸೃಷ್ಟಿಯಾಗುತ್ತಿಲ್ಲ. ಮುಂದಿನ ಕೆಲವು ವರ್ಷಗಳಲ್ಲಿ ಬೆಳವಣಿಗೆ, ಉದ್ಯೋಗ ಸೃಷ್ಟಿಯಾಗುವ ಸಂಭವ ಇಲ್ಲ ಎಂದು ಇನ್ಫೋಸಿಸ್ ಕಂಪನಿಯಲ್ಲಿದ್ದ ಉದ್ಯಮಿ ಮೋಹನ್ ದಾಸ್ ಪೈ ಇತ್ತೀಚೆಗೆ ನ್ಯೂಸ್ ಫಸ್ಟ್ ಗೆ ತಿಳಿಸಿದ್ದಾರೆ. ಇದರ ಬಗ್ಗೆ ನಾವು ಆಲೋಚನೆ ಮಾಡಬೇಕು. ಇಂಜಿನಿಯರಿಂಗ್ ಕಾಲೇಜುಗಳು ವಿದ್ಯಾರ್ಥಿಗಳಿಗೆ ಎಐ, ಆಟೋಮೆಷನ್ ಬಗ್ಗೆ ತರಬೇತಿ ನೀಡಬೇಕು. ಈ ಮೊದಲು ಅಭ್ಯರ್ಥಿಗಳ ನಾಲ್ಡೆಜ್ ನೋಡುತ್ತಿರಲಿಲ್ಲ. ಕಾಲೇಜುಗಳಲ್ಲಿ ಟ್ರೇನಿಂಗ್ ಹೆಚ್ಚಿಸಬೇಕು. ಸಣ್ಣ, ಸಣ್ಣ ಕಂಪನಿಗಳನ್ನು ಕಾಲೇಜಿಗೆ ಕರೆದು ಪ್ಲೇಸ್ ಮೆಂಟ್ ಹೆಚ್ಚಿಸಬೇಕು ಎಂದು ಮೋಹನ್ ದಾಸ್ ಪೈ ಹೇಳಿದ್ದರು.

2025 ತಂತ್ರಜ್ಞಾನ ವಲಯಕ್ಕೆ ಮತ್ತೊಂದು ಕ್ರೂರ ವರ್ಷವಾಗಿ ರೂಪುಗೊಳ್ಳುತ್ತಿದೆ. ಜಾಗತಿಕವಾಗಿ 2025 ರಲ್ಲಿ ಇದುವರೆಗೂ 1 ಲಕ್ಷ ಮಂದಿ ಉದ್ಯೋಗ ಕಳೆದುಕೊಂಡಿದ್ದಾರೆ. ಮೈಕ್ರೋಸಾಫ್ಟ್, ಇಂಟೆಲ್, ಮೆಟಾ, ಗೂಗಲ್ ನಂಥ ಕಂಪನಿಗಳು ತಮ್ಮ ಉದ್ಯೋಗಿಗಳ ಸಂಖ್ಯೆಯನ್ನು ಕಡಿತಗೊಳಿಸುತ್ತಿವೆ. ಈ ಎಲ್ಲ ದೈತ್ಯ ಕಂಪನಿಗಳು ಆರ್ಥಿಕ ಒತ್ತಡಕ್ಕೆ ಒಳಗಾಗಿವೆ. ತಮ್ಮ ನಷ್ಟವನ್ನು ಕಡಿಮೆ ಮಾಡಿಕೊಳ್ಳಲು ಉದ್ಯೋಗಿಗಳನ್ನು ಕೆಲಸದಿಂದ ತೆಗೆಯದೇ ಬೇರೆ ದಾರಿ ಇಲ್ಲ ಎಂದು ಕಂಪನಿಗಳು ಹೇಳುತ್ತಿವೆ. ಮೈಕ್ರೋಸಾಫ್ಟ್ ಈ ವರ್ಷದ ಎರಡನೇ ಸುತ್ತಿನ ಲೇ ಆಫ್ ನಲ್ಲಿ 6 ಸಾವಿರ ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದು ಹಾಕಿದೆ. ಎಕ್ಸ್ ಬಾಕ್ಸ್, ಗೇಮಿಂಗ್ ಯೂನಿಟ್ ಗಳಲ್ಲಿ 9,100 ಉದ್ಯೋಗಿಗಳು ತಮ್ಮ ಕೆಲಸ ಕಳೆದುಕೊಂಡಿದ್ದಾರೆ. ಮೈಕ್ರೋಸಾಫ್ಟ್ ಕಂಪನಿಯು ತನ್ನ ಉದ್ಯೋಗಿಗಳ ಪೈಕಿ ಶೇ.4 ರಷ್ಟು ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದು ಹಾಕುತ್ತಿದೆ. ಕ್ಯಾಂಡಿ ಕ್ರಷ್ ಸುಮಾರು 200 ಉದ್ಯೋಗಿಗಳನ್ನು ತೆಗೆದು ಹಾಕಿದೆ.

ಇದನ್ನೂ ಓದಿ: ಬ್ರಿಟಿಷರನ್ನು ಅಟ್ಟಾಡಿಸಿ ಹೊಡೆದ ಗಿಲ್​​.. ಯಂಗ್ ಟೈಗರ್ಸ್​ ಘರ್ಜನೆಗೆ ಸೈಲೆಂಟ್..!

ಇಂಟೆಲ್​ನಿಂದ ಶೇ.20 ಉದ್ಯೋಗಿಗಳಿಗೆ ಗೇಟ್ ಪಾಸ್

ಇಂಟೆಲ್ ಕಂಪನಿಯು ಶೇ.20 ರಷ್ಟು ಉದ್ಯೋಗಿಗಳಿಗೆ ಗೇಟ್ ಪಾಸ್ ನೀಡಿದೆ. ಇಂಟೆಲ್ ಕಂಪನಿಯು ಹೊಸ ಸಿಇಓ ಲಿಪ್ ಬು ಟಾನ್ ನೇತೃತ್ವದಲ್ಲಿ ಕಂಪನಿಯ ಪುನರ್ ರಚನೆ ಮಾಡುತ್ತಿದೆ. ಜುಲೈನಲ್ಲಿ ಸಾಂತಾ ಕ್ಲಾರಾ ಪ್ರಧಾನ ಕಚೇರಿಯಲ್ಲಿ 107 ಮಂದಿ ಉದ್ಯೋಗ ಕಳೆದುಕೊಳ್ಳುವರು. ಕಂಪನಿಯು ಜರ್ಮನ್ ನಲ್ಲಿರುವ ಆಟೋಮೋಟೀವ್ ಚಿಪ್ ಘಟಕವನ್ನು ಸಹ ಮುಚ್ಚುತ್ತಿದೆ.

ಬಹುತೇಕ ಇಡೀ ತಂಡವನ್ನು ಕೆಲಸದಿಂದ ತೆಗೆದು ಹಾಕುತ್ತಿದೆ. ಜಾಗತಿಕವಾಗಿ ಇಂಟೆಲ್ ಕಂಪನಿಯು ಶೇ.20 ರಷ್ಟು ಉದ್ಯೋಗಿಗಳನ್ನು ತೆಗೆದು ಹಾಕಲು ನಿರ್ಧರಿಸಿದೆ. ಚಿಪ್ ಡಿಸೈನ್, ಕ್ಲೌಡ್, ಆರ್ಕಿಟೆಕ್ಟರ್, ಎಕ್ಸಿಕ್ಯುಟೀವ್ ಇಂಜಿನಿಯರ್ ಗಳನ್ನು ಕೆಲಸದಿಂದ ತೆಗೆದು ಹಾಕುತ್ತಿದೆ. ಚಿಪ್ ಮ್ಯಾನ್ಯುಫ್ಯಾಕ್ಚರಿಂಗ್ ಉದ್ಯೋಗಿಗಳಿಗೆ ಹೆಚ್ಚಿನ ತೊಂದರೆಯಾಗುತ್ತಿದೆ. ಅನಗತ್ಯ ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದು ಹಾಕಿ, ಪರಿಣಾಮಕಾರಿಯಾದ ತಂಡವನ್ನು ರೂಪಿಸುವ ಕಾರ್ಯತಂತ್ರದ ಭಾಗವಾಗಿ ಲೇ ಆಫ್ ನೀಡಲಾಗುತ್ತಿದೆ ಎಂದು ಇಂಟೆಲ್ ಕಂಪನಿಯು ತನ್ನ ಕ್ರಮವನ್ನು ಸಮರ್ಥಿಸಿಕೊಂಡಿದೆ. ಚಿಕ್ಕ ತಂಡಗಳನ್ನು ರಚಿಸಿ, ಪರಿಣಾಮಕಾರಿಯಾಗಿ ಕೆಲಸ ಮಾಡುವಂತೆ ಮಾಡುವ ಬಗ್ಗೆ ಇಂಟೆಲ್ ಕಂಪನಿಯು ಈಗ ಆದ್ಯತೆ ನೀಡುತ್ತಿದೆ.

ಅಮೆಜಾನ್​ನಿಂದ ಶೇ.13 ರಷ್ಟು ಉದ್ಯೋಗಿಗಳಿಗೆ ಗೇಟ್‌ಪಾಸ್!

ಅಮೆಜಾನ್ ಕಂಪನಿಯು 2025 ರಲ್ಲಿ ಈಗಾಗಲೇ ನಾಲ್ಕು ಸುತ್ತಿನಲ್ಲಿ ಲೇ ಆಫ್ ನೀಡಿದೆ. ಅಮೆಜಾನ್ 14 ಸಾವಿರ ಮ್ಯಾನೇಜಿಂಗ್ ರೋಲ್ ನಲ್ಲಿದ್ದ ಉದ್ಯೋಗಿಗಳನ್ನು ಮನೆಗೆ ಕಳಿಸಲು ನಿರ್ಧರಿಸಿದೆಯಂತೆ. ಕಂಪನಿಯ ನಾಯಕತ್ವದ ಉದ್ಯೋಗಿಗಳ ಪೈಕಿ ಶೇ.13 ರಷ್ಟು ಮಂದಿಗೆ ಲೇ ಆಫ್ ನೀಡುತ್ತಿದೆ. ಕಂಪನಿಗೆ ಲಾಭ ಕಡಿಮೆಯಾಗಿರುವುದರಿಂದ ವೆಚ್ಚ ಕಡಿತದ ಭಾಗವಾಗಿ ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದು ಹಾಕುತ್ತಿದೆ. ಲೇ ಆಫ್ ಮುಗಿದ ಬಳಿಕ ಕಂಪನಿಯ ಉದ್ಯೋಗಿಗಳ ಸಂಖ್ಯೆ 92 ಸಾವಿರಕ್ಕೆ ಕುಸಿಯಲಿದೆ.

ಐಬಿಎಂ ನಿಂದ 8 ಸಾವಿರ ಉದ್ಯೋಗಿಗಳು ಮನೆಗೆ!

ಐಬಿಎಂ ಕಂಪನಿಯು 8 ಸಾವಿರ ಉದ್ಯೋಗಿಗಳಿಗೆ ಲೇ ಆಫ್ ನೀಡಿ ಮನೆಗೆ ಕಳಿಸಿದೆ. ಕಂಪನಿಯ ಮಾನವ ಸಂಪನ್ಮೂಲ ವಿಭಾಗದಲ್ಲಿ ಹೆಚ್ಚಿನ ಉದ್ಯೋಗಿಗಳನ್ನು ಮನೆಗೆ ಕಳಿಸಲಾಗಿದೆ. ಐಬಿಎಂ ಕಂಪನಿಯಲ್ಲಿ ಈ ಮೊದಲು ಉದ್ಯೋಗಿಗಳು ಮಾಡುತ್ತಿದ್ದ ಕೆಲಸಗಳನ್ನು ಈಗ ಆಟೋಮೇಷನ್, ಎಐ ನಿರ್ವಹಣೆ ಮಾಡುತ್ತಿವೆ. ಐಬಿಎಂ ಕಂಪನಿಯು ಆಟೋಮೆಷನ್, ಎಐ ಅನ್ನು ಅಳವಡಿಸಿಕೊಂಡು ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದು ಹಾಕಿದೆ.

ಇದನ್ನೂ ಓದಿ: ಅಮರನಾಥ ಯಾತ್ರೆಗೆ ಹೋಗುವ ಕುದುರೆಗಳಿಗೆ ವಿಮೆ.. ಪಹಲ್ಗಾಮ್ ಮೂಲಕ ಸಾಗಲು ವ್ಯವಸ್ಥೆ ಹೇಗಿದೆ..?

ಇನ್ಫೋಸಿಸ್​​ನಲ್ಲಿ 540 ಮಂದಿಗೆ ಲೇ ಆಫ್

ಇನ್ಫೋಸಿಸ್ ಕಂಪನಿಯಲ್ಲಿ ಈ ವರ್ಷ 540 ಮಂದಿಗೆ ಲೇ ಆಫ್ ನೀಡಲಾಗಿದೆ. ಇಂಟರನಲ್ ಅಸೆಸ್ ಮೆಂಟ್ ಅನ್ನು ಕ್ಲಿಯರ್ ಮಾಡಲು ಸಾಧ್ಯವಾಗದ 240 ಮಂದಿಯನ್ನು ಕೆಲಸದಿಂದ ತೆಗೆದು ಹಾಕಲಾಗಿತ್ತು. 2025ರ ಫೆಬ್ರವರಿಯಲ್ಲೂ 300 ಮಂದಿಯನ್ನು ಇಂಟರನಲ್ ಅಸೆಸ್ ಮೆಂಟ್ ಕ್ಲಿಯರ್ ಮಾಡಿಲ್ಲ ಎಂಬ ಕಾರಣದಿಂದ ತೆಗೆದು ಹಾಕಲಾಗಿತ್ತು.

ಮೆಟಾದಲ್ಲಿ ಶೇ.5 ರಷ್ಟು ಉದ್ಯೋಗ ಕಡಿತ

ಗೂಗಲ್​ನಲ್ಲಿ ನೂರಾರು ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದು ಹಾಕಲಾಗಿದೆ. ಮೆಟಾದಲ್ಲಿ ಶೇ.5 ರಷ್ಟು ಉದ್ಯೋಗ ಕಡಿತ ಮಾಡಲಾಗುತ್ತಿದೆ. 3,600 ಮಂದಿ ಉದ್ಯೋಗಿಗಳು ಕಳಪೆ ಕೆಲಸಗಾರರು ಎಂದು ಪಟ್ಟಿ ಮಾಡಿದ್ದು, ಕೆಲಸದಿಂದ ತೆಗೆದು ಹಾಕಲಾಗುತ್ತಿದೆ. ರಿಯಾಲ್ಟಿ ಲ್ಯಾಬ್ ಡಿವಿಷನ್​ನಲ್ಲಿ 100 ಮಂದಿಯನ್ನು ತೆಗೆದು ಹಾಕಲಾಗಿದೆ.

ಬೇರೆ ಯಾವ್ಯಾವ ಕಂಪನಿಗಳಲ್ಲಿ ಉದ್ಯೋಗ ಕಡಿತ?

• ಆಟೋಮ್ಯಾಟಿಕ್ ಕಂಪನಿಯು ವರ್ಡ್ ಪ್ರೆಸ್ ನಡೆಸುತ್ತಿದೆ. ಶೇ.16 ರಷ್ಟು ಉದ್ಯೋಗ ಕಡಿತ ಮಾಡುತ್ತಿದ್ದು, 270 ಮಂದಿಗೆ ಗೇಟ್ ಪಾಸ್ ನೀಡುತ್ತಿದೆ
• ಟಿಕ್ ಟಾಕ್ ತನ್ನ ಕಂಪನಿಯ ಶೇ.10 ರಷ್ಟು ಉದ್ಯೋಗ ಕಡಿತ ಮಾಡುತ್ತಿದ್ದು, 300 ಮಂದಿಯನ್ನು ಮನೆಗೆ ಕಳಿಸುತ್ತಿದೆ.
• ಓಲಾ ಎಲೆಕ್ಟ್ರಿಕ್ 5 ತಿಂಗಳಲ್ಲಿ 2ನೇ ಭಾರಿಗೆ ಲೇ ಆಫ್ ನೀಡಿದ್ದು, 1 ಸಾವಿರ ಉದ್ಯೋಗಿಗಳನ್ನು ಮನೆಗೆ ಕಳಿಸಿದೆ.
• ಎಚ್‌ಪಿ ಕಂಪನಿಯು 2 ಸಾವಿರ ಉದ್ಯೋಗಿಗಳನ್ನು ಪುನರ್ ರಚನೆಯ ಕಾರಣ ನೀಡಿ ತೆಗೆದು ಹಾಕಿದೆ
  ಸೇಲ್ಸ್ ಪೋರ್ಸ್, ಒಂದು ಸಾವಿರ ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದು ಹಾಕಿದೆ.
• ಬ್ಲೂ ಒರಿಜಿನ್ 1 ಸಾವಿರ ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದು ಹಾಕಿದೆ.
• ಕಾನವ ಲೇಡ್ ಕಂಪನಿಯು 10 ರಿಂದ 12 ಟೆಕ್ನಿಕಲ್ ರೈಟರ್ ಉದ್ಯೋಗಿಗಳನ್ನ ತೆಗೆದು ಹಾಕಿದೆ.
• ಸೀಮನ್ಸ್ ಕಂಪನಿಯು 5,600 ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದು ಹಾಕಿದೆ.
• ಎಲೆಕ್ಟ್ರಾನಿಕ್ ಆರ್ಟ್ಸ್ ಕಂಪನಿಯು 400 ಉದ್ಯೋಗಿಗಳನ್ನು ತೆಗೆದು ಹಾಕಿದೆ.
• ಮ್ಯಾಚ್ ಗ್ರೂಪ್ ಶೇ.13 ರಷ್ಟು ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದು ಹಾಕಿದೆ.
• ಕ್ರೌಡ್ ಸ್ಟ್ರೈಕ್ ಶೇ.5 ರಷ್ಟು ಉದ್ಯೋಗಿಗಳನ್ನು ತೆಗೆದು ಹಾಕಿದೆ.

ಹೀಗೆ ಬಹುತೇಕ ಎಲ್ಲ ಕಂಪನಿಗಳಲ್ಲೂ ಉದ್ಯೋಗ ಕಡಿತ, ವೆಚ್ಚ ಕಡಿತ, ಕಂಪನಿಯ ಪುನರ್ ರಚನೆ, ಎಐ ಆಳವಡಿಕೆ, ಆಟೋಮೇಷನ್ ಅಳವಡಿಕೆ ಎಂಬುದು ಸಾಮಾನ್ಯವಾಗಿದೆ. ಎಐ, ಆಟೋಮೇಷನ್ ನಿಂದಾಗಿ ಉದ್ಯೋಗಿಗಳಿಗೆ ಬೇಡಿಕೆಯೇ ಇಲ್ಲವಾಗಿದೆ. ಮುಂದಿನ 3 ವರ್ಷ ಇದೇ ರೀತಿಯಾದ ಪರಿಸ್ಥಿತಿ ಮುಂದುವರಿಯಲಿದೆ ಎಂದು ತಜ್ಞರು ಹೇಳಿದ್ದಾರೆ.

ವಿಶೇಷ ವರದಿ: ಚಂದ್ರಮೋಹನ್, ನ್ಯೂಸ್ ಫಸ್ಟ್

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ