ನ್ಯೂಜಿಲೆಂಡ್ ವಿರುದ್ಧ ODI ಸರಣಿ.. ಐದು ಬಿಗ್​​ ಸ್ಟಾರ್​ಗಳಿಗೆ ಅನ್ಯಾಯ ಆಗಿದೆ ಎಂದ ಫ್ಯಾನ್ಸ್..!

ಶಾಕ್ ಕೊಟ್ಟ ಅಗರ್ಕರ್

ನ್ಯೂಜಿಲೆಂಡ್ ವಿರುದ್ಧದ ಏಕದಿನ ಸರಣಿಗೆ ಕೊನೆಗೂ ಟೀಮ್​ ಇಂಡಿಯಾ ಪ್ರಕಟವಾಗಿದೆ. ಕಿವೀಸ್​ ಕಿವಿ ಹಿಂಡಲು 15 ಆಟಗಾರರ ಬಲಿಷ್ಠ ತಂಡವನ್ನೇ ಸೆಲೆಕ್ಷನ್​ ಕಮಿಟಿ ಪ್ರಕಟಿಸಿದೆ. ಬಹುತೇಕ ಕಳೆದ ಸೌತ್​ ಆಫ್ರಿಕಾ ಸರಣಿಯಲ್ಲಿ ಆಡಿದ ತಂಡವನ್ನೇ ಆಯ್ಕೆ ಮಾಡಲಾಗಿದೆ. ಇದೇ ವೇಳೆ ಸ್ಥಾನ ಸಿಗುತ್ತೆ ಅನ್ನೋ ಅಪಾರ ನಿರೀಕ್ಷೆಯನ್ನಿಟ್ಟುಕೊಂಡಿದ್ದ ಆಟಗಾರರಿಗೆ ಅಜಿತ್​ ಅಗರ್ಕರ್​ ಅಂಡ್ ಟೀಮ್​ ಶಾಕ್​ ನೀಡಿದೆ.

ಋತುರಾಜ್​​ಗೆ​​ ಗೇಟ್​ಪಾಸ್.​.!

ಕಳೆದ ಸೌತ್​ ಆಫ್ರಿಕಾ ವಿರುದ್ಧದ ಸರಣಿಯಲ್ಲಿ ಚಾನ್ಸ್​ ಗಿಟ್ಟಿಸಿಕೊಂಡಿದ್ದ ಋತುರಾಜ್​ ಗಾಯಕ್ವಾಡ್​ ಸೆಂಚುರಿ ಸಿಡಿಸಿ ಮಿಂಚಿದ್ರು. ಮೊದಲ ಏಕದಿನದಲ್ಲಿ ವೈಫಲ್ಯ ಅನುಭವಿಸಿದ್ದ ಗಾಯಕ್ವಾಡ್​, ರಾಯ್​ಪುರದಲ್ಲಿ ನಡೆದ 2ನೇ ಪಂದ್ಯದಲ್ಲಿ ಭರ್ಜರಿ ಬ್ಯಾಟಿಂಗ್​ ನಡೆಸಿ 105 ರನ್​ ಚಚ್ಚಿದ್ರು. ಸದ್ಯ ನಡೀತಾ ಇರೋ ವಿಜಯ್​ ಹಜಾರೆ ಟೂರ್ನಿಯ ಕಳೆದ 2 ಪಂದ್ಯಗಳಲ್ಲಿ ಶತಕ, ಹಾಫ್​ ಸೆಂಚುರಿ ಚಚ್ಚಿರೋ ಋತುರಾಜ್​, ನನ್ನ ಸ್ಥಾನ ಸೇಫ್​ ಅನ್ನೋ ಭರವಸೆ ಹೊಂದಿದ್ರು. ಭರವಸೆ ಹುಸಿಯಾಗಿದೆ. ಕಳೆದ ಸರಣಿಯ ಶತಕ ವೀರನನ್ನ ಡ್ರಾಪ್​ ಮಾಡಲಾಗಿದೆ.

ಕಿಶನ್​ ಕಮ್​ಬ್ಯಾಕ್ ಕನಸು ಭಗ್ನ

ಸೈಯದ್​ ಮುಷ್ತಾಕ್​ ಟೂರ್ನಿಯಲ್ಲಿ ಅಬ್ಬರಿಸಿದ್ದ ಇಶಾನ್ ಕಿಶನ್, ವಿಜಯ್​ ಹಜಾರೆ ಟೂರ್ನಿಯಲ್ಲೂ ಅದೇ ಫಾರ್ಮ್​ನಲ್ಲಿ ಬ್ಯಾಟಿಂಗ್​ ನಡೆಸ್ತಿದ್ದಾರೆ. ಟಿ20 ವಿಶ್ವಕಪ್​ ತಂಡಕ್ಕೆ ಸರ್​ಪ್ರೈಸ್​ ಎಂಟ್ರಿ ಕೊಟ್ಟಂತೆ​ ಏಕದಿನ ತಂಡಕ್ಕೂ ಕಮ್​​ಬ್ಯಾಕ್​ ಮಾಡೋ ನಿರೀಕ್ಷೆಯಲ್ಲಿದ್ರು. ಏಕದಿನ ಸರಣಿಯಿಂದ ರಿಷಭ್​ ಪಂತ್​ನ ಡ್ರಾಪ್​ ಮಾಡಿ, ಕಿಶನ್​ಗೆ ಸ್ಥಾನ ನೀಡೋ ಬಗ್ಗೆ ಸೆಲೆಕ್ಷನ್​ ಕಮಿಟಿಯಲ್ಲೂ ಚರ್ಚೆ ನಡೆದಿತ್ತು. ಅಂತಿಮವಾಗಿ ಪಂತ್​ಗೆ ಮತ್ತೊಂದು ಚಾನ್ಸ್​ ಸಿಕ್ಕಿದೆ. ಇಶಾನ್​ ಕಿಶನ್​ ಕಮ್​ಬ್ಯಾಕ್ ಕನಸು ಭಗ್ನವಾಗಿದೆ.

ಪಡಿಕ್ಕಲ್​ಗೆ ನಿರಾಸೆ..!

ಕರ್ನಾಟಕದ ಎಡಗೈ ಬ್ಯಾಟ್ಸ್​ಮನ್​ ದೇವದತ್​ ಪಡಿಕ್ಕಲ್​ ಡ್ರೀಮ್​ ಫಾರ್ಮ್​ನಲ್ಲಿದ್ದಾರೆ. ವಿಜಯ ಹಜಾರೆ ಟೂರ್ನಿಯಲ್ಲಿ ಸೆಂಚುರಿ ಮೇಲೆ ಸೆಂಚುರಿ ಸಿಡಿಸಿ ರನ್​ ಹೊಳೆ ಹರಿಸಿದ್ದಾರೆ. ಆಡಿದ 5 ಪಂದ್ಯಗಳಲ್ಲಿ 4 ಶತಕ ಸಿಡಿಸಿದ್ದ ದೇವದತ್​ ಪಡಿಕ್ಕಲ್​ ಒನ್​ ಡೇ ಟೀಮ್​ಗೆ ಎಂಟ್ರಿ ಕೊಡೋ ತವಕದಲ್ಲಿದ್ರು. ಪಡಿಕ್ಕಲ್​ ಸೆಲೆಕ್ಟ್​ ಆಗ್ತಾರೆ ಅಂತಾ ಕ್ರಿಕೆಟ್​ ಲೋಕ ಕೂಡ ಪ್ರಿಡಿಕ್ಟ್​ ಮಾಡಿತ್ತು. ಆದ್ರೆ, ಅಂತಿಮವಾಗಿ ಪಡಿಕ್ಕಲ್​ಗೆ ನಿರಾಸೆಯಾಗಿದೆ. ​

ಶಮಿ ಖೇಲ್​ ಖತಂ..?

ಸುದೀರ್ಘ ಅಂತರದ ಬಳಿಕ ಏಕದಿನ ತಂಡಕ್ಕೆ ಕಮ್​ಬ್ಯಾಕ್​ ಕನವರಿಕೆಯಲ್ಲಿದ್ದ ಅನುಭವಿ ವೇಗಿ ಮೊಹಮ್ಮದ್​ ಶಮಿಗೂ ನಿರಾಸೆಯಾಗಿದೆ. ಯಾರ್ಕರ್​ ಸ್ಪೆಷಲಿಸ್ಟ್​ ಜಸ್​​ಪ್ರಿತ್​ ಬೂಮ್ರಾ ಅಲಭ್ಯತೆಯಲ್ಲಿ ಚಾನ್ಸ್​ ಸಿಗುತ್ತೆ ಅನ್ನೋ ನಿರೀಕ್ಷೆಯಲ್ಲಿದ್ದ ಶಮಿಯನ್ನ ಡ್ರಾಪ್​ ಮಾಡಲಾಗಿದೆ. ದೇಶಿ ಕ್ರಿಕೆಟ್​ನಲ್ಲಿ ಶಮಿ ಪರ್ಫಾಮ್​ ಮಾಡ್ತಾ ಇದ್ರೂ ಸೆಲೆಕ್ಟರ್ಸ್​​ ಕಡೆಗಣಿಸಿದ್ದಾರೆ. ಇದ್ರೊಂದಿಗೆ ಶಮಿಯನ್ನ ಬಿಟ್ಟು ಟೀಮ್​ ಇಂಡಿಯಾ ಮುಂದೆ ಸಾಗ್ತಿದೆ ಅನ್ನೋ ಸಂದೇಶವನ್ನ ರವಾನಿಸಿದ್ದಾರೆ.

ಅಕ್ಷರ್​ ಪಟೇಲ್​ ಕತೆ ಏನು..?

ಕಳೆದ ಆಸ್ಟ್ರೇಲಿಯಾ ಪ್ರವಾಸದಲ್ಲಿ ಟೀಮ್​ ಇಂಡಿಯಾ ಏಕದಿನ ತಂಡದ ಭಾಗವಾಗಿದ್ದ ಅಕ್ಷರ್​ ಪಟೇಲ್​ನ​ ಸೌತ್​ ಆಫ್ರಿಕಾ ಸರಣಿಯಿಂದ ಡ್ರಾಪ್​ ಮಾಡಲಾಗಿತ್ತು. ಇದೀಗ ನ್ಯೂಜಿಲೆಂಡ್​ ಸರಣಿಯ ತಂಡದಿಂದಲೂ ಅಕ್ಷರ್​ ಪಟೇಲ್​ ಹೊರಬಿದ್ದಿದ್ದಾರೆ. ಅಕ್ಷರ್​ ಬದಲಾಗಿ ಸೆಲೆಕ್ಷನ್ ಕಮಿಟಿ​ ಜಡೇಜಾನ ಬ್ಯಾಕ್​ ಮಾಡಿದೆ. ಇದು ಅಕ್ಷರ್​ ಪಟೇಲ್​ 2027ರ ಏಕದಿನ ವಿಶ್ವಕಪ್​ ಪ್ಲಾನ್​​ನಲ್ಲಿ ಇದ್ದಾರಾ.? ಇಲ್ವಾ.? ಅನ್ನೋ ಗೊಂದಲವನ್ನ ಮೂಡಿಸಿದೆ.

ಡೊಮೆಸ್ಟಿಕ್​ ಕ್ರಿಕೆಟ್​ನಲ್ಲಿ ಭರ್ಜರಿ ಪರ್ಫಾಮೆನ್ಸ್​ ನೀಡಿ ತಂಡದಲ್ಲಿ ಸ್ಥಾನದ ನಿರೀಕ್ಷೆಯಿಟ್ಟಿದ್ದ ಆಟಗಾರರಿಗೆ ಈ ಬಾರಿಯೂ ನಿರಾಸೆಯಾಗಿದೆ. ಟೀಮ್​ ಇಂಡಿಯಾ ಸೆಲೆಕ್ಷನ್​ ಕಮಿಟಿಯ ನಡೆಯನ್ನ ನೋಡಿದ್ರೆ, ಕಿವೀಸ್​ ವಿರುದ್ಧದ ತಂಡವೇ ವಿಶ್ವಕಪ್​ ಟೂರ್ನಿಗೆ ಫೈನಲ್​​ ಎನಿಸಿದೆ. ಯಾರಾದ್ರೂ ಇಂಜುರಿಗೆ ತುತ್ತಾದ್ರೆ ಅಥವಾ ಫಾರ್ಮ್​ ಕಳೆದುಕೊಂಡರೇ ಮಾತ್ರ ಬೇರೆಯವರಿಗೆ ಅವಕಾಶ ಸಿಗಲಿದೆ.