ಟೀಮ್ ಇಂಡಿಯಾದಲ್ಲಿ ಸೀನಿಯರ್​ ಪ್ಲೇಯರ್​ಗಳ​ ಕಡೆಗಣನೆ.. ತಪ್ಪು ಆಗಿರುವುದು ಎಲ್ಲಿ?

ಪ್ರತಿಷ್ಠೆಯ ಸರಣಿಗಾಗಿ ಇಂಗ್ಲೆಂಡ್​ ಕಾಲಿಟ್ಟಿರೋ ಟೀಮ್​ ಇಂಡಿಯಾವನ್ನ ಯುದ್ಧದ ಆರಂಭಕ್ಕೂ ಮುನ್ನವೇ ಹಿನ್ನಡೆಯ ಭೀತಿ ಆವರಿಸಿದೆ. ಸಮರಾಭ್ಯಾಸದ ವೇಳೆಯೇ ದಿಗ್ಗಜರ ಅಲಭ್ಯತೆ ತಂಡವನ್ನ ಕಾಡಿದೆ. ಕಿಂಗ್​ ಕೊಹ್ಲಿ, ಹಿಟ್​ಮ್ಯಾನ್​ ರೋಹಿತ್​, ಅಶ್ವಿನ್​, ಶಮಿಯ ಅಲಭ್ಯತೆ ಇಂಗ್ಲೆಂಡ್​ ತಂಡಕ್ಕೆ ಬಿಗ್​ ರಿಲೀಫ್​ ನೀಡಿದ್ರೆ, ಟೀಮ್​ ಇಂಡಿಯಾಗೆ ಟೆನ್ಶನ್​ ತಂದಿಟ್ಟಿದೆ.

ಇಂಡೋ-ಇಂಗ್ಲೆಂಡ್​​ ಮದಗಜಗಳ ನಡುವಿನ ಕಾಳಗಕ್ಕೆ ದಿನಗಣನೆ ಶುರುವಾಗಿದೆ. 5 ಪಂದ್ಯಗಳ ಟೆಸ್ಟ್​ ಸರಣಿ ಜೂನ್​ 20ರಿಂದ ಆರಂಭವಾಗಲಿದ್ದು ಟೀಮ್​ ಇಂಡಿಯಾ ಇತಿಹಾಸ ಸೃಷ್ಟಿಸೋ ಕನಸು ಕಾಣ್ತಿದೆ. ಆದ್ರೆ, ಆ ಕನಸು ನನಸಾಗುತ್ತಾ.? ಯಾಕಂದ್ರೆ, ಬಲಿಷ್ಠ ಇಂಗ್ಲೆಂಡ್​ ತಂಡವನ್ನ ಅವರದ್ದೇ ನೆಲದಲ್ಲಿ ಎದುರಿಸಲು ಟೀಮ್​ ಇಂಡಿಯಾದಲ್ಲಿ ಬರಿ ಯುವ ಆಟಗಾರರೇ ತುಂಬಿಕೊಂಡಿದ್ದಾರೆ. ಹೀಗಾಗಿ ಸೀನಿಯರ್​ಗಳ ಅಲಭ್ಯತೆ ತಂಡವನ್ನ ಕಾಡಲಿದೆ ಅನ್ನೋ ವಿಶ್ಲೇಷಣೆ ಶುರುವಾಗಿದೆ. ಅದ್ರಲ್ಲೂ ಈ ನಾಲ್ವರನ್ನಂತೂ ಟೀಮ್​ ಇಂಡಿಯಾ ಅತಿ ಹೆಚ್ಚು ಮಿಸ್​ ಮಾಡಿಕೊಳ್ಳಲಿದೆ.

ಕಾಡಲಿದೆ ಕಿಂಗ್​ ಕೊಹ್ಲಿಯ ಅಲಭ್ಯತೆ.!

ಕ್ರಿಕೆಟ್​ ಲೋಕದ ಸುಲ್ತಾನ ವಿರಾಟ್​​ ಕೊಹ್ಲಿ ಹೆಸರನ್ನ ಕೇಳಿದ್ರೇನೆ ಎದುರಾಳಿ ಪಡೆಗಳು ಬೆಚ್ಚಿ ಬೀಳ್ತವೆ. ಯಾವುದೇ ಟೆಸ್ಟ್​ ಸರಣಿ ಆರಂಭವಾದ್ರೂ ಕೊಹ್ಲಿಯನ್ನ ಕಟ್ಟಿ ಹಾಕೋದು ಹೇಗೆ ಅನ್ನೋ ಚರ್ಚೆ ಎದುರಾಳಿ ತಂಡಗಳಲ್ಲಿ ನಡೀತಿತ್ತು. ಕೊಹ್ಲಿಯ ಆಟದ ಗತ್ತೇ ಅಂತದ್ದು. ಇಂಗ್ಲೆಂಡ್​ನ ಟಫ್​ ಕಂಡಿಷನ್ಸ್​ನಲ್ಲೂ ಕೊಹ್ಲಿ ಸರಾಗವಾಗಿ ಬ್ಯಾಟ್​ ಬೀಸಿದ್ರು. ಆಂಗ್ಲರ ನಾಡಲ್ಲಿ 33.2 ಸರಾಸರಿಯಲ್ಲಿ ಬ್ಯಾಟ್​ ಬೀಸಿದ್ದ ಕೊಹ್ಲಿ 1096 ರನ್​ಗಳಿಸಿದ್ರು. 3 ಪ್ರವಾಸಗಳಲ್ಲಿ ಆಡಿದ ಅನುಭವವಿತ್ತು. ಈ ಅನುಭವಿ ವಿರಾಟ್​ ಇದೀಗ ತಂಡದಲ್ಲಿಲ್ಲ.

ಬ್ಯಾಟ್ಸ್​ಮನ್​ ವಿರಾಟ್​ ಕೊಹ್ಲಿ ಮಾತ್ರ ಮಿಸ್​​ ಆಗಿಲ್ಲ, ಲೀಡರ್​ ವಿರಾಟ್​ ಕೊಹ್ಲಿಯನ್ನೂ ಟೀಮ್​ ಇಂಡಿಯಾ ಮಿಸ್​​ ಮಾಡಿಕೊಳ್ಳಲಿದೆ. ಆಟಗಾರರ ಪಾಲಿಗೆ ಎನರ್ಜಿ ಬೂಸ್ಟರ್​ ಆಗಿದ್ದ ವಿರಾಟ್​​ ಕೊಹ್ಲಿ ತನ್ನ ಅಗ್ರೆಸ್ಸಿವ್​ ಆ್ಯಟಿಟ್ಯೂಟ್​​ನಿಂದಲೇ ಎದುರಾಳಿಗಳ ಮೇಲೆ ಪ್ರೆಷರ್​ ಬ್ಯುಲ್ಡ್​ ಮಾಡ್ತಿದ್ರು. ಈ ಬಾರಿಯ ಪ್ರವಾಸದಲ್ಲಿ ಬಾರ್ನ್​ ಲೀಡರ್​​ ಕೊಹ್ಲಿಯ ಅಲಭ್ಯತೆ ಟೀಮ್​ ಇಂಡಿಯಾವನ್ನ ಕಾಡಲಿದೆ.

ನೋ ಹಿಟ್​​ಮ್ಯಾನ್​.. ಇಂಗ್ಲೆಂಡ್​ಗೆ ನೋ ಟೆನ್ಶನ್​.!

ಆಂಗ್ಲರ ನಾಡು ಇಂಗ್ಲೆಂಡ್​ನಲ್ಲೂ ಪವರ್​ಫುಲ್​ ಹಿಟ್ಟಿಂಗ್​ನಿಂದಲೇ ರೋಹಿತ್​ ಶರ್ಮಾ ಸೌಂಡ್​ ಮಾಡಿದರು. 40.3ರ ಸಾಲಿಡ್​ ಸರಾಸರಿಯನ್ನ ಹೊಂದಿದ್ದ ರೋಹಿತ್​ 524 ರನ್​ಗಳನ್ನ ಗಳಿಸಿದರು. ಅಗ್ರೆಸ್ಸಿವ್​ ಆರ್ಭಟ ನಡೆಸ್ತಿದ್ದ ಹಿಟ್​ಮ್ಯಾನ್​, ಇಂಗ್ಲೆಂಡ್​ ಬೌಲರ್​ಗಳ ಪಾಲಿಗೆ ತಲೆನೋವಾಗಿದ್ರು. ಪ್ರವಾಸಕ್ಕೂ ಮುನ್ನವೇ ಟೆಸ್ಟ್​ ಕ್ರಿಕೆಟ್​​ಗೆ ರೋಹಿತ್​ ಶರ್ಮಾ ಗುಡ್​ ಬೈ ಹೇಳಿರೋದು ಇಂಗ್ಲೆಂಡ್​ಗೆ ಬಿಗ್​ ರಿಲೀಫ್​ ನೀಡಿದ್ರೆ, ಟೀಮ್​ ಇಂಡಿಯಾಗೆ ಟೆನ್ಶನ್​ ತಂದಿಟ್ಟಿದೆ.

ಅಶ್ವಿನ್​ ಆಲ್​​ರೌಂಡ್​​ ಆಟದ ಬಲವಿಲ್ಲ.!

ಹಿಂದಿನ ಇಂಗ್ಲೆಂಡ್​ ಪ್ರವಾಸಗಳಲ್ಲಿ ಆಫ್​ ಸ್ಪಿನ್ನರ್​ ಆರ್​.ಅಶ್ವಿನ್​ ಆಲ್​​ರೌಂಡ್​ ಆಟದಿಂದ ಬಲ ತುಂಬಿದರು. ಬೌನ್ಸಿ ಟ್ರ್ಯಾಕ್​ನಲ್ಲೂ ಸ್ಪಿನ್​ ಮ್ಯಾಜಿಕ್​ ಮಾಡಿ ಬ್ಯಾಟ್ಸ್​ಮನ್​ಗಳಿಗೆ ಶಾಕ್​ ಕೊಡ್ತಿದ್ದ ಅಶ್ವಿನ್​ 18 ವಿಕೆಟ್​ ಬೇಟೆಯಾಡಿದ್ರು. 23.7ರ ಸರಾಸರಿಯಲ್ಲಿ 261 ರನ್​ಗಳಿಸಿ ಬ್ಯಾಟಿಂಗ್​ನಲ್ಲೂ ಕಾಂಟ್ರಿಬ್ಯೂಟ್​ ಮಾಡಿದ್ರು. ಆದ್ರೆ, ಈ ಬಾರಿ ಅಶ್ವಿನ್​ ಆಲ್​​​ರೌಂಡ್​ ಆಟದ ಬಲ ಟೀಮ್​ ಇಂಡಿಯಾಗಿಲ್ಲ.

ಇದನ್ನೂ ಓದಿ:ಜೇನುನೊಣ ನುಂಗಿ ಜೀವ ಬಿಟ್ಟ ಸಂಜಯ್ ಕಪೂರ್.. ಇಡೀ ಕಪೂರ್​ ಫ್ಯಾಮಿಲಿ, ಶಾರುಖ್​​ಗಿಂತ ದೊಡ್ಡ ಶ್ರೀಮಂತ!

ಶಮಿಗೆ ಮಾಯದ ಗಾಯ.. ಬೂಮ್ರಾ ಮೇಲೆ ಭಾರ.!

ಅನುಭವಿ ಸ್ಟೀಡ್​ಸ್ಟರ್​ ಮೊಹಮ್ಮದ್​ ಶಮಿ ಕೂಡ ಈ ಬಾರಿ ಇಂಗ್ಲೆಂಡ್​ ಟೂರ್​ನ ಟೀಮ್​ನಲ್ಲಿಲ್ಲ. ಆಂಗ್ಲರ ನಾಡಲ್ಲಿ ಧಮ್​ದಾರ್​ ಬೌಲಿಂಗ್​ ನಡೆಸಿ 42 ವಿಕೆಟ್​ ಉರುಳಿಸಿದ್ದ ಅನುಭವಿಯ ಅಲಭ್ಯತೆಯಿಂದ ಬೌಲಿಂಗ್​ ವಿಭಾಗದ ಬಲ ಕುಂದಿದೆ. ಫಿಟ್​ನೆಸ್​ ಸಮಸ್ಯೆಯಿಂದ ಹೊರಬಿದ್ದಿರೋದು ಬೂಮ್ರಾ ಮೇಲಿನ ಭಾರವನ್ನ ಹೆಚ್ಚು ಮಾಡಿದೆ. ಬೌಲಿಂಗ್​ ವಿಭಾಗದಲ್ಲಿ ಅನಾನುಭವಿಗಳೇ ಇರೋದ್ರಿಂದ ಟೂರ್ನಿ ಸಾಗಿದಂತೆ ಶಮಿಯ ಕೊರತೆ ಕಾಡೋ ಸಾಧ್ಯತೆಯಿದೆ.

ಇವರಿಷ್ಟೇ ಅಲ್ಲ, ಟೆಸ್ಟ್​ ಸ್ಪೆಷಲಿಸ್ಟ್​ ಬ್ಯಾಟರ್​ಗಳಾದ ಚೇತೇಶ್ವರ್​ ಪೂಜಾರ, ಅಂಜಿಕ್ಯಾ ರಹಾನೆ ಆಯ್ಕೆ ಲಭ್ಯರಿದ್ರೂ ಆಯ್ಕೆ ಸಮಿತಿ ಪರಿಗಣಿಸಿಲ್ಲ. ಸೀನಿಯರ್ಸ್​ ಕಡೆಗಣಿಸಿ ಯುವ ಆಟಗಾರರಿಗೆ ಮಣೆ ಹಾಕಿದೆ. ಇಂಗ್ಲೆಂಡ್​ನ ಪ್ಲೇಯಿಂಗ್​ ಕಂಡಿಷನ್ಸ್​ ಬಗ್ಗೆ ಹೆಚ್ಚಿನ ಅರಿವಿಲ್ಲದಿರೋ ಆಟಗಾರರೇ ತಂಡದಲ್ಲಿರೋದು ಮೊದಲೇ ಆತ್ಮವಿಶ್ವಾಸವನ್ನ ಕುಗ್ಗಿಸಿದೆ. ಟೂರ್ನಿಯಲ್ಲಿ ಆರಂಭದ ಬಳಿಕ ಇನ್ನಷ್ಟು ಒತ್ತಡ ಹೆಚ್ಚಾಗಲಿದ್ದು ಅದನ್ನ ಯಂಗ್​ ಇಂಡಿಯಾ ಹೇಗೆ ನಿಭಾಯಿಸುತ್ತೆ ಅನ್ನೋದು ಸದ್ಯ ದೊಡ್ಡ ಪ್ರಶ್ನೆಯಾಗಿದೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.30ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ