RCB ಈ ಸಲ ಕಪ್​ ಗೆಲ್ಲದಿದ್ರೆ, ಇನ್ಮುಂದೆ ಟ್ರೋಫಿಗೆ ಮುತ್ತಿಡುವ ಅವಕಾಶ ಸಿಗಲ್ವಾ..?

18 ವರ್ಷಗಳ ಕಾಯುವಿಕೆ, ಟ್ರೋಫಿ ಗೆಲ್ಲದ ಬರ, ಕೊರಗು ಪ್ರಸಕ್ತ ವರ್ಷ ನೀಗುತ್ತೆ ಎಂಬ ನಂಬಿಕೆ ಕೋಟ್ಯಾಂತರ ಆರ್​ಸಿಬಿ ಅಭಿಮಾನಿಗಳಲ್ಲಿದೆ. ಇಷ್ಟು ದಿನ ಕಪ್​ ನಮ್ದೇ ನಮ್ದೇ ಅಂತಿದ್ದ ಫ್ಯಾನ್ಸ್​, ಕಪ್​ ನಮ್ದೇ ಎಂದು ಮಾರ್ದನಿಸಲು ಜಸ್ಟ್​ 3 ದಿನಗಳಷ್ಟೇ ಬಾಕಿಯಿದೆ. ಆದ್ರೆ, ಈ ಕಪ್ ಗೆಲುವಿನ ಕನಸು ನಿಜಕ್ಕೂ ನನಸಾಗುತ್ತಾ?.

ಈ ಸಲ ಕಪ್ ನಮ್ದೇ, ಪ್ರತಿ ಬಾರಿಯ ಐಪಿಎಲ್ ಶುರುವಾದಾಗ್ಲೂ, ಆರ್​ಸಿಬಿ ಅಭಿಮಾನಿಗಳು ಸ್ಲೋಗನ್ ಶುರು ಮಾಡ್ತಾರೆ. ಜೈಕಾರ ಹಾಕಿ, ಹಾಡು ಹಾಡಿ, ಡ್ಯಾನ್ಸ್ ಮಾಡಿ ತಂಡಕ್ಕೆ ಜೋಶ್​ ತುಂಬ್ತಾರೆ. ಆದ್ರೆ, ಸೀಸನ್​​ ಕೊನೆಯಲ್ಲಿ ಸೋತು ನಿರಾಸೆ ಮೂಡಿಸುತ್ತೆ. ಆದ್ರೀಗ ಸೀಸನ್​​-18ರ ಐಪಿಎಲ್​ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ನಸೀಬು ಬದಲಾಗುವ ಭರವಸೆ ಹುಟ್ಟಿಹಾಕಿದೆ.

ಸೀಸನ್​​-18ರ ಐಪಿಎಲ್​ನಲ್ಲಿ ಅದ್ಭುತ ಪ್ರದರ್ಶನ ನೀಡಿರುವ ರಾಯಲ್ ಚಾಲೆಂಜರ್ಸ್ ಬೆಂಗಳೂರು, ಮೊದಲ ಕ್ವಾಲಿಫೈಯರ್​ನಲ್ಲಿ ಪಂಜಾಬ್ ಕಿಂಗ್ಸ್​ಗೆ ಪಂಚ್ ನೀಡಿ ಫೈನಲ್​​ಗೆ ಲಗ್ಗೆ ಇಟ್ಟಿದೆ. ಅಷ್ಟೇ ಅಲ್ಲ, ಮೊದಲ ಬಾರಿಗೆ ಐಪಿಎಲ್ ಟ್ರೋಫಿಗೆ ಮುತ್ತಿಡುವ ನಿರೀಕ್ಷೆ ಹೆಚ್ಚಿಸಿದೆ. ಆದ್ರೆ, ಪ್ರಶಸ್ತಿಯ ಬ್ಯಾಟಲ್​ಗೂ ಮುನ್ನ ಈ ಸಲನಾದ್ರೂ, ಕಪ್ ಗೆಲ್ಲುತ್ತಾ ಎಂಬ ಪ್ರಶ್ನೆ ಕಾಡ್ತಿದೆ.

18 ಸೀಸನ್​​ಗಳ ಪೈಕಿ 3 ಸಲ ಕೈತಪ್ಪಿದ ಐಪಿಎಲ್ ಕಪ್​..!

ಒಂದಲ್ಲ, ಎರಡಲ್ಲ ಬರೋಬ್ಬರಿ 18 ಸೀಸನ್​​ಗಳಿಂದ ಮೂರು ಬಾರಿ ಐಪಿಎಲ್​​​ನಲ್ಲಿ ಫೈನಲ್​ ಪ್ರವೇಶಿಸಿರುವ ಆರ್​ಸಿಬಿ, ಒಮ್ಮೆಯೂ ಟ್ರೋಫಿ ಗೆಲ್ಲುವ ಕನಸು ಈಡೇರಿಸಿಕೊಳ್ಳಲಿಲ್ಲ. 2009ರ ಐಪಿಎಲ್​ ಸೀಸನ್​ನಲ್ಲೇ ಕಪ್​ ಗೆಲ್ಲುವ ಅವಕಾಶ ಹೊಂದಿದ್ದ ಅನಿಲ್ ಕುಂಬ್ಳೆ ನಾಯಕತ್ವದ ಆರ್​ಸಿಬಿ, ಅಂದು ಫೈನಲ್​ನಲ್ಲಿ ಡೆಕ್ಕನ್ ಚಾರ್ಚಸ್ ಎದುರು ಮುಗ್ಗರಿಸಿ ಟ್ರೋಫಿ ಕೈಚೆಲ್ಲಿತ್ತು.

2011ರ ಐಪಿಎಲ್ ಸೀಸನ್​​ನಲ್ಲಿ ಜಬರ್ದಸ್ತ್ ಆಟವಾಡಿದ್ದ ಆರ್​ಸಿಬಿ, ಕ್ರಿಸ್ ಗೇಲ್​ ರಣಾರ್ಭಟಕ್ಕೆ ಟ್ರೋಫಿ ಗೆಲ್ಲೋದು ಫಿಕ್ಸ್ ಎಂಬ ಭರವಸೆ ಹುಟ್ಟಿಹಾಕಿತ್ತು. ಆದ್ರೆ, ಚೆನ್ನೈ ಎದುರು ಫೈನಲ್​ನಲ್ಲಿ 58 ರನ್​ಗಳ ಸೋಲು ಅನುಭವಿಸಿದ ಆರ್​ಸಿಬಿ, 2ನೇ ಬಾರಿಗೆ ಕಪ್ ಗೆಲ್ಲುವ ಕನಸು ನುಚ್ಚುನೂರು ಮಾಡಿಕೊಂಡಿತ್ತು.

2016ರ ಐಪಿಎಲ್ ಉದ್ದಕ್ಕೂ ಕಿಂಗ್ ಕೊಹ್ಲಿ ರಣಾರ್ಭಟಕ್ಕೆ ಫೈನಲ್​​ಗೇರಿದ್ದ ಆರ್​ಸಿಬಿ, ಚಿನ್ನಸ್ವಾಮಿಯಲ್ಲೇ ಸನ್​ ರೈಸರ್ಸ್ ಎದುರು ಗೆಲ್ಲೋ ಚಾನ್ಸ್ ದಟ್ಟವಾಗಿತ್ತು. ಆದ್ರೆ, ಲೋವರ್ ಆರ್ಡರ್​ನ ವೈಫಲ್ಯಕ್ಕೆ ಬೆಲೆ ತೆತ್ತು ಟ್ರೋಫಿ ಗೆಲ್ಲೋ ಚಾನ್ಸ್ ಮಿಸ್ ಮಾಡಿಕೊಂಡಿತ್ತು.

5 ವರ್ಷ, 4 ಬಾರಿ ಆರ್​ಸಿಬಿ ಪ್ಲೇ ಆಪ್​​ಗೆ ಎಂಟ್ರಿ.!

2008ರಿಂದ 2016ರ ಅವಧಿಯಲ್ಲಿ ಮೂರು ಸಲ ಟ್ರೋಫಿ ಗೆಲ್ಲೋ ಚಾನ್ಸ್​ ಮಿಸ್ ಮಾಡಿಕೊಂಡಿದ್ದ ಆರ್​ಸಿಬಿ, ಕಳೆದ 5 ವರ್ಷಗಳಿಂದ ಐಪಿಎಲ್​ನಲ್ಲಿ ಉತ್ತಮ ಪ್ರದರ್ಶನವನ್ನೇ ನೀಡಿದೆ. 2023ರ ಸೀಸನ್​ನಲ್ಲಿ ಲೀಗ್​​ನಿಂದ ಹೊರಬಿದ್ದಿದ್ದು ಬಿಟ್ರೆ, ಉಳಿದೆಲ್ಲಾ ಸೀಸನ್​​​​​​​​​​​​​​​​​​​​ ರೆಡ್ ಆರ್ಮಿ ಡೇಂಜರಸ್ ಆಟವೇ ಆಡಿದೆ.

• 2020- ಎಲಿಮಿನೇಟರ್- SRH ಎದುರು ಸೋಲು
• 2021- ಎಲಿಮಿನೇಟರ್- KKR ಎದುರು ಮುಖಭಂಗ
• 2022- ಕ್ವಾಲಿಫೈಯರ್​-2- RR ಎದುರು ಸೋಲು
• 2024- ಎಲಿಮಿನೇಟರ್- RR ಎದುರು ಸೋಲು

ಸೀಸನ್​-18 ಐಪಿಎಲ್​​​ ಆರ್​ಸಿಬಿಗೆ ತರುತ್ತಾ ಲಕ್..?

ಸೀಸನ್​​-18ರ ಐಪಿಎಲ್​.. ಆರ್​ಸಿಬಿ ಸೀಸನ್​ ಅಂತಾನೇ ಕರೆಯಲಾಗ್ತಿದೆ. ವಿರಾಟ್​ ಕೊಹ್ಲಿಯ ಜರ್ಸಿ ನಂಬರ್​ ಜೊತೆ ಹೋಲಿಸಿ, ಆರ್​ಸಿಬಿ ಟ್ರೋಫಿ ಗೆಲ್ಲೋದು ಫಿಕ್ಸ್ ಎಂಬ ಭವಿಷ್ಯವನ್ನೇ ಫ್ಯಾನ್ಸ್​ ನುಡಿಯುತ್ತಿದ್ದಾರೆ. ಇದಕ್ಕೆ ತಕ್ಕಂತೆಯೇ ಟೂರ್ನಿಯುದ್ದಕ್ಕೂ ಡಾಮಿನೇಟಿಂಗ್ ಪರ್ಫಾಮೆನ್ಸ್​ ನೀಡಿರುವ ಆರ್​ಸಿಬಿ, ಫೈನಲ್​ಗೆ ಎಂಟ್ರಿ ನೀಡಿದೆ. ಅಷ್ಟೇ ಅಲ್ಲ.! ಟ್ರೋಫಿ ಗೆಲ್ಲೋ ಭರವಸೆಯನ್ನು ದುಪ್ಪಟಾಗಿಸಿದೆ.

ಇದನ್ನೂ ಓದಿ: Qualifier- 2ರಲ್ಲಿ ಯಾರಿಗೆ ಯಾರು ಚೆಕ್​ಮೇಟ್ ಕೊಡ್ತಾರೆ..? ಫೈನಲ್ ಟಿಕೆಟ್​ಗಾಗಿ ಬಿಗ್ ಫೈಟ್​

ಈ ಸಲ ಕಪ್ ಗೆಲ್ಲದಿದ್ರೆ, ಭವಿಷ್ಯದಲ್ಲಿ ಕಪ್ ಗೆಲ್ಲೋದು ಡೌಟೇ..!

ಪ್ರಸಕ್ತ ಸೀಸನ್​ನಲ್ಲಿ ಫೈನಲ್​ಗೆ ಎಂಟ್ರಿ ನೀಡಿರುವ ಆರ್​​ಸಿಬಿ, ಅದೃಷ್ಟದ ಲೆಕ್ಕಾಚಾರದಲ್ಲಿ ಪ್ರತಿ ಮ್ಯಾಚ್​, ಪ್ರತಿ ಕಂಡೀಷನ್ಸ್​ನಲ್ಲಿ ಅದ್ಭುತ ಆಟವಾಡಿದೆ. ಬ್ಯಾಟಿಂಗ್​, ಬೌಲಿಂಗ್​ನಲ್ಲಿ ಚಮತ್ಕಾರವನ್ನೇ ಮಾಡಿರುವ ಆರ್​ಸಿಬಿ, ಟ್ರೋಫಿ ಗೆಲ್ಲೋ ಹಾಟ್ ಫೇವರಿಟ್ ಎನಿಸಿದೆ. ಇನ್​ಫ್ಯಾಕ್ಟ್​_ ಇದಕ್ಕೆ ತಕ್ಕಂತೆ ಪ್ರತಿ ಆಟಗಾರ, ನೂರಕ್ಕೆ ನೂರರಷ್ಟು ಕಮಿಟ್​ಮೆಂಟ್ ತೋರಿಸ್ತಿದ್ದಾರೆ. ಶತಯ ಗತಯ ಟ್ರೋಫಿ ಗೆಲ್ಲಬೇಕೆಂಬ ಛಲದಲ್ಲಿ ಆನ್​ಫೀಲ್ಡ್​ನಲ್ಲಿ ಹೋರಾಡ್ತಿದ್ದಾರೆ. ಹೀಗಾಗಿ ಕಪ್ ಗೆಲ್ಲುವ ಸುವರ್ಣಾವಕಾಶ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮುಂದಿದೆ. ಈ ಸುವರ್ಣವಕಾಶವನ್ನು ಆರ್​ಸಿಬಿ ಕೈಚೆಲ್ಲಿದ್ರೆ, ಭವಿಷ್ಯದಲ್ಲಿ ಇನ್ಯಾವತ್ತು ಟ್ರೋಫಿ ಗೆಲ್ಲುವ ಅವಕಾಶ ಸಿಗುತ್ತೋ ಆ ದೇವರಬಲ್ಲ.

ಟೂರ್ನಿ ಆರಂಭದಿಂದಲೂ ಅದ್ಭುತ ಆಟವಾಡಿರುವ ರಾಯಲ್ ಚಾಲೆಂಜರ್ಸ್ ಬೆಂಗಳೂರು, ನಿರೀಕ್ಷೆಯಂತೆ ಫೈನಲ್​ಗೆ ಎಂಟ್ರಿ ನೀಡಿದೆ. ಆದ್ರೀಗ ಆ ಸುವರ್ಣವಕಾಶ ಸದ್ಬಳಕೆ ಮಾಡಿಕೊಂಡು ಟ್ರೋಫಿ ಗೆಲುವಿನ ಬರ ನೀಗಿಸಿಕೊಳ್ಳಲಿ ಅನ್ನೋದೆ ಕೋಟ್ಯಾಂತರ ಅಭಿಮಾನಿಗಳ ಆಶಯ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.30ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ