ವೈಭವ್​ ಸೂರ್ಯವಂಶಿ ಸಿಡಿಲಬ್ಬರದ ಸೆಂಚುರಿ.. ಜೈಸ್ವಾಲ್​ ಅರ್ಧಶತಕ; ಗುಜರಾತ್​ಗೆ ಭಾರೀ ಅವಮಾನ

ಯಂಗ್ ಆ್ಯಂಡ್ ಎನರ್ಜಿಟಿಕ್​ ಬ್ಯಾಟರ್ ವೈಭವ್​ ಸೂರ್ಯವಂಶಿ ಅವರ ಸಿಡಿಲಬ್ಬರದ ಬ್ಯಾಟಿಂಗ್​ನಿಂದ ಗುಜರಾತ್​ ವಿರುದ್ಧ ರಾಜಸ್ಥಾನ ರಾಯಲ್ಸ್​ 8 ವಿಕೆಟ್​ಗಳ ಭರ್ಜರಿ ಗೆಲುವು ದಾಖಲಿಸಿದೆ.

ಸವಾಯಿ ಮಾನ್ಸಿಂಗ್ ಸ್ಟೇಡಿಯಂನಲ್ಲಿ ನಡೆದ ಪಂದ್ಯದಲ್ಲಿ ರಾಜಸ್ಥಾನ್ ರಾಯಲ್ಸ್ ತಂಡದ ಓಪನರ್​ ಯುವ ಬ್ಯಾಟರ್ ವೈಭವ್ ಸೂರ್ಯವಂಶಿ ಅತ್ಯಮೂಲ್ಯವಾದ ಸೆಂಚುರಿ ಬಾರಿಸುವ ಮೂಲಕ ಆರ್​ಆರ್​ ಸುಲಭ ಜಯಗಳಿಸಿದೆ. ಐಪಿಎಲ್ ಇತಿಹಾಸದಲ್ಲೇ ಇದೇ ಮೊದಲ ಬಾರಿಗೆ ಅತಿ ಕಿರಿಯ ವಯಸ್ಸಿನ ಪ್ಲೇಯರ್​ ಒಬ್ಬರು ಶತಕ ಬಾರಿಸಿರುವುದು ದಾಖಲೆ ಪಟ್ಟಿಗೆ ಸೇರಿದೆ.

ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ್ದ ಗುಜರಾತ್​ ಟೈಟನ್ಸ್, ಓಪನರ್​ ಶುಭ್​ಮನ್ ಗಿಲ್ ಮತ್ತು ಜೋಶ್ ಬಟ್ಲರ್ ಅವರ ಅಮೋಘ ಅರ್ಧಶತಕದಿಂದ​ ​210 ರನ್​ಗಳ ಬೃಹತ್​ ಮೊತ್ತದ ರನ್​ಗಳ ಗುರಿಯನ್ನು ನೀಡಿತ್ತು. ಪಂದ್ಯದಲ್ಲಿ ಸ್ಫೋಟಕ ಬ್ಯಾಟಿಂಗ್​ ಪ್ರದರ್ಶಿಸಿದ್ದ ಗಿಲ್​, ಕೇವಲ 50 ಬಾಲ್​ಗಳಲ್ಲಿ 5 ಬೌಂಡರಿ ಹಾಗೂ 4 ಬಿಗ್​ ಸಿಕ್ಸರ್​​ನಿಂದ 84 ರನ್​ ಗಳಿಸಿ ಕ್ಯಾಚ್ ಔಟ್​ ಆಗಿದ್ದರು. ಇದರಿಂದ 210 ರನ್​ಗಳ ಗುರಿ ಇತ್ತು. ​

ಈ ಟಾರ್ಗೆಟ್ ಹಿಂದೆ ಬಿದ್ದಿದ್ದ ರಾಜಸ್ಥಾನ್​ ಓಪನರ್ಸ್​ ಇಬ್ಬರು ಅಬ್ಬರದ ಬ್ಯಾಟಿಂಗ್ ಪ್ರದರ್ಶನ ಮಾಡಿದರು. ಗುಜರಾತ್​ ಬೌಲರ್​ಗಳನ್ನು ಹೇಗೆಂದರೆ ಹಾಗೇ ಚಚ್ಚಿದ ವೈಭವ್ ಸೂರ್ಯವಂಶಿ ಕೇವಲ 35 ಎಸೆತಗಳಲ್ಲಿ 100 ರನ್ ಚಚ್ಚಿದರು. 7 ಬೌಂಡರಿ ಹಾಗೂ​ ಮನಮೋಹಕವಾದ ಆಕಾಶದೆತ್ತರದ 11 ಸಿಕ್ಸರ್​ಗಳು ಇದರಲ್ಲಿ ಸೇರಿವೆ. ಐಪಿಎಲ್​ ಇತಿಹಾಸದಲ್ಲೇ ಸೂರ್ಯವಂಶಿ ಹೊಸದೊಂದು ಮೈಲಿಗಲ್ಲಿಗೆ ಕಾರಣರಾದರು ಎನ್ನಬಹುದು.

ಇದನ್ನೂ ಓದಿ: 11 ಸಿಕ್ಸರ್​ಗಳು.. ಅತಿ ವೇಗದ ಸೆಂಚುರಿ ಬಾರಿಸಿದ 14 ವರ್ಷದ ಬ್ಯಾಟರ್​ ವೈಭವ್ ಸೂರ್ಯವಂಶಿ

ಓಪನರ್​ ಆಗಿ ಕ್ರೀಸ್​ಗೆ ಬಂದು ತಂಡ ಗೆಲ್ಲುವವರೆಗೂ ಕ್ರೀಸ್​ ಕಾಯ್ದುಕೊಂಡಿದ್ದ ಯಶಸ್ವಿ ಜೈಸ್ವಾಲ್​ ಅರ್ಧಶತಕ ಗಳಿಸಿದರು. ಈ ಪಂದ್ಯದಲ್ಲಿ ಒಟ್ಟು 40 ಬಾಲ್​ಗಳನ್ನು ಎದುರಿಸಿದ ಯುವ ಬ್ಯಾಟ್ಸ್​ಮನ್​ 9 ಬೌಂಡರಿ, 2 ಸಿಕ್ಸರ್​ಗಳಿಂದ 70 ರನ್​ ಕಲೆ ಹಾಕಿ ಅಜೇಯರಾಗಿ ಉಳಿದರು. ಇನ್ನು ನಾಯಕ ರಿಯಾನ್ ಪರಾಗ್ ಔಟ್ ಆಗದೇ 15 ಎಸೆತದಲ್ಲಿ 2 ಫೋರ್, 2 ಸಿಕ್ಸರ್​ನಿಂದ 32 ರನ್​ ಗಳಿಸಿದರು. ಇದರಿಂದ ರಾಜಸ್ಥಾನ್ ಕೇವಲ 15.5 ಓವರ್​ನಲ್ಲಿ 2 ವಿಕೆಟ್​ ನಷ್ಟಕ್ಕೆ 212 ರನ್​ ಗಳಿಸುವ ಮೂಲಕ ವಿಜಯಶಾಲಿ ಆಯಿತು. ​​

ವಿಶೇಷ ಸೂಚನೆ: ಕ್ರಿಕೆಟ್‌ನ ಸುದ್ದಿಗಳಿಗಾಗಿ ಪ್ರತಿದಿನ ಬೆಳಗ್ಗೆ 8.27ಕ್ಕೆ ನ್ಯೂಸ್‌ಫಸ್ಟ್‌ಚಾನೆಲ್​​ನಲ್ಲಿ ‘ರನ್ ಭೂಮಿ’ ವೀಕ್ಷಿಸಿ