20 ವರ್ಷಗಳಿಂದ ನಿದ್ರಿಸುತ್ತಿರುವ ರಾಜಕುಮಾರನಿಗೆ 36ನೇ ವರ್ಷದ ಹುಟ್ಟುಹಬ್ಬ; ಯಾರಿವನು?

ಹಲ್ಲಿದ್ದವನಿಗೆ ಕಡಲೆಯಿಲ್ಲ, ಕಡಲೆಯಿದ್ದವನಿಗೆ ಹಲ್ಲಿಲ್ಲ ಅನ್ನೋ ಹಾಗೆ, ಸುಖದ ಸುಪ್ಪತ್ತಿಗೆ ಬದುಕಿ, ತೇಲಾಡಬೇಕಿದ್ದ ರಾಜಕುಮಾರನ ಸ್ಥಿತಿ ನೋಡಿ ಜನರು, ನಮ್ ಶತ್ರುಗೂ ಈ ಪರಿಸ್ಥಿತಿ ಬರಬಾರದು ಅಂತ ಬೇಜಾರ್ ಮಾಡಿಕೊಳ್ತಿದ್ದಾರೆ.

ಈ ರಾಜಕುಮಾರನ ಹೆಸರು ಅಲ್-ವಲೀದ್ ಬಿನ್ ಖಲೀದ್ ಬಿನ್ ತಲಾಲ್ ಅಂತ. ಸೌದಿ ರಾಜಮನೆತನವನ್ನ ಮುಂದುವರೆಸಬೇಕಿದ್ದ ಉತ್ತರಾಧಿಕಾರಿ ಅಂತಾನೇ ಹೇಳಬಹುದು. ಈ ರಾಜಕುಮಾರ ಮೊನ್ನೆ ತಾನೆ ತನ್ನ 36ನೇ ವರ್ಷದ ಹುಟ್ಟುಹಬ್ಬವನ್ನ ಆಚರಿಸಿಕೊಂಡಿದ್ದಾನೆ. ಆದ್ರೆ, ಆ ಹುಟ್ಟುಹಬ್ಬವನ್ನ ಸಂಭ್ರಮ ಮಾಡಿದ್ದು ಆ ರಾಜಕುಮಾರ ಅಲ್ಲ. ಆತನ ಸ್ನೇಹಿತರು, ಬಂಧುಗಳು.

ಸೌದಿ ಅರೇಬಿಯಾ ದೇಶದ ಈ ರಾಜಕುಮಾರನಿಗೆ 2005ರ ಏಪ್ರಿಲ್ 18ನೇ ತಾರೀಖು, ಮಿಲಿಟರಿ ಕಾಲೇಜಿನಲ್ಲಿ ಓದೋ ಟೈಂನಲ್ಲಿ ರಸ್ತೆ ಅಪಘಾತದಲ್ಲಿ ತಲೆಗೆ ಗಂಭೀರ ಗಾಯ ಆಗಿತ್ತು. ರಕ್ತಸ್ರಾವವಾಗಿ ಆಸ್ಪತ್ರೆಗೂ ದಾಖಲಾಗ್ತಾರೆ. ಅವತ್ತಿನಿಂದ, ಅಂದ್ರೆ 2005ರಿಂದಲೂ ಕೂಡ ಸ್ವಲ್ಪವೂ ಪ್ರಜ್ಞೆಯೇ ಇಲ್ಲದೇ, ಕೋಮಾದಲ್ಲಿದ್ದಾರೆ. ಅಲ್-ವಲೀದ್ ರಿಯಾದ್‌ನ ರಾಜ ಅಬ್ದುಲಾಜೀಜ್ ಮೆಡಿಕಲ್ ಸಿಟಿಯಲ್ಲಿ ಯಂತ್ರಗಳ ಸಹಾಯದಿಂದ ಜೀವಂತವಾಗಿ ಕೋಮಾದಲ್ಲಿದ್ದಾರೆ. ಬರೋಬ್ಬರಿ 2 ದಶಕಗಳಿಂದ ಕೋಮಾದಲ್ಲೇ ಇರ್ತಾ ಇರೋದ್ರಿಂದ ಸೌದಿಯ ಈ ರಾಜಕುಮಾರನಿಗೆ ಸ್ಲೀಪಿಂಗ್ ಪ್ರಿನ್ಸ್ ಅಂದ್ರೇ ನಿದ್ರೆ ಮಾಡೋ ರಾಜಕುಮಾರ ಅಂತ ಕರೀತಾರೆ.

ಸೌದಿ ಅರೇಬಿಯಾದ ಸ್ಥಾಪಕ, ರಾಜ ಅಬ್ದುಲ್ ಅಜೀಜ್ ಅವರ ಮರಿಮೊಮ್ಮಗನೇ ಈ ರಾಜಕುಮಾರ. ರಾಜವೈಭೋಗ ಅನುಭವಿಸಬೇಕಿದ್ದ ಈ ಪ್ರಿನ್ಸ್ ಈಗ ಆಸ್ಪತ್ರೆಯ ಬೆಡ್​​ ಮೇಲೆಯೇ ಮಲಗಿದ್ದಾರೆ. ಡಾಕ್ಟರ್​​ಗಳು, ಆತನ ಜೀವ ಉಳಿಸೋಕೆ ಈಗಲೂ ಸಾಕಷ್ಟೂ ರೀತಿಯಲ್ಲಿ ಪ್ರಯತ್ನ ಪಡ್ತಾನೇ ಇದ್ದಾರೆ. ಈ ರಾಜಕುಮಾರನಿಗೆ ವೆಂಟಿಲೇಟರ್ ಹಾಗೂ ಫೀಡಿಂಗ್ ಟ್ಯೂಬ್ ಸಪೋರ್ಟ್​ ಮಾಡ್ತಿವೆ. ಇನ್ನೊಂದು ಕಡೆ, ಅವರ ತಂದೆ ಮಾತ್ರ ನನ್ನ ಮಗ ಮತ್ತೆ ಕಣ್ಣು ಬಿಟ್ಟು ನಮ್ಮನ್ನ ನೋಡೇ ನೋಡ್ತಾನೆ ಅನ್ನೋ ಬಲವಾದ ಭರವಸೆಯಲ್ಲೇ ದಿನಗಳನ್ನ ಎಣಿಸ್ತಾ ಇದ್ದಾರೆ. ಅಕಸ್ಮಾತ್ ಆ ದೇವರು, ಆ್ಯಕ್ಸಿಡೆಂಟ್​​ನಲ್ಲೇ ಅವನು ಸಾಯಬೇಕೆಂದು ಅಂತ ಬಯಸಿದ್ರೆ, ಅವನೀಗ ಸಮಾಧಿಯಲ್ಲಿ ಇರುತ್ತಿದ್ದ ಅಂತ ರಾಜಕುಮಾರನ ತಂದೆ ಹೇಳ್ತಾರೆ.

ಇದನ್ನೂ ಓದಿ: ಪಾಕ್ ಬುಡಕ್ಕೆ ಬೆಂಕಿಯಿಟ್ಟ ಭಾರತದ ಒಂದೇ ಮೀಟಿಂಗ್.. ಸಿಂಧೂ ನದಿ ನೀರು ಒಪ್ಪಂದ ಅಮಾನತು ಸುಲಭನಾ..? 

2019ರಲ್ಲಿ, ಈ ರಾಜಕುಮಾರ, ತನ್ನ ಮೆಲ್ಲನೇ ಬೆರಳುಗಳನ್ನ ಎತ್ತೋದು, ಚಿಕ್ಕದಾಗಿ ತಲೆ ಅಲ್ಲಡಿಸೋದನ್ನ ಮಾಡಿದ್ನಂತೆ. ಆದ್ರೆ ಈ ಲಕ್ಷಣಗಳು ಸಂಪೂರ್ಣವಾಗಿ ಮತ್ತೆ ಪ್ರಜ್ಞೆ ಬರೋಕೆ ಆಗಿರಲಿಲ್ಲ. 2025ರ ಏಪ್ರಿಲ್ 18ನೇ ತಾರೀಖು, ರಾಜಕುಮಾರನ ಹುಟ್ಟುಹಬ್ಬ ಇತ್ತು. ಹೀಗಾಗಿ ಸ್ನೇಹಿತರು, ಬಂಧುಗಳೆಲ್ಲಾ ಸೇರಿ ಆಸ್ಪತ್ರೆಯಲ್ಲೇ ರಾಜಕುಮಾರನಿಗೆ ಬರ್ತ್​ಡೇ ಸೆಲೆಬ್ರೇಷನ್ ಮಾಡಿದ್ದಾರೆ. ಬರ್ತ್​ಡೇಯ ಕೆಲ ಫೋಟೋಗಳು ಸೋಶಿಯಲ್ ಮೀಡಿಯಾದಲ್ಲಿ ಸ್ನೇಹಿತರು ಹಂಚಿಕೊಂಡಿದ್ದಾರೆ. ಹೀಗಾಗಿ ಮತ್ತೆ ಈ ರಾಜಕುಮಾರನ ಸುದ್ದಿ ಗೊತ್ತಾಗಿದೆ.

ಬಾಳಿ ಬದುಕಬೇಕಿತ್ತು. ಅಕ್ಷರಶಃ ರಾಜವೈಭೋಗದಲ್ಲಿ ತೇಲಾಡಬೇಕಿತ್ತು. ಕೇವಲ 36 ವರ್ಷದ ಒಬ್ಬ ವ್ಯಕ್ತಿ, 20 ವರ್ಷಗಳಿಂದ ಕಂಟಿನ್ಯೂಯಾಗಿ ಕೋಮಾದಲ್ಲೇ ಇದ್ದಾನೆ ಅಂತಂದ್ರೇ ಯಾರಿಗೆ ಆದ್ರೂ ಕರುಳು ಚುರುಕ್ ಅನ್ನುತ್ತೆ ಕಣ್ರಿ. ಮತ್ತೆ ಆ ರಾಜಕುಮಾರನಿಗೆ ಪ್ರಜ್ಞೆ ಬರಲಿ. ಅವನ ತಂದೆ ಇಟ್ಟಿರೋ ಆ ಒಂದು ಭರವಸೆ ಅಳಿಸಿ ಹೋಗದಂತೆ ಆಗಲಿ ಅಂತ ಆಶಿಸೋಣ.

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ