ಕೊಹ್ಲಿ ಸ್ಲಾಟ್​​ಗೆ ನ್ಯಾಯ ಸಿಕ್ಕಾಗಿದೆ.. ಆಂಗ್ಲರ ಲೆಕ್ಕಾಚಾರ ಉಲ್ಟಾ-ಪಲ್ಟಾ ಆಗಿದೆ..!

ಎದುರಾಳಿ ತಂಡದಲ್ಲಿ ಸ್ಟಾರ್​​ಗಳ್ಯಾರು ಇಲ್ಲ.. ಹೋಮ್​ ಕಂಡಿಷನ್ಸ್ ಅಡ್ವಾಂಟೇಜ್​ ಇದೆ.. ಯಂಗ್​ ಇಂಡಿಯಾವನ್ನ ಸುಲಭಕ್ಕೆ ಮಣಿಸಬಹುದು ಅನ್ನೋ ಲೆಕ್ಕಾಚಾರದಲ್ಲಿದ್ದ ಇಂಗ್ಲೆಂಡ್​​ ತಂಡ ಮೊದಲ ಟೆಸ್ಟ್​ನ ಮೊದಲ ದಿನವೇ ಬೆಚ್ಚಿ ಬಿತ್ತು. ಟೀಮ್​ ಇಂಡಿಯಾದ ಯಂಗ್​​​ ಟೈಗರ್​​​ಗಳ ಘರ್ಜನೆಗೆ ಇಂಗ್ಲೆಂಡ್ ತಂಡ ಸೈಲೆಂಟಾಗಿ ಬಿಡ್ತು. ಲೀಡ್ಸ್​ ಮೈದಾನದಲ್ಲಿ ಯಶಸ್ವಿ ಜೈಸ್ವಾಲ್​, ಶುಭ್​​ಮನ್​ ಗಿಲ್​ ಆಂಗ್ಲರನ್ನ ಅಟ್ಟಾಡಿಸಿಬಿಟ್ರು.

ಆಂಗ್ಲರ ನಾಡಲ್ಲಿ ಇಂಡಿಯನ್​ ಯಂಗ್​ ಟೈಗರ್​​ ಘರ್ಜನೆ

ಲೀಡ್ಸ್​​​ ಮೈದಾನದಲ್ಲಿ ಟೀಮ್​ ಇಂಡಿಯಾ ಓಪನರ್​ ಯಶಸ್ವಿ ಜೈಸ್ವಾಲ್​ ಆಂಗ್ಲರಿಗೆ ಸಖತ್​ ಕಾಟ ಕೊಟ್ರು. ಬ್ಯಾಟಿಂಗ್​ಗೆ ಬಂದ ಆರಂಭದಲ್ಲಿ ತಾಳ್ಮೆಯ ಮಂತ್ರ ಪಠಿಸಿದ ಜೈಸ್ವಾಲ್​, ಬಳಿಕ ಉಗ್ರಾವತಾರ ತಾಳಿದ್ರು. ಜೈಸ್ವಾಲ್​ ಆಟದ ಮರ್ಮವನ್ನ ಅರ್ಥಮಾಡಿಕೊಳ್ಳಲಾಗದೇ ಇಂಗ್ಲೆಂಡ್​ ಬೌಲರ್​ಗಳು ಬಳಲಿ ಬೆಂಡಾಗಿ ಬಿಟ್ರು. ಆಂಗ್ಲರ ನಾಡಲ್ಲಿ ಇಂಡಿಯನ್​ ಯಂಗ್​​ ಟೈಗರ್ ಘರ್ಜನೆ ಹಂಗಿತ್ತು.

96 ಎಸೆತಕ್ಕೆ ಅರ್ಧಶತಕ, 126 ಎಸೆತಕ್ಕೆ ಶತಕ..

ಜೈಸ್ವಾಲ್ ಆಟ ಹೇಗಿತ್ತು ಅನ್ನೋದಕ್ಕೆ ಇದು ಬೆಸ್ಟ್​ ಎಕ್ಸಾಂಪಲ್​. ಕ್ರಿಸ್​​ನಲ್ಲಿ ಸೆಟಲ್​ ಆಗೋವರೆಗೆ ಜೈಸ್ವಾಲ್​ ರಿಸ್ಕ್​ ತೆಗೆದುಕೊಳ್ಳೋಕೆ ಹೋಗಲಿಲ್ಲ. ತಾಳ್ಮೆಯಿಂದ ಎಚ್ಚರಿಕೆಯ ಆಟವನ್ನ ಆಡಿದ್ರು. ಅರ್ಧಶತಕದ ಗಡಿ ದಾಟೋಕೆ ಬರೋಬ್ಬರಿ 96 ಎಸೆತಗಳನ್ನ ತೆಗೆದುಕೊಂಡ್ರು. ಅರ್ಧಶತಕದ ಬಳಿಕ ಜೈಸ್ವಾಲ್​ ಆಟವೇ ಬದಲಾಯ್ತು. ಜಸ್ಟ್​ 27 ಎಸೆತದಲ್ಲಿ ಶತಕ ಸಿಡಿಸಿ ಸಂಭ್ರಮಿಸಿದ್ರು.

ಇದನ್ನೂ ಓದಿ: ಸ್ಟಾರ್​ ಆಲ್​ರೌಂಡರ್ ಗಿಲ್​ ಪಡೆಯ​ ಟ್ರಂಪ್ ಕಾರ್ಡ್​ ಆಗ್ತಾರಾ.. 1 ಶತಕ, 3 ಅರ್ಧಶತಕ ಸಿಡಿಸಿರುವ ಪ್ಲೇಯರ್!

ಶತಕ ಸಿಡಿಸಿ ದಾಖಲೆ ಬರೆದ ಯಶಸ್ವಿ ಜೈಸ್ವಾಲ್​​

ಆಂಗ್ಲರ ನಾಡು ಬ್ಯಾಟರ್ಸ್​ ಪಾಲಿಗೆ ಅಗ್ನಿಪರೀಕ್ಷೆಯ ಕಣ. ಇಲ್ಲಿ ಬ್ಯಾಟಿಂಗ್​ ನಡೆಸೋದು ಸುಲಭದ ಮಾತಲ್ಲ. ಇಂಗ್ಲೆಂಡ್​ನಲ್ಲಿ ಇದೇ ಮೊದಲ ಬಾರಿಗೆ ಟೆಸ್ಟ್​ ಆಡಿದ ಜೈಸ್ವಾಲ್, ಲೀಲಾಜಾಲವಾಗಿ ಬ್ಯಾಟ್​ ಬೀಸಿದ್ರು. 159 ಎಸೆತ ಎದುರಿಸಿದ ಮುಂಬೈಕರ್​ 16 ಬೌಂಡರಿ, 1 ಸಿಕ್ಸರ್​ ಸಿಡಿಸಿದ್ರು. ಬೊಂಬಾಟ್​ ಶತಕ ಸಿಡಿಸಿದ ಜೈಸ್ವಾಲ್​ ಹೊಸ ದಾಖಲೆಯನ್ನೂ ಬರೆದ್ರು. ಇದುವರೆಗೆ ಯಾವೊಬ್ಬ ಇಂಡಿಯನ್​​ ಓಪನರ್​ ಕೂಡ ಇಂಗ್ಲೆಂಡ್​ನಲ್ಲಿ ಶತಕ ಸಿಡಿಸಿರಲಿಲ್ಲ. ಜೈಸ್ವಾಲ್​ ಅಸಾಧ್ಯವಾದುದನ್ನ ಸಾಧಿಸಿದ್ರು.

ಮೊದಲ ಟೆಸ್ಟ್​​ನಲ್ಲೇ ಕ್ಯಾಪ್ಟನ್​ ಫೆಂಟಾಸ್ಟಿಕ್ ಆಟ

ಜೈಸ್ವಾಲ್​ ಮಾತ್ರವಲ್ಲ.. ಕ್ಯಾಪ್ಟನ್​ ಶುಭ್​ಮನ್​ ಗಿಲ್​ ಕೂಡ ಫೆಂಟಾಸ್ಟಿಕ್​ ಆಟವಾಡಿದ್ರು. ಕಿಂಗ್​ಕೊಹ್ಲಿಯ ಸ್ಲಾಟ್​​ಗೆ ನಾನು ನ್ಯಾಯ ಒದಗಿಸಬಲ್ಲೇ ಅನ್ನೋದನ್ನ ಮೊದಲ ಇನ್ನಿಂಗ್ಸ್​​ನಲ್ಲೇ ನಿರೂಪಿಸಿದ್ರು. ಗಿಲ್​ ನಾಯಕತ್ವದ ಜವಾಬ್ದಾರಿಯಿಂದ ಪ್ರೆಶರ್​​ಗೊಳಗಾಗ್ತಾರೆ ಅನ್ನೋ ಬಹುತೇಕರ ಅಭಿಪ್ರಾಯವನ್ನ ಮೊದಲ ಟೆಸ್ಟ್​ನಲ್ಲೇ ಸುಳ್ಳಾಗಿಸಿದ್ರು. ಲೀಡ್ಸ್​​ ಅಂಗಳದಲ್ಲಿ ಲೀಡರ್​ ಶುಭ್​​ಮನ್​ ಬೊಂಬಾಟ್​ ಬ್ಯಾಟಿಂಗ್​ ನಡೆಸಿದ್ರು.

ಲೀಡ್ಸ್​ನಲ್ಲಿ ಲೀಡರ್​ ಶುಭ್​ಮನ್​ ಶತಕ ವೈಭವ

4ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್​ಗೆ ಬಂದ ಶುಭ್​ಮನ್​ ಗಿಲ್​ ಸಖತ್​ ಕಾನ್ಫಿಡೆಂಟ್​​ ಇನ್ನಿಂಗ್ಸ್​ ಕಟ್ಟಿದ್ರು. ಮೊದಲ ಎಸೆತದಿಂದಲೇ ಅಗ್ರೆಸ್ಸಿವ್​ ಆಟವಾಡಿದ ಶುಭ್​ಮನ್​ ಗಿಲ್, ಇಂಗ್ಲೆಂಡ್​ ಬೌಲರ್​​ಗಳನ್ನ ನಿರ್ದಯವಾಗಿ ದಂಡಿಸಿದ್ರು. ಜಸ್ಟ್​ 56 ಎಸೆತಕ್ಕೆ ಹಾಫ್​ ಸೆಂಚುರಿ ಸಿಡಿಸಿದ್ರು.

ಇದನ್ನೂ ಓದಿ: ಓಪನರ್ ಜೈಸ್ವಾಲ್, ಕ್ಯಾಪ್ಟನ್​​ ಗಿಲ್ ಸಿಡಿಲಬ್ಬರದ ಶತಕ..​ ಬೃಹತ್​ ಮೊತ್ತದತ್ತ ಟೀಮ್ ಇಂಡಿಯಾ

​ಹಾಫ್​ ಸೆಂಚುರಿ ಬಳಿಕ ಶುಭ್​​ಮನ್​ ಗಿಲ್​ ಸ್ಲೋ ಅಂಡ್ ಸ್ಟಡಿ ಬ್ಯಾಟಿಂಗ್​ ನಡೆಸಿದ್ರು. ಎಚ್ಚರಿಕೆಯಿಂದ ಬ್ಯಾಟಿಂಗ್​ ನಡೆಸಿದ ಗಿಲ್​ 140 ಎಸೆತಕ್ಕೆ ಶತಕ ಸಿಡಿಸಿ ಸಂಭ್ರಮಿಸಿದ್ರು. ಈ ಆಕರ್ಷಕ ಸೆಂಚುರಿ ಇನ್ನಿಂಗ್ಸ್​ನಲ್ಲಿ 14 ಬೊಂಬಾಟ್​​​ ಬೌಂಡರಿಗಳಿದ್ವು.
ಆಂಗ್ಲರ ನಾಡಲ್ಲಿ ಮೊದಲ ಟೆಸ್ಟ್​ ಶತಕ ಸಿಡಿಸಿದ ಗಿಲ್​​ ಏಷ್ಯಾದ ಹೊರಗಡೆಯಿದ್ದ ಸೆಂಚುರಿ ಬರವನ್ನ ನೀಗಿಸಿಕೊಂಡ್ರು. ಇನ್ನೊಂದೆಡೆ ಯಶಸ್ವಿ ಜೈಸ್ವಾಲ್​ ಇಂಗ್ಲೆಂಡ್​ ನೆಲದಲ್ಲಿ ಮೊದಲ ಟೆಸ್ಟ್​ನ ಫಸ್ಟ್​ ಕ್ಲಾಸ್​ನಲ್ಲಿ ಪಾಸ್​ ಮಾಡಿದ್ರು. ಈ ಮೂಲಕ ಇಂಗ್ಲೆಂಡ್​​ ಪ್ರವಾಸವನ್ನ ಶತಕವೀರರು ಪಾಸಿಟಿವ್​ ಇಂಟೆಂಟ್​ನೊಂದಿಗೆ ಆರಂಭಿಸಿದ್ದು, ಮುಂದಿನ ಪಂದ್ಯಗಳಲ್ಲೂ ಈ ಅಬ್ಬರ ಮುಂದುವರೆಯಲಿ ಫ್ಯಾನ್ಸ್​ ಆಶಯವಾಗಿದೆ.

ಇದನ್ನೂ ಓದಿ: ಗಿಲ್ ‘ಯಶಸ್ವಿ’ ಶತಕ ವೈಭವ, ಪಂತ್​ ಫೆಂಟಾಸ್ಟಿಕ್.. ಆಂಗ್ಲರ ನಾಡಲ್ಲಿ ಹೇಗಿದೆ ತಾಳ್ಮೆಯ ಆಟ..?

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.30ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ