ಜನರ ಜೀವದ ಜತೆ ಆಟ ಆಡಬೇಡ.. ಮಾತಾಡಲು ಬಂದ ಅಧ್ಯಕ್ಷನಿಗೆ ಡೊನಾಲ್ಡ್​ ಟ್ರಂಪ್ ಬಿಗ್ ವಾರ್ನಿಂಗ್!

ಯುದ್ಧ ಪೀಡಿತ ಉಕ್ರೇನ್​ ನೆಲದಲ್ಲಿ ಖನಿಜ ಸಂಪನ್ಮೂಲಗಳಿಗೆ ಅಮೆರಿಕಕ್ಕೆ ಒತ್ತು ನೀಡಿ ನೆರವು ನೀಡೋದಾಗಿ ಟ್ರಂಪ್​ ಹೇಳಿದ್ದರು. ಇದರ ಸಲುವಾಗಿ ಝೆಲೆನ್​ಸ್ಕಿ, ಟ್ರಂಪ್​ರನ್ನ ಭೇಟಿಯಾಗಿದ್ದರು. ಆದ್ರೆ ಝೆಲೆನ್ಸ್ಕಿ ಮಾತಿನ ಶೈಲಿ ಎಲ್ಲವನ್ನೂ ಬದಲಿಸಿ ಬಿಟ್ಟಿದೆ. ಒಪ್ಪಂದದ ಬದಲು ಎಚ್ಚರಿಕೆಯನ್ನ ತೆಗೆದುಕೊಂಡು ಹೋಗಿದ್ದಾರೆ ಉಕ್ರೇನ್ ಅಧ್ಯಕ್ಷ.

ಉಕ್ರೇನ್ ಮೇಲೆ ರಷ್ಯಾ ಮಾಡಿರುವ ದಾಳಿ ಕಂಡು ಅನೇಕ ದೇಶಗಳು ಇದು 3ನೇ ಯುದ್ಧ ಅಂತಾನೇ ಕನ್​​ಫಾರ್ಮ್​ ಮಾಡಿತ್ತು. ನ್ಯಾಟೋ ಉಕ್ರೇನ್​ ಬೆಂಬಲಕ್ಕೆ ನಿಂತಿತ್ತು. ಆದ್ರೆ ಹಲವು ದೇಶಗಳು ರಷ್ಯಾ ಪರ ಬ್ಯಾಟ್ ಬೀಸಿದ್ದವು. ಉಕ್ರೇನ್​-ರಷ್ಯಾ ನಡುವೆ ಯುದ್ಧ ಶುರುವಾಗಿ 3 ವರ್ಷ ಉರುಳಿವೆ. ಆದ್ರೆ, ಯುದ್ಧ ಮಾತ್ರ ಅಂತ್ಯವಾಗುತ್ತಿಲ್ಲ. ಭಾರತದ ಪ್ರಧಾನಿ ಮೋದಿ, ಎರಡೂ ದೇಶಗಳ ಜೊತೆ ಮಾತುಕತೆ ನಡೆಸಿದ್ರೂ, ಪ್ರಯೋಜನ ಆಗಿಲ್ಲ. ಇದೀಗ ರಷ್ಯಾ-ಉಕ್ರೇನ್​ ಮಧ್ಯೆ ಕದನ ವಿರಾಮಕ್ಕೆ ಮಧ್ಯಸ್ಥಿತಿ ವಹಿಸಿಲು ವಿಶ್ವದ ದೊಡ್ಡಣ ಅಮೆರಿಕ ಮುಂದಾಗಿತ್ತು. ಆದ್ರೆ ಆಗಿದ್ದೇ ಬೇರೆ.

ಡೀಲ್​ ಒಪ್ಪಿಕೋ ಎಂದ ಟ್ರಂಪ್​ ಜೊತೆ ಝೆಲೆನ್ಸ್ಲಿ ವಾಗ್ವಾದ

ರಷ್ಯಾ ಜೊತೆಗಿನ ಯುದ್ಧದ ಆರಂಭದಲ್ಲಿ ಉಕ್ರೇನ್​ ಜೊತೆಗಿದ್ದ ಅಮೆರಿಕ, ಇದೀಗ ಕದನ ವಿರಾಮಕ್ಕೆ ಮಧ್ಯಸ್ಥಿತಿವಹಿಸುವ ಮಾತನಾಡುತ್ತಿದೆ. ಇದರ ನಡುವೆ ಉಕ್ರೇನ್​ ಅಧ್ಯಕ್ಷ ಅಮೆರಿಕ ಪ್ರವಾಸ ಕೈಗೊಂಡಿದ್ದು, ಯುದ್ಧವನ್ನ ಕೊನೆಗೊಳಿಸುವತ್ತ ನಿರ್ಣಾಯಕ ಹೆಜ್ಜೆ ಎಂದೇ ಇಡೀ ವಿಶ್ವ ಭಾವಿಸಿತ್ತು. ಆದ್ರೆ ಟ್ರಂಪ್​, ಝೆಲೆನ್​ಸ್ಕಿ ಭೇಟಿ ವೇಳೆ ಆಗಿದ್ದೇ ಬೇರೆ. ಒವೆಲ್​ ಕಚೇರಿಯಲ್ಲಿ ಕದನ ವಿರಾಮಕ್ಕೆ ಸಂಬಂಧಿಸಿದಂತೆ ಜೋರು ಧ್ವನಿಯಲ್ಲೇ ಮಾತಿನಿ ಚಕಮಕಿ ನಡೆಯಿತು. ರಾಜತಾಂತ್ರಿಕತೆ ಮೂಲಕ ಸಮಸ್ಯೆ ಬಗೆಹರಿಸಿಕೊಳ್ಳುವಂತೆ ಅಮೆರಿಕ ಉಪಾಧ್ಯಕ್ಷ ನೀಡಿದ ಸಲಹೆಗೆ ಉಕ್ರೇನ್​ ಅಧ್ಯಕ್ಷ ಲೇವಡಿ ಮಾಡಿದ್ರು. ಈ ವೇಳೆ ಮಧ್ಯಪ್ರವೇಶಿಸಿದ ಟ್ರಂಪ್​, ಜನರ ಜೀವದ ಜೊತೆ ಆಟವಾಡಬೇಡ. ನಾವು ನಿಮಗೆ ಸಹಾಯ ಮಾಡದೇ ಇದಿದ್ದರೆ, ಎರಡು-ಮೂರು ವಾರಗಳನ್ನೇ ನಿಮ್ಮ ಕಥೆ ಮುಗಿಯುತ್ತಿತ್ತು ಎಂದು ಸಾಲು ಸಾಲು ವಾರ್ನಿಂಗ್​ ನೀಡಿದ್ದಾರೆ.

ಡೀಲ್​ ಒಪ್ಪಿಕೋ.. ಇಲ್ಲದಿದ್ದರೆ ನಾವು ಹೊರಗುಳಿಯುತ್ತೇವೆ

ಝೆಲೆನ್​ಸ್ಕಿಯ ಮನವೊಲಿಕೆ ಮಾಡಲು ಟ್ರಂಪ್​ ಎಷ್ಟೇ ಪ್ರಯತ್ನ ಮಾಡಿದ್ರೂ ಅದು ಸಾಧ್ಯವಾಗಲಿಲ್ಲ. ಬಳಿಕ ಇಬ್ಬರ ನಡುವಿನ ವಾಗ್ವಾದ ಮತ್ತಷ್ಟು ತಾರತಕ್ಕೇರಿತು. ಕಷ್ಟಕಾಲದಲ್ಲಿ ಸಹಾಯ ಮಾಡಿದ್ದಕ್ಕೆ ನಮಗೆ ನೀವು ಕೃತಜ್ಞತೆ ತೋರಿಸಬೇಕು. ಹೀಗೆ ವಾದಿಸೋದು ಸರಿಯಲ್ಲ. ಒಂದು ವೇಳೆ ಕದನ ವಿರಾಮದ ಡೀಲ್​ಗೆ ಒಪ್ಪದಿದ್ದರೆ, ಅಮೆರಿಕ ತನ್ನ ಬೆಂಬಲವನ್ನು ಹಿಂಪಡೆಯುತ್ತೆ ಎಂದು ಬೆದರಿಕೆ ಹಾಕುವ ರೀತಿಯಲ್ಲಿ ಟ್ರಂಪ್​, ಝೆಲೆನ್​ಸ್ಕಿಗೆ ವಾರ್ನಿಂಗ್​ ಮಾಡಿದ್ದಾರೆ.

ಇದನ್ನೂ ಓದಿ:ಇಂದಿನಿಂದ ದ್ವಿತೀಯ PUC Exam- 1.. ಈ ಬಾರಿ ಎಷ್ಟು ಲಕ್ಷ ವಿದ್ಯಾರ್ಥಿಗಳು ಪರೀಕ್ಷೆ ಬರೆಯುತ್ತಿದ್ದಾರೆ?

ಓವಲ್ ಆಫೀಸ್​ನಲ್ಲಿ ಮಾತಿನ ಸ್ಫೋಟದ ನಂತರ ಉಕ್ರೇನ್‌ ಅಧ್ಯಕ್ಷ ಝೆಲೆನ್​ಸ್ಕಿ ಜೊತೆಗಿನ ಮಾತುಕತೆಯನ್ನ ಟ್ರಂಪ್ ಮೊಟಕುಗೊಳಿಸಿದರು. ಇಷ್ಟಾದ್ರೂ ಅಮೆರಿಕ ಅಧ್ಯಕ್ಷ ಟ್ರಂಪ್​ ಶಾಂತಿಗೆ ಸಿದ್ಧರಾದಾಗ ಮತ್ತೆ ಬರಬಹುದು ಎಂದು ಝೆಲೆನ್​ಸ್ಕಿಗೆ ಪರೋಕ್ಷ ಆಹ್ವಾನ ನೀಡಿದ್ದಾರೆ. ಅಮೆರಿಕ ಮಾತಿಗೆ ಬಗ್ಗದ ಝೆಲೆನ್​ಸ್ಕಿ, ಶ್ವೇತಭವನದಿಂದ ಹೊರ ನಡೆದರು. ಆದ್ರೆ ಸಾಮಾಜಿಕ ಜಾಲತಾಣಗಳಲ್ಲಿ ಅಮೆರಿಕ ಅಧ್ಯಕ್ಷ ಮತ್ತು ಉಪಾಧ್ಯಕ್ಷರು ನಡೆದುಕೊಂಡ ರೀತಿಗೆ ಆಕ್ಷೇಪ ವ್ಯಕ್ತವಾಗಿದ್ದು, ಮಾತುಕತೆಗೆ ಕರೆದು, ಬೆದರಿಕೆ ಹಾಕಿದ್ದು ಸರಿನಾ ಎಂಬ ಚರ್ಚೆಗಳು ನಡೆಯುತ್ತಿವೆ.

ಸೂಚನೆ: ಎಲ್ಲಾ DTH & Cableನಲ್ಲಿ ನ್ಯೂಸ್​ಫಸ್ಟ್​ ಚಾನೆಲ್​​​ ಲಭ್ಯ