ಕಾನೂನುಬಾಹಿರ ಸಾರಿಗೆ ಮುಷ್ಕರ ಮಾಡಿದ್ರೆ ಸರ್ಕಾರದಿಂದ ಕ್ರಮ; ಹೈಕೋರ್ಟ್ ವಕೀಲೆ ದೀಕ್ಷಾ ಅಮೃತೇಶ್

ಬೆಂಗಳೂರು: ನಾಳೆಯಿಂದ ಮುಷ್ಕರ ಇರಲ್ಲ. ತಕ್ಷಣದಿಂದಲೇ ಮುಷ್ಕರ ನಿಲ್ಲಿಸಬೇಕು ಎಂದು ಕೋರ್ಟ್​ ಆದೇಶ ಮಾಡಿದ್ದು ಮುಂದಿನ ವಿಚಾರಣೆ ಗುರುವಾರ (ಆಗಸ್ಟ್​ 7)ದಂದು ಇದೆ ಎಂದು ಹೈಕೋರ್ಟ್ ವಕೀಲೆ ದೀಕ್ಷಾ ಅಮೃತೇಶ್ ಅವರು ಹೇಳಿದ್ದಾರೆ. 

ಹೈಕೋರ್ಟ್​ ಆವರಣದಲ್ಲಿ ಮಾತನಾಡಿದ ವಕೀಲೆ ದೀಕ್ಷಾ ಅಮೃತೇಶ್ ಅವರು, ಸಾರಿಗೆ ಮುಷ್ಕರದ ಬಗ್ಗೆ ನ್ಯಾಯಾಲಯ ವಿಚಾರಣೆ ನಡೆಸಿತು. ಯೂನಿಯನ್ ಅನ್ನು ಯಾರು ಮುನ್ನಡೆಸುತ್ತಿದ್ದಾರೆ ಎಂದು ನ್ಯಾಯಾಲಯ ಕೇಳಿತು. ಕೆಎಸ್​ಆರ್​ಟಿಸಿ ಪರ ವಕೀಲರು ಕೇವಲ 3 ಸಿಬ್ಬಂದಿ ಮಾತ್ರ ರಜೆ ತೆಗೆದುಕೊಂಡಿದ್ದಾರೆ ಎಂದಿದ್ದಾರೆ. ಬೆಂಗಳೂರಿನಲ್ಲಿ ಬಸ್ ಸಂಚಾರ ಇದ್ದು, ಬೇರೆ ಜಿಲ್ಲೆಗಳಲ್ಲಿ ಮುಷ್ಕರ ಮಾಡಲಾಗುತ್ತಿದೆ ಎಂದು ಕೋರ್ಟ್​ಗೆ ಗಮನಕ್ಕೆ ತರಲಾಯಿತು ಎಂದು ಹೇಳಿದ್ದಾರೆ. 

ಬೇರೆ ಜಿಲ್ಲೆಗಳಲ್ಲಿ ಮುಷ್ಕರ ಮಾಡಲಾಗುತ್ತಿದೆ ಎಂದು ಹೇಳುತ್ತಿದ್ದಂತೆ ಕೋರ್ಟ್​ ಗರಂ ಆಗಿ, ಆದೇಶ ಇದ್ದರೂ ಹೇಗೆ ಮುಷ್ಕರ ಮಾಡಲಾಗುತ್ತಿದೆ ಎಂದು ಪ್ರಶ್ನಿಸಿದೆ. ಇದು ಕಾನೂನುಬಾಹಿರವಾಗುತ್ತದೆ. ಪ್ರತಿಭಟನೆ ಮಾಡದಂತೆ ಎಚ್ಚರಿಕೆ ನೀಡಲಾಗಿದ್ದು ಅನಧಿಕೃತ ಪ್ರತಿಭಟನೆ ಆದಲ್ಲಿ ಕ್ರಮ ಜರುಗಿಸಬೇಕೆಂದು ಹೈಕೋರ್ಟ್ ಸರ್ಕಾರಕ್ಕೆ ಹೇಳಿದೆ ಅಂತ ಹೇಳಿದ್ದಾರೆ. 

ಇದನ್ನೂ ಓದಿ:ಸಾರಿಗೆ ನೌಕರರು ಈ ಕ್ಷಣದಿಂದಲೇ ಕರ್ತವ್ಯಕ್ಕೆ ಹಾಜರಾಗಲು ಜಂಟಿ ಕ್ರಿಯಾ ಸಮಿತಿಯ ಸೂಚನೆ

5 ಯೂನಿಯನ್​​ಗಳು ಸೇರಿ ಜಂಟಿಯಾಗಿ ಮುಷ್ಕರವನ್ನು ಮಾಡಿವೆ ಎನ್ನುವುದು ಕೋರ್ಟ್​ ಗಮನಕ್ಕೆ ತರಲಾಯಿತು. ಆದರೆ ಅವರು ಕೇವಲ ಒಂದು ಯೂನಿಯನ್ ಮಾತ್ರ ರೆಪ್ರೆಜೆಂಟ್ ಮಾಡಿದೆ ಎಂದು ಹೇಳಿ, ಅವರು ಟೆಕ್ನಿಕಲ್​ ಗ್ಲಿಚ್​ ಮೇಲೆ ಹೋಗಲು ನೋಡಿದರು. ಮರೆ ಮಾಚೋಕೆ ಗೊತ್ತಾಗಲಿಲ್ಲ, ನಮಗೆ 7 ಗಂಟೆಗೆ ಗೊತ್ತಾಯಿತು ಅಂತ ಕೋರ್ಟ್​ಗೆ ಹೇಳಿದ್ರು. ಬಾಗಲಕೋಟೆಯಲ್ಲಿ, ಕೊಪ್ಪಳದಲ್ಲಿ ಪರೀಕ್ಷೆ ನಿಲ್ಲಿಸಬೇಕಾಯಿತು. ಬೆಳಗಾವಿಯಲ್ಲಿ ತೊಂದರೆ ಆಯಿತು. ಮೈಸೂರಿನಲ್ಲಿ ಸ್ಥಳೀಯ ಬಸ್​ಗಳು ರಸ್ತೆಗೆ ಇಳಿದಿರಲಿಲ್ಲ ಎಂದು ಹೇಳಿದರು. 

ನಾಳೆಯಿಂದ ಮುಷ್ಕರ ಇಲ್ಲ. ತಕ್ಷಣದಿಂದಲೇ ಮುಷ್ಕರ ನಿಲ್ಲಿಸಬೇಕು ಎಂದು ಕೋರ್ಟ್​ ಆದೇಶ ಮಾಡಿದೆ. ಮುಂದಿನ ವಿಚಾರಣೆಯೂ ಗುರುವಾರ (ಆಗಸ್ಟ್​ 7)ದಂದು ಇದೆ. ಸಾರಿಗೆ ಇಲಾಖೆ ದೊಡ್ಡದಾಗಿದ್ದರೂ ಸಾರ್ವಜನಿಕರಿಗೆ ತೊಂದರೆ ಆಗದಂತೆ ಮುಷ್ಕರ ಮಾಡಬಾರದು. ಕಾನೂನುಬಾಹಿರವಾಗಿ ಮುಷ್ಕರ ಮಾಡಿದ್ರೆ ಸರ್ಕಾರ ಕ್ರಮ ತೆಗೆದುಕೊಳ್ಳಬಹುದು ಎಂದು ಕೋರ್ಟ್ ಹೇಳಿದೆ ಅಂತ ವಕೀಲೆ ಹೇಳಿದ್ದಾರೆ.  

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ