ಭಾರತದಲ್ಲೇ ಇದೆ ಬೇಬಿ ತಾಜ್​ ಮಹಲ್​.. ಇದನ್ನು ನಿರ್ಮಿಸಿದ್ದು ಯಾರು? ಇದರ ಇತಿಹಾಸ ನಿಮಗೆ ಗೊತ್ತಾ?

ತಾಜ್ ಮಹಲ್, ಆಗ್ರಾದಲ್ಲಿ ನೆಲೆ ನಿಂತಿರುವ ಜಗತ್ತಿನ 7 ಅದ್ಭುತಗಳಲ್ಲಿ ಒಂದು. ಇದು ವಿಶ್ವಕ್ಕೆ ತಿಳಿದ ಸತ್ಯ. ಇಂದಿಗೂ ಕೂಡ ಪ್ರೀತಿಯ ಸಂಕೇತವಾಗಿ ಶತಮಾನಗಳಿಂದ ಅದು ಪ್ರವಾಸಿಗರನ್ನು ಸೆಳೆಯುತ್ತಿದೆ. ಆದ್ರೆ ಅದೇ ಆಗ್ರಾದಲ್ಲಿ ಇನ್ನೊಂದು ತಾಜ್ ಮಹಲ್ ಇದೆ ಅಂದ್ರೆ ನಂಬೋಕೆ ಸಾಧ್ಯನಾ? ತಾಜ್ ಮಹಲ್​ನಂತಹ ಕಟ್ಟಡ ಇತಿಹಾಸದಲ್ಲಿ ಒಮ್ಮೆ ಮಾತ್ರ ನಿರ್ಮಿಸಲು ಸಾಧ್ಯ ಎಂದು ಎಲ್ಲರೂ ಹೇಳುತ್ತಾರೆ. ಅದು ನೂರಕ್ಕೆ ನೂರು ಸತ್ಯ. ಆದ್ರೆ ಆಗ್ರಾದಲ್ಲಿರುವ ಈ ತಾಜ್​ ಮಹಲ್, ಶಹಜಹಾನ್ ಕಟ್ಟಿಸಿರುವ ತಾಜ್ ಮಹಲ್​ನ್ನೇ ಹೋಲುತ್ತದೆ. ಇದಕ್ಕೆ ಬೇಬಿ ತಾಜ್​ ಮಹಲ್ ಅಂದ್ರೆ ಪುಟ್ಟ ಅಥವಾ ಮರಿ ತಾಜ್​ ಮಹಲ್ ಎಂದು ಕರೆಯುತ್ತಾರೆ.

ಇದನ್ನೂ ಓದಿ:ತಾಜ್​ ಮಹಲ್ ಒಂದೇ ಅಲ್ಲ.. ಭಾರತದಲ್ಲಿ ಇನ್ನೂ 6 ಪ್ರೇಮಿಗಾಗಿ ಕಟ್ಟಿದ ಸ್ಮಾರಕಗಳಿವೆ! ಎಲ್ಲಿ ಗೊತ್ತಾ?

ತಾಜ್​ ಮಹಲ್​ನ್ನೇ ಹೋಲುವ ಐತಿಹಾಸಿಕ ಸ್ಮಾರಕವೊಂದು ಇದೇ ಆಗ್ರಾದಲ್ಲಿದೆ. ಈಗಾಗಲೇ ಹೇಳಿದಂತೆ ಇದನ್ನು ಬೇಬಿ ತಾಜ್ ಮಹಲ್ ಎನ್ನುತ್ತಾರೆ. ಸ್ಥಳೀಯರು ಬಚ್ಚಾ ತಾಜ್ ಮಹಲ್ ಎಂದು ಬಣ್ಣಿಸುತ್ತಾರೆ. ಇತ್ಮಾದ್​ ಉದ್​ ಔಲ್ ಎಂಬುವವನು ಜಹಾಂಗೀರನ​ ಆಡಳಿತದಲ್ಲಿ ಪ್ರಧಾನಮಂತ್ರಿಯಾಗಿದ್ದ. ಅವನ ಅಸಲಿ ಹೆಸರು ಮಿರ್ಜಾ ಗಿಯಾಸ್ ಬೇಗ್​​. ಇವನು ಮೂಲತಃ ಪರ್ಷಿಯಾದವನು ಅಂದ್ರೆ ಇಂದಿನ ಇರಾನ್. ಈ ಗಿಯಾಸ್ ಬೇಗ್​ಗೆ ನೂರ್ ಜಹಾನ್ ಎಂಬುವ ಸುಂದರವಾದ ಒಬ್ಬಳು ಪುತ್ರಿ ಇದ್ದಳು. ಅವಳನ್ನು ಜಹಾಂಗೀರ ರಾಜನಿಗೆ ಮದುವೆ ಮಾಡಿ ಕೊಟ್ಟಿದ್ದನು. ನೂರ್ ಜಹಾನ್ ಜಹಾಂಗೀರನ ದರ್ಬಾರದಲ್ಲಿ ಎಂತಹ ಹಿಡಿತ ಸಾಧಿಸಿದ್ದಳು ಅಂದ್ರೆ ಅವನ ತಂದೆ ಗಿಯಾಸ್ ಬೇಗ್ ಹಾಗೂ ಸಹೋದರ ಅಸಫ್ ಖಾನ್​ಗೆ ಜಹಾಂಗೀರನ ಆಡಳಿತದಲ್ಲಿ ಅತಿದೊಡ್ಡ ಪದವಿಯಲ್ಲಿ ತಂದು ಕೂರಿಸಿದಳು.

ಇತ್ಮಾದ್ ಉದ್​ ಔಲ್ ಕಂಗಡಾದಲ್ಲಿ ಸುಮಾರು 1622 ರಲ್ಲಿ ತೀರಿಕೊಂಡ. ಅವನು ತೀರಿಕೊಂಡ ಬಳಿಕ ನೂರ ಜಹಾನ್ ತಂದೆಯ ನೆನಪಿಗಾಗಿ ಆಗ್ರಾದ ಯಮುನಾ ತೀರದಲ್ಲಿಯೇ ಒಂದು ಸಮಾಧಿ ಸ್ಮಾರಕವನ್ನು 1627-28ರ ಇಸ್ವಿಯಲ್ಲಿ ನಿರ್ಮಾಣ ಮಾಡಿದಳು. ಇದೇ ಸ್ಮಾರಕವನ್ನೂ ಜನರು ಬೇಬಿ ತಾಜ್ ಮಹಲ್ ಎಂದು ಕರೆಯುತ್ತಾರೆ.

ಚಾರ್​ಬಾರ್ ಶೈಲಿಯಲ್ಲಿ ನಿರ್ಮಿಸಲಾದ ಈ ಒಂದು ಗೋರಿಯು ನಾಲ್ಕು ಅತಿ ಎತ್ತರದ ಗೋಡೆಗಳನ್ನು ಹೊಂದಿದೆ. ನಾಲ್ಕು ಆಯತಾಕಾರದ ಕೋಳಗಳು ಈ ಕಟ್ಟದಲ್ಲಿವೆ. ನಾಲ್ಕು ಪ್ರವೇಶ ದ್ವಾರಗಳು ಹಾಗೂ ನಾಲ್ಕು ಅತಿಎತ್ತರದ ಸ್ಥಂಭಗಳನ್ನು ಈ ಸ್ಮಾರಕ ಸಮಾಧಿಗೆ ಅಳವಡಿಸಲಾಗಿದೆ. ಇದನ್ನು ಫಾರ್ಸಿ ಹಾಗೂ ಮೊಘಲ್​ ವಾಸ್ತುಶಿಲ್ಪದ ವಿನ್ಯಾಸದಲ್ಲಿ ನಿರ್ಮಿಸಲಾಗಿದೆ. ತನ್ನ ತಂದೆಯ ನೆನಪಿಗಾಗಿ ಈ ಒಂದು ಸಮಾಧಿಯ ಸ್ಮಾರಕವನ್ನು ಜಹಾಂಗೀರನ ಪತ್ನಿ ನೂರ ಜಹಾನ್​ ನಿರ್ಮಿಸಿದ್ದಳು

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ