ಠಾಕೂರ್ ಮುಂದೆ SRH ಆಟ ನಡೆಯಲಿಲ್ಲ.. ಬ್ಯಾಟ್​​ನಿಂದ ಅಟ್ಯಾಕ್ ಮಾಡ್ತಿದ್ದವ್ರಿಗೆ ಲಕ್ನೋ ಬೌಲರ್ಸ್ ಕೌಂಟರ್!

ಲಕ್ನೋ ಸೂಪರ್ ಜೈಂಟ್ಸ್​ ವಿರುದ್ಧ ನಡೆದ ಐಪಿಎಲ್​ನ 7ನೇ ಪಂದ್ಯದಲ್ಲಿ ಸನ್​ರೈಸರ್ಸ್​ ಹೈದ್ರಾಬಾದ್ 20 ಓವರ್​ಗಳಲ್ಲಿ 9 ವಿಕೆಟ್​​ಗೆ 190 ರನ್​ಗಳ ಟಾರ್ಗೆಟ್ ನೀಡಿದೆ. ಲಕ್ನೋ ಪರ ಪೇಸ್​ ಬೌಲರ್​ ಶಾರ್ದೂಲ್ ಠಾಕೂರ್​ ಬೌಲಿಂಗ್​​ಗೆ ಹೈದ್ರಾಬಾದ್ ಬ್ಯಾಟ್ಸ್​ಮನ್ಸ್​ ಪತರುಗುಟ್ಟಿದರು.

ಹೈದರಾಬಾದ್​ನ ರಾಜೀವ್ ಗಾಂಧಿ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಟಾಸ್ ಗೆದ್ದ ಲಕ್ನೋ ಕ್ಯಾಪ್ಟನ್​ ರಿಷಭ್ ಪಂತ್ ಅವರು ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡರು. ಬೃಹತ್ ರನ್​ಗಳ ಕಲೆ ಹಾಕುವ ಯೋಜನೆಯಲ್ಲಿ ಕ್ರೀಸ್​ಗೆ ಆಗಮಿಸಿದ ಹೈದ್ರಾಬಾದ್ ಓಪನರ್ಸ್​ ಅಭಿಷೇಕ್ ಶರ್ಮಾ ಹಾಗೂ ಟ್ರಾವಿಸ್​ ಹೆಡ್​ ಉತ್ತಮ ಆರಂಭ ಪಡೆಯಲಿಲ್ಲ. ​ಅಭಿಷೇಕ್ ಶರ್ಮಾ 6 ರನ್​ ಗಳಿಸಿ ಆಡುವಾಗ ಪೂರನ್​ಗೆ ಕ್ಯಾಚ್ ನೀಡಿ ಔಟ್ ಆದರು.

ಇದನ್ನೂ ಓದಿ: ವಿರಾಟ್ ಕೊಹ್ಲಿ ಕ್ರಿಕೆಟ್‌ ಜಗತ್ತಿನ ಕ್ರಿಸ್ಟಿಯಾನೊ ರೊನಾಲ್ಡೊ- CSK ಮಾಜಿ ಪ್ಲೇಯರ್​​ ಗುಣಗಾನ

ಮಧ್ಯಮ ಕ್ರಮಾಂಕದಲ್ಲಿ ನಿತೀಶ್ ಕುಮಾರ್ 32, ಕ್ಲಾಸೆನ್ 26, ಅಂಕಿತ್ 36, ನಾಯಕ ಕಮಿನ್ಸ್​ 18 ರನ್​ಗಳ ನೆರವಿನಿಂದ ಹೈದ್ರಾಬಾದ್ 190 ರನ್​ ಗುರಿ ನೀಡಿದೆ. ಇನ್ನು ಲಕ್ನೋ ಪರ ಆಟಗಾರರು ಬಿರುಸಿನ ಬೌಲಿಂಗ್ ನಡೆಸಿ ಎದುರಾಳಿಗಳನ್ನು ಕಟ್ಟಿ ಹಾಕುವಲ್ಲಿ ಯಶಸ್ವಿಯಾದರು ಎನ್ನಬಹುದು. ಶಾರ್ದುಲ್​ ಠಾಕೂರ್ ಅವರ ಬೌಲಿಂಗ್ ಪರಾಕ್ರಮದ ಮುಂದೆ ಅಭಿಷೇಕ್ ಶರ್ಮಾ, ಕಿಶನ್, ಮನೋಹರ, ಶಮಿ ಮಂಡಿಯೂರಿದರು.

4 ಓವರ್​ ಮಾಡಿದ ಶಾರ್ದುಲ್​ ಠಾಕೂರ್ 34 ರನ್​ಗೆ ಪ್ರಮುಖವಾದ 4 ವಿಕೆಟ್​ ಕಬಳಿಸಿ ಲಕ್ನೋಗೆ ನೆರವಾದರು. ಇನ್ನುಳಿದಂತೆ ಆವೇಶ್ ಖಾನ್, ದಿಗ್ವೇಶ್ ರಥಿ, ರವಿ ಬಿಷ್ಣೋಯಿ, ಪ್ರಿನ್ಸ್ ಯಾದವ್ ತಲಾ ಒಂದೊಂದು ವಿಕೆಟ್ ಕಬಳಿಸಿದರು. ಇದರಿಂದ ದೊಡ್ಡ ಮೊತ್ತದ ರನ್​ ಕಲೆ ಹಾಕುವ ಯೋಜನೆಯಲ್ಲಿದ್ದ ಎಸ್​​ಆರ್​ಹೆಚ್​ 190 ರನ್​ಗಳಿಗೆ ಆಟ ಮುಗಿಸಿತು.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ