ಪಂದ್ಯದ ವೇಳೆ ಅಭಿಮಾನಿಗಳನ್ನ ಥಳಿಸಲು ಯತ್ನಿಸಿದ ಸ್ಟಾರ್ ಕ್ರಿಕೆಟರ್.. ಅಸಲಿಗೆ ಆಗಿದ್ದೇನು?

3 ಏಕದಿನ ಪಂದ್ಯಗಳ ಸರಣಿಯಲ್ಲಿ ಪಾಕಿಸ್ತಾನ ಕ್ರಿಕೆಟ್​ ತಂಡ ವೈಟ್​ವಾಶ್ ನೋವಿನಲ್ಲಿ ಇರುವಾಗ ಆಘಾತಕಾರಿ ಘಟನೆಯೊಂದು ನಡೆದಿದೆ. ನ್ಯೂಜಿಲೆಂಡ್​ ವಿರುದ್ಧದ 3ನೇ ಏಕದಿನ ಪಂದ್ಯ ಸೋತ ಬಳಿಕ ಪಾಕ್ ಆಲರೌಂಡರ್ ಖುಷ್ದಿಲ್ ಶಾ ಬ್ಯಾರಿಕೇಡ್​ ಜಿಗಿದು, ಇಬ್ಬರು ಕ್ರಿಕೆಟ್​ ಅಭಿಮಾನಿಗಳನ್ನ ಥಳಿಸಲು ಮುಂದಾಗಿರುವ ಘಟನೆ ನಡೆದಿದೆ.

ನ್ಯೂಜಿಲೆಂಡ್​ನ ಮೌಂಟ್ ಮೌಂಗನುಯಿಯಲ್ಲಿ 3ನೇ ಏಕದಿನ ಪಂದ್ಯದಲ್ಲಿ ಕಿವೀಸ್​ ಮೊದಲು ಬ್ಯಾಟಿಂಗ್ ಮಾಡಿತ್ತು. 42 ಓವರ್​ನಲ್ಲಿ 8 ವಿಕೆಟ್​ಗೆ 264 ರನ್​ಗಳ ಟಾರ್ಗೆಟ್ ನೀಡಿತ್ತು. ಈ ಗುರಿ ಬೆನ್ನ ಹತ್ತಿದ್ದ ಪಾಕಿಸ್ತಾನ ವಿಫಲವಾಗಿ ಹೀನಾಯವಾಗಿ ಸೋತಿದೆ. 40 ಓವರ್​ಗಳಲ್ಲಿ ಆಲೌಟ್ ಆದ ಪಾಕ್ ಕೇವಲ 221 ರನ್​ ಗಳಿಸಿ ಸರಣಿಯಲ್ಲಿ ವೈಟ್​ವಾಶ್ ಆಯಿತು.

ಇದೇ ಬೇಸರದಲ್ಲಿರುವಾಗ ಪಾಕ್ ಆಟಗಾರರನ್ನು ಸ್ಟೇಡಿಯಂನಲ್ಲಿದ್ದ ಪಾಕಿಸ್ತಾನದ ಅಭಿಮಾನಿಗಳೇ ನಿಂದನೆ ಮಾಡಿದ್ದಾರೆ ಎನ್ನಲಾಗಿದೆ. ಪದೇ ಪದೇ ನಿಂದಿಸುತ್ತಿದ್ದರಿಂದ ಕೋಪಗೊಂಡ ಪಾಕ್ ಆಲರೌಂಡರ್ ಖುಷ್ದಿಲ್ ಶಾ, ಅಭಿಮಾನಿಗಳನ್ನು ಹೊಡೆಯಲು ಪ್ರಯತ್ನ ಮಾಡಿದ್ದಾರೆ. ಮೈದಾನದ ಬ್ಯಾರಿಕೇಡ್​ ಹಾರಿ ಹೋಗುವಾಗ ಭದ್ರತಾ ಸಿಬ್ಬಂದಿ ಅವರನ್ನು ತಡೆದು ದುರಂತವನ್ನ ತಡೆದಿದ್ದಾರೆ.

ಇದನ್ನೂ ಓದಿ:6, 6, 6; ಯಶಸ್ವಿ ಜೈಸ್ವಾಲ್ ಘರ್ಜನೆ ಆರಂಭ.. ಸ್ಫೋಟಕ ಅರ್ಧಶತಕ

ಅಭಿಮಾನಿಗಳು ನಿಂದಿಸುವಾಗ ಖುಷ್ದಿಲ್ ಶಾ ಕೂಡ ನಿಂದನೆ ಮಾಡಿದ್ದಾರೆ ಎನ್ನಲಾಗಿದೆ. ಇನ್ನು ಈ ಪಂದ್ಯದಲ್ಲಿ ಖುಷ್ದಿಲ್ ಶಾನನ್ನು ಬೆಂಚ್​ಗೆ ಸೀಮಿತ ಮಾಡಲಾಗಿತ್ತು. ಸದ್ಯ ಈ ಘಟನೆಯ ವಿಡಿಯೋ, ಫೋಟೋಗಳು ಸೋಶಿಯಲ್ ಮೀಡಿಯಾದಲ್ಲಿ ಫುಲ್ ವೈರಲ್ ಆಗಿದ್ದು ಪಾಕ್ ಕ್ರಿಕೆಟರನ ದುರ್ವರ್ತನೆಗೆ ನೆಟ್ಟಿಗರು ವಿರೋಧ ವ್ಯಕ್ತಪಡಿಸುತ್ತಿದ್ದಾರೆ.

ಸದ್ಯ ನ್ಯೂಜಿಲೆಂಡ್ ಪ್ರವಾಸದಲ್ಲಿದ್ದ ಪಾಕಿಸ್ತಾನ ಕ್ರಿಕೆಟ್ ತಂಡ ಎಲ್ಲ ಮಾದರಿಗಳಲ್ಲೂ ಹೀನಾಯವಾಗಿ ಸೋಲು ಕಂಡಿದೆ. ನ್ಯೂಜಿಲೆಂಡ್ ವಿರುದ್ಧ ನಡೆದ ವೈಟ್-ಬಾಲ್ ಸರಣಿ ಪ್ರವಾಸದಲ್ಲಿ ಯಾವುದೂ ಸರಿಯಾಗಿ ಆಡಿಲ್ಲ. ಟಿ20 ಸರಣಿಯನ್ನು 1-4 ಅಂತರದಿಂದ ಸೋತು ಹೋಗಿದೆ. ಇದರ ಜೊತೆಗೆ ಇದೀಗ 3 ಪಂದ್ಯಗಳ ಏಕದಿನ ಸರಣಿಯನ್ನು ಕ್ಲೀನ್ ಸ್ವೀಪ್​ಗೆ ಒಳಗಾಗಿದೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ