ಎಬಿಡಿ ತಂಡಕ್ಕೆ ಕರೆತರಲು RCB ಸರ್ವ ಪ್ರಯತ್ನ.. ಈ ಜೂನಿಯರ್​ಗೆ ಇದೆ ಆ ಸ್ಕಿಲ್​ಗಳು!

ಐಪಿಎಲ್​ ಸೀಸನ್​ 18ಕ್ಕೆ ಆರ್​​ಸಿಬಿಯಲ್ಲಿ ಭರ್ಜರಿ ಸಿದ್ಧತೆ ನಡೀತಿದೆ. ನಾಯಕನಾಗಿ ರಜತ್​ ಪಾಟಿದಾರ್​ ನೇಮಿಸಿದ ಬೆನ್ನಲ್ಲೇ, ಹೊಸ ಆಟಗಾರನ ಖರೀದಿಗೆ ಆರ್​​ಸಿಬಿ ಮುಂದಾಗಿದೆ. ಲಾಯಲ್​​ ಅಭಿಮಾನಿಗಳ ಬಹು ಕಾಲದ ಬೇಡಿಕೆ ಈ ಬಾರಿ ಈಡೇರುವ ಸಾಧ್ಯತೆ ದಟ್ಟವಾಗಿದೆ. ಅಷ್ಟಕ್ಕೂ ಆ ಆಟಗಾರ ಯಾರು?.

ಮಿಸ್ಟರ್​ 360 ಅಂದ್ರೆ ಸಾಕು.. ಆರ್​​ಸಿಬಿ ಅಭಿಮಾನಿಗಳಿಗೆ ಥಟ್ಟಂತ ನೆನಪಾಗೋ ಹೆಸರು ಎಬಿ ಡಿವಿಲಿಯರ್ಸ್​. ಈ ಎಬಿ ಬ್ಯಾಟಿಂಗ್​ ಅಂದ್ರೆ ನೋಡೋಕೆ ಹಬ್ಬ. 22 ಯಾರ್ಡ್​ನಲ್ಲಿ ಗಾಳಿಯಲ್ಲಿ ಹಾರಿ ಚೆಂಡನ್ನ ಹೊಡೆಯೋ ಕಲೆಗಾರಿಕೆ, ಕ್ರೀಸ್​ನಲ್ಲಿ ಗಿರಗಿಟ್ಲೆಯಂತೆ ತಿರುಗಿ ಬ್ಯಾಟ್ ಬೀಸುವ ಪರಿ. ಕನಸಲ್ಲೂ ಕಲ್ಪಿಸಿಕೊಳ್ಳಲು ಅಸಾಧ್ಯ ಬಿಡಿ. ಎಬಿಡಿ ಕ್ರಿಸ್​ನಲ್ಲಿ ಬ್ಯಾಟ್ ವಿನೂತನ ಶಾಟ್​​​​​ಗಳನ್ನ ಬಾರಿಸ್ತಿದ್ರೆ, ಅಭಿಮಾನಿಗಳು ಹುಚ್ಚೆದ್ದು ಕುಣೀತಿದ್ರು.

RCBಗೆ ‘ಎಬಿಡಿ’ ಕಮ್​​ಬ್ಯಾಕ್​ಗೆ ಕೌಂಟ್​​ಡೌನ್​.!

ಈ ಕಲೆಗಾರ ಎಬಿಡಿ ಆರ್​​ಸಿಬಿಯ ರಿಯಲ್ ಟ್ರಬಲ್ ಶೂಟರ್ ಆಗಿದ್ರು. 11 ವರ್ಷಗಳ ಕಾಲ ರೆಡ್ ಆರ್ಮಿಯ ಆಪತ್ಭಾಂದವರಾಗಿದ್ರು. ಈ ಸಂಕಷ್ಟಹರ ಆರ್​​ಸಿಬಿಯಿಂದ ಮರೆಯಾಗಿ ಬರೋಬ್ಬರಿ 4 ಸೀಸನ್​​ಗಳು ಕಳೆದಿವೆ. ಆದ್ರೆ, ಫ್ಯಾನ್ಸ್​ ಮಾತ್ರ ಎಬಿಡಿಯ ಕನವರಿಕೆಯಲ್ಲೇ ಇದ್ದಾರೆ. ಇದೀಗ ಮತ್ತೊಮ್ಮೆ ಆರ್​​ಸಿಬಿಗೆ ಎಬಿಡಿಯ ಆಗಮನಕ್ಕೆ ವೇದಿಕೆ ಸಜ್ಜಾಗಿದೆ. ಆದ್ರೆ, ಈಗ ಬರ್ತಿರೋದು ಸೀನಿಯರ್​​ ಎಬಿಡಿಯಲ್ಲ.. ಜೂನಿಯರ್​​ ಎಬಿಡಿ.

ಜೇಕಬ್​ ಬೆತೆಲ್​ಗೆ ಇಂಜುರಿ..! ಐಪಿಎಲ್​ಗೆ ಡೌಟ್​.!

ಈ ಬಾರಿಯ ಮೆಗಾ ಆಕ್ಷನ್​ನಲ್ಲಿ ಆರ್​​ಸಿಬಿ ತಂಡ ಖರೀದಿಸಿದ ಇಂಗ್ಲೆಂಡ್​ನ ಆಲ್​​ರೌಂಡರ್​ ಜೇಕಬ್​ ಬೆತೆಲ್​ ಇಂಜುರಿಗೆ ತುತ್ತಾಗಿದ್ದಾರೆ. ಭಾರತದ ವಿರುದ್ಧದ ಏಕದಿನ ಸರಣಿಯಲ್ಲಿ ಗಾಯಕ್ಕೆ ತುತ್ತಾದ ಬೆತೆಲ್​​, ಮುಂಬರೋ ಐಪಿಎಲ್​ ವೇಳೆಗೆ ಫಿಟ್​ ಆಗೋದು ಡೌಟ್​. ಹೀಗಾಗಿ ರಿಪ್ಲೇಸ್​ಮೆಂಟ್​ ಆಟಗಾರನ ಹುಡುಕಾಟ ಆರ್​​ಸಿಬಿ ಫ್ರಾಂಚೈಸಿಯಲ್ಲಿ ಜೋರಾಗಿದೆ. ಹೀಗೆ ಹೊಸ ಆಟಗಾರನ ಹುಡುಕಾಟದಲ್ಲಿರೋ ಆರ್​​ಸಿಬಿ ಕಣ್ಣಿಗೆ ಬೇಬಿ ಡಿವಿಲಿಯರ್ಸ್​​, ಡೆವಾಲ್ಡ್​ ಬ್ರೇವಿಸ್​ ಬಿದ್ದಿದ್ದಾರೆ.

ಹೊಡೆದಿದ್ದೆಲ್ಲಾ ಕ್ಲೀನ್​ ಹಿಟ್​​. ಅದ್ಭುತವಾದ ಶಾಟ್​​ ಸೆಲೆಕ್ಷನ್​. ಘಟಾನುಘಟಿ ಬೌಲರ್​​ಗಳನ್ನ ಈ ಯಂಗ್​​ಸ್ಟರ್ ಹಿಮ್ಮೆಟ್ಟಿಸ್ತಾ ಘರ್ಜಿಸಿರೋ ಶುರುವಿಟ್ಟುಕೊಂಡ್ರೆ, ಫ್ಯಾನ್ಸ್​ಗೆ ಭರ್ಜರಿ ಬಾಡೂಟ ಫಿಕ್ಸ್​. ಈತನ ಆಟ ನೋಡಿದ್ರೆ, ನಿಮಗೆ ಎಬಿ ಡಿವಿಲಿಯರ್ಸ್​ ನೆನಪಾಗದೇ ಇರಲ್ಲ. ಥೇಟ್​​ ಡಿವಿಲಿಯರ್ಸ್​​ರಂತೆ ಆಟ. ಈ ಮರಿ ಎಬಿಡಿಯನ್ನ ಕರೆ ತರೋಕೆ ಸರ್ವ ಪ್ರಯತ್ನ ಆರ್​​ಸಿಬಿ ಮ್ಯಾನೇಜ್​ಮೆಂಟ್​ ವಲಯದಲ್ಲಿ ಸದ್ದಿಲ್ಲದೇ ಶುರುವಾಗಿದೆ.

ಐಪಿಎಲ್​ನಲ್ಲಿ ಅನ್​ಸೋಲ್ಡ್​.. SAT20ಯಲ್ಲಿ ಶೈನ್​.!

ಕಳೆದ 2 ಸೀಸನ್​​ಗಳಲ್ಲಿ ಮುಂಬೈ ಪರ ಆಡಿದ್ದ ಡೆವಾಲ್ಡ್​ ಬ್ರೆವಿಸ್​ನ ಈ ಬಾರಿಯ ಮೆಗಾ ಹರಾಜಿಗೂ ಮುನ್ನ ರಿಲೀಸ್​ ಮಾಡಲಾಗಿತ್ತು. ಮೆಗಾ ಹರಾಜಿನಲ್ಲಿ ಅಚ್ಚರಿಯ ರೀತಿಯಲ್ಲಿ ಪ್ರತಿಭಾವಂತ ಯುವ ಕ್ರಿಕೆಟಿಗನನ್ನ ಬಿಡ್​ ಮಾಡೋಕೆ ಯಾವ ಫ್ರಾಂಚೈಸಿ ಕೂಡ ಮುಂದಾಗಲಿಲ್ಲ. ಆಕ್ಷನ್​ನಲ್ಲಿ ಅನ್​​ಸೋಲ್ಡ್​ ಆದ ಬೇಬಿ ಎಬಿಡಿ, ಆನಂತರ ನಡೆದ SAT20 ಟೂರ್ನಿಯಲ್ಲಿ ಧೂಳೆಬ್ಬಿಸಿದ್ರು. 184ರ ಸ್ಟ್ರೈಕ್​ರೇಟ್​ನಲ್ಲಿ ಘರ್ಜಿಸಿದ ಬ್ರೆವಿಸ್​ 48.50ರ ಸರಾಸರಿಯಲ್ಲಿ ರನ್ ಕೊಳ್ಳೆ ಹೊಡೆದರು.

ಸದ್ಯ ರೆಡ್​ ಹಾಟ್​ ಫಾರ್ಮ್​ನಲ್ಲಿರೋ ಡೆವಾಲ್ಡ್​ ಬ್ರೇವಿಸ್​ ಆರ್​​ಸಿಬಿಗೆ ಸೂಟಬಲ್​ ಪ್ಲೇಯರ್​. ಚಿನ್ನಸ್ವಾಮಿಯಂತ ಚಿಕ್ಕ ಸ್ಟೇಡಿಯಂನಲ್ಲಿ ಎದುರಾಳಿಗಳ ಗೇಮ್​​ಪ್ಲಾನ್​ ಧ್ವಂಸ ಮಾಡೋ ಸಾಮರ್ಥ್ಯ ಬ್ರೆವಿಸ್​ಗಿದೆ. ಒತ್ತಡ ಸಮಯದಲ್ಲೂ ನಿರ್ಭಿತಿಯಿಂದ ಆಡೋ ಕ್ವಾಲಿಟಿಯಿದೆ. ಭವಿಷ್ಯದ ಸ್ಟಾರ್​ ಆಗಿ ಕೂಡ ಬ್ರೆವಿಸ್​ ಬೆಳೆಸಬಹುದು. ಈ ಎಲ್ಲಾ ಆ್ಯಂಗಲ್​ನಲ್ಲಿ ಯೋಚಿಸಿದ ಮೇಲೆಯೇ ಆರ್​​ಸಿಬಿ ಫ್ರಾಂಚೈಸಿ ರಿಪ್ಲೇಸ್​ಮೆಂಟ್​ ಪ್ಲೇಯರ್​ ಆಗಿ ಕರೆತರಲು ಚಿಂತಿಸಿದೆ.

ಇದನ್ನೂ ಓದಿ: ಮ್ಯೂಸಿಕ್​ ಡೈರೆಕ್ಟರ್​ಗೆ ಐಷಾರಾಮಿ ಕಾರು ಗಿಫ್ಟ್​ ನೀಡಿದ ಟಾಲಿವುಡ್​ ಸ್ಟಾರ್ ಬಾಲಕೃಷ್ಣ.. ಯಾಕೆ?

ಎಬಿ ಡಿವಿಲಿಯರ್ಸ್​​ ಗರಡಿಯಲ್ಲಿ ಕ್ರಿಕೆಟ್​ನ ಪಾಠ​.!

ಡೆವಾಲ್ಡ್​ ಬ್ರೆವಿಸ್​ ಎಬಿಡಿಯ ಗರಡಿಯಲ್ಲಿ ಬೆಳೆದ ಪ್ರತಿಭೆ. ಈತನ ಟ್ಯಾಲೆಂಟ್​ಗೆ ಕ್ಲೀನ್​ಬೋಲ್ಡ್​ ಆಗಿದ್ದ ಎಬಿಡಿ, ಆರಂಭದಿಂದ ತಿದ್ದಿ ತೀಡಿ ಬೆಳೆಸಿದ್ದಾರೆ. ಆನ್​​ಫೀಲ್ಡ್​ನಲ್ಲಿ ಥೇಟ್​​ ಎಬಿಡಿಯಂತೆ ಬ್ಯಾಟಿಂಗ್​ ಬೀಸೋದ್ರ ಹಿಂದಿನ ಸೀಕ್ರೆಟ್​ ಇದೆ. ಜೊತೆಗೆ ಬ್ರೆವಿಸ್​ಗೂ ಕೂಡ ಆರ್​​ಸಿಬಿ ಕೂಡ ಅಚ್ಚುಮೆಚ್ಚು. ಆರ್​​ಸಿಬಿ ಪರ ಆಡೋಕೆ ಚಿಕ್ಕಂದಿನಿಂದಲೇ ಕನಸು ಕಂಡಿದ್ದಾರೆ. ಇಂತಾ ಡೆವಾಲ್ಡ್​ ಬ್ರೆವಿಸ್​ಗೆ ಆರ್​​ಸಿಬಿಗೆ ಬಂದ್ರೆ ಲಾಯಲ್​​ ಫ್ಯಾನ್ಸ್​ ಮತ್ತಷ್ಟು​ ಖುಷ್​ ಆಗೋದಂತೂ ಪಕ್ಕಾ.

ಡೆವಾಲ್ಡ್​ ಬ್ರೆವಿಸ್​ ಒಬ್ಬ ಫ್ಯೂಚರ್​ ಸ್ಟಾರ್​​, ವಿಧ್ವಂಸಕಾರಿ ಬ್ಯಾಟ್ಸ್​ಮನ್​, ಎಬಿಡಿಯ ಪಡಿಯಚ್ಚು ಎಲ್ಲವೂ ಸರಿ. ಆದ್ರೆ, ಇಂಡಿಯನ್​ ಪಿಚ್​ನಲ್ಲಿ ಈತನ ಆಟ ನಡೆಯುತ್ತಾ ಅನ್ನೋದು ಈಗ ಪ್ರಶ್ನೆಯಾಗಿದೆ. ಈ ಹಿಂದೆ ಮುಂಬೈ ಇಂಡಿಯನ್ಸ್​ ಪರ ಆಡಿದಾಗ ಇಂಪ್ರೆಸ್​ ಮಾಡುವಲ್ಲಿ ಫೇಲ್​ ಆಗಿದ್ದಾರೆ. ಈ ಒಂದು ವಿಚಾರ ಸದ್ಯ ಹಿನ್ನಡೆಯಾಗಿ ಪರಿಣಮಿಸಿದ್ರೂ, ಆರ್​​ಸಿಬಿ ಮ್ಯಾನೇಜ್​ಮೆಂಟ್​​ ಬ್ರೆವಿಸ್​ಗೆ ಗಾಳ ಹಾಕೋ ಎಲ್ಲಾ ಯತ್ನ ಮಾಡ್ತಿದೆ. ಅಂತಿಮ ನಿರ್ಧಾರ ಯಾವಾಗಾಗುತ್ತೆ ಅನ್ನೋದನ್ನ ಕಾದು ನೋಡಬೇಕಿದೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ