ಆರಂಭದಲ್ಲಿ ವಿಕೆಟ್​ ಬಿದ್ರೂ ಕೊನೆಯಲ್ಲಿ RCB ಆರ್ಭಟ.. ಗುಜರಾತ್​ಗೆ ಈ ಟಾರ್ಗೆಟ್ ಸೆಟ್ ಮಾಡಿದ ಬೆಂಗಳೂರು

ಇಂದಿನ ಐಪಿಎಲ್ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್​ ಬೆಂಗಳೂರು ತಂಡದ ವಿಕೆಟ್ ಉರುಳುತ್ತ ಹೋದರೂ 170 ರನ್​ಗಳ ಸಾಧಾರಣ ಟಾರ್ಗೆಟ್​ ಅನ್ನು ಗುಜರಾತ್​ಗೆ ನೀಡಿದೆ. ಆಲ್​ರೌಂಡರ್​ ಲೈಮ್ ವಿಲಿಂಗ್​ಸ್ಟನ್ ಅವರ ಭರ್ಜರಿ ಅರ್ಧಶತಕದ ನೆರವಿನಿಂದ ಆರ್​ಸಿಬಿ ಈ ಗುರಿ ನೀಡಿದೆ.

ಬೆಂಗಳೂರಿನ ಎಂ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಟಾಸ್ ಗೆದ್ದ ಗುಜರಾತ್ ತಂಡದ ನಾಯಕ ಶುಭ್​ಮನ್ ಗಿಲ್ ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡರು. ಓಪನರ್ ಆಗಿ ಕ್ರೀಸ್​ಗೆ ಆಗಮಿಸಿದ ಫಿಲ್ ಸಾಲ್ಟ್ ಹಾಗೂ ವಿರಾಟ್ ಕೊಹ್ಲಿಯ ಬ್ಯಾಟಿಂಗ್ ಆರಂಭ ಚೆನ್ನಾಗಿ ಇರಲಿಲ್ಲ. ಆರಂಭದಲ್ಲಿ 1 ಓವರ್​ 4 ಬಾಲ್​ ಆಗಿದ್ದಾಗ ವಿರಾಟ್​ ಕೊಹ್ಲಿ ಕೇವಲ 7 ರನ್​ಗೆ ಕ್ಯಾಚ್ ಕೊಟ್ಟು ಔಟ್ ಆದರು. ದೇವದತ್​ ಪಡಿಕ್ಕಲ್ 3 ಎಸೆತಗಳಲ್ಲಿ 1 ಬೌಂಡರಿ ಬಾರಿಸಿ ವಿಕೆಟ್ ಒಪ್ಪಿಸಿದರು.

ವಿರಾಟ್ ಕೊಹ್ಲಿ, ದೇವದತ್​ ಪಡಿಕ್ಕಲ್ ಔಟ್ ಆಗಿದ್ದರೂ ಸಾಲ್ಟ್​ ಅಬ್ಬರ ಮುಂದುವರೆದಿತ್ತು. 14 ರನ್​ ಗಳಿಸಿ ಆಡುವಾಗ ಮೊಹಮ್ಮದ್ ಸಿರಾಜ್​ ಬೌಲಿಂಗ್​ನಲ್ಲಿ ಕ್ಲೀನ್ ಬೋಲ್ಡ್​ ಆಗಿ ಪೆವಿಲಿಯನ್​ಗೆ ನಡೆದರು. ತಂಡದ ಸ್ಥಿತಿ ನೋಡಿಕೊಂಡು ರಜತ್ ಬ್ಯಾಟ್ ಬೀಸುತ್ತಾರೆ ಎಂದು ಊಹಿಸಲಾಗಿತ್ತು. ಆದರೆ 12 ಎಸೆತಗಳಲ್ಲಿ 2 ಬೌಂಡರಿಯಿಂದ 12 ರನ್​ ಗಳಿಸಿದಾಗ ರಜತ್ ಪಾಟಿದಾರ್ ಎಲ್​ಬಿ ಬಲೆಗೆ ಬಿದ್ದು ಹೊರ ನಡೆದರು.

ಆರ್​ಸಿಬಿ ತಂಡದಲ್ಲಿ ವಿಕೆಟ್​ಗಳು ಹೋಗುತ್ತಿದ್ದರೂ ಬ್ಯಾಟಿಂಗ್​ನಲ್ಲಿ ಆರ್ಭಟಿಸುತ್ತಿದ್ದ ಲೈಮ್ ಲಿವಿಂಗ್​ಸ್ಟನ್​, ಗುಜರಾತ್ ಬೌಲರ್​ಗಳನ್ನ ಮನಬಂದಂತೆ ಚಚ್ಚಿದರು. 40 ಎಸೆತಗಳನ್ನು ಎದುರಿಸಿದ ಲಿವಿಂಗ್​ಸ್ಟನ್, 1 ಬೌಂಡರಿ, 5 ಅದ್ಭುತವಾದ ಸಿಕ್ಸರ್​ಗಳಿಂದ 54 ರನ್​ಗಳನ್ನು ಚಚ್ಚಿದರು. ಇನ್ನು ಆರ್​ಸಿಬಿ ಪರವಾಗಿ ಆಡುತ್ತಿರುವ ಲಿವಿಂಗ್​ಸ್ಟನ್, ಮೊದಲ ಹಾಫ್​ಸೆಂಚುರಿ ಸಿಡಿಸಿದ್ದಾರೆ.

ಇದನ್ನೂ ಓದಿ: ತವರಲ್ಲಿ RCBಗೆ ಭಾರೀ ಅವಮಾನ.. ಸ್ಫೋಟಕ ಬ್ಯಾಟರ್ ಸಾಲ್ಟ್​ ಕ್ಲೀನ್ ಬೋಲ್ಡ್​

ಜಿತೇಶ್ ಶರ್ಮಾ 33 ರನ್​ಗಳು ಆರ್​ಸಿಬಿಗೆ ಉತ್ತಮವಾಗಿ ನೆರವಾದವು. 21 ಬಾಲ್​ಗಳನ್ನು ಆಡಿದ ಜಿತೇಶ್ ಶರ್ಮಾ, 5 ಬೌಂಡರಿ, 1 ಸಿಕ್ಸರ್​ನಿಂದ 33 ರನ್​ ಬಾರಿಸಿದರು. ಆಲ್​ರೌಂಡರ್ ಕೃನಾಲ್ ಪಾಂಡ್ಯ ಕೇವಲ 5ಕ್ಕೆ ಔಟ್ ಆದರು. ಕೊನೆಯಲ್ಲಿ ಟಿಮ್ ಡೇವಿಡ್ (32) ಅವರ ಆರ್ಭಟದ ಬ್ಯಾಟಿಂಗ್​ನಿಂದ ಆರ್​ಸಿಬಿ ನಿಗದಿತ 20 ಓವರ್​ಗಳಲ್ಲಿ 7 ವಿಕೆಟ್​ಗೆ 170 ರನ್​ಗಳ ಟಾರ್ಗೆಟ್​ ಅನ್ನು ಗುಜರಾತ್​ಗೆ ನೀಡಿದೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ