6, 6, 6, 6, 6; ಹೊಡಿಬಡಿ ಬ್ಯಾಟಿಂಗ್​, ರಾಣ ವೇಗದ ಅರ್ಧಶತಕ.. ಚೆನ್ನೈಗೆ ಬಿಗ್ ಟಾರ್ಗೆಟ್ ಕೊಟ್ಟ RR

ಚೆನ್ನೈ ಸೂಪರ್ ಕಿಂಗ್ಸ್​ ವಿರುದ್ಧ ನಡೆಯುತ್ತಿರುವ ಐಪಿಎಲ್​ ಪಂದ್ಯದಲ್ಲಿ ರಾಜಸ್ಥಾನ್ ರಾಯಲ್ಸ್ 9 ವಿಕೆಟ್​ಗೆ 182 ರನ್​ಗಳ ಟಾರ್ಗೆಟ್ ನೀಡಿದೆ. ನಿತೀಶ್ ರಾಣ ಅವರ ಭರ್ಜರಿ ಹಾಫ್​ಸೆಂಚುರಿ ನೆರವಿನಿಂದ ರಾಜಸ್ಥಾನ್ ದೊಡ್ಡ ಮೊತ್ತದ ಗುರಿಯನ್ನು ಚೆನ್ನೈಗೆ ನೀಡಿದೆ.

ಗುವಾಹಟಿಯ ಬರ್ಸಪಾರ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ 11ನೇ ಐಪಿಎಲ್ ಪಂದ್ಯದಲ್ಲಿ ಟಾಸ್ ಗೆದ್ದುಕೊಂಡು ಚೆನ್ನೈ ನಾಯಕ ರುತುರಾಜ್ ಗಾಯಕ್ವಾಡ್ ಫೀಲ್ಡಿಂಗ್ ಆಯ್ಕೆ ಮಾಡಿದರು. ಅದರಂತೆ ಮೊದಲ ಬ್ಯಾಟಿಂಗ್​ಗೆ ಆಗಮಿಸಿದ ರಾಜಸ್ಥಾನ ಪರ ಓಪನರ್ ಯಶಸ್ವಿ ಜೈಶ್ವಾಲ್ ಹಾಗೂ ಸಂಜು ಸ್ಯಾಮ್ಸನ್​ ಉತ್ತಮ ಆರಂಭವೇನು ಪಡೆಯಲಿಲ್ಲ. ಜೈಸ್ವಾಲ್ ಕೇವಲ 4 ರನ್​ಗೆ ಕ್ಯಾಚ್ ಕೊಟ್ಟು ಪೆವಿಲಿಯನ್ ಸೇರಿದ್ರೆ ಸಂಜು ಕೂಡ 20 ರನ್​ಗೆ ಆಟ ಮುಗಿಸಿದರು.

ಇದನ್ನೂ ಓದಿ: ಹೈದ್ರಾಬಾದ್​ಗೆ ಭಾರೀ ಮುಖಭಂಗ.. ಡುಪ್ಲೆಸಿಸ್​ ಅಬ್ಬರದ ಅರ್ಧಶತಕ, ಡೆಲ್ಲಿ ಕ್ಯಾಪಿಟಲ್ಸ್​ಗೆ ಜಯ

ಜೈಶ್ವಾಲ್ ಔಟ್ ಆದ ಬಳಿಕ ಕ್ರೀಸ್​ಗೆ ಆಗಮಿಸಿದ್ದ ನಿತೀಶ್ ರಾಣ, ಚೆನ್ನೈ ಬೌಲರ್​ಗಳನ್ನ ಬೆಂಡೆತ್ತಿದರು. ರಿಯಾನ್ ಪರಾಗ್ ಜೊತೆ ಉತ್ತಮ ಇನ್ನಿಂಗ್ಸ್​ ಕಟ್ಟಿದ ನಿತೀಶ್ ರಾಣ, ಕೇವಲ 21 ಎಸೆತದಲ್ಲಿ ಅರ್ಧಶತಕ ಸಿಡಿಸಿದರು. ಇದರಲ್ಲಿ 7 ಬೌಂಡರಿ, 3 ಅತ್ಯುತ್ತಮವಾದ ಸಿಕ್ಸರ್​ಗಳು ಸೇರಿದ್ದವು. ಅರ್ಧಶತಕದ ಬಳಿಕ ಬ್ಯಾಟಿಂಗ್​​ನಲ್ಲಿ ಆರ್ಭಟಿಸಿದ ರಾಣ, ಕೇವಲ 36 ಎಸೆತಗಳಲ್ಲಿ 10 ಫೋರ್, 5 ಬಿಗ್ ಸಿಕ್ಸರ್​ನಿಂದ​ 81 ರನ್​ಗಳನ್ನ ಗಳಿಸಿದರು. ಈ ವೇಳೆ ಧೋನಿ ಅವರ ಚಮತ್ಕಾರದಲ್ಲಿ ಸ್ಟಂಪ್​ಔಟ್ ಆದರು.

ಕ್ಯಾಪ್ಟನ್ ರಿಯಾನ್ ಪರಾಗ್ 37, ಹೆಟ್ಮರ್ 19 ರನ್​ಗಳ ನೆರವಿನಿಂದ ರಾಜಸ್ಥಾನ್ ರಾಯಲ್ಸ್​ ನಿಗದಿತ 20 ಓವರ್​ಗಳಲ್ಲಿ 182 ರನ್​ಗಳ ಗುರಿಯನ್ನು ಚೆನ್ನೈಗೆ ನೀಡಿದೆ. ಈಗಾಗಲೇ ಎರಡು ಪಂದ್ಯಗಳನ್ನು ಆಡಿರುವ ರಾಜಸ್ಥಾನ್ ಎರಡರಲ್ಲೂ ಸೋಲು ಕಂಡಿದೆ. ಹೀಗಾಗಿ ಇಂದಿನ ಪಂದ್ಯ ಆರ್​​ಆರ್​​ಗೆ ತುಂಬಾ ಮುಖ್ಯವಾಗಿದೆ. ಚೆನ್ನೈ ಕೂಡ ಒಂದು ಪಂದ್ಯ ಮಾತ್ರ ಗೆದ್ದಿದೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ