ಗಿಲ್, ಅಭಿ ಸ್ನೇಹದ ಬಗ್ಗೆ ನಿಮಗೆ ಗೊತ್ತಾ..? ಇದು ನಿನ್ನೆ ಮೊನ್ನೆಯ ಗೆಳತನವಲ್ಲ..!

ಪ್ರಸಕ್ತ ಏಷ್ಯಾಕಪ್​ ಟೂರ್ನಿಯಲ್ಲಿ ಬಲಿಷ್ಠ ಟೀಮ್​ ಇಂಡಿಯಾದ ಪರ್ಫಾಮೆನ್ಸ್​ ಮಾತ್ರವಲ್ಲ. ಟೀಮ್ ಇಂಡಿಯಾದ ಓಪನರ್ಸ್​​​ ಶುಭ್​ಮನ್​ ಗಿಲ್​ ಅಂಡ್ ಅಭಿಷೇಕ್ ಶರ್ಮಾ ಜೋಡಿ ಕೂಡ ವಿಶ್ವ ಕ್ರಿಕೆಟ್​ ಗಮನ ಸೆಳೆದಿದೆ. ಇವರಿಬ್ಬರ ಆಟದ್ದು ಒಂದು ಕತೆಯಾದ್ರೆ ಇವರಿಬ್ಬರ ಗೆಳೆತನ, ಬೆಳೆದು ಬಂದ ರೀತಿಯದ್ದು ಮತ್ತೊಂದು ಕಹಾನಿ.

ಅಭಿಷೇಕ್ ಕ್ಯಾಪ್ಟನ್​, ಗಿಲ್​​​ ವೈಸ್​ ಕ್ಯಾಪ್ಟನ್

ಶುಭ್​ಮನ್​ ಗಿಲ್​ ಹಾಗೂ ಅಭಿಷೇಕ್ ಶರ್ಮಾ ಓಪನರ್​ಗಳಾಗಿ ಕಣಕ್ಕಿಳಿದಿದ್ದು ನಿನ್ನೆಯ ಮೊದಲಲ್ಲ. ಇದು ಅಂಡರ್​ 14 ದಿನಗಳಿಂದಲೂ ಇಬ್ಬರೂ ಆರಂಭಿಕ ಜೊತೆಗಾರರಾಗಿದ್ದಾರೆ. ಪಂಜಾಬ್​ ಪರ ಏಜ್​​ ಗ್ರೂಪ್ ಕ್ರಿಕೆಟ್​ನಿಂದಲೇ ಇಬ್ಬರೂ ಒಟ್ಟಾಗಿ ಆಡ್ತಿದ್ದಾರೆ. ಅಂದು ಪಂಜಾಬ್​ ಅಂಡರ್​ 14 ತಂಡದ ನಾಯಕನಾಗಿದ್ದ ಅಭಿಷೇಕ್ ಶರ್ಮಾ ಇಂದು ಸಾಮಾನ್ಯ ಆಟಗಾರನಾಗಿದ್ರೆ ಗಿಲ್​ ಟೀಮ್​ ಇಂಡಿಯಾದಲ್ಲೂ ವೈಸ್​ ಕ್ಯಾಪ್ಟನ್​ ಆಗೇ ಉಳಿದಿದ್ದಾರೆ ಅಷ್ಟೇ ವ್ಯತ್ಯಾಸ.

ಅಂಡರ್​​-14, ಅಂಡರ್​ 16, ಅಂಡರ್​-19 ಲೆವೆಲ್​ನಲ್ಲಿ ಪಂಜಾಬ್​ ತಂಡದ ಪರ ಒಟ್ಟಾಗಿ ಆಡಿದ ಇಬ್ಬರೂ ಟೀಮ್​ ಇಂಡಿಯಾ ಅಂಡರ್​ 19 ತಂಡಕ್ಕೂ ಒಟ್ಟಾಗೆ ಕಾಲಿಟ್ರು. 2018ರಲ್ಲಿ ರಾಹುಲ್​ ದ್ರಾವಿಡ್​ ಮಾರ್ಗದರ್ಶನದಲ್ಲಿ ಟೀಮ್​ ಇಂಡಿಯಾ ಅಂಡರ್​​-19 ವಿಶ್ವಕಪ್​ ಗೆಲ್ತಲ್ವಾ? ಆ ವಿಶ್ವಕಪ್​ ಗೆಲುವಿನಲ್ಲಿ ಅಭಿಷೇಕ್ ಶರ್ಮಾ, ಶುಭ್​ಮನ್​ ಗಿಲ್​ ಮಹತ್ವದ ಪಾತ್ರವಹಿಸಿದ್ರು.

ಪಂದ್ಯಕ್ಕೂ ಮುನ್ನ ಫಿಜ್ಜಾ ತಿಂತಿದ್ದಿದ್ದೇಕೆ?

ಕ್ರಿಕೆಟ್​​​ ಕರಿಯರ್​​ನ​ ಆರಂಭದಲ್ಲಿ ಇವರಿಬ್ಬರಲ್ಲೂ ಒಂದು ವಿಚಿತ್ರವಾದ ನಂಬಿಕೆ ಇತ್ತು. ಪ್ರತಿ ಪಂದ್ಯಕ್ಕೂ ಆರಂಭಕ್ಕೂ ಮುನ್ನ ತಪ್ಪದೇ ಇಬ್ಬರೂ ಫಿಜ್ಜಾ ತಿಂತಿದ್ರಂತೆ. ಫಿಜ್ಜಾ ತಿಂದು ಫೀಲ್ಡ್​ಗಿಳಿದ್ರೆ ನಾವು ರನ್​ಗಳಿಸ್ತೀವಿ ಅನ್ನೋದು ಇಬ್ಬರಿಗಿದ್ದ ನಂಬಿಕೆಯಾಗಿತ್ತಂತೆ.

ಯುವರಾಜ್​ ಸಿಂಗ್​ ಗುರು

ಗಿಲ್​ ಅಂಡ್ ಶರ್ಮಾ ಇಬ್ಬರೂ ಪಳಗಿದ್ದು ಟೀಮ್​ ಇಂಡಿಯಾ ಮಾಜಿ ಕ್ರಿಕೆಟಿಗ, ಸಿಕ್ಸರ್​ ಕಿಂಗ್​ ಯುವರಾಜ್​ ಸಿಂಗ್ ಗರಡಿಯಲ್ಲಿ. ಅಂಡರ್​19 ದಿನಗಳಿಂದಲೂ ಇಬ್ಬರೂ ಸ್ನೇಹಿತರಿಗೆ ಯುವಿಯೇ ಗುರು. ಯುವರಾಜ್​ ಸಿಂಗ್​ ಮಾರ್ಗದರ್ಶನದಲ್ಲಿ ಅಭ್ಯಾಸ ಆರಂಭಿಸಿದ ಬಳಿಕ ಇವರಿಬ್ಬರ ಆಟವೇ ಬದಲಾಯ್ತು. ಇವರಿಬ್ಬರಿಗೂ ದೊಡ್ಡಮಟ್ಟದ ಸಕ್ಸಸ್​​ ಸಿಗೋಕೆ ಕಾರಣವಾಗಿದ್ದೇ ಯುವರಾಜ್​ ಸಿಂಗ್​ ಪಾಠಗಳು ಅಂದ್ರೆ ತಪ್ಪಾಗಲ್ಲ.

ಶುಭ್​ಮನ್​ ‘ಶಾಂತ’... ಅಭಿಷೇಕ್​ ಶರ್ಮಾ ‘ಸೈತಾನ’

ಚಿಕ್ಕಂದಿನಿಂದಲೇ ಒಟ್ಟಾಗಿ ಬೆಳೆದಿರೋ ಇವರಿಬ್ಬರಲ್ಲಿ ಒಂದು ಡಿಫರೆನ್ಸ್​ ಇದೆ. ಇಬ್ಬರ ವ್ಯಕ್ತಿತ್ವ ಸಿಕ್ಕಾಪಟ್ಟೆ ಡಿಫೆರೆಂಟ್​​. ಆನ್​​ಫೀಲ್ಡ್​ ಆಗಲಿ ಆಫ್​ ದ ಫೀಲ್ಡ್​ ಇರಲಿ ಗಿಲ್​ದ್ದು ಕೂಲ್​ ಅಂಡ್ ಕಾಮ್​ ನೇಚರ್​. ಅಭಿಷೇಕ್ ಶರ್ಮಾ ಫುಲ್​ ಅಗ್ರೆಸ್ಸಿವ್.​ ಆಟದ ವಿಚಾರದಲ್ಲಂತೂ ಇನ್ನೊಂದು ಕೈ ಮೇಲೆ. ಕ್ರಿಸ್​​ ಕಚ್ಚಿ ನಿಂತು ಅಬ್ಬರಿಸಲು ಶುರುವಿಟ್ಟುಕೊಂಡ್ರೆ ಎದುರಾಳಿ ತಂಡಕ್ಕೆ ತಡೆದುಕೊಳ್ಳೋಕೆ ಆಗಲ್ಲ. ಆರ್ಭಟ ಹಾಗಿರುತ್ತೆ.

ಗೆಳೆತನಕ್ಕೆ ಇದೊಂದು ಬೆಸ್ಟ್​ ಎಕ್ಸಾಂಪಲ್​.. 2024ರ ಜಿಂಬಾಬ್ವೆ ಪ್ರವಾಸದ ವೇಳೆ ಅಭಿಷೇಕ್​ ಶರ್ಮಾ ಫಸ್ಟ್​​ ಟೈಂ ಟೀಮ್​ ಇಂಡಿಯಾಗೆ ಸೆಲೆಕ್ಟ್​ ಆಗಿದ್ರು. ಆಗ ಟೀಮ್​ ಇಂಡಿಯಾ ನಾಯಕನಾಗಿದಿದ್ದು ಶುಭ್​ಮನ್​ ಗಿಲ್​. ಪ್ರವಾಸದ ಫಸ್ಟ್​ ಮ್ಯಾಚ್​ನಲ್ಲಿ ಡೆಬ್ಯೂ ಮಾಡಿದ ಅಭಿಷೇಕ್ ಶರ್ಮಾ ಡಕೌಟ್​ ಆಗಿ ನಿರಾಸೆ ಅನುಭವಿಸಿದ್ರು. ಬಳಿಕ 2ನೇ ಪಂದ್ಯದಲ್ಲಿ ದಾಖಲೆಯ ಶತಕ ಸಿಡಿಸಿದ್ರು. 47 ಎಸೆತಗಳಲ್ಲಿ ಸ್ಫೋಟಕ ಶತಕ ಸಿಡಿಸಿ ತನ್ನ ಆಯ್ಕೆಯನ್ನ ಸಮರ್ಥಿಸಿಕೊಂಡ್ರು. ಅಂದು ಅಭಿಷೇಕ್​ ಬಳಸಿದ್ದು ಶುಭ್​ಮನ್​ ಗಿಲ್​ ಬ್ಯಾಟನ್ನ.

ಪಂಜಾಬ್​ ಅಂಡರ್​ 14 ತಂಡದಲ್ಲಿದ್ದಾಗ ಟೀಮ್​ ಇಂಡಿಯಾ ಪರ ಆಡೋ ಕನಸು ಕಂಡಿದ್ದ ಇಬ್ಬರು ಸ್ನೇಹಿತರು ಅಂದುಕೊಂಡಿದ್ದನ್ನ ಸಾಧಿಸಿದ್ದಾರೆ. ಈಗಾಗಲೇ ಶುಭ್​ಮನ್​ ಗಿಲ್ ಟೀಮ್​ ಇಂಡಿಯಾ ನೆಕ್ಸ್ಟ್​ ಆಲ್​​ಫಾರ್ಮೆಟ್​ ಕ್ಯಾಪ್ಟನ್ ಆಗೋದು ಕನ್​​ಫರ್ಮ್​ ಆಗಿದೆ. ಅಭಿಷೇಕ್​ ಶರ್ಮಾ ಕೂಡ ಆಡಿದ ಕೆಲ ಪಂದ್ಯಗಳಲ್ಲೇ ಹೊಸ ಭರವಸೆಯನ್ನ ಹುಟ್ಟು ಹಾಕಿದ್ದಾರೆ. ಸ್ನೇಹಿತರ ಜೊತೆಯಾಟ ಟೀಮ್​ ಇಂಡಿಯಾ ಪರ ಹೀಗೆ ಮುಂದುವರೆಯಲಿ.