2025ರಲ್ಲಿ ಬದಲಾಯ್ತು ಕ್ರಿಕೆಟ್ ತಂಡಗಳ ಹಣೆಬರಹ.. 47 ವರ್ಷಗಳ ಆ ಕೊರಗು ಅಂತ್ಯವಾಗಿದ್ದು ಹೇಗೆ?

ಕ್ರಿಕೆಟ್​​ ಲೋಕದಲ್ಲಿ ಹೊಸ ಮನ್ವಂತರ

2025.. ಕ್ರಿಕೆಟ್​​ ಲೋಕದಲ್ಲಿ ಈ ವರ್ಷ ಹೊಸ ಮನ್ವಂತರವೇ ಸೃಷ್ಟಿಯಾಗಿದೆ. ಪ್ರತಿ ಟೂರ್ನಿಗಳಲ್ಲಿ ಸೋಲು, ಹತಾಶೆ, ನಿರಾಸೆ, ನೋವನ್ನೇ ಕಂಡಿದ್ದ ಹಲವು ತಂಡಗಳು ಗೆಲುವಿನ ರುಚಿಯನ್ನ ನೋಡಿದ ವರ್ಷವಿದು. 18 ವರ್ಷಗಳ ಸತತ ಸೋಲು ಮೆಟ್ಟಿನಿಂತು ಚೊಚ್ಚಲ ಐಪಿಎಲ್​ ಗೆದ್ದ ಆರ್​​ಸಿಬಿಯಿಂದ ಹಿಡಿದು ವಿಶ್ವಕಪ್​ ಗೆದ್ದು ಇತಿಹಾಸ ರಚಿಸಿದ ಮಹಿಳಾ ಏಕದಿನ ತಂಡದವರೆಗೆ.

ಕಪ್​ ಗೆದ್ದ RCB

ಈ ವರ್ಷವನ್ನ ಯಾರು ಮರೆತ್ರೂ ಆರ್​​ಸಿಬಿ ಅಭಿಮಾನಿಗಳು ಮರೆಯೋಕೆ ಸಾಧ್ಯಾನೆ ಇಲ್ಲ. ಮರೆಯೋದು ಇಲ್ಲ ಬಿಡಿ.. ಒಂದಲ.. ಎರಡಲ್ಲ.. 18 ವರ್ಷಗಳ ಕೊರಗು ನೀಗಿದ ವರ್ಷವಿದು. ಪ್ರತಿ ಬಾರಿ ಈ ಸಲ ಕಪ್​ ನಮ್ದು ಎಂದು ನಿರಾಸೆ ಅನುಭವಿಸಿದ್ದ ಫ್ಯಾನ್ಸ್​, ಈ ಸಲ ಕಪ್​ ನಮ್ದೇ ಎಂದು ಗರ್ವದಿಂದ ಬೀಗಿದ ವರ್ಷವಿದು. 2008ರಿಂದ ಐಪಿಎಲ್​ ಟ್ರೋಫಿಗಾಗಿ ಪರಿತಪಿಸಿದ್ದ ರೆಡ್​ ಆರ್ಮಿ ಕೊನೆಗೂ ಈ ವರ್ಷ ಟ್ರೋಫಿಗೆ ಮುತ್ತಿಕ್ಕಿತು. ಗುಜರಾತ್​ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ಪಂಜಾಬ್​ ಪಡೆಯನ್ನ ಮಣಿಸಿದ ಆರ್​​ಸಿಬಿ, ಕೋಟ್ಯಂತರ ಅಭಿಮಾನಿಗಳ ಕನಸನ್ನ ನನಸಾಗಿಸಿತು.

ಚೊಚ್ಚಲ ಏಕದಿನ ವಿಶ್ವಕಪ್​ ಗೆದ್ದ ವೀರ ವನಿತೆಯರು

ಮಹಿಳಾ ಏಕದಿನ ವಿಶ್ವಕಪ್​ ಟೂರ್ನಿ 1973ರಲ್ಲಿ ಆರಂಭವಾದಾಗಿನಿಂದಲೂ ಟೀಮ್​ ಇಂಡಿಯಾ ಟೂರ್ನಿಯ ಭಾಗವಾಗಿದೆ. ಒಂದು ಬಾರಿ ಕೂಡ ಚಾಂಪಿಯನ್​ ಪಟ್ಟವೇರಿರಲಿಲ್ಲ. 2005, 2017ರಲ್ಲಿ ಫೈನಲ್​ಗೆ ಹೋದ್ರೂ ಹಾರ್ಟ್​ಬ್ರೇಕ್​ನೊಂದಿಗೆ ಎಲ್ಲಾ ಅಂತ್ಯವಾಗಿತ್ತು. ಈ ಬಾರಿ ತವರಿನಲ್ಲೇ ನಡೆದ ಟೂರ್ನಿಯಲ್ಲಿ ಅದ್ಬುತ ಪ್ರದರ್ಶನ ನೀಡಿ ವೀರ ವನಿತೆಯರು ಚಾಂಪಿಯನ್​ ಪಟ್ಟವೇರಿದ್ರು. ಚೊಚ್ಚಲ ಟ್ರೋಫಿ ಗೆದ್ದು 47 ವರ್ಷಗಳ ಕೊರಗಿಗೆ ಅಂತ್ಯ ಹಾಡಿದ್ರು.

ಚೋಕರ್ಸ್​ ಪಟ್ಟ ಕಿತ್ತು ಬಿಸಾಕಿದ ದಕ್ಷಿಣ ಆಫ್ರಿಕಾ

ಈ ವರ್ಷ ಸೌತ್​ ಆಫ್ರಿಕಾ ಕೂಡ ತಂಡಕ್ಕಂಟಿದ್ದ ಚೋಕರ್ಸ್​ ಪಟ್ಟವನ್ನ ಕಿತ್ತು ಬಿಸಾಕಿದೆ. ಐಸಿಸಿ ಟೂರ್ನಿಗಳಲ್ಲಿ ಸತತ ಸೋಲುಂಡಿದ್ದ ಸೌತ್​ ಆಫ್ರಿಕಾ ಕೊನೆಗೂ ಟ್ರೋಫಿ ಗೆದ್ದು ಬೀಗಿತು. ಕ್ರಿಕೆಟ್​ ಕಾಶಿ ಲಾರ್ಡ್ಸ್​ನಲ್ಲಿ ಬಲಿಷ್ಠ ಆಸ್ಟ್ರೇಲಿಯಾ ತಂಡವನ್ನ ಭೇಟೆಯಾಡಿದ ಹರಿಣಗಳ ಪಡೆ ವಿಶ್ವ ಟೆಸ್ಟ್​ ಚಾಂಪಿಯನ್​ಶಿಪ್​ ಗೆದ್ದು ಬೀಗಿತು. 27 ವರ್ಷಗಳ ಬಳಿಕ ಐಸಿಸಿ ಟ್ರೋಫಿ ಗೆದ್ದ ಸಂಭ್ರಮದಲ್ಲಿ ಆಟಗಾರರು ಮಾತ್ರವಲ್ಲ. ಇಡೀ ಸೌತ್​​ ಆಫ್ರಿಕಾನೇ ತೇಲಾಡಿತ್ತು.

ಹೊಬಾರ್ಟ್​ ಹರಿಕೇನ್ಸ್​ ಚಾಂಪಿಯನ್​

ಆಸ್ಟ್ರೇಲಿಯಾದ ಬಿಗ್​ಬ್ಯಾಷ್​ ಲೀಗ್​ನಲ್ಲೂ ಈ ವರ್ಷ ಇತಿಹಾಸ ನಿರ್ಮಾಣವಾಯ್ತು. 2011ರಿಂದಲೂ ಪ್ರತಿ ಬಾರಿ ಸೋಲುಂಡು ಹತಾಶೆ ಅನುಭವಿಸಿದ್ದ ಹೊಬಾರ್ಟ್​ ಹರಿಕೇನ್ಸ್​ ಈ ಬಾರಿ ಚಾಂಪಿಯನ್​ ಪಟ್ಟವೇರಿತು. ಸಿಡ್ನಿ ಥಂಡರ್​ ತಂಡವನ್ನ 7 ವಿಕೆಟ್​ಗಳಿಂದ ಮಣಿಸಿ ಹೊಬಾರ್ಟ್ ಹರಿಕೇನ್ಸ್​​ ತಂಡ ಚೊಚ್ಚಲ ಟ್ರೋಫಿ ಗೆದ್ದು ಬೀಗಿತು.

12 ವರ್ಷಗಳ ಬಳಿಕ ಐಸಿಸಿ ಚಾಂಪಿಯನ್ಸ್​ ಟ್ರೋಫಿ

2013ರ ಬಳಿಕ ಚಾಂಪಿಯನ್ಸ್​ ಟ್ರೋಫಿಯಲ್ಲಿ ಹಿನ್ನಡೆ ಅನುಭವಿಸಿದ್ದ ಟೀಮ್​ ಇಂಡಿಯಾ ಕೂಡ ಚಾಂಪಿಯನ್​ ಆಗಿ ಹೊರಹೊಮ್ಮಿದ್ದು ಈ ವರ್ಷವೇ. ದುಬೈನಲ್ಲಿ ನ್ಯೂಜಿಲೆಂಡ್​ ತಂಡವನ್ನ ಮಣಿಸಿದ ಟೀಮ್​ ಇಂಡಿಯಾ 12 ವರ್ಷಗಳ ಬಳಿಕ ಐಸಿಸಿ ಚಾಂಪಿಯನ್ಸ್​ ಟ್ರೋಫಿ ಗೆದ್ದು ಬೀಗಿತು.

ಒಟ್ಟಿನಲ್ಲಿ, 2025ರಲ್ಲಿ ಟ್ರೋಫಿ ಗೆಲ್ಲಲಾಗದೇ ಸತತ ಹಿನ್ನಡೆ ಅನುಭವಿಸಿದ್ದ ತಂಡಗಳು ಚಾಂಪಿಯನ್​ಗಳಾಗಿ ಮೆರೆದಾಡಿವೆ. ಹಲವು ತಂಡಗಳ ಹಣೆಬರಹವೇ ಬದಲಾಗಿದೆ. ಹೀಗಾಗಿಯೇ ಹೇಳಿದ್ದು, 2025 ಕ್ರಿಕೆಟ್​ ತಂಡಗಳ ಪಾಲಿನ ಲಕ್ಕಿ ವರ್ಷ ಅಂತಾ.!