T20I; ಐತಿಹಾಸಿಕ ದಾಖಲೆ.. ಕೊಹ್ಲಿ ಕೂಡ ಮಾಡದ ರೆಕಾರ್ಡ್ ಮಾಡಿದ ತಿಲಕ್ ವರ್ಮಾ

ಇಂಗ್ಲೆಂಡ್ ವಿರುದ್ಧ ನಡೆಯುತ್ತಿರುವ T20 ಸರಣಿಯ 2ನೇ ಪಂದ್ಯದಲ್ಲಿ ಟೀಮ್ ಇಂಡಿಯಾ ರಣರೋಚಕ ಗೆಲುವು ಪಡೆದಿದೆ. ಈ ಮೂಲಕ ಸೂರ್ಯಕುಮಾರ್ ನೇತೃತ್ವದ ಟೀಮ್ ಇಂಡಿಯಾ ಸರಣಿಯಲ್ಲಿ 2-0 ಅಂತರದಿಂದ ಮುನ್ನಡೆ ಕಾಯ್ದುಕೊಂಡಿದೆ. ಇದರ ಜೊತೆ 3ನೇ ಪಂದ್ಯವನ್ನು ಇಂಗ್ಲೆಂಡ್ ಗೆಲ್ಲಲೇ ಬೇಕಾದ ಅನಿವಾರ್ಯ ಇದೆ. ಪಂದ್ಯದಲ್ಲಿ ಸಿಡಿಲಬ್ಬರದ ಬ್ಯಾಟಿಂಗ್ ಮಾಡಿದ ತಿಲಕ್ ವರ್ಮಾ ವಿಶೇಷವಾದ ದಾಖಲೆ ಬರೆದಿದ್ದಾರೆ.

ಎದುರಾಳಿ ಇಂಗ್ಲೆಂಡ್ ನೀಡಿದ 165 ರನ್​ಗಳ ಸಾಧಾರಣ ಮೊತ್ತ ಬೆನ್ನಟ್ಟಿದ ಟೀಮ್ ಇಂಡಿಯಾ ಆರಂಭದಲ್ಲೇ ಸಂಕಷ್ಟಕ್ಕೆ ಸಿಲುಕಿತ್ತು. ಅಭಿಷೇಕ್, ಸಂಜು ಜೋಡಿ ಈ ಸಲ ಬೇಸರ ತರಿಸಿತು. ಕ್ಯಾಪ್ಟನ್ ಸೂರ್ಯ ಕೂಡ ಔಟ್ ಆಗಿರುವುದು ಭಾರೀ ನಿರಾಸೆ ಮೂಡಿಸಿತು. ವಿಕೆಟ್ ಬೀಳುತ್ತಿದ್ದರೂ ಧೈರ್ಯದಿಂದ ಹೋರಾಡಿದ ತಿಲಕ್ ವರ್ಮಾ ಪಂದ್ಯದಲ್ಲಿ ಎದುರಾಳಿ ಬೌಲರ್​ಗಳಿಗೆ ಬೆವರಿಳಿಸಿದರು.

ಇದನ್ನೂ ಓದಿ:IPL 2025ರಲ್ಲೂ ಫ್ಯಾನ್ಸ್​ಗೆ ಫುಲ್ ಮನರಂಜನೆ.. ಮಹೇಂದ್ರ ಸಿಂಗ್ ಧೋನಿ ಸಿದ್ಧತೆ ಹೇಗಿದೆ?

ಚಿದಂಬರಂ ಸ್ಟೇಡಿಯಂನಲ್ಲಿ ಚಿತ್ತಾರ ಮೂಡಿಸಿದ ಯಂಗ್ ಪ್ಲೇಯರ್​, ಕೇವಲ 55 ಎಸೆತಗಳಲ್ಲಿ 4 ಫೋರ್, 5 ಭರ್ಜರಿ ಸಿಕ್ಸರ್ ಸಮೇತ 72 ರನ್​ ಗಳಿಸಿ ಅಜೇಯರಾಗಿ ಭಾರತಕ್ಕೆ ಗೆಲುವು ತಂದರು. ಟಿ20 ಪಂದ್ಯಗಳಲ್ಲಿ ಸತತವಾಗಿ ಔಟ್​ ಆಗದೇ 318 ರನ್​ ಗಳಿಸಿದ್ದಾರೆ. ಕಳೆದ 4 ಪಂದ್ಯಗಳಲ್ಲಿ ತಿಲಕ್ ವರ್ಮಾ ಔಟ್ ಆಗದೇ ಅಜೇಯರಾಗಿ ಉಳಿಯುತ್ತಿದ್ದಾರೆ. ಈ ರೀತಿಯಾಗಿ ಅಜೇಯರಾಗಿ ಉಳಿದು ಅತಿ ಹೆಚ್ಚು ರನ್​ ಗಳಿಸಿದ ವಿಶ್ವದ ಏಕೈಕ ಬ್ಯಾಟ್ಸ್​ಮನ್ ಆಗಿದ್ದಾರೆ.

ತಿಲಕ್ ವರ್ಮಾ ಕಳೆದ ನಾಲ್ಕು ಇನ್ನಿಂಗ್ಸ್​ಗಳಲ್ಲಿ ಪ್ರದರ್ಶನ ನೋಡುವುದಾದರೆ, ದಕ್ಷಿಣ ಆಫ್ರಿಕಾ ವಿರುದ್ಧ 56 ಎಸೆತಗಳಲ್ಲಿ 107, ಮತ್ತೆ ಆಫ್ರಿಕಾ ವಿರುದ್ಧ 47 ಎಸೆತಗಳಲ್ಲಿ 120, 19 ರನ್ಸ್​ ಹಾಗೂ ಇಂಗ್ಲೆಂಡ್ ವಿರುದ್ಧ ಈಗ ಔಟಾಗದೆ 72 ರನ್ ಗಳಿಸಿದ್ದಾರೆ. ಈ ಎಲ್ಲ ಸೇರಿ 318 ರನ್​ಗಳನ್ನು ಔಟ್ ಆಗದೇ ತಿಲಕ್ ಗಳಿಸಿದ್ದಾರೆ. ಈ ಮೂಲಕ ನ್ಯೂಜಿಲೆಂಡ್‌ನ ಮಾರ್ಕ್ ಚಾಪ್‌ಮನ್ 271 ರನ್​ಗಳ ದಾಖಲೆಯನ್ನು ಬ್ರೇಕ್ ಮಾಡಿದ್ದಾರೆ.

ಔಟ್ ಆಗದೇ ಹೆಚ್ಚು ರನ್​ ಗಳಿಸಿದವರ ಪಟ್ಟಿ

• ತಿಲಕ್ ವರ್ಮಾ (ಭಾರತ)- 318 (107*, 120*, 19*, 72*)
• ಮಾರ್ಕ್ ಚಾಪ್​ಮನ್ (ನ್ಯೂಜಿಲೆಂಡ್)- 271 (65*, 16*, 71*, 104*, 15)
• ಆರೋನ್ ಫಿಂಚ್ (ಆಸ್ಟ್ರೇಲಿಯಾ)- 240 (68*, 172)
• ಶ್ರೇಯಸ್ ಅಯ್ಯರ್ (ಭಾರತ)- 240 (57*, 74*, 73*, 36)
• ಡೇವಿಡ್ ವಾರ್ನರ್ (ಆಸ್ಟ್ರೇಲಿಯಾ)- 239 (100*, 60*, 57*, 2*, 20)

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ