IPL​ನಲ್ಲಿ ಶ್ರೇಯಸ್​ ಅಯ್ಯರ್ ಟ್ರ್ಯಾಕ್​ ರೆಕಾರ್ಡ್​ RCBಗೆ ಭಯ ಹುಟ್ಟಿಸುತ್ತಾ?

ಪಂಜಾಬ್ ಕಿಂಗ್ಸ್​ ತಂಡದ ನಾಯಕ ಶ್ರೇಯಸ್ ಅಯ್ಯರ್ ಬಗ್ಗೆ, ಕ್ರಿಕೆಟ್ ವಲಯದಲ್ಲಿ ಜೋರಾಗೇ ಚರ್ಚೆ ನಡೆಯುತ್ತಿದೆ. ಶ್ರೇಯಸ್ ನಾಯಕತ್ವ, ಶ್ರೇಯಸ್ ಬ್ಯಾಟಿಂಗ್ ಬಗ್ಗೆ ಒಬ್ಬೊಬ್ಬರು, ಒಂದೊಂದು ರೀತಿಯಲ್ಲಿ ಮಾತನಾಡುತ್ತಿದ್ದಾರೆ. ಪಂಜಾಬ್ ಕಿಂಗ್ಸ್, ಐಪಿಎಲ್ ಟೇಬಲ್ ಟಾಪರ್ ಆದ್ರೂ ಶ್ರೇಯಸ್ ಇಷ್ಟೊಂದು ಸುದ್ದಿಯಲ್ಲಿರೋದು ಯಾಕೆ?.

ಸೆಟ್​ಬ್ಯಾಕ್ ಅಥವಾ ಹಿನ್ನಡೆ, ಒಬ್ಬ ವ್ಯಕ್ತಿಯನ್ನ ಏನ್ ಬೇಕಾದ್ರೂ ಮಾಡುತ್ತೆ. ಸೆಟ್​ಬ್ಯಾಕ್​​ನಿಂದ ಆ ವ್ಯಕ್ತಿ ಎತ್ತರಕ್ಕೆ ಬೆಳೆಯಬಹುದು ಅಥವಾ ಪಾತಾಳಕ್ಕೂ ಬೀಳಬಹುದು. ಆದ್ರೆ ಸೆಟ್​ಬ್ಯಾಕ್, ಒಬ್ಬ ಕ್ರಿಕೆಟಿಗನನ್ನ ಬಹು ಎತ್ತರಕ್ಕೆ ಬೆಳೆಯುವಂತೆ ಮಾಡಿದೆ. ನಾವು ಮಾತಾಡ್ತಾ ಇರೋದು ಪಂಜಾಬ್ ಕಿಂಗ್ಸ್​ ತಂಡದ ಸಕ್ಸಸ್​​ಫುಲ್ ಕ್ಯಾಪ್ಟನ್ ಶ್ರೇಯಸ್ ಅಯ್ಯರ್ ಬಗ್ಗೆ.

ಅಂದು ಬಿಸಿಸಿಐ ಮಾತಿಗೆ ಕ್ಯಾರೇ ಅನ್ನದ ಶ್ರೇಯಸ್ ಅಯ್ಯರ್ ಕ್ರಿಕೆಟ್ ಕರಿಯರ್, ಖತಂ ಅಂತಾನೇ ಎಲ್ಲರೂ ಭಾವಿಸಿದರು. ಆ ಕೆಟ್ಟ ಘಟನೆಯಿಂದ ಶ್ರೇಯಸ್ ಅಯ್ಯರ್ ಮತ್ತೆ ಕ್ರಿಕೆಟ್ ಆಡ್ತಾರೋ ಇಲ್ವೋ ಅಂತ ಅನುಮಾನ ವ್ಯಕ್ತವಾಗಿತ್ತು. ಆದ್ರೆ ಆ ಸೆಟ್​ಬ್ಯಾಕ್​​ನಿಂದ ಇಂದು ಶ್ರೇಯಸ್ ಅಯ್ಯರ್, ಮನೆ ಮನೆ ಮಾತಾಗಿದ್ದಾರೆ. ದಿಗ್ಗಜ ಕ್ರಿಕೆಟಿಗರು, ಕ್ರಿಕೆಟ್ ವಿಶ್ಲೇಷಕರು, ಕ್ರಿಕೆಟ್ ಪಂಡಿತರು, ಶ್ರೇಯಸ್​​ ಅಯ್ಯರ್​ನ ಕೊಂಡಾಡುತ್ತಿದ್ದಾರೆ.

ಐಪಿಎಲ್​​ ಸೀಸನ್-18ರ ಬೆಸ್ಟ್ ಕ್ಯಾಪ್ಟನ್

ಐಪಿಎಲ್ ಸೀಸನ್-18ರ ಬೆಸ್ಟ್ ಕ್ಯಾಪ್ಟನ್ ಯಾರು ಅಂದ್ರೆ, ಥಟ್​ ಅಂತ ನೆನಪಾಗೋ ಹೆಸರು ಒಂದೇ, ಅದು ಶ್ರೇಯಸ್ ಅಯ್ಯರ್. ಯುವ ಸೈನ್ಯದ ಸಾರಥಿಯಾಗಿ ಶ್ರೇಯಸ್, ಆನ್​ಫೀಲ್ಡ್​​ನಲ್ಲಿ ಉತ್ತಮ ನಿರ್ಣಯಗಳನ್ನ ಕೈಗೊಂಡಿದ್ದಾರೆ. ಶ್ರೇಯಸ್​​​ರ ಗೇಮ್​​ಪ್ಲಾನ್, ಸ್ಟ್ರಾಟಜಿ, ಟ್ಯಾಕ್ಟಿಕ್ಸ್​​ ಎಲ್ಲವೂ ಸುಪರ್ಬ್​​​. ಎಲ್ಲದಕ್ಕಿಂತ ಮುಖ್ಯವಾಗಿ ಶ್ರೇಯಸ್, ಪ್ಲೇಯಿಂಗ್ ಇಲೆವೆನ್​ ಆಯ್ಕೆಗೆ ಬಿಗ್ ಕ್ರೆಡಿಟ್ ಕೊಡಲೇಬೇಕು. ​​​​​​​​​ಶ್ರೇಯಸ್, ದಿ ಬೆಸ್ಟ್ ಕ್ಯಾಪ್ಟನ್ ಅನ್ನೋದಕ್ಕೆ, ಇದಕ್ಕಿಂತ ಬೇರೇನು ಬೇಕು ಹೇಳಿ?.

ಶ್ರೇಯಸ್​​ ಎಲ್ಲಾ ನಾಯಕರಿಗಿಂತ ಮುಂದು

ಆರು ಐಪಿಎಲ್ ಸೀಸನ್​ಗಳಲ್ಲಿ ನಾಯಕನಾಗಿ ಶ್ರೇಯಸ್ ಅಯ್ಯರ್, 5 ಬಾರಿ ತಂಡವನ್ನ ಪ್ಲೇ-ಆಫ್​​​​​​ಗೆ ಕೊಂಡೊಯ್ದಿದ್ದಾರೆ. ಧೋನಿ 16 ಸೀಸನ್​ಗಳಲ್ಲಿ 12 ಬಾರಿ, ರೋಹಿತ್ ಶರ್ಮಾ 11 ಸೀಸನ್​ಗಳಲ್ಲಿ 7 ಬಾರಿ, ಗೌತಮ್ ಗಂಭೀರ್ 7 ಸೀಸನ್​​ಗಳಲ್ಲಿ 5 ಬಾರಿ ಮತ್ತು ವಿರಾಟ್ ಕೊಹ್ಲಿ 9 ಸೀಸನ್​​ಗಳಲ್ಲಿ ನಾಯಕನಾಗಿ 4 ಬಾರಿ ತಮ್ಮ ತಂಡವನ್ನ ಪ್ಲೇ-ಆಫ್​​ಗೆ ಎಂಟ್ರಿ ಕೊಡಿಸಿದ್ದಾರೆ.

ನಾಯಕನಾಗಿ ಶ್ರೇಯಸ್​​ ಐಪಿಎಲ್​​ನಲ್ಲಿ ಹೆಚ್ಚು ಹೆಚ್ಚು ಸಕ್ಸಸ್ ಕಂಡಿದ್ದಾರೆ. ಹಾಗೇ ಬ್ಯಾಟ್ಸ್​ಮನ್ ಆಗಿಯೂ ಶ್ರೇಯಸ್, ಯಾರಿಗಿಂತ ಕಮ್ಮಿ ಇಲ್ಲ. ಇದೇ ಆರ್​ಸಿಬಿಗೆ ಈಗ ಕಾಡುತ್ತಿದೆ. ಆರ್​ಸಿಬಿಗೆ ಭಯ ಇಲ್ಲದಿದ್ದರೂ ಸಕ್ಸಸ್​ ಅನ್ನೋದು ಶ್ರೇಯಸ್​ ಸುತ್ತ ಸುತ್ತುತ್ತಿದೆ. ಇದೆ ಬೆಂಗಳೂರಿಗೆ ಮುಳುವಾಗುತ್ತಾ ಎನ್ನುವುದು ಪ್ರಶ್ನೆ. ಇನ್ನೊಂದು ಪಂದ್ಯವಿದ್ದರೂ ಶ್ರೇಯಸ್ ಅಯ್ಯರ್ ಪಡೆಯನ್ನು ಮಣಿಸಿದರೆ ಮತ್ತೊಂದರ ಬಗ್ಗೆ ಚಿಂತೆ ಇಲ್ಲದೇ ಫೈನಲ್​ ಹೋಗಬಹುದು.

ಬ್ಯಾಟ್ಸ್​ಮನ್​​ ಆಗಿ ಶ್ರೇಯಸ್​​​​​​ ಮಿಂಚಿನ ಆಟ

ಈ ಸೀಸನ್​ನಲ್ಲಿ ಶ್ರೇಯಸ್ ಆರಂಭದಲ್ಲೇ, ಬ್ಯಾಟಿಂಗ್​ನಲ್ಲಿ ಅಬ್ಬರಿಸಿದ್ದಾರೆ. 14 ಪಂದ್ಯಗಳನ್ನ ಆಡಿರೋ ಶ್ರೇಯಸ್, ಒಟ್ಟು 299 ಎಸೆತಗಳನ್ನ ಎದುರಿಸಿದ್ದಾರೆ. 172ರ ಬ್ಯಾಟಿಂಗ್ ಸ್ಟ್ರೈಕ್​ರೇಟ್​ನಲ್ಲಿ 514 ರನ್​ಗಳಿಸಿರುವ ಶ್ರೇಯಸ್, 5 ಆಕರ್ಷಕ ಅರ್ಧಶತಕಗಳನ್ನೂ ಸಿಡಿಸಿದ್ದಾರೆ. ಟೂರ್ನಿಯಲ್ಲಿ ಅತಿ ಹೆಚ್ಚು ರನ್​ಗಳಿಸಿರೋ ಟಾಪ್-10 ಲಿಸ್ಟ್​ನಲ್ಲಿ ಪಂಜಾಬ್ ಕ್ಯಾಪ್ಟನ್ ಕಾಣಿಸಿಕೊಂಡಿದ್ದಾರೆ.

ಯಾವ ಸ್ಲಾಟ್​​ನಲ್ಲಿ ಎಷ್ಟು ರನ್

ಶ್ರೇಯಸ್​ ಅಯ್ಯರ್​ರ ಫೇವರಿಟ್ ಸ್ಲಾಟ್, ನಂಬರ್ 3. ಈ ಸ್ಲಾಟ್​​ನಲ್ಲಿ ಶ್ರೇಯಸ್ 181ರ ಬ್ಯಾಟಿಂಗ್ ಸ್ಟ್ರೈಕ್​ರೇಟ್​ನಲ್ಲಿ 360 ರನ್​ಗಳಿಸಿದ್ದಾರೆ. ನಂಬರ್ 4 ಸ್ಲಾಟ್​​ನಲ್ಲಿ ಶ್ರೇಯಸ್ 165ರ ಸ್ಟ್ರೈಕ್​ರೇಟ್​ನಲ್ಲಿ 124 ರನ್​ಗಳಿಸಿದ್ದಾರೆ. ಯಾವ ಸ್ಲಾಟ್​​ನಲ್ಲಿ ಬ್ಯಾಟಿಂಗ್​​ ನಡೆಸಿದರೂ, ಶ್ರೇಯಸ್ ಬ್ಯಾಟ್​ನಿಂದ ರನ್​ಮಳೆ ಪಕ್ಕಾ.

ಶ್ರೇಯಸ್​​​​​​, ಇದುವರೆಗೂ ಮೂರು ಐಪಿಎಲ್ ತಂಡಗಳನ್ನ ಮುನ್ನಡೆಸಿದ್ದಾರೆ. ನಾಯಕನಾಗಿ ಶ್ರೇಯಸ್ ಫುಲ್ ಮಾರ್ಕ್ಸ್​ ಪಡೆದು, ಸೂಪರ್​ಹಿಟ್ ದಾಖಲೆ ಹೊಂದಿದ್ದಾರೆ.

3 ತಂಡಗಳು, 3 ಬಾರಿ ಟಾಪ್ 2, ಕ್ಯಾಪ್ಟನ್ ಫೆಂಟಾಸ್ಟಿಕ್..!

ಡೆಲ್ಲಿ, ಕೆಕೆಆರ್ ಮತ್ತು ಪಂಜಾಬ್ ಕಿಂಗ್ಸ್​ ಈ ಮೂರೂ ತಂಡಗಳ ಸಾರಥಿಯಾಗಿ ಶ್ರೇಯಸ್ ಸೇವೆ ಸಲ್ಲಿಸಿದ್ದಾರೆ. ಶ್ರೇಯಸ್​ ನಾಯಕತ್ವದಲ್ಲಿ 2019ರಲ್ಲಿ ಕ್ವಾಲಿಫೈಯರ್-2, 2020ರಲ್ಲಿ ಫೈನಲ್ ಮತ್ತು 2021ರಲ್ಲಿ ಕ್ವಾಲಿಫೈಯರ್-2ಗೆ ಡೆಲ್ಲಿ ಕ್ಯಾಪಿಟಲ್ಸ್ ಎಂಟ್ರಿ ಕೊಟ್ಟಿತ್ತು. 2024ರಲ್ಲಿ ಕೊಲ್ಕತ್ತಾ ನೈಟ್​ರೈಡರ್ಸ್ ತಂಡವನ್ನ ಚಾಂಪಿಯನ್ ಮಾಡಿದ್ದ ಶ್ರೇಯಸ್, ಈ ಸೀಸನ್​ನಲ್ಲಿ ಪಂಜಾಬ್ ಕಿಂಗ್ಸ್ ತಂಡವನ್ನ ಟಾಪ್​-1 ಸ್ಥಾನಕ್ಕೇರಿಸಿದ್ದಾರೆ.

ಇದನ್ನೂ ಓದಿ: RCB ಗೆಲುವಿಗೆ ಇವರನ್ನು ಮರೆಯುವಂತಿಲ್ಲ.. ಪಂದ್ಯ ಮುಗಿದ ಬಳಿಕ ಕನ್ನಡಿಗ ಮಯಾಂಕ್ ಏನಂದ್ರು..?

ಐಪಿಎಲ್ ಕಪ್ ಗೆದ್ದು ದಾಖಲೆ ಬರೆಯುತ್ತಾರಾ ಶ್ರೇಯಸ್..?

ಕಳೆದ ಬಾರಿ ಕೊಲ್ಕತ್ತಾ ನೈಟ್​ರೈಡರ್ಸ್​ ತಂಡದ ಸಾರಥಿಯಾಗಿ ಶ್ರೇಯಸ್, ತಂಡಕ್ಕೆ ಕಪ್ ಗೆಲ್ಲಿಸಿಕೊಟ್ಟಿದ್ದಾರೆ. ಈ ಬಾರಿ ಕೂಡ ಶ್ರೇಯಸ್ ನಾಯಕತ್ವದ ಪಂಜಾಬ್ ಕಿಂಗ್ಸ್, ಕಪ್ ಗೆಲ್ಲೋ ಫೇವರಿಟ್ ತಂಡಗಳಲ್ಲಿ ಒಂದು ಎನಿಸಿಕೊಂಡಿದೆ. ಒಂದು ವೇಳೆ ಪಂಜಾಬ್, ಐಪಿಎಲ್​ ಟ್ರೋಫಿ ಗೆದ್ರೆ ಶ್ರೇಯಸ್ ಪಕ್ಕಾ ದಾಖಲೆ ಬರೆಯುತ್ತಾರೆ. ಬ್ಯಾಕ್ ಟು ಬ್ಯಾಕ್ ಐಪಿಎಲ್ ಕಪ್ ಗೆದ್ದ ನಾಯಕ ಎಂಬ ಹೆಗ್ಗಳಿಕೆಗೆ ಪಾತ್ರರಾಗುತ್ತಾರೆ. ಆದ್ರೆ ಇದು ಶ್ರೇಯಸ್​​​ಗೆ ಸಾಧ್ಯಾನಾ?.

ಶ್ರೇಯಸ್​​​​​​​​​​​​​, ಬಾರ್ನ್​​​​ ಲೀಡರ್ ಅನ್ನೋದ್ರಲ್ಲಿ ಯಾವುದೇ ಅನುಮಾನವಿಲ್ಲ. ಒಬ್ಬ ನಾಯಕನಿಗೆ ಇರೋ ಎಲ್ಲಾ ಕ್ವಾಲಿಟಿಗಳು, ಶ್ರೇಯಸ್​ ಅಯ್ಯರ್​ರಲ್ಲಿ ಇದೆ. ಹಾಗಾಗೇ ಶ್ರೇಯಸ್​​​ಗೆ, ನಾಯಕನಾಗಿ ಶ್ರೇಯಸ್ಸು ಸಲ್ಲುತ್ತಿದೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.30ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ