ನಿನ್ನೆಯ ದಿನ ಬರೀ ಬೌಂಡರಿಯಲ್ಲೇ ಡೀಲ್ ಮಾಡಿದ RCB.. ಒಟ್ಟು ದಾಖಲಾದ ಫೋರ್​ಗಳ ಸಂಖ್ಯೆ ಎಷ್ಟು..?

ನಾಯಕ ರಿಷಭ್ ಪಂತ್ ಸೆಂಚುರಿ ಬಾರಿಸಿದರೂ ಲಕ್ನೋ ಸೂಪರ್ ಜೈಂಟ್ಸ್ ತಂಡ, ರಾಯಲ್ ಚಾಲೆಂಜರ್ಸ್​ ಬೆಂಗಳೂರು ವಿರುದ್ಧ ಸೋಲೋಪ್ಪಿಕೊಂಡಿತು. ಬೃಹತ್ ಮೊತ್ತದ ರನ್​ಗಳನ್ನು ಚೇಸ್ ಮಾಡಿದ ಆರ್​ಸಿಬಿ ಹೋರಾಟಕ್ಕೆ ಫ್ಯಾನ್ಸ್​ ಫುಲ್ ಫಿದಾ ಆದರು. ಈ ಪಂದ್ಯದಲ್ಲಿ ಸಿಕ್ಸರ್​ಗಳಿಗಿಂತ ಬೌಂಡರಿಗಳ ಸುರಿಮಳೆಗೈದಿದ್ದೇ ಹೆಚ್ಚು. ಆರ್​ಸಿಬಿ ಬಾರಿಸಿದ ಬೌಂಡರಿಗಳ ಸಂಖ್ಯೆ..?

ಟಾಸ್ ಸೋತರೂ ಮೊದಲು ಬ್ಯಾಟಿಂಗ್ ಮಾಡಿದ ಲಕ್ನೋ ತಂಡ ಭರ್ಜರಿಯಾಗಿ ಬ್ಯಾಟಿಂಗ್ ಮಾಡಿತು. ಓಪನರ್​ ಮಿಚೆಲ್ ಮಾರ್ಷ್​ 4 ಬೌಂಡರಿ, 5 ಸಿಕ್ಸರ್​ಗಳಿಂದ 67 ರನ್​ ಚಚ್ಚಿದರು. ಮತ್ತೊಬ್ಬ ಆರಂಭಿಕ ಬ್ಯಾಟರ್ ಮ್ಯಾಥ್ಯೂ ಬ್ರೀಟ್ಜ್ಕೆ 1 ಸಿಕ್ಸರ್​, 1 ಬೌಂಡರಿಯಿಂದ 14 ರನ್​ ಚಚ್ಚಿದರು. 3ನೇ ಕ್ರಮಾಂಕದಲ್ಲಿ ಅಖಾಡಕ್ಕೆ ಇಳಿದ ರಿಷಭ್ ಪಂತ್​ ಸಿಡಿಲಬ್ಬರದ ಸೆಂಚುರಿ ಬಾರಿಸಿದರು.

ಪಂದ್ಯದಲ್ಲಿ ಒಟ್ಟು 61 ಎಸೆತಗಳನ್ನು ಆಡಿದ ಪಂತ್ 11 ಅದ್ಭುತವಾದ ಬೌಂಡರಿ ಹಾಗೂ 8 ಮುಗಿಲೆತ್ತರದ ಸಿಕ್ಸರ್​​ಗಳಿಂದ 118 ರನ್​ ಬಾರಿಸಿ ಅಜೇಯರಾಗಿ ಉಳಿದರು. ಇದರಿಂದ ಎಲ್​ಎಸ್​ಜಿ ತಂಡ ಈ ಪಂದ್ಯದಲ್ಲಿ ಒಟ್ಟು 14 ಸಿಕ್ಸರ್​ ಹಾಗೂ 17 ಬೌಂಡರಿಗಳಿಂದ 3 ವಿಕೆಟ್​ಗೆ 228 ರನ್​ಗಳ ದೊಡ್ಡ ಟಾರ್ಗೆಟ್​ ಅನ್ನು ಆರ್​ಸಿಬಿಗೆ ನೀಡಿತ್ತು.

ಈ ಟಾರ್ಗೆಟ್​ ಸ್ವೀಕರಿಸಿದ ಆರ್​ಸಿಬಿ ಆರಂಭದಲ್ಲೇ ಅಬ್ಬರದ ಬ್ಯಾಟಿಂಗ್ ಪ್ರದರ್ಶನ ಮಾಡಿತು. ಸಾಲ್ಟ್​ 6 ಸಿಕ್ಸರ್​ಗಳಿಂದ 30 ರನ್​ ಚಚ್ಚಿದರು. ವಿರಾಟ್​ ಕೊಹ್ಲಿ ಪಂದ್ಯದಲ್ಲಿ ಸಿಕ್ಸರ್​ ಬಾರಿಸದೇ 10 ಬೌಂಡರಿಗಳಿಂದ ಮತ್ತೊಂದು ಅರ್ಧಶತಕ ಬಾರಿಸಿದರು. ರಜತ್ ಕೂಡ 1 ಸಿಕ್ಸರ್​, 1 ಬೌಂಡರಿಯಿಂದ 14 ರನ್​ ಚಚ್ಚಿದರು. ಮಯಾಂಕ್ ಅಗರ್ವಾಲ್ ಹಾಗೂ ಜಿತೇಶ್ ಅತ್ಯುತ್ತಮ ಜೊತೆಯಾಟ ಆಡಿದರು.

ಮಯಾಂಕ್ ಸಿಕ್ಸರ್ ಬಾರಿಸದೇ 5 ಬೌಂಡರಿಗಳಿಂದ 41 ಬಾರಿಸಿದರು. ನಾಯಕ ಜಿತೇಶ್ ಶರ್ಮಾ ಸಿಡಿಲಬ್ಬರದ ಬ್ಯಾಟಿಂಗ್ ಪ್ರದರ್ಶಿಸಿ, 8 ಬೌಂಡರಿ, 6 ಸಿಕ್ಸರ್​ಗಳಿಂದ 85 ರನ್​ ಬಾರಿಸಿ ತಂಡಕ್ಕೆ ಗೆಲುವು ತಂದುಕೊಟ್ಟರು. ಆರ್​ಸಿಬಿ ಪಂದ್ಯದಲ್ಲಿ ಕೇವಲ 7 ಸಿಕ್ಸರ್​ ಹಾಗೂ 30 ಬೌಂಡರಿಗಳೊಂದಿಗೆ 4 ವಿಕೆಟ್​ಗೆ 230 ರನ್​ಗಳ ಬಿಗ್​ ಟಾರ್ಗೆಟ್​ ಅನ್ನು ಚೇಸ್ ಮಾಡಿತು.

ಇದನ್ನೂ ಓದಿ:ಆರ್​​ಸಿಬಿಗೆ ಪಂಜಾಬ್ ಸವಾಲು.. ಐಪಿಎಲ್​ನ ಮುಂದಿನ ಪಂದ್ಯಗಳು ಹೇಗಿರಲಿವೆ..?

ಇನ್ನು ಈ ಪಂದ್ಯದಲ್ಲಿ ಒಟ್ಟು 21 ಸಿಕ್ಸರ್​ಗಳು ಹಾಗೂ 47 ಬೌಂಡರಿಗಳು ಹರಿದು ಬಂದಿವೆ. ವಿಶೇಷ ಎಂದರೆ ಈ ಪಂದ್ಯದಲ್ಲಿ ಲಕ್ನೋ ತಂಡ ಹೆಚ್ಚು ಸಿಕ್ಸರ್ (14) ಬಾರಿಸಿದರೆ, ಆರ್​ಸಿಬಿ ಅತಿ ಹೆಚ್ಚು ಬೌಂಡರಿ (30) ಗಳನ್ನು ಬಾರಿಸಿದೆ. ಆರ್​ಸಿಬಿ ಮುಂದಿನ ಕ್ವಾಲಿಫೈಯರ್-1 ಪಂದ್ಯವನ್ನು ಪಂಜಾಬ್ ವಿರುದ್ಧ ನಾಳೆ ಆಡಲಿದೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.30ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ