ಮುಂಬೈ ಟೀಮ್​ಗೆ RCB ಗರ್ಲ್ಸ್​ ರಾಯಲ್ ಚಾಲೆಂಜ್.. ಹ್ಯಾಟ್ರಿಕ್ ನಿರೀಕ್ಷೆಯಲ್ಲಿ ಸ್ಮೃತಿ ಮಂದಾನ

ಚಾಂಪಿಯನ್ಸ್​ ಟ್ರೋಫಿ ಫೀವರ್​ನ ನಡುವೆ ಮಹಿಳಾ ಪ್ರೀಮಿಯರ್​ ಲೀಗ್​ನ ಕಾವು ಕೂಡ ಕ್ರಿಕೆಟ್​ ಲೋಕವನ್ನ ಆವರಿಸಿದೆ. ಇಂದಿನಿಂದ ಬೆಂಗಳೂರಿನ ಚಿನ್ನಸ್ವಾಮಿ ಮೈದಾನದ ಬ್ಯಾಟಲ್​ ಫೀಲ್ಡ್​ನಲ್ಲಿ ಪಂದ್ಯಗಳು ನಡೆಯಲಿವೆ. ಹೋಮ್​ ಟೀಮ್​ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು -ಮುಂಬೈ ಇಂಡಿಯನ್ಸ್​ ಮುಖಾಮುಖಿ ಆಗಲಿವೆ. ಹೈ ಪ್ರೊಫೈಲ್​ ತಂಡಗಳ ಹೈವೋಲ್ಟೆಜ್​ ಕದನ ಅಭಿಮಾನಿಗಳಲ್ಲಿ ನಿರೀಕ್ಷೆ ಹೆಚ್ಚಿಸಿದೆ.

ಗಾರ್ಡನ್​ ಸಿಟಿ ಬೆಂಗಳೂರಲ್ಲಿ ಕ್ರಿಕೆಟ್​ ಕಲರವ ಜೋರಾಗಿದೆ. ಚಿನ್ನಸ್ವಾಮಿ ಮೈದಾನದ ಸುತ್ತ ಕ್ರಿಕೆಟ್​ ಫೀವರ್​​ ಕಾವೇರಿದೆ. ಹೋಮ್​ಗ್ರೌಂಡ್​ನಲ್ಲಿ 3ನೇ ಆವೃತ್ತಿಯ ಮೊದಲ ಪಂದ್ಯವನ್ನಾಡಲು ಆರ್​​ಸಿಬಿ ಮಹಿಳಾ ಮಣಿಗಳು ಸಜ್ಜಾಗಿದ್ದಾರೆ.

ಚಿನ್ನಸ್ವಾಮಿ ಮೈದಾನದಲ್ಲಿಂದು ಹೈವೋಲ್ಟೆಜ್​ ಹಣಾಹಣಿ.!

ಮಹಿಳಾ ಪ್ರೀಮಿಯರ್​ ಲೀಗ್​ನ ಹೈಪ್ರೋಫೈಲ್​ ತಂಡಗಳ ನಡುವಿನ ಹೈವೋಲ್ಟೆಜ್​​ ಕದನಕ್ಕೆ ಕೌಂಟ್​ಡೌನ್​ ಶುರುವಾಗಿದೆ. ಬೆಂಗಳೂರಿನ ಚಿನ್ನಸ್ವಾಮಿ ಮೈದಾನದಲ್ಲಿಂದು ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ಹಾಗೂ ಮುಂಬೈ ಇಂಡಿಯನ್ಸ್​ ತಂಡಗಳು ಮುಖಾಮುಖಿ ಆಗಲಿವೆ. ಬಿಗ್​ ಟೀಮ್​ಗಳ ಹಣಾಹಣಿ ಅಭಿಮಾನಿಗಳ ವಲಯದಲ್ಲಿ ತೀವ್ರ ಕುತೂಹಲ ಹುಟ್ಟಿ ಹಾಕಿದೆ.

ಹ್ಯಾಟ್ರಿಕ್​​ ಗೆಲುವಿನ ಮೇಲೆ ಮಂದಾನ ಪಡೆಯ ಕಣ್ಣು.!

ಸ್ಮೃತಿ ಮಂದಾನ ನಾಯಕತ್ವದ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ಟೂರ್ನಿಯಲ್ಲಿ ಗೆಲುವಿನ ಓಟ ಮುಂದುವರೆಸಿದೆ. ಟೂರ್ನಿ ಅರಂಭಕ್ಕೂ ಮುನ್ನ ಪ್ರಮುಖ ಆಟಗಾರ್ತಿಯರ ಅಲಭ್ಯತೆ ಆರ್​​ಸಿಬಿಗೆ ಹಿನ್ನಡೆಯಾಗುತ್ತೆ ಅನ್ನೋ ಪ್ರಿಡಿಕ್ಷನ್​ ನಡೆದಿತ್ತು. ಆದ್ರೆ, ಆ ಪ್ರಿಡಿಕ್ಷನ್​ ಸುಳ್ಳಾಗಿದೆ. ಆಡಿದ ಎರಡೂ ಪಂದ್ಯಗಳಲ್ಲಿ ಭರ್ಜರಿ ಜಯ ಸಾಧಿಸಿರೋ ಮಂದಾನ ಪಡೆ ಇದೀಗ ಹ್ಯಾಟ್ರಿಕ್​ ಗೆಲುವಿನ ಮೇಲೆ ಕಣ್ಣಿಟ್ಟಿದೆ.

ಮಂದಾನ, ಎಲ್ಲಿಸ್​ ಪೆರ್ರಿ ಮೇಲೆ ಫ್ಯಾನ್ಸ್​ ನಿರೀಕ್ಷೆ.!

ಬೆಂಗಳೂರಿನ ಚಿನ್ನಸ್ವಾಮಿ ಮೈದಾನ ಅಭಿಮಾನಿಗಳಿಂದ ಕಿಕ್ಕಿರಿದು ತುಂಬೋದು ಪಕ್ಕಾ. ಮನೆ ಹುಡುಗಿಯರಿಗೆ ಸಪೋರ್ಟ್​​ ಮಾಡಲು ಸಾವಿರಾರು ಸಂಖ್ಯೆಯಲ್ಲಿ ಫ್ಯಾನ್ಸ್​ ಬಂದೆ ಬರ್ತಾರೆ. ಕನ್ನಡತಿ ಶ್ರೇಯಾಂಕ ಪಾಟೀಲ್​ ಇಂಜುರಿಗೊಂಡು ಸೀಸನ್​ನಿಂದ ಔಟ್​ ಆಗಿದ್ದಾರೆ. ಇದೀಗ ಸಾಲಿಡ್​ ಫಾರ್ಮ್​ನಲ್ಲಿರೋ ನಾಯಕಿ ಸ್ಮೃತಿ ಮಂದಾನ, ಎಲ್ಲಿಸ್​ ಪೆರ್ರಿ ಮೇಲೆ ಬೆಟ್ಟದಷ್ಟು ನಿರೀಕ್ಷೆ ಅಭಿಮಾನಿಗಳ ವಲಯದಲ್ಲಿದೆ.

ಚಿನ್ನಸ್ವಾಮಿಯಲ್ಲಿ ಮ್ಯಾಜಿಕ್​ ಮಾಡ್ತಾರಾ ರಿಚಾ ಘೋಷ್.?

ಆರ್​​ಸಿಬಿಯ ವಿಕೆಟ್​ ಕೀಪರ್​​ ಬ್ಯಾಟರ್​ ರಿಚಾ ಘೋಷ್​ ಕೂಡ ಅದ್ಭುತ ಬ್ಯಾಟಿಂಗ್​ ನಡೆಸ್ತಿದ್ದಾರೆ. ಮೊದಲ ಪಂದ್ಯದಲ್ಲಿ ಆರ್ಭಟಿಸಿ ಗುಜರಾತ್​​ಗೆ ಶಾಕ್​ ಕೊಟ್ಟ ರಿಚಾ ಘೋಷ್​, ಡೆಲ್ಲಿ ಎದುರಿನ ಪಂದ್ಯದಲ್ಲೂ ಮಿಂಚಿದ್ರು. ಎರಡೂ ಪಂದ್ಯಗಳಲ್ಲಿ ಸಿಕ್ಸರ್​ ಸಿಡಿಸಿ ಗೆಲುವಿನ ದಡ ಸೇರಿಸಿರೋ ರಿಚಾ ಕೂಡ ಪಂದ್ಯದ ಸೆಂಟರ್​ ಆಫ್​ ಅಟ್ರಾಕ್ಷನ್​ ಆಗಿದ್ದಾರೆ.

ಇನ್ನುಳಿದಂತೆ ಡೇನಿಯಲ್​ ವ್ಯಾಟ್​, ಕನ್ನಿಕಾ ಅಹುಜಾ, ರೇಣುಕಾ ಸಿಂಗ್, ಜಾರ್ಜಿಯಾ ವೆರ್ಹಾಮ್​​ ​​ಉತ್ತಮ ಪರ್ಫಾಮೆನ್ಸ್​ ನೀಡ್ತಿದ್ದಾರೆ. ಹೋಮ್​ಗ್ರೌಂಡ್​​ನಲ್ಲೂ ಇದೇ ಪರ್ಫಾಮೆನ್ಸ್​ ಮುಂದುವರೆಸಿದ್ರೆ, ಆರ್​​​ಸಿಬಿಯ ಪ್ಲೇ ಆಫ್​ ಟಿಕೆಟ್​ ಬಹುತೇಕ ಕನ್​ಫರ್ಮ್​ ಆದಂತೆ.

ಇದನ್ನೂ ಓದಿ: ಪವರ್ ಪ್ಲೇನಲ್ಲಿ ಪವರ್ ಫುಲ್ ಸ್ಪೆಲ್.. ಬೌಲಿಂಗ್​ನಲ್ಲಿ ಶಮಿ ಯಾವಾಗಲೂ ಗೋಲ್ಡನ್ ಆರ್ಮ್

ಆರ್​​​ಸಿಬಿಗೆ ಟಕ್ಕರ್​ ಕೊಡುವ ಲೆಕ್ಕಾಚಾರದಲ್ಲಿ ಮುಂಬೈ.!

ಸೋಲಿನೊಂದಿಗೆ ಈ ಸೀಸನ್​ ಆರಂಭಿಸಿದ ಮುಂಬೈ ಇಂಡಿಯನ್ಸ್​ 2ನೇ ಪಂದ್ಯದಲ್ಲಿ ಗೆದ್ದು ಬೀಗಿದೆ. ಡೆಲ್ಲಿ ವಿರುದ್ಧ ಸೋತು, ಗುಜರಾತ್​ ವಿರುದ್ಧ ಗೆದ್ದ ಮುಂಬೈ ಆತ್ಮವಿಶ್ವಾಸದ ಅಲೆಯಲ್ಲಿದೆ. ಚಿನ್ನಸ್ವಾಮಿ ಮೈದಾನದಲ್ಲಿ ಕಠಿಣ ಅಭ್ಯಾಸ ನಡೆಸಿರುವ ಹರ್ಮನ್​​ಪ್ರೀತ್​ ಕೌರ್​ ಪಡೆ ಆರ್​​ಸಿಬಿ ಟಕ್ಕರ್​ ಕೊಡೋ ಲೆಕ್ಕಾಚಾರದಲ್ಲಿದೆ.

ಬೆಂಗಳೂರಿನಲ್ಲಿ ನಡೆಯುವ ಇವತ್ತಿನ ವುಮೆನ್ಸ್​ ಪ್ರೀಮಿಯರ್​ ಲೀಗ್​ನ ಹೈವೋಲ್ಟೆಜ್ ಕದನಕ್ಕೆ ಕ್ರಿಕೆಟ್​​ ಲೋಕದ ಕುತೂಹಲದಿಂದ ಕಾಯ್ತಿದೆ. ಮುಂಬೈ VS ಬೆಂಗಳೂರು ನಡುವಿನ ಹೈಪ್ರೊಫೈಲ್​ ತಂಡಗಳ ನಡುವಿನ ಕಾದಾಟದಲ್ಲಿ ಯಾರು ಗೆಲ್ತಾರೆ, ಯಾರು ಸೋಲ್ತಾರೆ ಕಾದು ನೋಡಬೇಕಿದೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ