ಪಂಜಾಬ್​ ಕಿಂಗ್ಸ್​​ ಆಲೌಟ್​.. ಆರ್​ಸಿಬಿಗೆ ಆರಂಭಿಕ ಜಯ

2025ರ ಐಪಿಎಲ್​ ಟೂರ್ನಿಯಲ್ಲಿ ಬಲಿಷ್ಠ ತಂಡವಾಗಿ ಹೊರ ಹೊಮ್ಮಿದ್ದ ಪಂಜಾಬ್​ ಕಿಂಗ್ಸ್​ ಅಲ್ಪ ಮೊತ್ತಕ್ಕೆ ರಾಯಲ್ ಚಾಲೆಂಜರ್ಸ್​ ಬೆಂಗಳೂರು ವಿರುದ್ಧ ಮಂಡಿಯೂರಿದೆ. 14.1 ಓವರ್​ಗೆ ಆಲೌಟ್​ ಆಗಿರುವ ಪಂಜಾಬ್​ ಕಿಂಗ್ಸ್​ ಕೇವಲ 101 ರನ್​ಗಳ ಗುರಿಯನ್ನು ಆರ್​ಸಿಬಿಗೆ ನೀಡಿದೆ. ಸೆಮಿಸ್​ನಲ್ಲಿ ಭರ್ಜರಿ ಬೌಲಿಂಗ್​ ಪ್ರದರ್ಶನ ನೀಡಿದ್ದು ಇದು ಆರ್​ಸಿಬಿಗೆ ಆರಂಭಿಕ ಜಯವಾಗಿದೆ.

ಚಂಢಿಗಡದ ಮುಲ್ಲನಪುರದ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಐಪಿಎಲ್​ ಪಂದ್ಯದಲ್ಲಿ ಆರ್​ಸಿಬಿ ನಾಯಕ ರಜತ್ ಪಾಟಿದಾರ್ ಟಾಸ್ ಗೆದ್ದು ಬೌಲಿಂಗ್ ಆಯ್ಕೆ ಮಾಡಿದರು. ಈ ನಿರ್ಧಾರ ಸರಿಯಾಗಿದೆ ಎಂದು ಕೆಲವೇ ಕ್ಷಣಗಳಲ್ಲಿ ಗೊತ್ತಾಯಿತು. ಏಕೆಂದರೆ ಪಂಜಾಬ್​ 60 ರನ್​ಗೆ ತನ್ನ ಪ್ರಮುಖ 6 ವಿಕೆಟ್​ಗಳನ್ನು ಕಳೆದುಕೊಂಡಿತ್ತು. ಓಪನರ್​​ ಪ್ರಿಯಾಂಶ್​ ಆರ್ಯ ಹಾಗೂ ಪ್ರಭಾಸಿಮ್ರಾನ್​ ಸಿಂಗ್ ಉತ್ತಮ ಆರಂಭ ಪಡೆಯಲಿಲ್ಲ.

ಯಶ್​ ದಯಾಳ್ ಬೌಲಿಂಗ್​ನಲ್ಲಿ ಪ್ರಿಯಾಂಶ್​ ಆರ್ಯ 7 ರನ್​ಗೆ ಔಟ್ ಆದರೆ, ಭುವನೇಶ್ವರ್​ ಕುಮಾರ್​ ಬೌಲಿಂಗ್​ನಲ್ಲಿ ಪ್ರಭಾಸಿಮ್ರಾನ್​ ಸಿಂಗ್ 18 ರನ್​ಗೆ ಕೀಪರ್ ಜಿತೇಶ್​ ಶರ್ಮಾಗೆ​ ಕ್ಯಾಚ್ ಕೊಟ್ಟರು. ಪ್ರಭಾಸಿಮ್ರಾನ್​ ಔಟ್​ ಆದ 3 ರನ್​ಗಳ ನಂತರದಲ್ಲೇ ನಾಯಕ ಶ್ರೇಯಸ್​ ಅಯ್ಯರ್ ಕೂಡ ಕೇವಲ 2 ರನ್​ಗೆ ಡ್ರೆಸ್ಸಿಂಗ್​ ರೂಮ್​ನತ್ತ ಹೆಜ್ಜೆ ಹಾಕಿದರು. ಇವರ ಬೆನ್ನಲ್ಲೇ ಜೋಶ್ ಇಂಗ್ಲಿಷ್​ ಕೇವಲ 4 ರನ್​ಗೆ ಹ್ಯಾಜಲ್ವುಡ್​ ಬೌಲಿಂಗ್​ನಲ್ಲಿ ವಿಕೆಟ್​ ಒಪ್ಪಿಸಿದರು.

ಇದನ್ನೂ ಓದಿ:IPL​ನಲ್ಲಿ ಶ್ರೇಯಸ್​ ಅಯ್ಯರ್ ಟ್ರ್ಯಾಕ್​ ರೆಕಾರ್ಡ್​ RCBಗೆ ಭಯ ಹುಟ್ಟಿಸುತ್ತಾ?

ಇಲ್ಲಿಗೆ ಪಂಜಾಬ್​ ಕಿಂಗ್ಸ್​ ತಂಡದ ಬಲಿಷ್ಠ ಬ್ಯಾಟಿಂಗ್​​ ಮಗ್ಗಲು ಅನ್ನು ಬೆಂಗಳೂರು ತಂಡ ಮುರಿದಂತೆ ಆಯಿತು. ಶ್ರೇಯಸ್​ ಅಯ್ಯರ್​ ಔಟ್ ಆಗಿದ್ದಾಗ ತಂಡದ ಮೊತ್ತ 30 ಆಗಿತ್ತು. ಇನ್ನು 5ನೇ ಬ್ಯಾಟರ್​​​​ ಆಗಿ ಕ್ರೀಸ್​ಗೆ ಬಂದ ನೆಹಾಲ್ ವಧೇರಾ ಕೂಡ ಯಶ್​ ದಯಾಳ್​ ಬೌಲಿಂಗ್​ನಲ್ಲಿ ಕ್ಲೀನ್ ಬೋಲ್ಡ್​ ಆಗಿ ಬಂದ ದಾರಿಗೆ ಸುಂಕವಿಲ್ಲ ಎಂಬಂತೆ ಮರಳಿದರು.

ಇನ್ನು ಸುಯಶ್ ಶರ್ಮಾ ಬೌಲಿಂಗ್​ನಲ್ಲಿ ಶಶಾಂಕ್​ ಸಿಂಗ್​ ಕೇವಲ 3 ರನ್​ಗೆ ಔಟ್​ ಆದರು. ಶಶಾಂಕ್​ ಸಿಂಗ್ ಬೆನ್ನಲ್ಲೇ ಮುಶೀರ್ ಖಾನ್​ ಅವರನ್ನು ಸುಯಶ್ ಶರ್ಮಾ ಎಲ್​ಬಿ ಬಲಿಗೆ ಕೆಡವಿದರು. ಇದರ ಜೊತೆಗೆ ಮಾರ್ಕಸ್ ಸ್ಟೊಯಿನಿಸ್ ಅವರನ್ನು ಸುಯಶ್ ಶರ್ಮಾ ಕ್ಲೀನ್ ಬೋಲ್ಡ್ ಮಾಡಿ, ಬ್ಯಾಕ್​ ಟು ಬ್ಯಾಕ್​ ಮೂರು ವಿಕೆಟ್​ಗಳನ್ನು ಉರುಳಿಸಿ ಆರ್​ಸಿಬಿಗೆ ದೊಡ್ಡ ಕೊಡುಗೆ ನೀಡಿದರು. 8 ವಿಕೆಟ್​ ಉರುಳಿದ ಮೇಲೆ ಇನ್ನು ತಂಡದ ಬ್ಯಾಟಿಂಗ್​ ನಿರೀಕ್ಷೆ ಮಾಡಲು ಯಾವುದೇ ಬಲಿಷ್ಠ ಬ್ಯಾಟರ್​ ಇರಲಿಲ್ಲ. ಹೀಗಾಗಿ ಪಂಜಾಬ್ ತಂಡದ 14.1 ಓವರ್​ಗೆ​ ಆಲೌಟ್​ ಆಗಿ 101 ರನ್​ಗಳ ಟಾರ್ಗೆಟ್​ ಅನ್ನು ಆರ್​ಸಿಬಿಗೆ ನೀಡಿದೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.30ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ