ರಾಜ್ಯದಲ್ಲಿ ಎಣ್ಣೆ ಮಾರಾಟ ಕುಸಿತ! ಆದಾಯ ಕುಸಿತದಿಂದ ಕಂಗಾಲಾದ ರಾಜ್ಯ ಸರ್ಕಾರ!!

ಗ್ಯಾರಂಟಿ ಸರ್ಕಾರಕ್ಕೆ ಕುರ್ಚಿ ಕಾದಾಟದಿಂದ ವಾರಂಟಿ ಇಲ್ಲದಂತಾಗಿದೆ. ಆದ್ರೆ ರಾಜ್ಯದಲ್ಲಿ ಅಭಿವೃದ್ಧಿ ಕಾಮಗಾರಿಗಳಿಗೆ ಖಜಾನೆಯೇ ಇಲ್ಲ ಅಂತಿರುವಾಗ ಸರ್ಕಾರದ ನೆತ್ತಿಗೆ ಮತ್ತೊಂದು ಪೆಟ್ಟು ಬಿದ್ದಿದೆ. ಗ್ಯಾರಂಟಿಗಳ ನಡುವೆ ಸರ್ಕಾರಕ್ಕೆ ಎಣ್ಣೆ ಪ್ರಿಯರು ಶಾಕ್ ಕೊಟ್ಟಿದ್ದಾರೆ. ಅಬಕಾರಿ ಆದಾಯವೇ ಕುಸಿದಿದ್ದು ಟಾರ್ಗೆಟ್ ರೀಚ್​ ಆಗದೇ ಸರ್ಕಾರದ ಖಜಾನೆ ಮತ್ತಷ್ಟು ಖಾಲಿಯಾಗುವಂತಾಗಿದೆ. 
ಮದ್ಯ.. ಸಿಂಪಲ್ಲಾಗಿ ಎಣ್ಣೆ ಮಾರಾಟ.. ಸರ್ಕಾರದ ಆದಾಯದ ಬಹುಮುಖ್ಯ ಮೂಲಗಳಲ್ಲೊಂದು.. ಖಜಾನೆ ಭರ್ತಿಗಿರುವ ಸರಕು.. ಸರ್ಕಾರಕ್ಕೆ ಎಣ್ಣೆ ಪ್ರಿಯರೇ ಬ್ಯುಸಿನೆಸ್​ಮ್ಯಾನ್​ಗಳು.. ಆದ್ರೆ ಈ ಬಾರಿ ರಾಜ್ಯ ಸರ್ಕಾರಕ್ಕೆ ಎಣ್ಣೆ ಪ್ರಿಯರು ಶಾಕ್ ಕೊಟ್ಟಿದ್ದಾರೆ. 
ರಾಜ್ಯದಲ್ಲಿ ಮದ್ಯ ಮಾರಾಟ ಭಾರಿ ಪ್ರಮಾಣದಲ್ಲಿ ಇಳಿಕೆ
ಪಾತಾಳಕ್ಕೆ ಕುಸಿದ ಐಎಂಎಲ್ ಹಾಗೂ ಬಿಯರ್​ ಮಾರಾಟ 
ಒಂದ್ಕಡೆ ಕುರ್ಚಿ ಕಿತ್ತಾಟ.. ಮತ್ತೊಂದ್ಕಡೆ ಗ್ಯಾರಂಟಿಗಳಿಂದ ಅಭಿವೃದ್ಧಿ ಕಾರ್ಯಗಳಿಗೆ ಹಿನ್ನಡೆ.. ಈ ನಡುವೆ ಸಿಎಂ ಸಿದ್ದರಾಮಯ್ಯ ಸರ್ಕಾರಕ್ಕೆ ಮತ್ತೊಂದು ಶಾಕ್. ಅದೇನಂದ್ರೆ ರಾಜ್ಯದಲ್ಲಿ ಮದ್ಯ ಮಾರಾಟ ಭಾರೀ ಇಳಿಕೆ ಕಂಡಿದೆ. ಅದು ಕೂಡ ಬಿಯರ್​ ಮಾರಾಟ ತೀರಾ ಪಾತಾಳಕ್ಕೆ ಇಳಿದಿದೆ. ಅಬಕಾರಿ ಇಲಾಖೆಯ 3 ವರ್ಷಗಳ ಅಂಕಿ ಅಂಶ‌ ನೋಡಿದ್ರೆ ಪ್ರತಿ ವರ್ಷ ಮದ್ಯ ಮಾರಾಟ ಕಡಿಮೆಯಾಗಿರೋದು ಬಯಲಾಗಿದೆ.

ಎಣ್ಣೆ ಬೇಡ ಅಣ್ಣ!
7 ತಿಂಗಳಿಂದ ರಾಜ್ಯದಲ್ಲಿ ಬಿಯರ್, IML ಮಾರಾಟ ಫುಲ್​​ ಡಲ್
ಕಳೆದ ವರ್ಷ ಈ ಅವಧಿಯಲ್ಲಿ 279 ಲಕ್ಷ ಬಿಯರ್ ಬಾಕ್ಸ್ ಮಾರಾಟ
ಆದ್ರೆ 2025ರಲ್ಲಿ ಕೇವಲ 228 ಲಕ್ಷ ಬಾಕ್ಸ್‌ಗಳಷ್ಟೇ ಮಾರಾಟವಾಗಿವೆ
ಕಳೆದ ವರ್ಷಕ್ಕೆ ಹೋಲಿಸಿದ್ರೆ 51 ಲಕ್ಷ ಬಿಯರ್ ಬಾಕ್ಸ್​ ಮಾರಾಟ ಕುಸಿತ
ವಿಸ್ಕಿ, ಬ್ರಾಂದಿ, ರಮ್, ಜಿನ್ ಸೇರಿ ಎಲ್ಲಾ IML ಮಾರಾಟದಲ್ಲೂ ಇಳಿಕೆ
ಕಳೆದ ವರ್ಷ ನವೆಂಬರ್​​ ಅವಧಿವರೆಗೆ 407 ಲಕ್ಷ ಬಾಕ್ಸ್ IML ಮಾರಾಟ
ಆದ್ರೆ ಈ ಬಾರಿ ನವೆಂಬರ್​ವರೆಗೆ 403 ಲಕ್ಷ ಬಾಕ್ಸ್ IML ಮಾರಾಟ
ಎಣ್ಣೆ ಮಾರಾಟ ಕುಸಿತದಿಂದ ತಲೆಕೆಡಿಸಿಕೊಂಡ ಅಬಕಾರಿ ಇಲಾಖೆ

ಕಳೆದ 7 ತಿಂಗಳ ಅಂಕಿಅಂಶಗಳಂತೆ ಬಿಯರ್ ಹಾಗೂ IML ಮಾರಾಟ ಫುಲ್​​ ಡಲ್ ಆಗಿದೆ. 2024ರಲ್ಲಿ 279 ಲಕ್ಷ ಬಾಕ್ಸ್ ಬಿಯರ್ ಮಾರಾಟವಾಗಿದ್ದರೆ, 2025ರಲ್ಲಿ ಕೇವಲ 228 ಲಕ್ಷ ಬಾಕ್ಸ್‌ಗಳಷ್ಟೇ ಮಾರಾಟವಾಗಿವೆ. ಒಂದು ಬಾಕ್ಸ್‌ನಲ್ಲಿ ಸುಮಾರು 8 ಲೀಟರ್ ಬಿಯರ್ ಇರುತ್ತದೆ. ಅಂದರೆ ಬರೋಬ್ಬರಿ 51 ಲಕ್ಷ ಬಾಕ್ಸ್‌ಗಳಷ್ಟು ಬಿಯರ್ ಮಾರಾಟ ಕುಸಿತವಾಗಿವೆ. ಇದೇ ರೀತಿ ವಿಸ್ಕಿ, ಬ್ರಾಂದಿ, ರಮ್, ಜಿನ್ ಸೇರಿ ಎಲ್ಲಾ ಇಂಡಿಯನ್ ಮೇಡ್ ಲಿಕ್ಕರ್ ಮಾರಾಟದಲ್ಲೂ ಇಳಿಕೆ ಕಂಡುಬಂದಿದೆ. 2024ರ ನವೆಂಬರ್​ ಅವಧಿಯವರೆಗೆ 407 ಲಕ್ಷ ಬಾಕ್ಸ್ ಐಎಮ್​ಎಲ್​ ಮಾರಾಟ ಆಗಿದ್ರೆ ಈ ವರ್ಷ 403 ಲಕ್ಷ ಬಾಕ್ಸ್‌ಗಳಿಗೆ ಇಳಿದಿದೆ. ಅಂದರೆ 4.36 ಲಕ್ಷ ಬಾಕ್ಸ್‌ಗಳ ಮಾರಾಟ ಕುಸಿದಿದೆ. ಎಣ್ಣೆ ಮಾರಾಟ ಕುಸಿತದಿಂದ ಅಬಕಾರಿ ಇಲಾಖೆ ತಲೆ ಕೆಡಿಸಿಕೊಂಡಿದೆ. ಸರ್ಕಾರ ಅವಾಗವಾಗ ಮದ್ಯದ ಬೆಲೆ ಏರಿಸುವುದರಿಂದ ಮದ್ಯಪ್ರಿಯರು ಪರ್ಯಾಯ ಮಾರ್ಗ ಹುಡುಕಿಕೊಂಡ್ರಾ ಅನ್ನೋ ಪ್ರಶ್ನೆಯೂ ಎದುರಾಗಿದೆ. ಅಲ್ಲದೇ ಗಾಂಜಾ-ಅಫೀಮು ಹಾವಳಿಯಿಂದ ಮದ್ಯ ಮಾರಾಟ ಕುಸಿದಿದೆ ಎನ್ನಲಾಗ್ತಿದೆ.

ಒಟ್ಟಾರೆ ಅಬಕಾರಿ ಇಲಾಖೆ ಆದಾಯವನ್ನು ನೆಚ್ಚಿಕೊಂಡಿದ್ದ ಸರ್ಕಾರಕ್ಕೆ ಮದ್ಯ ಪ್ರಿಯರು ಭರ್ಜರಿ ಶಾಕ್​​ ಕೊಟ್ಟಿದ್ದಾರೆ. ಈ ವರ್ಷದ ಏಪ್ರಿಲ್​ನಿಂದ ನವೆಂಬರ್​ವರೆಗೆ ನಿರೀಕ್ಷೆಯಂತೆ ಎಣ್ಣೆ ಖರೀದಿಯಾಗದ ಪರಿಣಾಮ ಸರ್ಕಾರದ ಖಜಾನೆಗೆ ಸಾವಿರಾರು ಕೋಟಿ ರೂಪಾಯಿ ನಷ್ಟವಾಗಲಿದೆ. 

ರಘುಪಾಲ್ ನ್ಯೂಸ್​ ಬೆಂಗಳೂರು