ನಾಯಕಿ ಸ್ಮೃತಿ ಮಂದಾನ, ಪ್ರತೀಕಾ ಅದ್ಭುತ ಸೆಂಚುರಿ.. ಎದುರಾಳಿಗೆ ಬೃಹತ್ ಟಾರ್ಗೆಟ್

ಮಹಿಳೆಯರ ಐಸಿಸಿ ಚಾಂಪಿಯನ್​ಶಿಪ್ ಟೂರ್ನಿಯ 3ನೇ ಪಂದ್ಯದಲ್ಲಿ ಐರ್ಲೆಂಡ್ ವಿರುದ್ಧ ಭಾರತದ ಮಹಿಳಾ ತಂಡ ಬೃಹತ್​ ಮೊತ್ತದ ರನ್​ಗಳನ್ನ ಕಲೆ ಹಾಕಿ ಐತಿಹಾಸಿಕ ದಾಖಲೆ ಬರೆದಿದೆ. ಟೀಮ್ ಇಂಡಿಯಾದ ಸ್ಟಾರ್ ಆಟಗಾರ್ತಿ ಸ್ಮೃತಿ ಮಂದಾನ ಹಾಗೂ ಪ್ರತೀಕಾ ರಾವಲ್ ಅವರ ಅತ್ಯದ್ಭುತವಾದ ಶತಕದ ನೆರವಿನಿಂದ 50 ಓವರ್​ಗಳಲ್ಲಿ 5 ವಿಕೆಟ್​ಗೆ 435 ರನ್​ಗಳನ್ನ ಸಂಗ್ರಹಿಸಿದೆ.

ಗುಜರಾತ್​ನಲ್ಲಿನ ರಾಜ್​ಕೋಟ್​ನ ನಿರಂಜನ್ ಶಾ ಸ್ಟೇಡಿಯಂನಲ್ಲಿ ನಡೆದ ಮಹಿಳಾ ಏಕದಿನ ಪಂದ್ಯದಲ್ಲಿ ಟೀಮ್ ಇಂಡಿಯಾದ ಕ್ಯಾಪ್ಟನ್ ಸ್ಮೃತಿ ಮಂದಾನ ಅವರು ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡರು. ಓಪನರ್ ಆಗಿ ಕ್ರೀಸ್​ಗೆ ಆಗಮಿಸಿದ ನಾಯಕಿ ಸ್ಮೃತಿ ಮಂದಾನ ಹಾಗೂ ಪ್ರತೀಕಾ ರಾವಲ್, ಐರ್ಲೆಂಡ್​ನ ಮಹಿಳಾ ಮಣಿಗಳನ್ನ ಎಡಬಿಡದೇ ಕಾಡಿದರು. ಓಪನಿಂಗ್ ಬ್ಯಾಟಿಂಗ್ ಪಾರ್ಟನರ್​ಶಿಪ್ ಬ್ರೇಕ್ ಮಾಡೋದು ಹೇಗೆ ಎಂದು ಐರ್ಲೆಂಡ್​ ಆಟಗಾರರ್ತಿಯರು ತಲೆ ಕೆಡಿಸಿಕೊಂಡಿದ್ದರು.

ಏಕೆಂದರೆ ಅತಿ ವೇಗದ ಶತಕ ಸಿಡಿಸಿದ ಸ್ಮೃತಿ ಮಂದಾನ ಕೇವಲ 70 ಎಸೆತಗಳಲ್ಲಿ ಶತಕ ಪೂರೈಸಿ ದಾಖಲೆ ಬರೆದರು. ಈ ಹಿಂದೆ ಈ ದಾಖಲೆ ನಾಯಕಿ ಹರ್ಮನ್​ಪ್ರೀತ್ ಕೌರ್ ಹೆಸರಲ್ಲಿತ್ತು. ಅವರು 87 ಎಸೆತಗಳಲ್ಲಿ ಶತಕ ಸಿಡಿಸಿದ್ದರು. ಆದರೆ ಈಗ ಈ ದಾಖಲೆ ಸ್ಮೃತಿ ಮಂದಾನ ಹೆಸರಿಗೆ ವರ್ಗವಾಗಿದೆ. ಈ ಪಂದ್ಯದಲ್ಲಿ ಅದ್ಭುತ ಬ್ಯಾಟಿಂಗ್ ಮಾಡಿದ ಸ್ಮೃತಿ ಮಂದಾನ ಕೇವಲ 80 ಎಸೆತಗಳಲ್ಲಿ 12 ಬೌಂಡರಿ, 7 ಸಿಕ್ಸರ್ ಸಮೇತ 135 ರನ್​ಗಳನ್ನು ಬಾರಿಸಿದರು.

ಸ್ಮೃತಿ ಮಂದಾನ ಜೊತೆ ತಾಳ್ಮೆಯ ಬ್ಯಾಟಿಂಗ್ ಮಾಡಿದ ಯುವ ಆಟಗಾರ್ತಿ ಪ್ರತೀಕಾ ರಾವಲ್ ತಮ್ಮ ಚೊಚ್ಚಲ ಶತಕ ಸಿಡಿಸಿದರು. 100 ಎಸೆತಗಳಲ್ಲಿ 100 ರನ್​ ಬಾರಿಸಿ ಐರ್ಲೆಂಡ್ ಬೌಲರ್​ಗಳನ್ನು ಬೆವರಿಳಿಸಿದರು. ಟೂರ್ನಿಯಲ್ಲಿ ತಮ್ಮ ಸಮೃದ್ಧ ಫಾರ್ಮ್ ಅನ್ನು ಮುಂದುವರೆಸಿದ ಅವರು ಈ ಪಂದ್ಯದಲ್ಲಿ ಒಟ್ಟು 129 ಎಸೆತಗಳನ್ನು ಎದುರಿಸಿದ ಪ್ರತೀಕಾ ರಾವಲ್ 1 ಸಿಕ್ಸರ್, 20 ಬೌಂಡರಿಗಳಿಂದ 154 ರನ್ ಗಳಿಸಿ ಸಂಭ್ರಮಿಸಿದರು. ರಿಚಾ ಘೋಷ್ ಕೂಡ ಅರ್ಧ ಶತಕ ಸಿಡಿಸಿ ತಂಡಕ್ಕೆ ನೆರವಾದರು.

ಇದನ್ನೂ ಓದಿ: ಟೀಮ್​ ಇಂಡಿಯಾ ಮುಖ್ಯ ಕೋಚ್​ಗೆ ಬಿಗ್​ ಶಾಕ್​​; ಗಂಭೀರ್​ ಪವರ್​ ಕಟ್​​ ಮಾಡಿದ ಬಿಸಿಸಿಐ ಬಾಸ್​ಗಳು

ಬೌಂಡರಿಗಳನ್ನು ಬಾರಿಸಿದ ತಂಡದ ಪೈಕಿ ಟೀಮ್ ಇಂಡಿಯಾ 3ನೇ ಸ್ಥಾನ ಪಡೆದುಕೊಂಡಿದೆ. ನ್ಯೂಜಿಲೆಂಡ್ 71 ಹಾಗೂ 59 ರನ್​ಗಳಿಂದ ಮೊದಲ ಸ್ಥಾನದಲ್ಲಿದೆ. ಈ ಪಂದ್ಯದಲ್ಲಿ ಟೀಮ್ ಇಂಡಿಯಾ ಕೇವಲ 5 ವಿಕೆಟ್​ಗೆ 435 ರನ್​ಗಳ ಬೃಹತ್​ ಮೊತ್ತವನ್ನು ಪೇರಿಸಿತು. ಮಹಿಳಾ ಟೂರ್ನಿಯಲ್ಲೇ 4ನೇ ಅತ್ಯಧಿಕ ರನ್​ ಗಳಿಸಿದ ಕೀರ್ತಿಗೆ ಭಾರತ ಪಾತ್ರವಾಯಿತು.

ಅತ್ಯಧಿಕ ರನ್ ಗಳಿಸಿದ ವಿಶ್ವದ ಮಹಿಳಾ ತಂಡಗಳು

• 2018ರಲ್ಲಿ ಐರ್ಲೆಂಡ್ ವಿರುದ್ಧ ನ್ಯೂಜಿಲೆಂಡ್ ತಂಡ- 491/4
• 1997 ಪಾಕಿಸ್ತಾನದ ವಿರುದ್ಧ ನ್ಯೂಜಿಲೆಂಡ್ ತಂಡ- 455/5
• 2018ರಲ್ಲಿ ಐರ್ಲೆಂಡ್ ವಿರುದ್ಧ ನ್ಯೂಜಿಲೆಂಡ್ ತಂಡ- 440/3
• 2025 ಐರ್ಲೆಂಡ್ ವಿರುದ್ಧ ಭಾರತ ತಂಡ- 435/5

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ