ನೆಲಮಂಗಲ ಅಪಘಾತ! ದುರಂತ ಅಸಲಿಗೆ ನಡೆದಿದ್ದು ಹೇಗೆ? ಕಂಟೇನರ್ ಡ್ರೈವರ್ ಹೇಳೋದೇನು?

ಒಂದೇ ಕುಟುಂಬದ 6 ಮಂದಿ ಬಲಿ ಪಡೆದ ಕಂಟೇನರ್​​ ಕ್ರೌರ್ಯ ಬೆಚ್ಚಿಬೀಳಿಸಿದೆ. ಆದರೆ, ಕಂಟೇನರ್​​ ಡ್ರೈವರ್​ ಮಾತ್ರ ಬೇರೆಯದ್ದೇ ಕಥೆ ಹೇಳುತ್ತಿದ್ದಾನೆ. ಆಸ್ಪತ್ರೆ ಬೆಡ್​​ ಮೇಲೆ ಮಲಗಿರೋ ಕಂಟೇನರ್​ ಡ್ರೈವರ್​ ವರ್ಷನ್ ಏನು? ಚಂದ್ರಮ್ ಕುಟುಂಬದ ಬಗ್ಗೆ ಅವರ ಆಫೀಸ್​​ನ ಸಿಬ್ಬಂದಿ ಹೇಳೋದೇನು? ವೋಲ್ವೋ ಕಾರ್​ ತಂದ ಕೆಲವೇ ತಿಂಗಳಲ್ಲೇ ಹೀಗೇಕಾಯ್ತು.

ಸಿಸಿಟಿವಿ ಕಂಟೇನರ್​ ಕ್ರೌರ್ಯ ಎಂಥದ್ದು ಅನ್ನೋದನ್ನ ಸಾರಿ ಸಾರಿ ಹೇಳ್ತಿದೆ. ಚಂದ್ರಮ್ ಯೋಗಪ್ಪಗೋಳ ಕುಟುಂಬ ಅಪ್ಪಚ್ಚಿ ಆಗಿದ್ದೇಗೆ ಅನ್ನೋದನ್ನ ಪ್ರತ್ಯಕ್ಷದರ್ಶಿ ಹೇಳ್ತಿದ್ದಾರೆ. ಹೊಚ್ಚ ಹೊಸ ಕಾರು ಜಖಂ ಆಗಿರೋದನ್ನ ನೋಡಿದ್ರೆ ದಾರುಣ ಎಂಥದ್ದು ಅನ್ನೋದು ಸ್ಪಷ್ಟವಾಗುತ್ತದೆ. ಆದರೇ, ಅದ್ಯಾವ ಕಂಟೇನರ್​ನಿಂದಾಗಿ ಈ ದುರಂತ ಆಯ್ತೋ? ಅದೇ ಕಂಟೇನರ್​​ ಡ್ರೈವರ್​ ಮಾತ್ರ ಬೇರೆಯದ್ದೇ ಕಥೆ ಹೇಳುತ್ತಿದ್ದಾನೆ.

ಕಂಟೇನರ್​ ಪಲ್ಟಿ ಹೊಡೆದಾಗ ಅಲ್ಲಿ ಯಾವ ಕಾರೂ ಇರಲಿಲ್ಲ"
ಇಲ್ಲಿ ಆಸ್ಪತ್ರೆ ಬೆಡ್​​ ಮೇಲೆ ಮಲಗಿರೋ ವ್ಯಕ್ತಿಯೇ ಭೀಕರ ದುರಂತಕ್ಕೆ ಕಾರಣ ಆಗಿರೋ ಕಂಟೇನರ್​ ಡ್ರೈವರ್​. ಅಪಘಾತದಿಂದಾಗಿ ಗಾಯಗೊಂಡಿರೋ ಚಾಲಕನನ್ನು ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಇದೀಗ ಚೇತರಿಸಿಕೊಂಡಿರೋ ಕಂಟೇನರ್​ ಡ್ರೈವರ್​ ವಿಲಕ್ಷಣ ಕಥೆ ಹೇಳುತ್ತಿದ್ದಾನೆ. ಕಂಟೇನರ್​ ಪಲ್ಟಿ ಹೊಡೆದಾಗ ಕಾರೇ ಇರಲಿಲ್ಲ ಅಂತಿದ್ದಾನೆ.

ನನ್ನ ಎದುರಿಗೆ ಇದ್ದ ಕಾರಿನವನು ಬಂದ. ಅರ್ಜೆಂಟ್​ ಬ್ರೇಕ್ ಹಾಕಿಬಿಟ್ಟ. ನನ್ನ ಮುಂದಿದ್ದ ಕಾರ್‌ಗೆ ಗುದ್ದಬಾರದು ಅಂದುಕೊಂಡೆ, ಅವನನ್ನು ಸೇಫ್‌ ಮಾಡಲು ಹೋಗಿ, ಸ್ಟೇರಿಂಗ್​​ನ ಎಡಗಡೆಗೆ ಎಳೆದುಕೊಂಡೆ. ಬ್ರೇಕ್ ಹಾಕೋದಕ್ಕೆ ನೋಡಿದೆ, ಸಾಧ್ಯವಾಗಲಿಲ್ಲ. ಕಾರ್​​ ಬಚಾವ್ ಮಾಡೋದಕ್ಕೆ ಹೋಗಿ ಗಾಡಿಯನ್ನ ಡಿವೈಡರ್​ ಮೇಲೆ ಹತ್ತಿಸಿಬಿಟ್ಟೆ. ಅತ್ತ ಬಲಗಡೆಯಿಂದಲೂ ಗಾಡಿಗಳು ಬರುತ್ತಿದ್ದವು. ಸ್ಟೇರಿಂಗ್‌ ಲೆಫ್ಟ್‌ಗೆ ಎಳೆದುಕೊಂಡೆ ಗಾಡಿ ರಸ್ತೆ ಮೇಲೆ ಪಲ್ಟಿ ಹೊಡೀತು. ಕೆಳಗೆ ಯಾವುದೇ ಕಾರ್ ಇರಲಿಲ್ಲ ಎಂದು ಹೇಳಿದ್ದಾನೆ.

ಇದೇ ಕಂಟೇನರ್​ ಡ್ರೈವರ್​ ಡಾಬಸ್​ಪೇಟೆಯಿಂದ ಬೆಂಗಳೂರಿನ ಬೈಪಾಸ್​ ಕಡೆ ಬರ್ತಿದ್ದ. ಇದೇ ವೇಳೆಯೇ ಬೆಂಗಳೂರಿನಿಂದ ತುಮಕೂರಿನತ್ತ ಸಾಗುತ್ತಿದ್ದ ಚಂದ್ರಮ್ ಯೋಗಪ್ಪಗೋಳ ಕಾರು ಕಂಟೇನರ್​​​ ಕೆಳಕ್ಕೆ ಸಿಕ್ಕಿ ಅಪ್ಪಚ್ಚಿ ಆಯ್ತು. ಆ ಕ್ಷಣ ನಿಜಕ್ಕೂ ಕಾರೊಳಗಿದ್ದ ಅಷ್ಟೂ ಮಂದಿ ಕ್ಷಣ ಕಾಲ ವಿಲವಿಲ ಒದ್ದಾಡಿ ಪ್ರಾಣ ಬಿಟ್ಟಿದ್ದಾರೆ. ಮೃತರ ಕಳೇಬರ ಇದೇ ತಣ್ಣನೆಯ ಕ್ರೌರ್ಯದ ಕಥೆ ಹೇಳುತ್ತಿದೆ. ಆದರೇ, ಕಂಟೇನರ್​​ ಪಲ್ಟಿ ಹೊಡೆದಾಗ ಯಾವ ಕಾರೂ ಇರ್ಲಿಲ್ಲ ಅಂತಿದ್ದಾನೆ. ಸಿಸಿಟಿವಿ ದೃಶ್ಯ ಮಾತ್ರ ಅಸಲಿ ಸಾಕ್ಷಿ ಹೇಳುತ್ತಿದೆ. ಚಂದ್ರಮ್ ಯೋಗಪ್ಪಗೋಳ ಕಾರು ಸಾಧಾರಣ ವೇಗದಲ್ಲಿ ಬರುತ್ತಿತ್ತು. ಆದರೇ, ಕಂಟೇನರ್​​ ಅತಿಯಾದ ವೇಗವಾಗಿ ಬಂದಿದ್ದರಿಂದಾಗಿಯೇ ಇಂಥಾ ದಾರುಣ ಆಗಿದೆ ಅನ್ನೋದನ್ನ ಪ್ರತ್ಯಕ್ಷದರ್ಶಿ ಹೇಳುತ್ತಿದ್ದಾರೆ.

200ಕ್ಕೂ ಅಧಿಕ ಮಂದಿಗೆ ಅನ್ನದಾತ ಆಗಿದ್ರು ಯೋಗಪ್ಪಗೋಳ!
ಶ್ರೀನಿವಾಸುಲು, ಚಂದ್ರಮ್ ಯೋಗಪ್ಪಗೋಳ ಅವರ ಕಂಪನಿಯ ಮ್ಯಾನೇಜರ್​. ಐದಾರು ವರ್ಷಗಳಿಂದ ಜೊತೆಯಲ್ಲೇ ಇದ್ದೋರು. IAST ಸಾಫ್ಟ್​ವೇರ್ ಸಲ್ಯೂಷನ್ಸ್​​ ಕಂಪನಿಯಲ್ಲಿ 200ಕ್ಕೂ ಅಧಿಕ ಮಂದಿ ದುಡಿಯುತ್ತಿದ್ದಾರೆ. ತಮ್ಮ ಮಾಲೀಕನ ಕುಟುಂಬವೇ ಸಾವನ್ನಪ್ಪಿದ ವಿಚಾರ ತಿಳಿದು ಕಣ್ಣೀರಿಡುತ್ತಲೇ ಸ್ಥಳಕ್ಕಾಗಮಿಸಿದ್ದರು. ಇದೇ ವೇಳೆ ಕಂಪನಿ ಮ್ಯಾನೇಜರ್​​ ಶ್ರೀನಿವಾಸುಲು ಭಾವುಕರಾದರು. ತಮ್ಮ ಮಾಲೀಕ ಎಂಥಾ ಒಳ್ಳೆ ಮನುಷ್ಯ ಅನ್ನೋದನ್ನ ಹೇಳುತ್ತಲೇ ಬಿಕ್ಕಳಿಸಿದರು.

ಇದನ್ನೂ ಓದಿ:ನೆಲಮಂಗಲ ಭೀಕರ ಅಪಘಾತ.. ಚಂದ್ರಮ್ ಯೋಗಪ್ಪಗೋಳ ಕುಟುಂಬದ ದುರಂತ ಹೇಗಾಯ್ತು?

ಅಸ್ವಸ್ಥಗೊಂಡಿದ್ದ ಅಪ್ಪ ಆಸ್ಪತ್ರೆಯಿಂದ ಡಿಸ್ಚಾರ್ಜ್ ಆಗಿದ್ರು. ಅವರ ಆರೋಗ್ಯ ವಿಚಾರಿಸಿ, ಮಕ್ಕಳ ಕ್ರಿಸ್​ಮಸ್ ರಜೆಯನ್ನು ಮುಗಿಸಿಕೊಂಡು ಬರಲು ಹೋದ ಕುಟುಂಬವನ್ನ ಹೆದ್ದಾರಿಯ ಯಮ ಬಲಿ ಪಡೆದಿದ್ದಾನೆ. ಕಂಟೇನರ್ ಪಲ್ಟಿ ಹೊಡೆದು ಬಿದ್ದಾಗ ಯಾವುದೇ ಶಬ್ದ, ಚೀರಾಟವೇ ಕೇಳಸಲಿಲ್ಲ. 6 ಜನರು ಸ್ಥಳದಲ್ಲಿಯೇ ಮೃತಪಟ್ಟಿದ್ದಾರೆ ಅನ್ನೋದನ್ನ ಪ್ರತ್ಯಕ್ಷದರ್ಶಿ ಹೇಳ್ತಿದ್ದಾರೆ. ಅಲ್ಲಿನ ಒಂದೊಂದು ದೃಶ್ಯವೂ ಸಹ ಸಾಯೋಕೆ ಮುನ್ನ ನರಕ ಅನುಭವಿಸಿದ್ದಾರೆ ಅನ್ನೋ ಸಾಕ್ಷಿ ನುಡಿಯುತ್ತಿವೆ. ಕಂದಮ್ಮಗಳ ಕಳೇಬರ ಈ ಕ್ಷಣಕ್ಕೂ ಕಣ್ಣಾಲಿಗಳಲ್ಲಿ ನೀರು ಜಿನುಗುವಂತೆ ಮಾಡ್ತಿದೆ.

ಇದನ್ನೂ ಓದಿ:ಕರಾಳ ಶನಿವಾರಕ್ಕೆ 13 ಮಂದಿ ಬಲಿ.. ರಾಜ್ಯದ ವಿವಿಧೆಡೆ ಇಂದು ಭೀಕರ ಅಪಘಾತ; ಎಲ್ಲೆಲ್ಲಿ? ಏನಾಯ್ತು?

ಬಾಳಿ ಬದುಕಬೇಕಿದ್ದ ಕಂದಮ್ಮಗಳು ನಿರ್ದಯವಾಗಿ ಕಣ್ಮುಚ್ಚಿವೆ. ಇನ್ನು, ನೂರಾರು ಮಂದಿಗೆ ಅನ್ನ ಹಾಕ್ತಿದ್ದ ಕುಟುಂಬ ದಾರುಣ ಅಂತ್ಯ ಕಂಡಿದೆ. ವೋಲ್ವಾದಂಥಾ ವೋಲ್ವಾ ಕಾರಲ್ಲಿದ್ರೂ ಕಂಟೇನರ್​ ಬಿದ್ದ ಕಾರಣಕ್ಕೆ ಇಡೀ ಕುಟುಂಬ ಸಾವನ್ನಪ್ಪಿದೆ. ಒಂದು ವೇಳೆ ಎದುರಿಗೆ ಅದೇ ಕಂಟೇನರ್​ ಬಂದು ಗುದ್ದಿದ್ದರೂ ಬದುಕುಳಿಯೋ ಸಾಧ್ಯತೆ ಇರುತ್ತಿತ್ತು. ಆದರೇ, ವಿಧಿ ಹೂಡುವ ಆಟವೇ ಬೇರೆಯದ್ದಾಗಿರುತ್ತೆ.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ