IPL ಬ್ರ್ಯಾಂಡ್ ವ್ಯಾಲ್ಯೂ ಬರೋಬ್ಬರಿ 1 ಲಕ್ಷ ಕೋಟಿ; ಇದರಲ್ಲಿ ಆರ್​​​ಸಿಬಿ ತಂಡದ ಪಾಲು ಎಷ್ಟು?

ಇಂಡಿಯನ್​ ಪ್ರೀಮಿಯರ್​​ ಲೀಗ್. ಇದು​ ವಿಶ್ವದ ಶ್ರೀಮಂತ ಕ್ರಿಕೆಟ್​ ಲೀಗ್. ವಿಶ್ವ ಕ್ರಿಕೆಟ್​ನಲ್ಲಿರೋ ಅದೆಷ್ಟೋ ಬೋರ್ಡ್​ಗಳ ಬಳಿ ಇಲ್ಲದಷ್ಟು ಹಣ ಈ ಐಪಿಎಲ್​ನಲ್ಲಿದೆ. ಮಿಲಿಯನ್​ ಡಾಲರ್​ ಟೂರ್ನಿ ಎಂದು ಸುಮ್ಮನೇ ಹೇಳೋದಲ್ಲ. ಇಲ್ಲಿ ಬೌಂಡರಿ-ಸಿಕ್ಸರ್​ಗಳ ಅಬ್ಬರ ಎಷ್ಟಿರುತ್ತೋ ಅಷ್ಟೇ ದುಡ್ಡು ಇರುತ್ತೆ.

ಇತ್ತೀಚೆಗೆ ಸೌದಿ ಅರೇಬಿಯಾದಲ್ಲಿ ಹಣದ ಹೊಳೆಯೇ ಹರಿಯಿತು. ಕೋಟಿ ಕೋಟಿ ಹಣದ ಸುರಿಮಳೆ ಆಕ್ಷನ್​ ಅಖಾಡದಲ್ಲಿ ಆಯ್ತು. 10 ಫ್ರಾಂಚೈಸಿಗಳು ಸೇರಿ ಒಂದಲ್ಲ.. ಎರಡಲ್ಲ.. ಬರೋಬ್ಬರಿ 639.15 ಕೋಟಿ ಹಣವನ್ನ ಆಕ್ಷನ್​ನಲ್ಲಿ ನೀರಿನಂತೆ ಖರ್ಚು ಮಾಡಿದವು.

IPL ಬ್ರ್ಯಾಂಡ್​ ವ್ಯಾಲ್ಯೂ ರಿಲೀಸ್​

ಹತ್ತು, ಇಪ್ಪತ್ತು ಸಾವಿರ ಕೋಟಿ ಅಲ್ಲ.. ಒಂದು ಲಕ್ಷ ಕೋಟಿ. 2024ರ ಐಪಿಎಲ್​​ ಲೆಕ್ಕಾಚಾರಗಳ ಅಂತ್ಯದ ಬಳಿಕ ಹೊರಬಿದ್ದಿರೋ ಬಿಗ್​ ಸುದ್ದಿಯಿದು. ಐಪಿಎಲ್​ನ ಬ್ರಾಡ್​​ ಕಾಸ್ಟರ್​ ರೈಟ್ಸ್​​, ಸ್ಪಾನ್ಸರ್ಸ್​, ಅಡ್ವರ್ಟೈಸ್ಮೆಂಟ್​, ಟೈಟಲ್​ ರೈಟ್ಸ್​​, ಪ್ಲೇಯರ್​​ ಪ್ರೈಸ್​ ಹಾಗೂ ತಂಡಗಳ ಪ್ರೈಸ್​​ ಎಲ್ಲವನ್ನ ಕೂಡಿ ಕಳೆದು ಲೆಕ್ಕಾಚಾರ ಹಾಕಲಾಗಿದೆ. ಅನ್ವಯ 2024ರ ಅಂತ್ಯಕ್ಕೆ ಐಪಿಎಲ್​ನ ಬ್ರ್ಯಾಂಡ್​ ವ್ಯಾಲ್ಯೂ 1.1 ಲಕ್ಷ ಕೋಟಿ ದಾಟಿದೆ.

ಕಳೆದ ವರ್ಷಕ್ಕಿಂತ 13 ಪಟ್ಟು ಹೆಚ್ಚಳ

2023ರ ಐಪಿಎಲ್​ ಅಂತ್ಯದ ಬಳಿಕ ಐಪಿಎಲ್​​ನ ಬ್ರ್ಯಾಂಡ್​ ವ್ಯಾಲ್ಯೂ 90,679 ಕೋಟಿಯಾಗಿತ್ತು. ಕಳೆದ ಬಾರಿಗಿಂತ ಈ ಬಾರಿ ಶೇಕಡಾ 13ರಷ್ಟು ಇದು ಏರಿಕೆಯಾಗಿದೆ. ಒಟಿಟಿ ಫ್ಲಾಟ್​​ಫಾರ್ಮ್​ನಲ್ಲಿ ಉಚಿತ ವೀಕ್ಷಣೆಗೆ ಅವಕಾಶ ನೀಡಿದ್ದು, ಇದ್ರ ಹೆಚ್ಚಳಕ್ಕೆ ಕಾರಣ ಎನ್ನಲಾಗ್ತಿದೆ.

ಕಪ್​ ಗೆಲ್ಲದಿದ್ರೂ ಆರ್​​ಸಿಬಿ ಎಂದಿಗೂ ‘ರಾಯಲ್​​’

17 ಸೀಸನ್​ಗಳಾದ್ರೂ ಆರ್​​ಸಿಬಿ ಐಪಿಎಲ್​ ಕಪ್​ ಗೆದ್ದಿಲ್ಲ. ಕ್ರೇಜ್​ ಮಾತ್ರ ಯಾರಿಗೂ ಕಮ್ಮಿ ಇಲ್ಲ. ಕಪ್​ ನಮ್ಮದಾಗದಿದ್ರೂ ಲಾಯಲ್​​ ಅಭಿಮಾನಿಗಳ ಅಪರಿಮಿತ ಪ್ರೀತಿ ಆರ್​​ಸಿಬಿ ಖಜಾನೆಯನ್ನಂತೂ ತುಂಬಿಸ್ತಾನೆ ಇದೆ. ವರ್ಷದಿಂದ ವರ್ಷಕ್ಕೆ ಬಂಪರ್​ ಗಳಿಕೆಯನ್ನ ಆರ್​​ಸಿಬಿ ಕಾಣ್ತಿದೆ. ಕಳೆದ ಒಂದು ವರ್ಷದಲ್ಲೇ ಆರ್​​ಸಿಬಿಯ ಬ್ರ್ಯಾಂಡ್​ ವ್ಯಾಲ್ಯೂ 67 ಪರ್ಸೆಂಟ್​ ಏರಿಕೆ ಕಂಡಿದೆ. ಒಟ್ಟಾರೆ ಬ್ರ್ಯಾಂಡ್​ ವ್ಯಾಲ್ಯೂ 991 ಕೋಟಿಗೆ ಬಂದು ನಿಂತಿದೆ. ಚೆನ್ನೈ, ಮುಂಬೈ ಬಿಟ್ರೆ, ರಾಯಲ್​ ಚಾಲೆಂಜರ್ಸ್​​ ಬೆಂಗಳೂರು ಫ್ರಾಂಚೈಸಿಯೇ ಐಪಿಎಲ್​ನ ಶ್ರೀಮಂತ ಫ್ರಾಂಚೈಸಿ​.

ವಿಶೇಷ ಸೂಚನೆ: ಕ್ರಿಕೆಟ್​​ನ ವಿಶೇಷ ಸುದ್ದಿಗಳಿಗಾಗಿ ವೀಕ್ಷಿಸಿ 'ರನ್ ಭೂಮಿ' ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್ ಫಸ್ಟ್ ಚಾನೆಲ್