ತನ್ನ ಗರಡಿಯಲ್ಲಿ ಆಡಿದ ಮಾಜಿ ಆಟಗಾರರೇ RCBಗೆ ವಿರೋಧಿಗಳು ಆಗ್ತಾರಾ.. ಹೇಗೆ ಗೊತ್ತಾ?

ರಾಯಲ್ ಚಾಲೆಂಜರ್ಸ್ ಬೆಂಗಳೂರು ನಾಳೆ ತವರಿನಲ್ಲಿ ಶ್ರೇಯಸ್ ಅಯ್ಯರ್ ನೇತೃತ್ವದ ಬಲಿಷ್ಠ ಪಂಜಾಬ್ ಕಿಂಗ್ಸ್​ ತಂಡವನ್ನು ಎದುರಿಸಲಿದೆ. ತನ್ನ ನೆಲವೇ ಆರ್​ಸಿಬಿಗೆ ಮಗ್ಗಲು ಮುಳ್ಳಾಗಿ ಕಾಡುತ್ತಿದೆ. ಸೀಸನ್​-18ರಲ್ಲಿ ಎಂ. ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ಹೇಗಾದರೂ ಮಾಡಿ ಗೆಲುವು ಪಡೆಯಲು ನೂರೆಂಟು ಪ್ರಯತ್ನ ಮಾಡುತ್ತಿದೆ. ಆದ್ರೆ ಇದಕ್ಕೆ ಪಂಜಾಬ್​ ಕಿಂಗ್ಸ್​ನಲ್ಲಿರುವ ಆರ್​ಸಿಬಿಯ ಮಾಜಿ ಪ್ಲೇಯರ್​ಗಳು ಗೆಲುವಿಗೆ ಅಡ್ಡಿಯಾಗವ ಸಂಭವ ಹೆಚ್ಚಿದೆ.

ರಜತ್ ಪಾಟಿದಾರ್ ಇದೇ ಮೊದಲ ಬಾರಿಗೆ ಆರ್​​ಸಿಬಿ ನಾಯಕನಾಗಿ ತಂಡವನ್ನು ಯಶಸ್ವಿಯಾಗಿ ಮುನ್ನಡೆಸುತ್ತಿದ್ದಾರೆ. ಅದರಂತೆ ಶ್ರೇಯಸ್ ಅಯ್ಯರ್ ಟೀಮ್ ಇಂಡಿಯಾದಲ್ಲೂ ಯಶಸ್ಸಿನ ಆಟಗಾರ. ಜೊತೆಗೆ ಕೆಕೆಆರ್​ ತಂಡದ ನಾಯಕನಾಗಿದ್ದಾಗ ಟ್ರೋಫಿ ಎತ್ತಿಡಿದ ಛಲದಂಕ. ಕಳೆದ ಋತುವಿನಂತೆ ಪಂಜಾಬ್​ ಕಿಂಗ್ಸ್​ ಇಲ್ಲ. ಈ ಸಲ ಬಲಿಷ್ಠವಾಗಿದೆ. ಹೀಗಾಗಿ ಆರ್​ಸಿಬಿ ತನ್ನ ನೆಲದಲ್ಲೇ ಗೆಲ್ಲುವುದು ಕೊಂಚ ಕಠಿಣವಾಗಬಹುದು.

ಯಜುವೇಂದ್ರ ಚಹಲ್ ಹಾಗೂ ಮ್ಯಾಕ್ಸ್​ವೆಲ್​ ಈ ಮೊದಲು ಆರ್​ಸಿಬಿ ತಂಡದಲ್ಲಿ ಆಡಿದ್ದಾರೆ. ಇವರಿಗೆ ಚಿನ್ನಸ್ವಾಮಿ ಮೈದಾನದ ಅಣು ಅಣು ಕೂಡ ಚೆನ್ನಾಗಿ ತಿಳಿದಿರುತ್ತದೆ. ಪಂದ್ಯ ವೇಳೆ ಚಹಲ್ ಹಾಗೂ ಮ್ಯಾಕ್ಸಿ​, ಆರ್​ಸಿಬಿ ಬ್ಯಾಟ್ಸ್​​ಮನ್​​​ಗಳ ಮೇಲೆ ಎರಗಬಹುದು. ಏಕೆಂದರೆ ರಜತ್ ನೇತೃತ್ವದ ಆರ್​ಸಿಬಿ ಬ್ಯಾಟರ್ಸ್​ ಸ್ಪಿನ್ನರ್​ಗಳನ್ನ ಎದುರಿಸುವಲ್ಲಿ ಈಗಾಗಲೇ ಸೋತಿದ್ದಾರೆ. ನಿಧಾನಗತಿ ಬೌಲಿಂಗ್​ಗೆ ಬಾರಿಸುವಾಗ ಎಡವಿದ್ದೇ ಹೆಚ್ಚು.

ಇದನ್ನೂ ಓದಿ: 46ನೇ ವಯಸ್ಸಿಗೆ ಮೊದಲ ಮಗುವಿಗೆ ಅಪ್ಪನಾದ ಮಾಜಿ ಕ್ರಿಕೆಟರ್ ಜಹೀರ್ ಖಾನ್​.. ಇಟ್ಟ ಹೆಸರೇನು?

ಈ ಹಿಂದೆ ಆರ್​ಸಿಬಿ ವಿರುದ್ಧ ಗುಜರಾತ್ ಟೈಟಾನ್ಸ್ ತಂಡದ ಸ್ಪಿನ್ನರ್ ಸಾಯಿ ಕಿಶೋರ್ ಕೇವಲ 22 ರನ್​ಗೆ 2 ವಿಕೆಟ್ ಉರುಳಿಸಿದ್ದರು. ಡೆಲ್ಲಿಯ ಕುಲ್​ದೀಪ್ ಯಾದವ್ ಕೂಡ 17 ರನ್​ಗೆ 2 ವಿಕೆಟ್​ ಪಡೆದಿದ್ದರು. ವಿಪ್ರಜ್ ನಿಗಮ್ ಕೂಡ 18 ರನ್​ ನೀಡಿ 2 ಪ್ರಮುಖ ವಿಕೆಟ್​ ಉರುಳಿಸಿ ತಂಡದ ಗೆಲುವಿಗೆ ಕಾರಣವಾಗಿದ್ದರು. ಇವೆಲ್ಲಾ ಆರ್​ಸಿಬಿ ಬ್ಯಾಟರ್​ಗಳು ಸ್ಪಿನ್ನರ್​ಗಳ ಮುಂದೆ ಏನೂ ಆಡಲ್ಲ ಎನ್ನುವುದನ್ನು ಹೇಳುತ್ತವೆ. ನಾಳೆ ನಡೆಯುವ ಪಂದ್ಯದಲ್ಲಿ ಪಂಜಾಬ್​ನ ಮ್ಯಾಕ್ಸ್​ವೆಲ್ ಹಾಗೂ ಚಹಲ್ ಮುಖ್ಯ ಪಾತ್ರ ವಹಿಸುವ ಸಾಧ್ಯತೆ ಇದೆ. ಇವರ ಸ್ಪಿನ್ ಬೌಲಿಂಗ್​ ಆರ್​ಸಿಬಿಗೆ ಮಾರಕವಾಗಬಹುದು.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ