ಒಂದೇ ಇನ್ನಿಂಗ್ಸ್​ನಲ್ಲಿ ಜೈಸ್ವಾಲ್​, ಗಿಲ್, ಪಂತ್ ಶತಕ.. ಬೃಹತ್​ ರನ್​ ಕಲೆ ಹಾಕಿದ ಟೀಮ್ ಇಂಡಿಯಾ, ಆಲೌಟ್!​

ಇಂಗ್ಲೆಂಡ್ ವಿರುದ್ಧ ನಡೆಯುತ್ತಿರುವ ಮೊದಲ ಟೆಸ್ಟ್​ ಪಂದ್ಯದ ಮೊದಲ ಇನ್ನಿಂಗ್ಸ್​ನಲ್ಲಿ ಯಶಸ್ವಿ ಜೈಸ್ವಾಲ್, ನಾಯಕ ಗಿಲ್ ಹಾಗೂ ರಿಷಭ್ ಪಂತ್ ಅವರ ಭರ್ಜರಿ ಶತಕಗಳಿಂದ ಟೀಮ್ ಇಂಡಿಯಾ 471 ರನ್​ಗಳಿಗೆ ಆಲೌಟ್ ಆಗಿದೆ.

ಲೀಡ್ಸ್​​​ನ ಹೆಡಿಂಗ್ಲೆ ಕ್ರಿಕೆಟ್​ ಮೈದಾನದಲ್ಲಿ ನಡೆಯುತ್ತಿರುವ ಮೊದಲ ಟೆಸ್ಟ್​ ಪಂದ್ಯದಲ್ಲಿ ಇಂಗ್ಲೆಂಡ್​ ನಾಯಕ ಬೆನ್​​ ಸ್ಟೋಕ್ಸ್​ ಟಾಸ್​ ಗೆದ್ದು ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡರು. ಟೀಮ್ ಇಂಡಿಯಾ ಮೊದಲ ಬ್ಯಾಟಿಂಗ್ ಮಾಡುವ ಅವಕಾಶ ಪಡೆದುಕೊಂಡಿತು. ಅದರಂತೆ ಭಾರತದ ಪರ ಓಪನರ್​ ಆಗಿ ಕ್ರೀಸ್​ಗೆ ಬಂದ ಯಶಸ್ವಿ ಜೈಸ್ವಾಲ್ ಹಾಗೂ ಕೆ.ಎಲ್ ರಾಹುಲ್ ಅವರು ಉತ್ತಮ ಆರಂಭ ಪಡೆದರು. 42 ರನ್​ ಗಳಿಸಿ ಆಡುವಾಗ ಕೆ.ಎಲ್ ರಾಹುಲ್ ಅವರು, ರೂಟ್​ಗೆ ಕ್ಯಾಚ್ ಕೊಟ್ಟು ಹಾಫ್​ ಸೆಂಚುರಿ ಮಿಸ್ ಮಾಡಿಕೊಂಡರು.

ಇನ್ನೊಂದೆಡೆ ಬ್ಯಾಟಿಂಗ್ ಮಾಡುತ್ತಿದ್ದ ಜೈಸ್ವಾಲ್, ಭರ್ಜರಿ ಶತಕ ಸಿಡಿಸಿದರು. ಪಂದ್ಯದ ಮೊದಲ ಇನ್ನಿಂಗ್ಸ್​ನಲ್ಲಿ 150 ಎಸೆತಗಳನ್ನು ಎದುರಿಸಿದ ಯಶಸ್ವಿ ಜೈಸ್ವಾಲ್ 1 ಸಿಕ್ಸರ್​, 16 ಬೌಂಡರಿಗಳಿಂದ ಅಮೋಘವಾದ ಶತಕ ಬಾರಿಸಿ ಸಂಭ್ರಮಿಸಿದರು. ಬೆನ್​ ಸ್ಟೋಕ್ಸ್ ಬೌಲಿಂಗ್​ನಲ್ಲಿ ಜೈಸ್ವಾಲ್ ಔಟ್ ಆಗಿ ಹೊರ ನಡೆದರು. ಯಂಗ್ ಬ್ಯಾಟರ್​ ಸಾಯಿ ಸುದರ್ಶನ್ 4 ಬಾಲ್​ ಆಡಿ ಡಕೌಟ್ ಆದರು.

4ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್​ಗೆ ಬಂದ ನಾಯಕ ಶುಭ್​ಮನ್ ಗಿಲ್ ಜವಾಬ್ದಾರಿಯುತ ಆಡ ಆಡಿದರು. ಈ ಟೆಸ್ಟ್​ ಪಂದ್ಯದಲ್ಲಿ ಶತಕ ಬಾರಿಸಿ ತಮ್ಮ ಸಾಮರ್ಥ್ಯವನ್ನು ತೋರಿಸಿದರು. 140 ಎಸೆತ ಆಡಿದ ಗಿಲ್ ಅವರು 14 ಬೌಂಡರಿಗಳಿಂದ 102 ರನ್​ ಗಳಿಸಿದ್ದರು. ಇಂದು ಕೂಡ ಬ್ಯಾಟಿಂಗ್ ಮುಂದುವರೆಸಿದ್ದ ಗಿಲ್, ಒಟ್ಟು 227 ಎಸೆತಗಳಲ್ಲಿ 19 ಬೌಂಡರಿ ಒಂದು ಸಿಕ್ಸರ್​ನಿಂದ 147 ರನ್​ ಗಳಿಸಿ ಆಡುವಾಗ ಕ್ಯಾಚ್​ ಔಟ್ ಆದರು. ಕೇವಲ 3 ರನ್​ಗಳಿಂದ 150 ರನ್​​ ಮಿಸ್​ ಮಾಡಿಕೊಂಡರು.

ಇದನ್ನೂ ಓದಿ:Video; ಸಿಕ್ಸರ್​ ಸಿಡಿಸಿ ಸೆಂಚುರಿ ಬಾರಿಸಿದ ರಿಷಭ್ ಪಂತ್, ಫ್ರಂಟ್​ಫ್ಲಿಪ್​ ಮಾಡಿ ಸೆಲೆಬ್ರೆಷನ್.. ಕನ್ನಡಿಗ ಡಕೌಟ್​!

ರಿಷಭ್ ಪಂತ್​ ಬ್ಯಾಟಿಂಗ್ ವೇಳೆ ಟೆಸ್ಟ್ ಮ್ಯಾಚ್ ಆದರೂ ಏಕದಿನ ಪಂದ್ಯದಂತೆ ರನ್​ಗಳು ಹರಿದು ಬಂದವು. ಮೊದಲ ಇನ್ನಿಂಗ್ಸ್​ನಲ್ಲಿ 146 ಬಾಲ್​ ಎದುರಿಸಿದ ಪಂತ್ 10 ಬೌಂಡರಿ ಹಾಗೂ 3 ಸಿಕ್ಸರ್​ಗಳಿಂದ ಹಂಡ್ರೆಡ್​ ಬಾರಿಸಿದರು. ಪಂತ್ ಅವರ ಇನ್ನೊಂದು ವಿಶೇಷತೆ ಎಂದರೆ 99 ರನ್​ ಆಗಿದ್ದಾಗ ಸಿಕ್ಸರ್​ ಬಾರಿಸಿ 100 ರನ್​ಗಳ ಗಡಿ ದಾಟಿದರು. ಒಟ್ಟು 178 ಬಾಲ್​ಗಳನ್ನು ಆಡಿದ ಪಂತ್ 12 ಬೌಂಡರಿ, 6 ಸಿಕ್ಸರ್​ ಸಮೇತ 134 ರನ್​ಗಳಿಸಿ, ಎಲ್​ಬಿಗೆ ಬಲಿಯಾದರು.

ರಿಷಭ್ ಪಂತ್ ಬಳಿಕ ಬ್ಯಾಟಿಂಗ್​ಗೆ ಬಂದ ಯಾವ ಆಟಗಾರನೂ ಸರಿಯಾದ ಪ್ರದರ್ಶನ ತೋರಲಿಲ್ಲ. ಹೀಗಾಗಿ ಟೀಮ್ ಇಂಡಿಯಾ ಮೊದಲ ಟೆಸ್ಟ್​ ಪಂದ್ಯದ ಮೊದಲ ಇನ್ನಿಂಗ್ಸ್​ನಲ್ಲಿ ಒಟ್ಟು 113 ಓವರ್​ ಬ್ಯಾಟಿಂಗ್ ಮಾಡಿ ಎಲ್ಲ ವಿಕೆಟ್​ ಕಳೆದುಕೊಂಡು 471 ರನ್​ಗಳನ್ನು ಗಳಿಸಿದೆ. ಇನ್ನು ಇಂಗ್ಲೆಂಡ್ ಪರ ನಾಯಕ ಬೆನ್​​ಸ್ಟೋಕ್ಸ್​ ಹಾಗೂ ಜೋಶ್ ಟಂಗ್ ತಲಾ 4 ವಿಕೆಟ್​ ಪಡೆದಿದ್ದಾರೆ. 2ನೇ ದಿನದಾಟದಲ್ಲಿ ಭಾರತ ಆಲೌಟ್ ಆಗ್ತಿದ್ದಂತೆ ಮೈದಾನದಲ್ಲಿ ಮಳೆ ಬರುತ್ತಿದ್ದರಿಂದ ಸದ್ಯ ಪಂದ್ಯವನ್ನು ನಿಲ್ಲಿಸಲಾಗಿದೆ. ಮಳೆ ನಿಂತರೆ ಇಂಗ್ಲೆಂಡ್​ ಬ್ಯಾಟಿಂಗ್ ಮಾಡಲಿದೆ.

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.30ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ