ಧೋನಿ ಕ್ಯಾಪ್ಟನ್ ಆದ್ರೂ ಮುಂದುವರೆದ CSK ಸೋಲು.. ಮನೆಯಂಗಳದಲ್ಲಿ ಚೆನ್ನೈ ತಂಡ ಧೂಳೀಪಟ

ಎಂ.ಎ ಚಿದಂಬರಂ ಸ್ಟೇಡಿಯಂನಲ್ಲಿ ನಡೆದ ಪಂದ್ಯದಲ್ಲಿ ಕೋಲ್ಕತ್ತಾ ನೈಟ್​ ರೈಡರ್ಸ್​ ವಿರುದ್ಧ ಚೆನ್ನೈ ಸೂಪರ್ ಕಿಂಗ್ಸ್​ ಹೀನಾಯವಾಗಿ ಸೋತು ಹೋಗಿದೆ. ಕೆಕೆಆರ್​ 8 ವಿಕೆಟ್​ಗಳಿಂದ ಭರ್ಜರಿ ಗೆಲುವು ಪಡೆದುಕೊಂಡಿದೆ.

ಚೆನ್ನೈನಲ್ಲಿ ನಡೆದ 25ನೇ ಐಪಿಎಲ್​ ಪಂದ್ಯದಲ್ಲಿ ಟಾಸ್ ಗೆದ್ದ ಕೆಕೆಆರ್ ತಂಡದ ನಾಯಕ ಅಜಿಂಕ್ಯಾ ರಹಾನೆ ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡರು. ಅದರಂತೆ ಬ್ಯಾಟಿಂಗ್​ಗೆ ಆಗಮಿಸಿದ ಚೆನ್ನೈ ಪರ ಓಪನರ್ಸ್ ರಚಿನ್ ರವೀಂದ್ರ ಹಾಗೂ ಡಿವೋನ್ ಕಾನ್ವೆ ಉತ್ತಮ ಆರಂಭವೇನು ಪಡೆಯಲಿಲ್ಲ. ರಚಿನ್​ ಕೇವಲ 4 ರನ್​ಗೆ ಔಟ್ ಆದ್ರೆ, ಕಾನ್ವೆ 12 ರನ್​ಗೆ ಎಲ್​ಬಿಡಬ್ಲುಗೆ ಬಲಿಯಾದರು.

ವಿಜಯ್ ಶಂಕರ್ 2 ಫೋರ್, 1 ಸಿಕ್ಸರ್ ಸಮೇತ 29 ಹಾಗೂ ಶುವಂ ದುಬೆ ಅವರ 3 ಬೌಂಡರಿಗಳಿಂದ 31 ರನ್​ಗಳನ್ನು ಗಳಿಸಿದರು. ಈ ಇಬ್ಬರು ಬ್ಯಾಟರ್​ಗಳನ್ನ ಬಿಟ್ಟರೇ ಉಳಿದವರು ಯಾರು ಕೂಡ ಚೆನ್ನಾಗಿ ಬ್ಯಾಟಿಂಗ್ ಮಾಡಲಿಲ್ಲ. ಕ್ಯಾಪ್ಟನ್​ ಧೋನಿ ಕೂಡ ಕೊನೆಯಲ್ಲಿ ಬ್ಯಾಟಿಂಗ್​ಗೆ ಬಂದು ಕೇವಲ 1 ರನ್​ಗೆ ಔಟ್​ ಆದರು. ಹೀಗಾಗಿ ಚೆನ್ನೈ ತಂಡ 20 ಓವರ್​ಗಳಲ್ಲಿ 9 ವಿಕೆಟ್​ಗೆ​ 104 ರನ್​ಗಳ ಗುರಿ ನೀಡಿತ್ತು.

ಇದನ್ನೂ ಓದಿ:IPLನಲ್ಲಿ ಒಬ್ಬೊಬ್ಬರಿಗೆ ಒಂದೊಂದು ನ್ಯಾಯ.. ಯಂಗ್ ಪ್ಲೇಯರ್​​ಗೆ ಬ್ಯಾನ್​ ಭೀತಿನಾ?

ಈ ಸುಲಭ ಟಾರ್ಗೆಟ್​ ಬೆನ್ನು ಹತ್ತಿದ್ದ ಕೋಲ್ಕತ್ತಾ ನೈಟ್ ರೈಡರ್ಸ್​ ತಂಡ ಬಹು ಬೇಗನೇ ಜಯ ಸಾಧಿಸಿತು. ಕೆಕೆಆರ್ ತಂಡದಲ್ಲಿ ಆರಂಭಿಕ ಬ್ಯಾಟರ್​ಗಳಾಗಿ ಬಂದ ಕ್ವಿಂಟನ್ ಡಿ ಕಾಕ್, ಸುನಿಲ್ ನರೈನ್​ ಒಳ್ಳೆಯ ಬ್ಯಾಟಿಂಗ್ ಪ್ರದರ್ಶನ ಮಾಡಿದರು. ಡಿ ಕಾಕ್ 23ಕ್ಕೆ ಔಟ್ ಆದರೆ, ನರೈನ್ 44 ರನ್​ಗೆ ವಿಕೆಟ್ ಒಪ್ಪಿಸಿದರು. ಅಜಿಂಕ್ಯಾ ರಹಾನೆ ಅಜೇಯ 20 ಹಾಗೂ ರಿಂಕು ಸಿಂಗ್ ಅಜೇಯ 15 ರನ್​ಗಳಿಂದ ಕೆಕೆಆರ್ ತಂಡಕ್ಕೆ ಗೆಲುವು ತಂದು ಕೊಟ್ಟರು.

10.1 ಓವರ್​ಗಳಲ್ಲಿ ಕೇವಲ 2 ವಿಕೆಟ್​ಗೆ 107 ರನ್​ಗಳನ್ನು ಗಳಿಸುವ ಮೂಲಕ ಕೋಲ್ಕತ್ತಾ ತಂಡ ವಿಜಯಶಾಲಿಯಾಯಿತು. ಈ ಮೂಲಕ ಕೆಕೆಆರ್ ತಂಡ 6 ಪಂದ್ಯಗಳಲ್ಲಿ ಮೂರರಲ್ಲಿ ಗೆಲುವು ಕಂಡು, ಮೂರರಲ್ಲಿ ಸೋಲುಂಡಿದೆ. ಅದರಂತೆ ಚೆನ್ನೈ ತಂಡ ಕೂಡ 6 ಮ್ಯಾಚ್​ಗಳನ್ನು ಆಡಿದ್ದು ಇದರಲ್ಲಿ ಒಂದು ಪಂದ್ಯವನ್ನು ಮಾತ್ರ ಗೆದ್ದು ಉಳಿದ ಎಲ್ಲ ಪಂದ್ಯಗಳಲ್ಲಿ ಹೀನಾಯವಾಗಿ ಸೋತು ಹೋಗಿದೆ. ಈ ಪಂದ್ಯಕ್ಕೆ ಧೋನಿ ಕ್ಯಾಪ್ಟನ್ ಆದರೂ ಚೆನ್ನೈನ ಸೋಲಿನ ಓಟ ಮುಂದುವರೆದಿದೆ ಎಂದು ಹೇಳಲಾಗುತ್ತಿದೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ