ಮೆಗಾ ಹರಾಜಿಗಾಗಿ ಭರ್ಜರಿ ಪ್ಲಾನ್​​; ಆರ್​​​ಸಿಬಿ ತಂಡಕ್ಕೆ ಸ್ಫೋಟಕ ಆಟಗಾರನ ಎಂಟ್ರಿ

ಬಹುನಿರೀಕ್ಷಿತ 2025ರ ಇಂಡಿಯನ್​ ಪ್ರೀಮಿಯರ್​​ ಲೀಗ್​​ಗೆ ಈಗಿನಿಂದಲೇ ಭರ್ಜರಿ ತಯಾರಿ ನಡೆಯುತ್ತಿದೆ. ಎಲ್ಲಾ ಐಪಿಎಲ್​ ತಂಡಗಳು ಬಿಸಿಸಿಐಗೆ ರಿಟೆನ್ಷನ್‌ ಲೀಸ್ಟ್ ನೀಡಲು ಕೆಲವೇ ಗಂಟೆಗಳು ಬಾಕಿ ಉಳಿದಿವೆ. ಹೀಗಾಗಿ ಆರ್​​​ಸಿಬಿ ಸೇರಿದಂತೆ ಎಲ್ಲಾ ತಂಡಗಳ ಮಾಲೀಕರು ಕೊನೆಯ ಹಂತದ ಕಸರತ್ತು ನಡೆಸುತ್ತಿದ್ದಾರೆ. ಇದರ ಮಧ್ಯೆ ಗುಜರಾತ್​ ಟೈಟನ್ಸ್​ ತಂಡದಿಂದ ಬಿಗ್​ ಅಪ್ಡೇಟ್​​ ಒಂದು ಹೊರಬಿದ್ದಿದೆ.

ಗುಜರಾತ್​ ಟೈಟನ್ಸ್​ ತಂಡವು ಕ್ಯಾಪ್ಟನ್​​ ಶುಭ್ಮನ್​ ಗಿಲ್​ ಸೇರಿದಂತೆ ಇಬ್ಬರು ಸ್ಟಾರ್​ ಆಟಗಾರರನ್ನು ಮಾತ್ರ ಉಳಿಸಿಕೊಳ್ಳಲು ಮುಂದಾಗಿದೆ. ಅಚ್ಚರಿ ಎಂದರೆ ಗುಜರಾತ್​ ಟೈಟನ್ಸ್​​ ತಂಡದ ರೀಟೈನ್​ ಲಿಸ್ಟ್​ನಲ್ಲಿ ಸ್ಟಾರ್​ ವೇಗಿ ಮೊಹಮ್ಮದ್​ ಶಮಿ ಹೆಸರು ಇಲ್ಲದಿರುವುದು. ಹಾಗಾಗಿ ಶಮಿ ಐಪಿಎಲ್​​ ಮೆಗಾ ಆಕ್ಷನ್​​ಗೆ ಬರೋದು ಪಕ್ಕಾ ಆಗಿದೆ.

ರೀಟೈನ್​​ ಲಿಸ್ಟ್​​ನಲ್ಲಿ ಯಾರಿಗೆ ಮಣೆ?

ಸದ್ಯಕ್ಕೆ ಸಿಕ್ಕಿರೋ ಮಾಹಿತಿ ಪ್ರಕಾರ ಗುಜರಾತ್​​ ತಂಡದ ಮೊದಲ ಆಯ್ಕೆ ಕ್ಯಾಪ್ಟನ್​ ಶುಭ್ಮನ್​ ಗಿಲ್​​. ಇವರ 2ನೇ ಆಯ್ಕೆ ರಶೀದ್​ ಖಾನ್​ ಮತ್ತು 3ನೇ ಆದ್ಯತೆ ಯುವ ಬ್ಯಾಟರ್​​ ಸಾಯಿ ಸುದರ್ಶನ್​ ಎಂದು ತಿಳಿದು ಬಂದಿದೆ. ಈ ಲಿಸ್ಟ್​​ನಲ್ಲಿ ಶಮಿ ಹೆಸರು ಇಲ್ಲ ಎನ್ನುವುದು ಖಾತ್ರಿಯಾಗಿದೆ.

ಶಮಿ ಮೇಲೆ ಆರ್​​​​ಸಿಬಿ ಕಣ್ಣು

ವರ್ಷದ ಕೊನೆಗೆ ನಡೆಯಲಿರೋ ಮೆಗಾ ಹರಾಜಿನಲ್ಲಿ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ತಂಡ ಇಂಡಿಯನ್​ ಬೌಲರ್​ಗಳ ಮೇಲೆ ಕಣ್ಣಿಟ್ಟಿದೆ. ಶಮಿ ಹರಾಜಿಗೆ ಬಂದರೆ ಆರ್​​ಸಿಬಿ ಬಿಡ್​ ಮಾಡೋದು ಪಕ್ಕಾ. ಇದಕ್ಕೆ ಕಾರಣ ಆರ್​​​ಸಿಬಿ ಟಾರ್ಗೆಟ್​ ಲಿಸ್ಟ್​​ನಲ್ಲಿ ಶಮಿ ಹೆಸರಿದೆ ಎನ್ನುವ ಮಾಹಿತಿ ಇದೆ. ಶಮಿ ಆರ್​​​ಸಿಬಿಗೆ ಬಂದರೆ ಪವರ್‌ ಪ್ಲೇ ಹಾಗೂ ಡೆತ್‌ ಓವರ್‌ಗಳಲ್ಲಿ ತಂಡಕ್ಕೆ ದೊಡ್ಡ ಸ್ಟ್ರೆಂಥ್​ ಆಗಲಿದ್ದಾರೆ.

ಕಮ್​ಬ್ಯಾಕ್​ ಮಾಡಲು ಶಮಿ ಸರ್ಕಸ್​​

ಟೀಮ್​ ಇಂಡಿಯಾದ ಸ್ಟಾರ್​ ಬೌಲರ್​​ ಶಮಿ. ಇವರು ಇತ್ತೀಚೆಷ್ಟೇ ಗಾಯದಿಂದ ಚೇತರಿಸಿಕೊಂಡಿದ್ದು, ಸದ್ಯದಲ್ಲೇ ಟೀಮ್​ ಇಂಡಿಯಾಗೆ ಕಮ್​ಬ್ಯಾಕ್​ ಮಾಡಲು ಸರ್ಕಸ್​ ಮಾಡುತ್ತಿದ್ದಾರೆ. ಶಮಿ ಏಕದಿನ ವಿಶ್ವಕಪ್‌ ಫೈನಲ್‌ನಲ್ಲಿ ಕೊನೆ ಬಾರಿಗೆ ಟೀಮ್ ಇಂಡಿಯಾ ಪರ ಆಡಿದ್ರು. ಇವರಿಗೆ ಬಾರ್ಡರ್-ಗವಾಸ್ಕರ್ ಟ್ರೋಫಿ ತಂಡದಲ್ಲೂ ಸ್ಥಾನ ಸಿಕ್ಕಿಲ್ಲ. ಹೀಗಾಗಿ ಫ್ರಾಂಚೈಸಿ ಇವರನ್ನು ಕೈ ಬಿಡುವ ಸಾಧ್ಯತೆ ಇದೆ.

ಶಮಿ ಐಪಿಎಲ್ ಸಾಧನೆ

ಕಳೆದ 11 ವರ್ಷಗಳ ಹಿಂದೆ ಶಮಿ ಐಪಿಎಲ್​ಗೆ ಡೆಬ್ಯೂ ಮಾಡಿದ್ರು. 2013ರಲ್ಲಿ ಪಾದಾರ್ಪಣೆ ಮಾಡಿರೋ ಇವರು ಕೋಲ್ಕತ್ತಾ ನೈಟ್ ರೈಡರ್ಸ್, ಡೆಲ್ಲಿ ಕ್ಯಾಪಿಟಲ್ಸ್, ಪಂಜಾಬ್ ಕಿಂಗ್ಸ್ ಮತ್ತು ಗುಜರಾತ್ ಟೈಟನ್ಸ್ ತಂಡವನ್ನು ಪ್ರತಿನಿಧಿಸಿದ್ದಾರೆ. ಒಟ್ಟು 110 ಪಂದ್ಯಗಳಲ್ಲಿ 127 ವಿಕೆಟ್‌ ಪಡೆದಿದ್ದಾರೆ.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ