ಹಾವಿನ ದ್ವೇಷ 12 ವರುಷ.. ಟ್ರಂಪ್-ಝೆಲೆನ್ಸ್​ಕಿ ದ್ವೇಷ 6 ವರುಷ; ಸ್ಪೆಷಲ್‌ ರಿಪೋರ್ಟ್‌ ಇಲ್ಲಿದೆ!

ಹಿಂದೆಂದೂ ಕಾಣದಂತ ಘಟನೆಗೆ ಅಮೆರಿಕಾದ ವೈಟ್ ಹೌಸ್ ಸಾಕ್ಷಿಯಾಗಿದೆ. ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹಾಗೂ ಉಕ್ರೇನ್ ಅಧ್ಯಕ್ಷ ವ್ಲಾಡಿಮಿರ್ ಝೆಲೆನ್ಸ್​ಕಿ ಅಕ್ಷರಶಃ ಹಾವು-ಮುಂಗುಸಿಯಂತೆ ಕಿತ್ತಾಡಿದ್ದಾರೆ. ಯಾವುದೋ ಟೀ ಅಂಗಡಿ ಮುಂದೆ ಕುಳಿತುಕೊಂಡು ಬೈದಾಡಿಕೊಳ್ಳುವಂತೆ ಶ್ವೇತಭವನದಲ್ಲಿ ಜಗಳವಾಡಿದ್ದಾರೆ. ಅಷ್ಟಕ್ಕೂ ಅತ್ತೆ-ಸೊಸೆಯಂತಿದ್ದ ರಷ್ಯಾ-ಅಮೆರಿಕಾ, ಇದೀಗ ಅಮ್ಮ-ಮಗಳ ರೀತಿ ಬದಲಾಗಿದ್ದೇಕೆ? ಉಕ್ರೇನ್ ಅಧ್ಯಕ್ಷನ ಮೇಲೆ ಡೊನಾಲ್ಡ್ ಟ್ರಂಪ್​ಗೇಕೆ ಕೋಪ? ಅಮೆರಿಕಾ ಅಧ್ಯಕ್ಷರ ಬದಲಾವಣೆ ಬಳಿಕ ರಷ್ಯಾ-ಉಕ್ರೇನ್ ಯುದ್ಧವನ್ನ ನೋಡೋ ರೀತಿಯೇ ಬದಲಾಗಿದ್ದೇಕೆ? ಪುಟಿನ್ ಹಾಗೂ ಟ್ರಂಪ್ ಭಾಯಿ ಭಾಯಿ ಥರ ಒಬ್ಬರನ್ನೊಬ್ಬರು ಹೊಗಳ್ತಿರೋದೇಕೆ?-ಈ ಪ್ರತೀ ಪ್ರಶ್ನೆಗೂ ಉತ್ತರ ಪುಟಿನ್ ಹಾಗೂ ಝೆಲೆನ್ಸ್​ಕಿ ಹಳೇ ದ್ವೇಷ.

ಕಳೆದ ಮೂರು ವರ್ಷದ ಹಿಂದೆ ಆರಂಭವಾದ ರಷ್ಯಾ- ಉಕ್ರೇನ್​ ಯುದ್ದದಲ್ಲಿ ಅಮೆರಿಕ ಉಕ್ರೇನ್​​​​ ಪರ ಇತ್ತು. ಆದರೆ, ಇದೀಗ ಟ್ರಂಪ್​ ರಷ್ಯಾ ಪರವಾಗಿ ನಿಂತಿದ್ದಾರೆ. ಇದಕ್ಕೆ ಪ್ರತ್ಯಕ್ಷ ಸಾಕ್ಷಿ ಮೊನ್ನೆ ಮೊನ್ನೆಯಷ್ಟೇ ವಿಶ್ವಸಂಸ್ಥೆಯಲ್ಲಿ ರಷ್ಯಾ ಪರ ಟ್ರಂಪ್ ಮತ ಹಾಕಿರೋದು. ಇದಲ್ಲದೇ ಮೊನ್ನೆಯಷ್ಟೇ ಪುಟಿನ್​ಗೆ ಕರೆ ಮಾಡಿದ್ದ ಟ್ರಂಪ್ ವ್ಯಾಪಾರ ಸಂಬಂಧ ವೃದ್ಧಿಗೊಳಿಸೋ ಬಗ್ಗೆ ಮಾತುಕತೆ ನಡೆಸಿದ್ರು. ಇದುವರೆಗೂ ರಷ್ಯಾ ಅಧ್ಯಕ್ಷ ಪುಟಿನ್ ಶಾಂತಿ ಮಂತ್ರ ಜಪಿಸ್ಬೇಕು ಅಂತಿದ್ದ ಅಮೆರಿಕಾ, ಟ್ರಂಪ್ ಅಧ್ಯಕ್ಷರಾದ್ಮೇಲೆ ವರಸೆ ಬದಲಿಸಿದೆ. ಉಕ್ರೇನ್ ಅಧ್ಯಕ್ಷ ಝೆಲೆನ್ಸ್​ಕಿ ಶಾಂತಿ ಮಂತ್ರ ಜಪಿಸ್ಬೇಕು ಅಂತಿದೆ. ಅರ್ಥಾತ್ ಜಗತ್ತಿನ ದೃಷ್ಟಿಯಲ್ಲೇ ಉಕ್ರೇನ್​ ಶಾಂತಿಗೆ ಸಿದ್ದವಿಲ್ಲ ಅನ್ನೋ ಸಂದೇಶ ಸಾರಿ ಸಾರಿ ಹೇಳ್ತಿದೆ. ಇಂಥದ್ದೊಂದು ಮಂತ್ರಪಠಣೆ ಹಿಂದೆಯೂ ಟ್ರಂಪ್ ಲೆಕ್ಕಾಚಾರವಿದೆ.

ಟ್ರಂಪ್-ಪುಟಿನ್ ಉದ್ದೇಶ ಒಂದೇ
1. ನ್ಯಾಟೋ ಶಕ್ತಿ!
ಉಕ್ರೇನ್​ ನ್ಯಾಟೋ ಪಟ್ಟಿಗೆ ಸೇರಬಾರದು ಅನ್ನೋದು ರಷ್ಯಾದ ಪ್ರಮುಖ ಉದ್ದೇಶ. ಹೀಗಾದ್ರೆ ಉಕ್ರೇನ್​ಗೆ ನ್ಯಾಟೋ ದೇಶಗಳ ಪವರ್ ಸಿಗಲಿದೆ.. ಹೀಗಾಗಬಾರದು ಅನ್ನೋದು ಪುಟಿನ್ ಪ್ಲಾನ್​. ಇದೇ ಕಾರಣಕ್ಕೆ ಯುದ್ಧ ಶುರುವಾಗಿರೋದು. ಇಂಟ್ರೆಸ್ಟಿಂಗ್​ ವಿಚಾರ ಅಂದ್ರೆ ಟ್ರಂಪ್ ಉದ್ದೇಶವೂ ಇದೇ ಮಾದರಿಯಲ್ಲಿದೆ. ಅಮೆರಿಕಾ ಫಸ್ಟ್​ ಅನ್ನೋ ಮೈಂಡ್​ಸೆಟ್ ಹೊಂದಿರೋ ಟ್ರಂಪ್​ಗೆ ಅವರ ದೇಶದ ಹಣ ಯೂರೋಪಿಯನ್ ದೇಶಗಳ ಜಗಳದ ನಡುವೆ ವ್ಯಯಿಸೋದು ಇಷ್ಟವಿಲ್ಲ. ಇದೇ ಕಾರಣಕ್ಕೆ ಉಕ್ರೇನ್ ನ್ಯಾಟೋಗೆ ಸೇರ್ಪಡೆ ಮಾಡೋ ಇಂಗಿತ ಟ್ರಂಪ್​ಗಿಲ್ಲ.

2. ಇಂಧನದ ‘ಪವರ್’
ರಷ್ಯಾ ಹಾಗೂ ಅಮೆರಿಕಾ ಎರಡೂ ದೇಶಗಳ ಕಣ್ಣು ಇಂಧನ ಶಕ್ತಿಯ ಮೇಲಿದೆ. ರಷ್ಯಾದ ಆರ್ಥಿಕತೆ ತೈಲದ ರಫ್ತಿನ ಮೇಲೆ ನಡೆಯುತ್ತೆ. ಇತ್ತ ಟ್ರಂಪ್​ಗೆ ಕೂಡ ತೈಲ ಬೆಲೆಯನ್ನ ನಾನೇ ಕಂಟ್ರೋಲ್ ಮಾಡಬೇಕು ಅನ್ನೋ ಮಹಾದಾಸೆ ಇದೆ. ಈ ಕಾರಣಕ್ಕೆ ರಷ್ಯಾ ಜೊತೆಗೆ ಸ್ನೇಹ ಸಂಬಂಧ ಚೆನ್ನಾಗಿ ಇಟ್ಟುಕೊಳ್ಳೋದು ಟ್ರಂಪ್​ಗೆ ಒಂದು ಲೆಕ್ಕದಲ್ಲಿ ಮಹತ್ವದ್ದಾಗಿದೆ.

3. ವಿಲನ್ ಝೆಲೆನ್ಸ್​ಕಿ
ಉಕ್ರೇನ್ ಅಧ್ಯಕ್ಷ ವ್ಲಾಡಿಮಿರ್ ಝೆಲೆನ್ಸ್​ಕಿ ರಷ್ಯಾದ ಪುಟಿನ್ ಪಾಲಿಗೆ ಸದ್ಯದ ಪರಮ ಶತ್ರು ಅಂದ್ರೆ ತಪ್ಪಾಗಲ್ಲ. ಆದ್ರೆ ಇದೇ ಝೆಲೆನ್ಸ್​ಕಿ, ಡೊನಾಲ್ಡ್​ ಟ್ರಂಪ್​ಗೂ ಕೂಡ ಅಘೋಷಿತ ವಿರೋಧಿ. ಅರೆರೆ.. ಅಮೆರಿಕಾದ ಟ್ರಂಪ್​ಗೂ, ಉಕ್ರೇನ್​ ಅನ್ನೋ ಪುಟ್ಟ ದೇಶದ ಝೆಲೆನ್ಸ್​ಕಿಗೂ ಏನು ದ್ವೇಷ ಅಂತೀರಾ? ಈ ಕೋಪತಾಪದ ಹಿಂದೆ ಒಂದು ದೊಡ್ಡ ಕಥೆಯೇ ಇದೆ.

ಝೆಲೆನ್ಸ್​ಕಿ V/S ಟ್ರಂಪ್
2020ರಲ್ಲಿ ಡೊನಾಲ್ಡ್ ಟ್ರಂಪ್ ಅಮೆರಿಕಾ ಅಧ್ಯಕ್ಷೀಯ ಚುನಾವಣೆ ಸೋಲೋದರ ಹಿಂದೆಯೂ ಉಕ್ರೇನ್ ಅಧ್ಯಕ್ಷರ ಪರೋಕ್ಷ ಪಾತ್ರ ಇತ್ತು ಅನ್ನೋದು ಅದೆಷ್ಟೋ ಜನರಿಗೆ ಗೊತ್ತಿರಲಿಕ್ಕಿಲ್ಲ. 2019ರ ಸಮಯ ಅದು.. ಟ್ರಂಪ್​ ಮುಂಬರೋ ಎಲೆಕ್ಷನ್​ಗೆ ತಯಾರಿ ನಡೆಸ್ತಿದ್ರು. ಆಗ ಟ್ರಂಪ್ ಎದುರಾಳಿ ಆಗಿದ್ದಿದ್ದು ಜೋ ಬೈಡನ್. ಚುನಾವಣಾ ತಂತ್ರಗಳನ್ನ ಹೆಣೆಯುವಲ್ಲಿ ನಿಸ್ಸೀಮರಾಗಿದ್ದ ಟ್ರಂಪ್ 2019ರ ಜುಲೈ 25ರಂದು ಝೆಲೆನ್ಸ್​ಕಿಗೆ ಒಂದು ಫೋನ್ ಕಾಲ್ ಮಾಡ್ತಾರೆ. ಆಗ ಒಂದು ಇಂಪಾರ್ಟೆಂಟ್ ಚರ್ಚೆ ನಡೆದಿತ್ತು. ಈ ಮಾತುಕತೆ ಅರ್ಥ ಆಗ್ಬೇಕು ಅಂದ್ರೆ 2016ರ ಒಂದಷ್ಟು ಚುನಾವಣಾ ವಿಚಾರಗಳನ್ನ ಗಮನಿಸಬೇಕು.

ಇದನ್ನೂ ಓದಿ: ಜನರ ಜೀವದ ಜತೆ ಆಟ ಆಡಬೇಡ.. ಮಾತಾಡಲು ಬಂದ ಅಧ್ಯಕ್ಷನಿಗೆ ಡೊನಾಲ್ಡ್​ ಟ್ರಂಪ್ ಬಿಗ್ ವಾರ್ನಿಂಗ್! 

2016ರಲ್ಲಿ ಟ್ರಂಪ್ ಅಮೆರಿಕಾ ಎಲೆಕ್ಷನ್ ಗೆಲ್ಲೋದಕ್ಕೆ ರಷ್ಯಾ ಪರೋಕ್ಷವಾಗಿ ​ಸಹಾಯ ಮಾಡಿದ್ದ ಆರೋಪ ಕೇಳಿ ಬಂದಿತ್ತು. ವಿಚಾರಣೆ ವೇಳೆ ಟ್ರಂಪ್ ಎದುರಾಳಿಯಾಗಿದ್ದ ಡೆಮಕ್ರಾಟಿಕ್ ಪಕ್ಷದವರ ಇ-ಮೇಲ್​ಗಳನ್ನ ರಷ್ಯಾದ ಸೈಬರ್ ಪಡೆಗಳು ಹ್ಯಾಕ್ ಮಾಡಿರೋದು ಪತ್ತೆಯಾಗಿತ್ತು. ಆದ್ರೆ ಇದನ್ನ ಒಪ್ಪಿಕೊಳ್ಳದ ಟ್ರಂಪ್, ರಷ್ಯಾದ ಹೆಸರನ್ನ ಹಾಳು ಮಾಡೋದಕ್ಕೆ ಉಕ್ರೇನ್ ಈ ಕೆಲಸ ಮಾಡಿದೆ ಅಂತಾ ವಾದಿಸಿದ್ರು. ಇದನ್ನ 2020ರ ಚುನಾವಣೆಯಲ್ಲಿ ರಾಜಕೀಯವಾಗಿ ಬಳಸಿಕೊಳ್ಳಲು ಮುಂದಾಗಿದ್ದ ಟ್ರಂಪ್, ಎಲೆಕ್ಷನ್ ತಯಾರಿ ನಡುವೆ ಝೆಲೆನ್ಸ್​ಕಿಗೆ ಕಾಲ್ ಮಾಡಿದ್ದರು. ಈ ಹ್ಯಾಕಿಂಗ್​ಗೆ ಸಂಬಂಧಪಟ್ಟಂತೆ ಒಂದು ತನಿಖೆ ನಡೆಸಿ, ಇದನ್ನ ಉಕ್ರೇನ್​ನವರೇ ಮಾಡಿದ್ದಾಗಿ ಬಿಂಬಿಸಿ.. ಹೀಗೆ ಮಾಡಿದ್ರೆ ನಿಮ್ಮೊಂದಿಗೆ ನಾವಿದ್ದೇವೆ. ಮುಂದೆ ಇರ್ತೇವೆ ಅಂತಾ ಟ್ರಂಪ್ ಭರವಸೆ ನೀಡಿದ್ರು. ಇದರ ಜೊತೆಗೆ ಆಗ ಎದುರಾಳಿಯಾಗಿದ್ದ ಜೋ ಬೈಡನ್ ಪುತ್ರ ಹಂಟರ್ ಬೈಡನ್ ವಿರುದ್ಧ ತನಿಖೆ ಮಾಡುವಂತೆಯೂ ಮನವಿ ಮಾಡಿದ್ರು. ಉಕ್ರೇನ್​ನ ಪ್ರೈವೇಟ್ ಕಂಪನಿಯೊಂದರ ನಿರ್ದೇಶಕರಾಗಿದ್ದ ಹಂಟರ್ ಬೈಡನ್​ರನ್ನ ಯಾವುದಾದರೊಂದು ಪ್ರಕರಣದಲ್ಲಿ ಸಿಲುಕಿಸಿದ್ರೆ, ಬೈಡನ್ ವಿರುದ್ಧ ಚುನಾವಣೆಯಲ್ಲಿ ಅಸ್ತ್ರವಾಗಿಸಿಕೊಳ್ಳಬಹುದು ಅನ್ನೋದು ಟ್ರಂಪ್ ಲೆಕ್ಕಾಚಾರವಾಗಿತ್ತು. ಈ ಬಗ್ಗೆ ನಡೆದ ಸಂಭಾಷಣೆಯಲ್ಲಿ ಉಕ್ರೇನ್ ಅಧ್ಯಕ್ಷ ಝೆಲೆನ್ಸ್​ಕಿ, ಟ್ರಂಪ್ ಬೇಡಿಕೆಗಳಿಗೆ ಓಕೆ ಅಂದಿದ್ರಂತೆ.

ಉಲ್ಟಾ ಹೊಡೆದ ಝೆಲೆನ್ಸ್​ಕಿ!
ಫೋನ್​ ಕರೆಯಲ್ಲಿ ತಲೆ ಅಲ್ಲಾಡಿಸಿದ್ದ ಉಕ್ರೇನ್ ಅಧ್ಯಕ್ಷ ಝೆಲೆನ್ಸ್​ಕಿ, ಬಳಿಕ ಟ್ರಂಪ್ ವಿರುದ್ಧವೇ ಉಲ್ಟಾ ಹೊಡೆದಿದ್ರು. ಇವರಿಬ್ಬರ ನಡುವೆ ನಡೆದ ದೂರವಾಣಿ ಸಂಭಾಷಣೆ ಏನಾಗಿತ್ತು ಅನ್ನೋ ಮಾಹಿತಿ ಸೋರಿಕೆಯಾಯ್ತು. ವಿಶ್ವಾದ್ಯಂತ ಟ್ರಂಪ್ ಸೀಕ್ರೇಟ್ ಪ್ಲಾನ್ ಬಗ್ಗೆ ವ್ಯಾಪಕ ಚರ್ಚೆಯಾಯ್ತು. ಅಮೆರಿಕಾದ ಎಲೆಕ್ಷನ್​ನಲ್ಲಿ ವಿದೇಶಿ ಶಕ್ತಿಗಳನ್ನ ಬಳಸಿಕೊಂಡ ಬಗ್ಗೆ ಟ್ರಂಪ್​ ವಿರುದ್ಧ ದೊಡ್ಡ ಪ್ರಮಾಣದಲ್ಲಿ ಖಂಡನೆ ವ್ಯಕ್ತವಾಯ್ತು. ಬಳಿಕ ಎದುರಾದ 2020ರ ಚುನಾವಣೆಯಲ್ಲಿ ಟ್ರಂಪ್ ಸೋಲೋದಕ್ಕೆ ಇದು ಕೂಡ ಒಂದು ಕಾರಣ. ಈ ಫೋನ್ ಸಂಭಾಷಣೆಯನ್ನ ಬೇಕಂತಲೇ ಉಕ್ರೇನ್ ಅಧ್ಯಕ್ಷ ಝೆಲೆನ್ಸ್​ಕಿ ಲೀಕ್ ಮಾಡಿ, ಬೈಡನ್ ಪರ ನಿಂತಿದ್ದಾರೆ ಅಂತಾ ಭಾವಿಸಿದ ಟ್ರಂಪ್ ಕೋಪದಲ್ಲಿ ಕೆಂಡವಾಗಿದ್ದರು. ಕಳೆದ 4 ವರ್ಷದಿಂದ ಅಧಿಕಾರ ಇಲ್ಲದೇ ಕುಳಿತಿದ್ದ ಟ್ರಂಪ್.. ಈಗ ಅಧ್ಯಕ್ಷ ಪಟ್ಟ ಸಿಗ್ತಿದ್ದಂತೆ ಉಕ್ರೇನ್ ಅಧ್ಯಕ್ಷನ ವಿರುದ್ಧ ಬುಸುಗುಡೋದಕ್ಕೆ ಶುರು ಮಾಡಿದ್ದಾರೆ. ಹಾವಿನ ದ್ವೇಷ 12 ವರ್ಷವಾದ್ರೆ.. ಟ್ರಂಪ್ ದ್ವೇಷ 6 ವರ್ಷ ಅಂತಲೇ ಝೆಲೆನ್ಸ್​ಕಿ ಹಾಗೂ ಟ್ರಂಪ್ ನಡುವಿನ ಸಂಘರ್ಷವನ್ನ ವಿಶ್ಲೇಷಿಸಲಾಗ್ತಿದೆ.

ಟ್ರಂಪ್-ಪುಟಿನ್ ಕುಚಿಕು ಕುಚಿಕು
ಅಮೆರಿಕಾ ಹಾಗೂ ರಷ್ಯಾ ನಡುವಿನ ಕೋಲ್ಡ್​ ವಾರ್​ನಲ್ಲಿ ಏನೇನಾಯ್ತು ಅನ್ನೋದು ಇಡೀ ಜಗತ್ತಿಗೆ ಗೊತ್ತು. ಒಬ್ಬರನ್ನ ಕಂಡ್ರೆ ಮತ್ತೊಬ್ಬರು ಧಗಧಗ ಅಂತಿದ್ದವರು ಇಂದು ಐಸ್​ಪೈಸ್ ಆಡವಷ್ಟು ಟ್ರಂಪ್-ಪುಟಿನ್ ಕ್ಲೋಸ್ ಆಗಿದ್ದಾರೆ. ಇದಕ್ಕೆ ಕಾರಣ ಮತ್ತದೇ ಡೊನಾಲ್ಡ್​ ಟ್ರಂಪ್ ಗೇಮ್ ಪ್ಲಾನ್.. ಇವತ್ತು ಅಮೆರಿಕಾಗೆ ಟಕ್ಕರ್ ಕೊಡೋ ಮಟ್ಟಿಗೆ ಬೆಳೆದು ನಿಂತಿರೋ ಇನ್ನೊಂದು ರಾಷ್ಟ್ರ ಅಂದ್ರೆ ಅದು ಚೀನಾ.. ಹೀಗಾಗಿ ಚೀನಾ ವಿರುದ್ಧ ತೊಡೆ ತಟ್ಟೋದು ಹಾಗೂ ಇಂಡೋ ಫೆಸಿಫಿಕ್ ವಲಯದಲ್ಲಿ ಪ್ರಾಬಲ್ಯ ಸಾಧಿಸೋದು ಟ್ರಂಪ್​ರ ಪ್ರಮುಖ ಉದ್ದೇಶ.. ಯೋರೋಪ್ ದೇಶಗಳ ಜಗಳದಲ್ಲಿ ಸುಮ್ಮನೆ ಮೂಗು ತೂರಿಸಿ ಸಮಯ ಹಾಗೂ ಹಣ ವ್ಯರ್ಥ ಮಾಡೋ ಬದಲು ಇಂಡೋ ಫೆಸಿಫಿಕ್ ಭಾಗದ ಮೇಲೆ ಹೆಚ್ಚು ಗಮನಹರಿಸೋದಕ್ಕೆ ಟ್ರಂಪ್ ನಿರ್ಧರಿಸಿದ್ದಾರಂತೆ.

ಪುಟಿನ್ ದ್ವೇಷದಿಂದ ಟ್ರಂಪ್​ಗೆ ಲಾಭವೇನೂ ಇಲ್ಲ.. ಆದ್ರೆ ಇದೇ ಪುಟಿನ್ ಚೀನಾಗೆ ಹತ್ತಿರವಾದ್ರೆ, ಅಮೆರಿಕಾ ಸವಾಲಿನ ಪ್ರಮಾಣ ಹೆಚ್ಚಾಗುತ್ತೆ. ಈ ನಡುವೆ ಬ್ರಿಕ್ಸ್ ಒಕ್ಕೂಟದಲ್ಲಿ ಡಾಲರ್​ಗೆ ಪರ್ಯಾಯವಾಗಿ ಹೊಸ ಕರೆನ್ಸಿ ತರೋದಕ್ಕೆ ಚರ್ಚೆ ನಡೆದಿರೋದು ಟ್ರಂಪ್​ಗೆ ನುಂಗಲಾರದ ತುತ್ತಾಗಿ ಪರಿಣಮಿಸಿದೆ. ಇದೆಲ್ಲ ಸಮಸ್ಯೆಗಳ ನಡುವೆ ಸುಖಾಸುಮ್ಮನೇ ರಷ್ಯಾ ವಿರುದ್ಧ ದ್ವೇಷ ಸಾಧನೆ ಯಾಕೆ ಅನ್ನೋದು ಟ್ರಂಪ್ ಲೆಕ್ಕಾಚಾರ. ಅಲ್ಲದೇ ಪುಟಿನ್ ಸಹಾಯದೊಂದಿಗೆ ತಮ್ಮ ದ್ವೇಷಿ ಝೆಲೆನ್ಸ್​ಕಿ ಬಗ್ಗು ಬಡಿದು, ಉಕ್ರೇನ್​ನ ಮೇಲೆ ಪ್ರಾಬಲ್ಯ ಸಾಧಿಸಬಹುದು. ಅಲ್ಲದೇ ಪುಟಿನ್ ಜೊತೆಗೂಡಿ ಇಂಧನ ಕ್ಷೇತ್ರದಲ್ಲಿ ಬಲ ಹಿಗ್ಗಿಸಿಕೊಳ್ಳಬಹುದು. ಯೂರೋಪ್ ಜಗಳದಿಂದ ದೂರ ನಿಂತು ಚೀನಾವನ್ನ ಹಿಮ್ಮೆಟ್ಟಿಸುವತ್ತ ಹೆಚ್ಚು ಕೇಂದ್ರೀಕೃತವಾಗಬಹುದು. ಈ ಮೂಲಕ ಮತ್ತೆ ದೊಡ್ಡಣ್ಣನಾಗಿ ಅಮೆರಿಕಾ ಮೆರೆಯಬೇಕು ಅನ್ನೋದು ಟ್ರಂಪ್ ಮಹಾದಾಸೆ. ಇದೆಲ್ಲದರ ಪರಿಣಾಮವೇ ವೈಟ್​ಹೌಸ್​ನಲ್ಲಿ ನಡೆದಿರೋ ಟ್ರಂಪ್ ಹಾಗೂ ಝೆಲೆನ್ಸ್​ಕಿ ಟಾಕ್ ವಾರ್ ಅನ್ನೋದು ರಾಜತಾಂತ್ರಿಕ ವಿಶ್ಲೇಷಕರ ಅಭಿಪ್ರಾಯ.. ಕಾರಣಗಳು ಅದೇನೇ ಇರಲಿ ಈ ಇಬ್ಬರ ಕಿತ್ತಾಟದಿಂದ ಪುಟಿನ್ ಖುಷಿಯಾಗಿರೋದಂತೂ ನಿಜ.

ವಿಶೇಷ ವರದಿ: ಪ್ರಿಯತೋಷ್.ಎಸ್  

ವಿಶೇಷ ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ